Nsaŋ 6

Yeesu dɔw vannda vàála ŋuɛɛnu balo

(Matie 14.13-21, Marke 6.30-44, Luke 9.10-17)

1O dɛnnda lan kɔɔli, mí Yeesu kɔannun o dalaa Kalile kɔngɔɔ pilɔɔ, o nda veelu vɛlɛ aa Tiberiade-o. 2Mí sɛ́lɛ́ bɛndoo del ndu kɔɔli le singi kaamaa o va vanaa lanàá-o. 3Mí Yeesu hel o pembei coo, mó kɔ cal lon nda kaandeŋaa ndɔa. 4Kafo-hiavaa-coo ndóò sɔɔnguu nin, kafo Yuifia pɛɛn. 5Yeesu tofaa, mó ca maa sɛ́lɛ́ bɛndoo va ndu kɔlan kɔɔli. Mó ɲuna Filipe aa: «Kuɛɛ naa n piandu yɛnin buloo le vannda ha dioo?» 6Nduyɛ le Filipe kɔlɔɔ solio daama ndóò ɲuna lende ni, kani ndóò sina nin ɲɛ o va hunɔɔ tosa-o. 7Mí Filipe mulul ndu aa: «N piondu bɛɛ buloo a volin sala vana baalaa le palɛi kɛmɛ lediin-ndon, o tiwnin vannda ha mì nda kpow a sɔla o pɔm-pɔmbɔ le.» 8Mí kaandennɔ ndɔɔ pilɛ, Andree puapilɛ Simɔn Piɛr-o dimul ndu aa: 9«Poombɔɔ pum nɔ bulula ɔrselan nanu tan ŋuɛɛnu a suwva nda ŋiɔn, kɛ kan co ɲɛ-ɲɛ le sɛ́lɛ́ bɛndu vaa nuaa le.» 10Mí Yeesu dimi aa: «La dimul vannda mà cal.» Bil puiyaa va o fonda kon taw. O kon má cal, ndáà va le vanpiaandua vàála ŋuɛɛnu. 11Mí Yeesu cua bululan, mó mal balikaa, mó piɔw vanaa va lon-nda lan. Mó tosa vɛlɛ lende a suwva. 12Ndáà pumndo, mó dimul kaandeŋaa ndɔa aa: «La mɔɔsiaa bulula bingi-bingila lo lan, haliko ɲɛ-ɲɛ tambu le.» 13Má cɔwviaa lan, mí ɲɛla bingi-bingila vannda dema fulaa o bulula ŋuɛɛnula ɔrsela lan nin-ndan la pia kambɛilan tɔ́ a latiɔn. 14Vanaa kan cɔu dɛnɛ kaamaa Yeesu tosa kon-ndo, má dimi aa: «Vana-tɛɛngaa-diom Hala bɛnda le hunɔɔ o ceendo coo-o kpeekpei co hoo ni.» 15Yeesu sinaa maa a va ndu hunɔɔ baŋɔɔ mì ndóò siŋnun masaa, mó kɔannun vɛlɛ o pembei coo ndu pilɛ kpé.

Yeesu kɔɛ o mɛnndan coo

(Matie 14.22-33, Marke 6.45-52)

16Paalen delɔɔ, mí kaandeŋaa ndɔa toal o dalaa kɔngɔ di. 17Má hel o dɛ̀ndɔ̀ɔ́ nin le kɔlan Kapɛrnaum o dalaa kɔngɔɔ pilɔɔ. Ɲumndan maa tol nin, Yeesu ndóò muungu vɔ nda o ibuŋ te. 18Mí hoeyii fùkù-fùkùei pum i can hɔŋndo, mí mɛnndan ma va biiŋɔnndo. 19Ndáà kɔlan o mɛnndan coo le kilola ŋuɛɛnu, te kon te kilola ŋɔmpum, má ca Yeesu hunɔɔ a ba dɛ̀ndɔ̀ɔ́ va-o o mɛnndan coo, mí siòònde bii nda. 20Kɛ mí Yeesu dimul nda aa: «Siòòŋii bii niaa le!» 21Ndáà yeema le ndu cuaa o dɛ̀ndɔ̀ɔ́ nin, kɛ fɔ́ɔ́fɔ̀, mí dɛ̀ndɔ̀ɔ́ pilan lɛŋnden o kɔngɔ nda va kɔlan-ndo.

Yeesu co ɲɛdiaa cindaa ni

22Diimandɔɔ, mí sɛ́lɛ́ lo o dalaa kɔngɔɔ pilɔɔ-o ca maa dɛ̀ndɔ̀ɔ́ ndu pilɛ kpé va lon ni, nduyɛ Yeesu ndóò luei o dɛ̀ndɛ̀ kon nin nda kaandeŋaa ndɔa le, kaandennda nda pilɛ kpé ndáà kɔɛ lenin ni. 23Kɛ mí dɛ̀ndɛ̀la celen la fula Tiberiade, mí la hun o fonda Maalii ndóò dɔw buloo duaa mí vannda dia-o ikɛi. 24Sɛ́lɛ́ kon cɔu maa Yeesu nda kaandeŋaa ndɔa a ve lon te, mí nda pila hel o dɛ̀ndɛ̀la lan nin, má kɔa Yeesu nuwviaa Kapɛrnaum.

