Osee 9
9
Ɲɔɔn kpow n hialunnin yungu Hala-o
1«Israɛlla la dɔawnun ɲaale
mì la pɛ a kɔlkɛndɔɔ
maa vanaa súúla celennda le.
Kani la luɛi suunda soolaa n'piɔmndo,
mí la kɔa Hala niaa levil.
O kpelela lɔaa n'malta niaalan kpow coo,
tɔnɔ dɛnɛ nɔɔlɛiyo niaa yeema ni.
2Kɛ o co niaa le nɔnin malun nda lɔɔ
o kpele lɔaa n'mallo coo-on
a cuɛima nda co solio o doolaa nin-ndan te.
Mɔima sɛnɛima niaa co cumndo-an
ma keinin niaa o milinndo bɛngu.
3Cuavaa-imamaa Efraim-nda
lonin icali o lɛŋnde Mɛlɛka len nin te.
À biinin nɛiyo le muungoo Esipte.
À kɔ dianin ɲɛm dian nɔɔlɛiyon Asiri.
4À solul-lɛnin Mɛlɛka sálàla mamɔilan te,
o hini lɛnin kɔl a sálàla ndalan te.
À solul lɛnin lasálà le ndu hɛnanndo le.
Le nda, ɲɛdiaa vanin maa ɲɛdiaa dɛnɛ palaa.
Vanaa dianin ndu-a kpede
a siŋnunnin vanaa nɔɔlɛiya.
Ɲɛdiaa ndaa dɔawnin nda pila balo,
kɛ a lueinin ndu o Cɛi-Mɛlɛka-o nin te.
5Yɛɛ niaa tosa yɛnin o paale bɔɔŋian lekaando coo
a o paale kafole Mɛlɛka len coo?
6Kani má cè niaa kɔnndan
le dɛnɛ tambɛi co tosanndo-o.
La kɔ cuungiannin Esipte
mí kobio Mɛnfis siŋnun sɛila niaalan.
Yɔɔn ciinin bolofaa niaa latɔ́ɔ́-tɔ́ɔ́ tɛɛmbuu niaa kɔɔli,
siɛmbulle vulnin o cɛila-kolala-toandaala nialan nin.
7Palɛi Mɛlɛka co sangaa tuisi-e tiiya,
palɛi konalan la dɔawnunnin-nde pɛɛn.
A toɲa, palɛi ken keinin Israɛlla coo.
La co dimio aa:
‹Vana-tɛɛngaa-diom Hala-o seema.
Vana sɔla Kɔllo-o hiŋnun bollen.›
Lende ni, kɛ kon tosan
le dɛnɛ vɔɔn niaa bɛndoo
a le nɛyɔn bɛndu niaa nɔ-o.
8Kɛ kpalilnɔ co mɛɛndanndo
le cuavaa-imamaa Efraim-nda-o,
vana-tɛɛngaa-diom Hala-o pɛɛn,
o co nda Hala nuu latulu.
Nɛɛ-nɛɛ o kɔɛ pɛ,
a co ndu yaŋɔɔlan hendullo,
a co ndu ciŋilanndo
háá o Cɛi-Hala ndɔɔ nin.
9La luɛi bɔɔ o laasianndo
mɛɛ ɲɔɔ va tosanndo lɔ́ɔ́ kon Kibea yɛ.
Mɛlɛka co dɛnnda niaala vɔɔnndan loonɔnndo,
mò tuisi nda sangaa coo le hakila ndalan.»
Mɛlɛka tambu kɔllo
10«Maa rɛsɛŋun co o lɛŋnde veselɛilen nin-ndon
lende ya komal Israɛlla ni,
maa voosun tasen voosoo koam-ndon
ya ce fuɲaa niaa mamaa ni.
Kɛ mɛɛ nda tiiya dɔ́ɔ́ Baal-Peɔr,
má luei balan o piɔm nɔɔlɛi kon sooloo#9.10 má luei balan o piɔm nɔɔlɛi kon sooloo: Le kasi Israɛlla del a Mɛlɛka Peɔr-o, tofa vɔ Kundalan 25.1-19.,
mí nda pila siŋnun ɲɛ vɔɔn bɛndoo ya Mɛlɛka o hɔl
maa piɔm ndáà kaola kon sɛnɛi-yo.
11Biilu cuavaa-imamaa Efraim-nda cannin coocoo,
mò ɲaanun maa yow.
Vana ve lɛnin violɔɔ le,
vanalanɔ cue lɛnin foli le,
a ciiku lɛnin vanalanɔ a foli le.
12Taa manda pɛ cuawva,
telen cuavaa kan kandunin fulaa lenin-ndo,
i poonda nda nda o ba.
Dɛnɛ palaa vanin le nda
lɔ́ɔ́ ya malnin nda mì faŋan nda ikɛi-yo.
13Mɛɛ ya co Efraim cɔu yɛ,
cuavaa ndɔa siŋnun maa visi doosua toaw-vo.
O co nda malɔɔ kɔlan vana diyaa o hɔl#9.13 Fondaa ho dindu taw o hebrei nin te, kɔlɔ ndɔɔ sinan taw le. Vannda pum a hivi ndu aa: «Efraim, lɔ́ɔ́ ya ce ndu-o, o va maa nakɔ mavaw tɔlnun o fonda ɲuloo o lɛŋnde veselɛilen nin-ndo. Kɛ Efraim bɛnda mò soli cuavaa ndɔa, mò yɛɛ nda vana diyaa o hɔl»..
14«Éé Mɛlɛka! Te o va pɛ le sanga tuisi,
sanga yɛɛ nɛ n tuisi yɛnin nda coo kpeekpei?
Siinguu laandaa ndaa bɔlɔkɛa
mà veesiaa nda mɛɛyan o ibuŋ.»
15«Laasian ndaa kpow co cɔmnɔnndo Kilkal,
lon dɛnɛ ndaa kuisin ya o kɔl ni.
I solinin nda o ya lo cɛinin
le dɛnnda ndala kɔlvesɛilan.
I kaola lɛnin nda le,
kani simlacia ndaa kpow
vanaa nila kalua nda co ni.
16Polale Efraim-nden le keŋnun,
mí dumbule ndɔlen le vesa.
A soli lɛnin n'cuaw le.
Taa velu yɛ pɛ cuawva,
i yaanin cuavaa nda kaolanin kan-nda ciee-piɔ́m.»
17«Hala nuu kɛɛnin nda,
kani a bii diom ndɔɔ le.
A vanin a laasiannda
vanaa-mangalaa-isɔɔa tɛɛn.»
Currently Selected:
Osee 9: BKG
Highlight
Share
Copy
Want to have your highlights saved across all your devices? Sign up or sign in
© Alliance Biblique en Guinée
