O Kandɔɔ 42

Bɛndaa Yosɛf-a kɔɛ baloo piondɔɔ Esipte

1Mɛɛ Yakɔb tuei maa a co baloo pisio Esipte, mó dimul poaa ndɔa aa: «Le yɛɛ niaa co yɛ calle he mì la va nuannanndo ho vellaa-velle nuaa? 2I tuei maa baloo co pisio Esipte. Lelan, la kɔ lon mì la kɔ pindu naa ndu yɔŋii naa n vu a yiaan man.» 3Mí bɛndaa Yosɛf-a n'van tɔ́ a kɔa Esipte le baloo piondɔɔ. 4Kɛ Yakɔb fuɲa nda cɛl mì Bɛnyamɛn, pɔmbɔɔ Yosɛf kɔɛ nda kɔɔli le. Kani nuaa ndóò dimi o kɔl ndɔɔ nin ni aa: «Yɔŋii dɛnɛ vɔɔn yɔŋnun ndu.» 5Mí poaa Israɛl-la tiiya Esipte vanaa celeŋaa va kɔlan lon-nda tɛɛn, kani yima fofolan ma va o lɛŋnde Kanaan-nden nin taw.

6Yosɛf va lɛŋnde Esipte len kpow bollen ni. Ndóò nɔ hɔlten o balo nda va cuavaa lelɛŋnda pisio o ba-o coo ni. Mí bɛndaa ndɔa hun baŋ vulan ndu o labɛngunin, má tundu bolle lɛŋ. 7Mɛɛ Yosɛf ce nda, mó sina maa bɛndaa ndɔa ni. Kɛ mó tosa maa o sina nda le, mó soaa o nda lo a hɔlta kalalan. Mó ɲuna nda aa: «Lɛŋnde kuɛɛ niaa fula yɛ?» Má mulul ndu aa: «O lɛŋnde Kanaan-nden nin naa n fula ni mí n hun ɲɛdiaa piondɔɔ nanu.»

8Mí Yosɛf sina bɛndaa ndɔa, kɛ nda sina ndu le. 9O kon mó loonun a lɔma ndóò sɔl lɔ́ɔ́ kon a nda o kɔɔ-an. Mó dimul nda aa: «Suansuaanda niaa co ni. Le fonda lɛŋnde naalen le nɔ mayoomu loo sinaa niaa hin nanu ni.» 10Mí bɛndaa ndɔa muli aa: «O co vanaa vaa lende le naa n co le, vana bɛndoo. Le baloo piondɔɔ kínɛí naa buɛyaa nɔmnda n hin ni. 11Naa kpow fuɲa pilɔɔ velu naa ni, vanaa toɲaa naa n co ni, n co n'suansuaan te.» 12Mí Yosɛf dimi aa: «Còòlan fúú. La hin ma hunaa le fonda lɛŋnde naalen le nɔ mayoomu loo mɛɛndanndo.» 13Má dimul Yosɛf aa: «Òó vana bɛndoo! Naa buɛyaa nɔmnda, n va n'van tɔ́ a vanaa ŋiɔn, naa fuɲa pilɔɔ velu-a pɛɛn. O lɛŋnde Kanaan-nden nin naa n co icali ni. Pɔmbɔ naa lumndo lo fuɲa naa ikɛi lon, pɔmbɔ naa pilɔɔ co lɛ le.» 14Kɛ mí Yosɛf dimul nda aa: «Le hee kpeekpei ya dimi ni maa suansuaanda niaa co ni. 15O hee coo ya co toɲa niaa sina ni: te Faraɔnnɔɔ co yoomu, la feŋan nanu le fɔ mì pɔmbɔ niaa lumndo hin. 16La viom vana pilɛ o niaa tɛɛn, mò kɔ hun a ndu, mì a tɔ̀a co lo nanu-a va pɔɔ o biyɔɔ nin háá mì sina te toɲaa niaa dimi ni. Te o co kon te, mɛɛ te Faraɔnnɔɔ co yoomu, suansuaanda niaa co ni.»

17O kon mí Yosɛf mal nda o kaasoo nɛɛ pilɛ le palɛi ndii yáá. 18O paale yàándɔlen, mó dimul nda aa: «La tosa ɲɛ ya dimul niaa-o mì la baŋa yoomu niaa, kani vana ke Hala bɛɛlen-ndo ya co ni. 19Te vanaa toɲaa niaa co ni, mɛɛ puapilɛ niaa pilɛ lo nanu o biyɔɔ nin, o cɛi niaa co hoo nin o kaasoo-o, mì niaa tɔ̀a yoo yungula niaala yiaan ma co coo lan baloo. 20Kɛ mì la kɔ muungu nanu a pɔmbɔ niaa lumndo. Kon cɔmnin ni maa toɲaa niaa dimi ni. O kon la sɔla lɛnin piɔ́m te.» Má cɛl le tosaa lende. 21Má dimulan vellaa-velle aa: «Le dɛnɛ naa n tosal puapilɛ naa lɔ́ɔ́ kon-ndo dɛnɛ palaa ho tol naa coo nuaa ni. Kani n ce ndu o mɔnɛi nin, mó cɛɛŋun naa o lani tei, n yeŋ nilan o cɛɛŋɔn ndɔ kon te. Naa bɛɛ lelan sangaa ho tol naa coo nuaa ni.» 22Mí Rubɛn dimul nda aa: «I dimul niaa sɔɛi he lɔ́ɔ́ kon aa: ‹La tosa dɛnɛ kɔlvesɛi vaa nuaa mì la cua hakio a poombɔɔ ho le.› Kɛ la tui ya diom te. Bàà piɔ́m o sɔla-o co naa nihau mingulɔnndo mì n va sangaa nuaa ni.» 23A ve sina maa Yosɛf co sɔɛi ndɛi tueyɔɔ le, kani vana hivia isɔɔ Yosɛf ndóò cua le suukanndo nda ndaa ni. 24Mí Yosɛf faŋan nda ikɛi, mó kɔannun lándán, mó kɔ caŋ hiko-hiko. Mó muungu vɛlɛ nda ikɛi, má suukan nda ndaa. Mó bii Simeɔn, mó mal ndu o kaasoo nda o hɔl. 25Mó dimul vannda le maalon peiyo o bɔlɔla ndalan nin cá-cá, le volin vana-vana mingio vowvo o bɔlɔ ndɔɔ nin a le nda ɲɛdiaa yɔngoo le keiyo dioo nɛi-tɛɛn. Mà tosal nda lende. 26Má handu malun mun o sofɛlɛa ndaa coo, má kɔannun.

