O Kandɔɔ 33

Yakɔb bɔŋan nda Esau bɛ ndɔ

1Mɛɛ Yakɔb heelu hɔlla, mó ca Esau bɛ ndɔ hunɔɔ a vanpiaandua kɛmɛ lehiɔɔlu. O kon, mí Yakɔb piɔw cuavaa ndɔa Lea, Rasɛl a buɛyaa ndaa laandua ŋiɔnda tɛɛn. 2Mó simi buɛyaa laandua a cuavaa ndaa laci, mó simi Lea nda cuavaa ndɔa tɛɛn, mó simi niko Rasɛl nda Yosɛf kɔɔli. 3Mí ndu pila hiaw nda laci. O tundun lɛŋ bɛmbɛ leŋɔmmɛw malan o tiiya Esau bɛ ndɔ ikɛi. 4Mí Esau hun ndu demullo a kiltan, mó cua ndu o balan coo, mó kafalan ndu o labolo, mó kɔman ndu. Mí nda ŋiɔn kpow a saan caŋndo. 5O kon kɔɔli, mí Esau cua hɔlla, mó ca laandaa Yakɔb-a a cuavaa ndɔa. Mó ɲuna ndu aa: «Vanndacieaa kuɛɛ co yɛ haa nɔm kɔɔli?» Mí Yakɔb muli aa: «Kɛndɛi Hala tosal ya vana nɔm baalaa-e n ca nuaa ni. Cuawva ha o dɔw ya o ipulu ni.»

6Mí buɛyaa laandua sɔɔnguu vɛlɛ a cuavaa ndaa, má tundun. 7Mí Lea bɛɛ hun tundun nda cuavaa ndɔa. O mɛɛlulan niko, mí Yosɛf nda Rasɛl a hun tundun. 8Mí Esau ɲuna ndu aa: «Yɛɛ n yeema yɛ le tosaa a cɔlua ya bɔŋan haa-a kpow?» Mí Yakɔb muli aa: «Ɲɛ ya cuu nɔm vana ni bɛndoo-o co kon ni, haliko ma ce ya ɲia.» 9Mí Esau dimul ndu aa: «Pɔmbɔnndo, bolofaa co ya o ba taw. Lelan, manda ɲɛm nɔmndon le nɔm pila.» 10Mí Yakɔb muli aa: «Kɛì-kɛì bɛɛ! I tɛɛlun nɔm, taa naŋ pɛ kɔl a ya lekɛ́ndɛi, mɛɛ bii ɲɛ ya cuu nɔm hoo-o. Kani ciikanndo ho naa nɔm, o co ko kpen a mɛɛ vana ciikan a Hala nuaa yɛ. Nduyɛ, a demul-la bɔɔ a kɔlkɛndɔɔ. 11Lelan, bii ɲɛ ya cuu nɔm hoo-o ya o ba. Kani Hala ce ya ɲia taw, ɲɛ-ɲɛ ka co ya o ba.» O lo Esau baŋnɔnndo kɔɔli háá mí Esau bii yɔŋɔɔ kon. 12O kon mí Esau dimi aa: «N faŋan nanu mì n kɔɛ latulu, i co va nɔm laci.» 13Kɛ mí Yakɔb mulul ndu aa: «Vana ni bɛndoo, a sina maa cuaambɔa kindu n'dial te. O kon kɔɔli, cɔlua co ya o ba: saa, cuinnda a nawva, nda kpow komsaa nda co ni. Te n kɔɛ pɛ a nda kɔla paale pilɛ, cɔlua kan co cuvɔɔ vu. 14Lelan vana ni bɛndoo, hiow ya pɔɔ laci yandi, i co va kɔlan nɔm kɔɔli o pɔm-pɔmbɔ a cɔlua mɛɛ nda nɔla kɔlan yɛ a mɛɛ cuaambɔa nɔla kɔlan yɛ, mì kɔ komal nɔm Seir.» 15Mí Esau tuu aa: «Te lende ni, mɛɛ i co nɔm vanaa ya hin-nda mel a tiŋ.» Mí Yakɔb muli aa: «Hali ma mɛi vana le, o ya haw ba-o tuŋ co ni mì vana nɔm ni bɛndoo naŋ kɔl a ya.»

16Paale len, mí Esau bii nɛiyo le muungoo Seir, 17mí Yakɔb ndu kɔa Sukɔt. Mó tangul cɛiyo lon, mó tangul vɛlɛ kùùlan le cɔlua ndɔa. Lelan nda ke fonda kon diolan ni aa Sukɔt (kon co dimio ni aa «Kùùlan»).

Yakɔb kɔ cal Sikɛm

18Mɛɛ Yakɔb faŋan Padan-Aram, mó tiiya a kɔlɲuloo o kobio Sikɛm nin, o lɛŋnde Kanaan-nden nin. Mó kɔ kila dɔ́ɔ́ngɔ́ ndɔɔ o kobio hɔl-ndɔ. 19Mó piandu lɛŋnden cuavaa-imamaa Hamɔr-a o ba volin latámán kɛmɛ, Hamɔr kon kelu Sikɛm ni#33.19 Hamɔr kon kelu Sikɛm ni: O hebrei nin o dimin aa «Hamɔr, fuɲaa Sikɛm». Kobila bɔɔ-bɔɔ diola vanndacieea láà nɔ telen kon ni. Hiovɔɔ o kon coo, te vanndo ndóò kelu pɛ cieo, ndáà dimi aa vana kon co fuɲaa ciee kon ni.. Lon Yakɔb simi cɛila-kolala-toandaala ndɔlan ni. 20Mó cɔaw fonda-loamaa-lasálàá lon, mó ke ndu diolan aa Ɛl-Elohe-Israɛl (kon co dimio ni aa «Hala co Hala Israɛl-lo ni»).

Currently Selected:

O Kandɔɔ 33: BKG

Highlight

Copy