O Kandɔɔ 45

Yosɛf cɔmnun bɛndaa ndɔa

1Mɛɛ Yosɛf ndóò nɔla lɛ kɔl ndɔɔ saa le kɛɔ caŋndo vanaa va lon-nda o hɔl te yɛ, mó dimi aa: «La soli vannda kpow.» Vana-vana celen lo ndu ikɛi cɛinin ndon te. O kon, mó cɔmnun bɛndaa ndɔa maa ndu co Yosɛf ni. 2Kɛ mɛɛ o va sɔɛi a caŋndo taw, mí Esiptea tuɛi. Mí sɔɛi ken tiiya o cɛi lemasa Faraɔnnɔɔ nin di. 3Mí Yosɛf dimul bɛndaa ndɔa aa: «Ya co Yosɛf ni. Vɛ̀ɛ̀ fuɲa nuu co vɔ yoomu?» Kɛ bako bɛɛ bɛndaa ndɔa nɔla sɔɛi le ndu mulullo le, kani mí siòònde bii nda a ndu taw. 4Mí Yosɛf dimul nda aa: «La sɔɔnguu ya ikɛi.» Má sɔɔnguu ndu ikɛi. Mó dimul nda aa: «Ya co Yosɛf ni, pɔmbɔ niaa niaa pisi má hun a ndu Esipte nanu-o pɛɛn. 5Kɛ nduyɛ sisa, mɔnɛi bii niaa le, kɔlta hiilun niaa nin le pisi niaa pisi ya má hun a ya o cɛlen nin nanu-o le. Kani le yoomu niaa baŋaa Hala hivi ya niaa laci nanu ni. 6Bau, o co nihau vɔsilan tan tiɔn, yima fofolan ma co o lɛŋnden nin, o lo vɛlɛ vɔsilan laŋuɛɛnu, vana veenin iciɛɛ le, vana kuwnin vɛlɛ ɲɛ-ɲɛ le. 7Hala vem ya niaa laci nanu le niaa malaa ni, haliko mi la lo yoomu o lɛŋnden nden coo, mì la sɔla baŋan kɔndɔfillo. 8Lelan, o co niaa le cuu ya nanu le, kɛ Hala pila cuu ya ni. O siinguu ya fuɲaa Faraɔnnɔɔ, vana bɛndoo le cɛi ndɔɔ a simlacinɔɔ le lɛŋnde Esipte len kpow. 9Le hee, la muungu cɔ́-cɔ́ fuɲa nuu o ibuŋ, mì la kɔ dimul ndu aa: ‹Yosɛf po nɔm yil nɔm, Hala siinguu ndu vana bɛndoo o lɛŋnde Esipte len kpow coo. Lelan, aa nɔm cɔn mà kɔɛ o ndu lo cɔ́-cɔ́. 10A kɔɛ pɛ, a kɔ va icali o tàndàá Kosɛn nin, le vaa ndu Yosɛf macɛlu niaa cuavaa nɔmnda, cuavaa-imamaa nɔmnda, saa, cuinnda a navaa nɔmnda, a ɲɛ-ɲɛ co le nɔm. 11A co va lon mò toosiaa kpekula nɔmndan, yɔŋii bolofaa niaa cuu, mì la lo bala fondo niaa yungu nɔmndo a ɲɛ-ɲɛ co nɔm o ba. Kani o lo vɔ vɛlɛ vɔsilan tan ŋuɛɛnu malan yima fofolan man ma cuu.› 12Niaa pila co cɔu ciŋ, Bɛnyamɛn pɔmbɔ ni bɛɛ co cɔu maa ya Yosɛf co sɔɛi o niaa lo ni. 13La downun fuɲa nuu kona, mì la cɔm ndu ɲɛ kɛndɛ ya cal coo Esipte nanu-o. La kɔ tɛɛsial ndu ɲɛ-ɲɛ niaa ce nanu. Handɔɔ o kon coo, mì la hin a ndu nanu cɔ́-cɔ́.» 14O kon kɔɔli, mó kafalan Bɛnyamɛn pɔmbɔ ndɔ o labolo, mí nda ŋiɔn kpow a caŋ fúkpàà-fùkpàà a kafalannda lende. 15Mó kɔɔmian vɛlɛ bɛndaa ndɔa tɔ̀a a caŋndo. Fɔ o kon kɔɔli bɛndaa ndɔa nɔla sɔɛi o ndu lo ni.

