Luke 4

Ɲina vɔɔndo tɔɔndan Yeesu

(Matie 4.1-11, Marke 1.12-13)

1Yeesu va o piaa a Kɔl-Diandaa, telen o va muungoo fulaa Yurdɛn-ndo, mí Kɔl Hala-o yaa ndu o lɛŋnde veselɛilen nin. 2Mí masa ɲinaa vɔɔnda dɛɛniaa ndu palɛi belehiɔɔlu. O di ɲɛ-ɲɛ o palɛi ken bɛngu le, o kon kɔɔli, mí yiaan ma nɛi ndu. 3O kon mí masa ɲinaa vɔɔnda dimul ndu aa: «Te Po Hala-o n co ni, dimul powvo ho mò siŋnun buloo.» 4Mí Yeesu mulul ndu aa: «O co o sɛvaa aa: ‹O co ko ɲɛdiaa daama le vanacieo dia mò va yoomu le.›»

5Mí masa ɲinaa vɔɔnda hel a ndu, mó cɔm ndu masɛi co o lɛŋnden coo-e kpow o lepilɔɔ, 6mó dimul ndu aa: «I yɔngunin nɔm masalen nden a biilu masɛi he, kani ya o yɔngun ni, vana ya yeema pɛ le ndu yɔngoo, i yɔngu. 7Lelan, taa baŋ pɛ vulan ya o labɛngunin, mɛɛ le nɔm kon kpow vanin ni.» 8Mí Yeesu mulul ndu aa: «O co o sɛvaa aa: ‹Biilu Mɛlɛka, o co Hala nɔmndo-o. Ndu pilɛ kpé n bɛnda ma tosal baalaa ni.›»

9Mí masa ɲinaa vɔɔnda kɔa vɛlɛ a ndu Yerusalɛm, mó kɔ simi ndu o Cɛi-Hala-o tullo, mó dimul ndu aa: «Te Po Hala-o n co ni, huulu vɔ mà tol, kani o co o sɛvaa aa: 10‹O dimulnin mɛlɛkaa ndɔa mà kanda nɔm, 11a saalanin nɔm balan yɔŋii n kposoŋa pelei o powvo.›» 12Mí Yeesu mulul ndu aa: «O co o sɛvaa aa: ‹Tɔɔndan Mɛlɛka le, Hala nɔmndo pɛɛn.›» 13Masa ɲinaa vɔɔnda ciiyo ndu tɔɔndanndo o nɛilan kpow coo, mó faŋan ndu ikɛi le telen pum.

Yeesu kandu baala ndɔɔ Kalile

(Matie 4.12-17, Marke 1.14-15)

14Mí Yeesu muungu Kalile a kpaaya Hala Kɔl-Diandaa. Mí tɔ́ɔ́ ndɔɔ sɛŋin o lɛŋnde len nin kpow. 15O va kaannden tosaa o cɛila lekaandan nin, mí vannda kpow a va ndu biiloo.

A kɛɛ Yeesu Nasarɛt

(Matie 13.53-58, Marke 6.1-6)

16Mɛɛ Yeesu tiiya Nasarɛt, nɛɛ o sul-la, mó luɛi o cɛi lekaando nin o paale pɛngiaalen coo mɛɛ o dema tosa yɛ, mó can le Sɛbɛ Hala-o dimio. 17Má yɔngu ndu sɛbɛ simbula Esai vana-tɛɛngaa-diom Hala-o. Mó timbi ndu, mó ca nɛɛ o co o sɛvaa-a aa:

18«Kɔl Hala-o co ya coo,

kani o hɛli ya

le vanaa bala fondoa Yoongu Kɛndɔɔ tiiyallo.

Le vanaa co o kaasolan-nda baŋaa,

le vanaa sumɛiya hɔltan kumbio,

le vanaa co o sangaa nin-nda pɛngio keo,

19a le vɔsi Mɛlɛka cɔmnin vannda kɛndɛi ndɔɛi-yo nda dimullo.»