25Má kɔ saalun ndu o dalaa kɔngɔɔ pilɔɔ, má ɲuna ndu aa: «Vana bɛndoo, telen kuɛɛ n tiiya yɛ nanu?» 26Mí Yeesu mulul nda aa: «I co niaa toɲaa dimul kpendekele, o co le kaamaala niaa ce lan te niaa co ya nuwviaa le, kɛ le bulu niaa de mí la pum-ndo. 27La fafala le ɲɛdiaa nɔla mò tambu-o le, kɛ la fafala le ɲɛdiaa tembu loo, o tosa mi vana va yoomu le fɛɛn a fɛɛn-ndo, o Po vanacieo kenin niaa-o, kani ndu Hala Fuɲaa sui pondale ndɔlen ni.» 28Má ɲuna ndu aa: «Yɛɛ naa n tosa yɛ mi kon va dɛnnda Hala lan?» 29Mí Yeesu mulul nda aa: «Baala Hala-o co ni, mì la laalan vana o vem-ndo.» 30Má ɲuna ndu aa: «Ɔ́ɔ̀ dɛnɛ kaamaa n co tosa haliko mi n ce mi n laalan nɔm-ndo? Ɔ́ɔ̀ dɛnɛ n co tosa-o! 31Fuɲaa naa de mane o lɛŋnde veselɛilen nin, maa mɛɛ o co o sɛvaa yɛ aa: ‹O ke nda ɲɛdiaa fula o halataala-o.› » 32Mí Yeesu mulul nda aa: «I co niaa toɲaa dimul kpendekele, o co Moise le ke niaa ɲɛdiaa fula o halataala-o le, kɛ Fuɲa nuu ke niaa ɲɛdiaa kpeekpei fula o halataala-o ni. 33Kani ɲɛdiaa Hala-o, ndu co o fula o halataala mó ke ceendo cindaa-o ni.»

34O kon má dimul ndu aa: «Maalii va naa ɲɛdiaa kon keo lɔ́ɔ́-lɔ́ɔ̀.»

35Mí Yeesu dimul nda aa: «Ya, ɲɛdiaa cindaa ya co ni. Vana hin pɛ o ya lo, yima nɛi ndu lɔ́ɔ́-lɔ́ɔ̀ le, vana laalan ya pɛ, kolɔɔ bii ndu lɔ́ɔ́-lɔ́ɔ̀ le. 36Kɛ i dimul niaa ndi: la ce ya, kɛ nduyɛ la laalan te. 37Vanaa kɛ́-kɛ̀ Pua ke ya pɛ, nda hunnin o ya lo, i solinin vɛlɛ vana hin o ya lo-o o dio le, 38kani i fula o halataala mì toal le hɛnan ni tosa le, kɛ le hɛnan vana vem ya-o tosaa. 39Nduyɛ, hɛnan vana vem ya-o co hoo ni, maa vana-vana hialun ya o vanaa o ke ya-a tɛɛn te, kɛ mì tindi nda, mà muungu yoomu o paale mɛɛlaa len. 40Hɛnan Fuɲa nuu co kon ni, maa vannda kpow a mulul Poo hɔlla, mà laalan ndu, mà sɔla cinda fɛɛn-fɛɛndo. Ya yɛ, i minginin nda yoomu fulaa vanvílɛ́iya tɛɛn o paale mɛɛlaa len.»

41Mí Yuifia soaa sɔɔn pɔmbɔn a ndu le tùú o dimi maa ndu co ɲɛdiaa fula o halataala-o ni. 42Má va dimio aa: «O co macoaa ndu le co Yeesu po Yosɛf-o le? N sina masinaa fuɲa ndɔ a kala ndɔ le? Kɛ le yɛɛ o co yɛɛ naa niko dimullo maa o halataala o fula ni?» 43Mí Yeesu mulul nda aa: «La mɛi sɔɔn pɔmbɔn niaa pila tɛɛn. 44Vana-vana nɔla hunɔɔ o ya lo le, fɔ mì Pua sim vana kon laci, i tindinin ndu fulaa vanvílɛ́iya tɛɛn o paale mɛɛlaa len. 45O co o sɛvaa o sɛbɛla vanaa-tɛɛngaa-diom Hala-a nin aa: ‹Nda kpow a sɔlanin pɛɛkoo fulaa Hala o ba.› Vana-vana tuei pɛ Pua diom, mò cɛl pɛɛku ndɔɔ, ndu hin o ya lo. 46Ken co dimi le maa vana pum ce nin Pua, vana fula o Hala lo-o kínɛí ce Pua ni. 47I co niaa toɲaa dimul kpendekele, vana laalan pɛ, ndu sɔla cinda fɛɛn-fɛɛndo. 48Ya, ya co ɲɛdiaa cindaa ni. 49Fuɲaa niaa de mane o lɛŋnde veselɛilen nin, kɛ a kon kpede ma vu. 50Kɛ vana de pɛ ɲɛdiaa fula o halataala-o, ndu vi le. 51Ya, ya co ɲɛdiaa kiyɛi tol fulaa o halataala-o ni. Te vanndo de pɛ ɲɛdiaa kon, o vanin yoomu le fɛɛn a fɛɛn. Ɲɛdiaa ya yɔngunin-ndo, ndu co dialun nun ni, haliko mi ceendo va yoomu.»

