O Kandɔɔ 40

1Dɛnɛ kon hiovɔɔ, mí vanaa bɛndua va masaa Esipte o ba bɛngu-a, bolle vanaa va masaa mɔiyan yɔngoo-a a bolle vanaa loamaa bulua, a del kasi a masa ndaa. 2Mí ndu Faraɔnnɔɔ tuulu kɔl a nda taw, 3mó mal nda o kaasoo, o bolle vanaa kándà masaa-a lo cɛinin. Lon koni Yosɛf bɛɛ o kaasoo ni. 4Mí bolle vanaa kándà masaa-a sɔaa nda Yosɛf o ba le nda hɔlten nɔu coo. Má cii telen pum o kaasoo lon.

Yosɛf tɛɛsiaa lɔma sɔlaama vanaa bɛndua va o kaasoo-a nda ŋiɔn

5Icɔllo pum, mí bolle vanaa va masaa mɔiyan yɔngoo-a a bolle vanaa loamaa bulua masaa Esipte a sɔl lɔan nda ŋiɔn kpow o kaaso kon. Lɔma vana-vana sɔl-lan maa nɔ kɔlɔ ndɔ. 6Diimandɔɔ idiiyo, mɛɛ Yosɛf kɔɛ o nda lo, mó ca nda kɔɔyɔlɔɔ a buulanndo. 7Mó ɲuna vanaa baalaa Faraɔnnɔ-aa kan, a va kan o kaasoo o cɛi kaaso vana ndɔ bɛndoo nin-nda aa: «La vɛ hau calle nuaa kɔɔyɔlɔɔ a buulanndo?» 8Má mulul ndu aa: «Lɔan naa n sɔl ni, kɛ vana co nanu le naa kɔlɔ ndɔɔ cɔmndo le.» Mí Yosɛf dimi aa: «O co macoaa Hala le tɛɛsiaa kɔlɔ lɔma sɔlaan te? La cɔm-ndɔ ya lɔma niaa sɔl-lan.»

9O kon mí bolle vanaa va masaa mɔiyan yɔngoo-a tombola lɔma o sɔl-lan, mó dimi aa: «O lɔma ya sɔl-lan nin, mí cannun rɛsɛn tumndo ya laci, 10lɛwvon va o rɛsɛn kon coo mún yáá. Mó kandu dɔ́ɔ́ kuumiaa, mó yandu, mí rɛsɛŋun va o kpɔ̀nyɔ̀lan-ndon diw. 11Taala kólaa Faraɔnnɔɔ va ya o ba, mí kiandu rɛsɛŋun mun, mí vayia mun, mí mɔiyan ma fula, mí haw man o taala kólaa ndɔ kon nin, mí yɔngu vana ni bɛndoo taala kólaa kon.» 12Mí Yosɛf dimul ndu aa: «Yaŋ nilan o kɔlɔ lɔma sɔlaan man: lɛvun yaa-on co palɛi ndii yáá ni. 13Nanu a palɛi ndii yáá, Faraɔnnɔɔ co nɔm yiyan coo. O co nɔm mingi o vali nɔmndo nin, ma múúngu ndu mɔiyan yɔngoo mɛɛ nɔm óò tosa paandu telen n va baala kon tosaa ndu o ba bɛngu-o yɛ. 14Kɛ a yandi fallo, te sɔɛi nɔmnde cuu pɛ toosian, mà muungu o vali nɔmndo nin, yiyan ya coo ma tuinun ya iɲíí, ma soo o Faraɔnnɔɔ lo, mò soli ya o kaasoo ho. 15Kani o lɛŋnde Hebreea nin nda bii ya a paa-kala ni, má hun a ya nanu. Nduyɛ, nanu bɛɛ i tosa dɛnɛ vana mal vana o kaaso le.»

16Mɛɛ bolle vanaa loamaa bulua ce maa Yosɛf caa lɔma caan ndɔ sɔl-lan tɛɛsiaa, mó dimul ndu aa: «Ya bɛɛ mí sɔl lɔan, man ma co man ni: kambɛila bululan la va ya o lebol tan yáá. 17O kambɛi va lecoo-o nin, ɲɛm dian kɛndɛ-kɛndɛn ndáà toosiaa le Faraɔnnɔɔ-on va lenin. Kɛ yowva va hunɔɔ ɲɛm dian mun dioo o kambɛi kon nin ya o lebol.» 18Mí Yosɛf dimul ndu aa: «Lɔma n sɔl-lan kɔlɔ ndɔɔ co hoo ni: kambɛila yàálan la co palɛi ndii yáá ni. 19Nanu a palɛi ndii yáá, Faraɔnnɔɔ co nɔm bollen faŋa o kɛsei coo, o co nɔm landɔɔ o yɔm bɛndoo mì yowva hun dio visin nɔmndon.»

20Mɛɛ palɛi yaa hiow, mí Faraɔnnɔɔ tuisi kafoo le paale o velun-nden yelelaa. Mó toosiaa ɲɛdiaa kafoo le vanaa bɛndua kpow. 21Mó mingi ɲinkon bolle vanaa yɔngù ndu masaa mɔiyan-nda o baala ndɔɔ nin, mí ndu muungu vɛlɛ ndu mɔiyan yɔngoo. 22Mó landu ɲinkon bolle vanaa loamaa bulua masaa. Mí sɔɔn tosan mɛɛ Yosɛf cɔm nda kɔlɔ lɔma sɔlaama ndan yɛ kpafii. 23Kɛ bolle vanaa va masaa mɔiyan yɔngoo-a loonun a Yosɛf le, mó pɔɛɛnun a sɔɛi ndɔɛi.

Currently Selected:

O Kandɔɔ 40: BKG

Highlight

Copy