Osee 7
7
1«telen yáà yeema le Israɛlla singio-o,
mí kɔlvesɛi cuavaa-imamaa Efraim-nda
a dɛnɛ vɔɔn Samaria fula ceen kpendekele.
Kani o còòlan nin nda co kelaa ni.
Vuiya co luɛyɔɔ cɛilan nin,
vanaa del vannda coo-a tiw o nɛilan kpow coo.
2Nduyɛ, a co yiyanndo
maa i co loonɔn a kɔlvesɛi ndaa kpede le.
Sisa, dɛnnda nda co tosaa lan
la balu nda nɛɛ-nɛɛ ka,
i co dɛnnda ndala lan cɔu.
3A co masaa kɔllo nɛŋio a yɔŋ vɔɔn ndaa,
mà va simlacia kɔllo nɛŋio a sɔɔn lacòòvan.
4Nda kpow vanaa suundaa nda co ni.
Maa cɛi loamaa bulu
vana loamaa buloo hiw tuuloo-o nda co ni.
Kandɔɔ tuma o lindà kpeyanndo-vo,
háá mì kpeyan kalaa cuu helɔɔ,
vana loamaa buloo tofa lɛ cɛi loamaa buloo le.
5O paale kafole masa naa coo,
vanaa bɛndua kol pɛ mɔiyan tei,
a yɔŋnun maa vanaa nàà.
O kon, masaa siɛndul vanaa mam vannda-a baa.
6À va pɛ sɔɔnguuo ndu ikɛi,
à tosa kɔlkalu vɔɔndo
a kɔltan nda latuw maa cɛi loamaa bulu.
Icɔl pii kɔl nda tuwvo connun o malɔ,
kɛ idii, o tuulu vundé-vundé maa yinnde bɛndu.
7Nda kpow, a co a tuw kpɛikpɛi
maa cɛi loamaa bulu.
À co simlacia ndaa lumio,
masaa ndaa kpow a co cɛɛlɔnndo.
Kɛ o nda tɛɛn vana-vana co ya Mɛlɛka veelu le.
8Cuavaa-imamaa Efraim-nda muulian
a vanaa-mangalaa-isɔaa celen.
Polale Efraim-nden le yɔŋnun
fùlúfúlù nda mulumulu o toŋɔɔ loo.
9Mialla co kpaaya ndaa ciiyo,
kɛ nda pila co o sina nin te.
Yuuvɛi bii nda icanya,
kɛ a co ndi bila biyɔɔ le.
10Yonga Israɛlla co nda pila seilen tɛndallo,
kɛ a co muungu Mɛlɛka Hala ndaa o ibuŋ te.
A kon kpede, a co ya Mɛlɛka nuwviaa le.
11Maa poonpoon diɔm nɔ kɔl too
cuavaa-imamaa Efraim-nda co ni.
A co Esiptea veeloo le nda malaa,
a co kɔlan Asiri.
12Tuma nda co kɔlan lon-ndo,
i co yala nuu tondɔɔ nda coo,
mì tuisi nda maa yovaa co coocoo-a,
mì soŋ nda le nda silaa
mɛɛ ya dimul nda o cuungian ndaa coo yɛ.
13Dɛnɛ palaa co nda cum
le ɲaanɔn nda ɲaanun ya-o!
Mɔnɛi co nda laci
le tùú nda simul-la-o!
Yáà yeema le nda ciindiaa,
kɛ còòlan kposon nda co ya dimullo ni.
14A co veelu a kɔlta ndalan kpow le.
Nda yɛ, a co somisominndo
o kpelela ndala hinialan coo.
A co diallon tɛɛndianndo
le maalon a le mɔima sɛnɛiyan sɔlaa.
Lende nda co ya kɔlan levil ni.
15Ya yɛ, ya pɛɛku nda ni,
ya luei bala ndalan yoomuan ni,
kɛ yiyan vɔɔndo koni nda nɔ a ya ni.
16O va bɛɛ mà va muungu vana o ibuŋ,
mɛɛ le vana celen, kɛ o co ya Mɛlɛka o ibuŋ te.
Maa kpaasiaa tennda loo nda co ni.
Simlacia ndaa delinin
mà vi o mɔɛi cɔwve bɛngu
le diɛɛmule ndale yeovaalen.
Kon tosanin ni mì vannda mam nda
o lɛŋnde Esipte len nin!»
Currently Selected:
Osee 7: BKG
Highlight
Share
Copy
Want to have your highlights saved across all your devices? Sign up or sign in
© Alliance Biblique en Guinée