27Mɛɛ nda tiiya nɛɛ ndáà yeema le lɔan-nda, mí vana pilɛ nda tɛɛn kumbi bɔlɔ ndɔɔ le sofɛlɛ ndɔɔ billo yɔngoo le dioo, mó ca volin ndɔn o bɔlɔɔ sondoo. 28Mó dimul puapilɛa ndɔa aa: «A mingul-la volin nun, má cè mun o bɔlɔ nuu nin.» O kon mí kɔltan la fula nda, mí siòònde bii nda taw, má va ɲuunianndo vellaa-velle aa: «Yɛɛ nɛ Hala tosal-lɛ naa hoo?»

29Mɛɛ nda muungu o Yakɔb fuɲa nda lo o lɛŋnde Kanaan-nden nin, má downun ndu kona, má cɔm ndu ɲɛ-ɲɛ yɔŋnun nda kpede. 30Má dimul ndu aa: «Langbanɔ co bollen o lɛŋnde len nin-ndo, mó soaa o naa lo a hɔlta kalalan taw. Mó dimi aa suansuaanda naa n co ni. 31Mí n dimul ndu aa: Vanaa toɲaa naa n co ni, kabi bɛɛ n tosa lesuansuaan te. 32Naa fuɲa pilɔɔ velu-a, n'van tɔ́ a vanaa ŋiɔn naa n co ni, puapilɛ naa pilɔɔ co lɛ le, pɔmbɔ naa lumndo lo fuɲa naa ikɛi o lɛŋnde Kanaan-nden nin. 33O kon mí langbanɔ kon dimul naa aa: ‹Ɲɛ ya co tosa le sinaa maa vanaa toɲaa niaa co ni-o co hoo ni: la mɛi vana pilɛ ya o ba nanu, mì niaa tɔ̀a cua ɲɛm niaa nɔ makoo-on, mì la yoo yungula niaala yiaan ma co coo lan. 34La kɔɛ pɛ, la kɔ hun a pɔmbɔ niaa lumndo, haliko mi sina te la co n'suansuaan te, te vanaa toɲaa niaa co ni. La hin pɛ a ndu, i mel niaa bɛ niaa#42.34 bɛ niaa: Puapilɛ nda nda va mɛi o kaasoo Esipte-o, Simeɔn pɛɛn. Ndu Simeɔn kon va bɛ nda diinndɔɔ kpow o Rubɛn kɔɔli ni. Kani Rubɛn yɔŋnun po tasoo ni., la kelan vɛlɛ a kɔlɲuloo o lɛŋnden nden nin.›»

35Mɛɛ nda pɛi bɔlɔla ndalan, mí vana-vana ca bɔlɔ pɔmbɔɔ a volin ndɔn lenin o bɔlɔ ndɔɔ nin. Mɛɛ nda ce bɔlɔla pɔmbɔla lan a volin ndan lenin nda fuɲa nda-aa, mí siòònde bii nda kpow. 36Mí Yakɔb dimul nda aa: «La yeema mì de poaa niaa tɔnɔ le? Yosɛf co lɛ le, Simeɔn bɛɛ lo o lekáá. Bàà la yeema vɛlɛ mì la puu ya Bɛnyamɛn o ba? Nduyɛ, ya niaa co mɔnɛi lueiyo nuaa ni.» 37Mí Rubɛn dimul fuɲa ndɔ aa: «Sɔɔ Bɛnyamɛn ya o ba, i co nɔm ndu mingul nanu. Te i cuu nɔm ndu le, a diw poaa niaa ŋiɔnda.» 38Mí Yakɔb muli aa: «I kɛɛ, i co niaa po nuu yɔngu mì la kɔɛ a ndu le. Kani bɛ ndɔ vi, ndu pilɛ kpé lo ya nin o ba ni. Te i yɔngu niaa ndu pɛ mì ɲɛ kei ndu yɔŋnɔn nɛi-tɛɛn, mɛɛ ya co nin o yuuvɛiyo nuaa yɛ, la yɛɛ ya ciee-piɔ́m o mɔnɛi nin.»

Currently Selected:

O Kandɔɔ 42: BKG

Highlight

Copy