O Kandɔɔ 23

Abraham pendu lɛŋnden a sɛiyo le Sara laa ndɔ kumbɔɔ

1Mɛɛ Sara cii vɔsilan kɛmɛ a bidiin a laŋɔmmɛw, 2mó vu Kiriat-Arba, Hebrɔn pɛɛn, o lɛŋnde Kanaan-nden nin. Mí Abraham pɔnɔ ndɔ hun tosa biisi ndɔɔ, mó caŋ ndu taw. 3O kon kɔɔli, mó faŋan nɛɛ vana vílɛ́iyo va-a, mó kɔa o Hitiia lo, mó dimul nda aa: 4«I co icali niaa tɛɛn, kɛ miallo ya co o lɛŋnde niaalen nin ni. Lelan, a yandi, la pisi ya fonda kumbaa n'vanvílɛ́iyo o ba, mì kumbu laa ni vi-o.» 5Mí Hitiaa kan a mulul ndu aa: 6«Yaŋ-ndɔ nilan, vana bɛndoo. Naa naa n co nɔm cɔu naa tɛɛn maa cua lemasa Hala-o. Lelan, o sɛila naalan nin, sɛi oo sɛi n ce pɛ mò hɛnan nɔm, a kumbu laa nɔm lenin. Vana-vana kuunanin nɔm laa nɔm kumbɔɔ o sɛi ndɔɔ nin te.»

7Mí Abraham can, mó baŋ vulan Hitiaa va lon-nda o labɛngunin, 8mó dimul nda aa: «Mɛɛ niaa cii cɛlɔɔ le ya fondaa yɔngoo mì kumbu laa nuu yɛ, la ɲɔɔlul-la niko Efrɔn, po Sohar-o, 9mò ke ya buulula ndɔla co Mak-pela o cɛi ndɔɛi dangalaa lan. I yeema mò kelu baa fonda kon o volion nin niaa o hɔl, haliko mi pendu ndu le vanvílɛ́iya kumbɔɔ lon.» 10Nduyɛ, Efrɔn Hitiinɔ kon va icali nda tɛɛn o fonda nda va sɔɛi ken toosiaa-o. Mó mulul Abraham Hitiaa hun cal o sondo kpaki kobi kon-nda kpow o hɔl aa: 11«Yaŋ-ndɔ nilan, vana bɛndoo. I yɔngu nɔm cɛi ken a buulula lan kpow, o co a vɔngu le. Vanaa nia naa n co haa sɔɛi mangalɛi pilɛi dimio mì n va súú pilɔɔ-a o hɔl ya ke nɔm yondo ni kon ni, nda co seiya ni. Kumbu vana vílɛ́i nɔmndo lon.»

12Mí Abraham baŋ vulan pilacieaa kan o labɛngunin, 13mó dimul Efrɔn vanaa kan kpow o hɔl aa: «Taa cɛl pɛ, nɔm bɛɛ yaŋ-ndɔ nilan mì soo. Cɛl mì pendu lɛŋnden nden nɔm o ba a ɲɛ-sɔlaa. Cɛl mì yɔngu nɔm vɔngu ndɔɔ, mì kumbu vana vílɛ́i nuu lon.» 14Mí Efrɔn mulul ndu aa: 15«Vana bɛndoo, i ɲuna vɔ nɔm: volin latámán kɛmɛ lehiɔɔlu daama lɛŋnden nden a buululan ndan la nɔ vɔngoo ni. Te vɔngu vaa lende luɛi pɛ naa tɛɛn, kpeku yɛɛ nɛ o solul-lɛnin naa? Lelan, a ce fonda kalaa, kumbu laa nɔm.»

16Mí Abraham cɛl tuu Efrɔn-ndo, mó tuu vɔngu lelɛŋ ndóò dimi Hitiaa tɔ̀a o hɔl-lo, volin latámán kɛmɛ lehiɔɔlu, mɛɛ ndáà tuu mun o yulalen boondii ken yɛ, mó yɔngu ndu. 17O kon, mí lɛŋnde Efrɔn-nde va len Mamre ikɛi Mak-pela len, buulula va lenin-ndan, yɔmii va o lɛŋnde len coo-e a lɛŋii balu ndi-e kpow 18i siŋnun ɲinkon kɛ́ Abraham-ndo Hitiia a vanáà hin o fonda dimia nsɔɔ kobi kon-nda o hɔl.

19Le hee, mí Abraham kumbu Sara laa ndɔ o buulula lan nin Mak-pela lon, Mamre ikɛi, Hebrɔn pɛɛn, o lɛŋnde Kanaan-nden nin. 20Paale len, mí lɛŋnde len a buulula lan la faŋan o ba Hitiia bɛngu, mí le siŋnun kɛ́ Abraham-ndo le vanvílɛ́yaa ndɔa kumbɔɔ.

Currently Selected:

O Kandɔɔ 23: BKG

Highlight

Copy