20O kon, mó simbul sɛbɛ kalaa, mó mingi ndu vana baalaa o ba, mó cal. Vanaa va o cɛi lekaando nin-nda kpow a va ndu tofaa. 21Mó kandu sɔɛi aa: «Sɔɛi he i peelun hau, niaa vanaa tuei ndi-ya o hɔl.» 22Mí nda kpow a naŋ kɔl, má dɔawnun kɔndɔfili a sɔɔn kɛndɛn va ndu fulaa o sondo-on, má ɲuna aa: «Vɛ̀ɛ̀ o co po Yosɛf-o le?» 23Mí Yeesu dimul nda aa: «A toɲa, la dimulnin ya taloo ho aa: ‹Nɔm vana singiaa, nɔm pila singin-ndɔ.› Mì la dimi vɛlɛ aa: ‹N tuei dɛnnda n tosa Kapɛrnaiim-ndan kpede tɔ́ɔ́, tosa vɛlɛ dɛnnda pilɛla lan o lɛŋnde nɔmnden nin nanu.›» 24Mó dimul nda vɛlɛ aa: «I co niaa toɲaa dimul, vana-tɛɛngaa-diom Hala kɛ́-kɛ̀ sɔla biiloo o lɛŋnde ndɔlen nin te. 25I co niaa toɲaa dimul, vanlaandua piandaa ndaa vi-a a va taw o lɛŋnde Israɛl-ten nin o palɛi Elii-e bɛngu, telen halataalaa kindan o vɔsilan tan yáá a paangon mún ŋɔmpum, mí yima fofolan ma luɛi o lɛŋnden kpow nin-ndo pɛɛn. 26Kɛ nduyɛ, Hala vim Elii o vanalanɔ kɛ́-kɛ̀ lo o nda tɛɛn te, fɔ o vuɛɛn pɔnɔ ndɔ vi, mo va Sarɛpta o lɛŋnde Sidɔn-nden nin-ndo lo. 27Vanaa nàà siaŋaa va vɛlɛ taw Israɛl o palɛi Elise, vana-tɛɛngaa-diom Hala-o-e bɛngu, kɛ vana-vana o nda tɛɛn sɔla siongɔɔ le, fɔ Naaman Sirinɔ.»

28Mɛɛ vanaa va o cɛi lekaando nin-nda kpow a tuei sɔɔn mun, má fula kɔl taw. 29Má can, má soli Yeesu o kobio kɔɔli, má kɔa a ndu o pembei coo, nɛɛ kobio va paandu-a le ndu ɲindɔɔ o kɔngɔ feke-fekeo. 30Kɛ mí Yeesu kei nda tɛɛn, mó kɔannun.

Yeesu tow ɲina vɔɔndo

(Marke 1.21-28)

31O kon kɔɔli, mó tuusu Kapɛrnaum, kobi pilɛ o tàndá Kalile-o nin. Mó va vannda pɛɛkoo o paale pɛngiaalen coo. 32Mí sɔɔn o va nda pɛɛkoo-on n va nda kɔltan pilanndo, kani o va sɔɛi a kpaayaa. 33Vana pum va o cɛi lekaando nin, o ɲina vɔɔndo va kɔɔli-o, mó yonda kpélén aa: 34«Yɛɛ n yeema yɛ naa yɔŋndo ho, nɔm Yeesu Nasarɛt? Vɛ̀ɛ̀ le naa ciiyo n hin ni? I sina vana n co-o, O-Diandaa Hala-o.» 35Mí Yeesu deŋul ɲina vɔɔn kon aa: «Mei ma fula langbanɔɔ ho nin!» Mí ɲina vɔɔn kalaa mal langbanɔ kon lɛŋ vannda kpow o hɔl, mó faŋan ndu kɔɔli, o yɔŋ ndu ɲɛ-ɲɛ le. 36Mí kɔndɔfillo bii nda kpow, má va ɲuunianndo vellaa-velle aa: «Dɛnɛ súú yɛɛ co yɛ hoo? O deŋul ɲinaa vɔɔnda a kpaayaa, má fula.» 37O kon, mí tɔ́ɔ́ Yeesu-o tiw nɛɛ-nɛɛ ka o tàndá kon nin kpow.

Yeesu singi vannda taw a nààlan

(Matie 8.14-17, Marke 1.29-34)

38Yeesu fulaa o cɛi lekaando nin, mó kɔa o Simɔn-ndo cɛinin. Lefu laandu Simɔn kon va sangaa a dialun tuwvon taw. Má tɛɛlun Yeesu haliko mi ndóò tosa ɲɛ pum le ndu. 39Mó tundun ndu coo, mó kpaa dialun tuwvun mun, mí n faŋan ndu. Fɔ́ɔ́fɔ̀, mì vuɛɛn kalaa can, mó ke nda ɲɛdiaa.

40Paalen léè delɔɔ, mí vanaa-vanaa ndáà nɔ vanaa lanàà súú-súù ka-a a hun a nda o ndu lo, mó handu nda balan coo a pilɛn-pilɛnnda, mó singi nda. 41Mí ɲinaa vɔɔnda bɛɛ va fulaa vanaa siama nin, ma va deŋio aa: «Po Hala-o n co ni!» O kon, mí Yeesu kpaa nda, o cɛl mà soo le, kani má sina maa Krista o co ni.

Yeesu dimi sɔɛi Hala-e o cɛila lekaanndan nin

(Marke 1.35-39)

42Ɲɔɔ tengaa, mí Yeesu fula o kobi kon nin, mó kɔa nɛɛ vana ve le-a. Mí vanaa bɔɔ-bɔɔ can ndu nuwviaa, má tiiya nɛɛ o va-a. Ndáà yeema mi ndóò lo lon, yɔŋii o faŋan nda. 43Kɛ mó dimul nda aa: «Fɔ mi dimi Yoongu Kɛndɛ Masale Hala len o cieon celen, kani lelan Hala vem ya ni.» 44Mó va vannda pɛɛkoo Kalile o cɛila lekaandan nin o tàndá Yuda-o nin.

Currently Selected:

Luke 4: BKG

Highlight

Copy