52Mí Yuifia va sɛɛngianndo nda pila tɛɛn, ma va ɲunaa aa: «Vɛɛ o ke yɛnin naa dialun ndɔn le dioo?» 53Mí Yeesu dimul nda aa: «I co niaa toɲaa dimul kpendekele, te la di dialun Po vanacieo, mì la kol kooma ndɔan te, mɛɛ yoomu venin niaa nin te. 54Vana de pɛ dialun nun, mò kol kooma nian, ndu sɔla cinda fɛɛn-fɛɛndo. O kon, i tindinin ndu fulaa vanvílɛ́iya tɛɛn o paale mɛɛlaa len. 55Kani balo kpeekpeiyo dialun nun co ni, ɲɛ kolaa kpeekpeiyo kooma nian ma co ni. 56Vana de pɛ dialun nun mò kol kooma nian, ndu co ya nin, mì ya i va ndu nin. 57Maa mɛɛ Pua co yoomu-o vem ya, mì va yoomu le ndu Pua yɛ, lende koni, vana de ya pɛ, ndu vanin yoomu le ya. 58Ɲɛdiaa fula o halataala-o co kon ni. O co maa o fuɲaa niaa vi-a de-o le. Vana de pɛ ɲɛdiaa hoo, o vanin yoomu le fɛɛn a fɛɛn.» 59Pɛɛkula Yeesu yɔngu o cɛi lekaando nin Kapɛrnaum-ndan la co lan ni.

Bundɔn a cinda fɛɛn-fɛɛndo o kɔɔ

60Ndáà ciiyo ndu diomndo tueyɔɔ, mí kaandeŋaa ndɔa bɔɔ-bɔɔ a dimi aa: «Sɔɔn mun kendu bɔɔ, nɛ̀ɛ́ nɔla yɛ mun biyɔɔ?»

61Le tùú Yeesu ndóò sina maa kaandeŋaa ndɔa co sɔɔn pɔmbɔn a pɛɛku ndɔ kon o kɔɔ-o, mó ɲuna nda aa: «Vɛ̀ɛ̀ mì sɔɔn ya dimi mun-ndon pala niaa? 62Te la hun cɔ yɛ pɛ niko Po vanacieo helɔɔ nɛɛ o va o tasendɔ-a, vɛ̀ɛ̀ niaa dimi yɛnin? 63Kɔl Hala-o ke vana yoomoo ni. Diallon nɛŋi mako kɛ́-kɛ̀ le. Kɔl Hala-o a yoomoo sɔɔn ya dimul niaa-on co ni. 64Kɛ vanaa pum a co niaa tɛɛn, a laalan te.» Kani o kandɔɔ pɔ́, Yeesu ndóò sina vanaa laalan te-a a vana óò malnin ndu vannda o ba-o. 65Mó dimi vɛlɛ aa: «Lelan ya dimul niaa ni maa vana-vana nɔla hunɔɔ o ya lo le, te o co Pua le ke ndu le.»

66Cɔn a telen kon, mí vanaa bɔɔ-bɔɔ o kaandeŋaa ndɔa tɛɛn a muungun kɔɔli, a cɛl lɛ le kɔlan ndu kɔɔli le. 67O kon, mí Yeesu dimul kaandeŋaa tɔ́ a à ŋiɔnda aa: «Niaa bɛɛ la koennun te?» 68Mí Simɔn Piɛr mulul ndu aa: «Maalii, o nɛ̀ɛ̀ lo naa n kɔa yɛnin? Nɔm nɔ sɔɔn yoomu fɛɛn-fɛɛnndon ni. 69Naa n laalan ken, n sina maa nɔm co Krista ni, O-Diandaa Hala-o.» 70Mí Yeesu mulul nda aa: «Vɛ̀ɛ̀ o co ya le hɛli niaa n'van tɔ́ a vanaa ŋiɔnda ha le? Kɛ nduyɛ, ɲina vɔɔndo luɛi vana pilɛ nin niaa tɛɛn.» 71Sɔɛi Yuda, po Simɔn Iskariɔt-o-e o va dimi kon lende ni, kani Yuda kon va hunɔɔ Yeesu malɔɔ vannda o ba ni. O va vana pilɛ o n'van tɔ́ a vanaa ŋiɔnda tɛɛn.

Currently Selected:

Nsaŋ 6: BKG

Highlight

Copy