Faraɔnnɔɔ yoongu Yakɔb o lɛŋnde Esipte len nin

16Mí tɔ́ɔ́ tiw o cɛi lemasa Faraɔnnɔɔ nin maa bɛndaa Yosɛf-a hin. Mí ɲɔɔ hɛnan Faraɔnnɔɔ a vanaa bɛndua kpow. 17Mó dimul Yosɛf aa: «Dimul bɛndaa nɔmnda aa a handu volɔɔlan o cɔlua ndaa coo, mà muungu Kanaan, 18mà kɔ cua fuɲa nda a yungula ndalan. Mà muungu o ya lo nanu, mì yɔngu nda lɛŋii ɲɔɔn naŋ coo-e, mì yɔngu vɛlɛ nda ɲɛm kɛndɛn co o lɛŋnden nden nin-ndon. 19Dimul nda vɛlɛ maa taa va pɛ muungoo Kanaan, a cua ɲɛla ɲaanannda pɔmbɔla cɔlua nan-ndan o lɛŋnde Esipte len nin le kɔlan hunɔɔ a cuavaa ndaa a á laandaa ndaa lenin. Mà cua vɛlɛ fuɲa nda, mà hin a ndu nanu. 20Mɔnɛi bii nda le ɲɛm nda mɛinin lon-ndon te, kani ɲɛ-ɲɛ co ɲɛ kɛndɔɔ o lɛŋnde Esipte len nin, o vanin le nda.» 21Mí poaa Israɛl-la tosa mɛɛ nda dimul nda yɛ. Mí Yosɛf yɔngu nda ɲɛla ɲaanannda soa nan-ndan mɛɛ Faraɔnnɔɔ ndóò dimi yɛ. Mó yɔngu nda vɛlɛ ɲɛm dian le keiyo dioo nɛi-tɛɛn. 22Mó yɔngu vana-vana volɔɔla cuɛinanndan le mangalanndo. Kɛ Bɛnyamɛn ndu, mó yɔngu ndu volin latámán kɛmɛ leyáá a domalan tan ŋuɛɛnu le mangalanndo. 23Mó siiluu sofɛlɛa tɔ́ ɲɛm kɛndɛ-kɛndɛn co o lɛŋnde Esipte len nin-ndon, mó yɔŋ fuɲa ndɔ. Mó siiluu vɛlɛ sofɛlɛa laandua tɔ́ maalon, buloo a ɲɛm dian celen, mó yɔŋ fuɲa ndɔ le keiyo dioo nɛi-tɛɛn telen o vanin kɔlan Esipte-o. 24Mó congun bɛndaa ndɔa, mó mal nda kɔlan, mó sila nda kpéŋ-kpéŋ maa a kei sɛɛngian nɛi-tɛɛn te. 25Má faŋan Esipte, má muungu Kanaan o Yakɔb fuɲa nda lo. 26Má tɛɛngul ndu yoongu kon aa: «Yosɛf po nɔm co vɔ yoomu. Ndu co vana bɛndoo o lɛŋnde Esipte len kpow coo ni.» Kɛ Yakɔb kuŋ te o soli le, kani o ve sɔɛi ndɛi laalan maa toɲa le. 27Má dimul ndu ɲɛ-ɲɛ Yosɛf soo. Mɛɛ o ce ɲɛla ɲaanannda soa nan-ndan, la Yosɛf yɔŋ le kɔlan a ndu Yakɔb lenin-ndan, mí ɲɔɔ tosalan ndu mɛ̀ɛ́-mɛ̀ɛ́ vanndo tendul nuaa yɛ. 28O kon, mí Israɛl dimi aa: «Ɲuna co lɛ ya o sondo le, i sina nihau maa Yosɛf po ni co yoomu. Fɔ mì kɔ del ndu hɔlten malan ya vu.»

Currently Selected:

O Kandɔɔ 45: BKG

Highlight

Copy