Daniɛl 1
1
Daniɛl nda caaŋaa ndɔa o lɛŋnde Babilɔn-nden nin
1O vɔsi yàándɔɔ nin, o masale Yehoyakim va masaa o tàndá Yuda-o coo len bɛngu, mí Nebukanɛsar va masaa Babilɔn-ndo hinul Yerusalɛm, mó tiila ndu. 2Mí Maalii mal Yehoyakim ndu o ba. Mó mal vɛlɛ Nebukanɛsar ɲɛm diandan va o Cɛi-Hala-o nin-ndon n tiŋ cuaa. Mó kɔannun a mun o lɛŋnde Sinear len nin, mó kɔ kɛsi mun o cɛi mandaa bolofaa halaa ndɔa#1.2 halaa ndɔa ɲɛm masaa ndóò biilu-on, piɔmaa ndɔa, a ndóò ce maa hala ndɔa-a pɛɛn nin. 3Mí masaa dimul Aspenas, o va bolle vanaa baalaa masaa-o, le felengia piaandua fula o yungu lemasaa, te kon te o yungu lesalamaa nin-nda pum hɛlio o Israɛlla tɛɛn. 4Felengia kan ndáà bɛnda mì ndáà va n'namta le, mì ndáà naŋ hɔlla, mì ndáà nɔ taasio, mì ndáà pɛ a kɔlkaloo, a dɛnɛ sinaa a á sinapɛngoo, haliko mi ndáà nɔla baalaa tosaa o cɛi lemasaa nin. Ndáà bɛnda mi ndáà pɛɛku nda sɛva Kaldea a sɔɛi ndɛi mangalɛi. 5Mí masaa dimi le ɲɛdiaa ndu pila va dioo-o a mɔima ndu pila va kolɔɔ lepalaa-lepala-an nda yɔngoo a le nda pɛɛkoo o vɔsilan tan yáá bɛngu. O vɔsila lan mɛɛlulan, ndáà kandu niko baalaa tosaa le ndu.
6O vanaa fula o polale Yuda len nin-nda tɛɛn, má hɛli Daniɛl, Hanania, Mikaɛl a Asaria. 7Mí bolle vanaa masaa ndóò kɛsi kɔllo coo-a baŋ nda diola celen: mí Daniɛl sɔla diolan aa Bɛlsasar, Hanania aa Sadrak, Mikaɛl aa Mesak, Asaria aa Abɛd-Neko.
8Mí Daniɛl kialun o kɔl maa o yeema mò nɔɔlian Mɛlɛka o hɔl o ɲɛdiaa pilɔɔ dioo nin a o mɔima pilɛan kolɔɔ nin nda masaa le. Lelan, mó tɛɛlun Aspenas aa o baŋ ndu nɔɔlianndo a ɲɛm mun te. 9Mí Hala tosa, mí Aspenas cɛl sɔɛi Daniɛl-le a yiyan kɛndɔɔ, a ɲííye. 10Kɛ mó mulul Daniɛl aa: «Siòònde co ya ni, kani masaa pila cɔm ɲɛ niaa bɛnda le dioo a kolɔɔ-o ni, te o ci niaa a dialun kɛndɔn mì la celul maa felengia niaa co lambi pilɔɔ-a le, ya kɔandunin dɛnɛ ni mì masaa kelu ya bollen le niaa.»
11O kon, mí Daniɛl dimul langbanɔ bolle vanaa baalaa masaa#1.11 bolle vanaa baalaa masaa Aspenas va bolle vanaa baalaa masaa telen kon ni (1.3). Vanaa baalaa kan masaa ndóò kɛsi kɔllo coo taw ni ndóò handu le ndu Daniɛl pila, Hanania, Mikaɛl a Asaria hɔlten nɔu coo-o aa: 12«I tɛɛlun nɔm, mɛɛndan-ndɔ buɛyaa nɔmnda o palɛi tɔ́ bɛngu, mà va naa lam lapeo daama yɔngoo le dioo, a mɛnndan daama le kolɔɔ. 13O kon kɔɔli, a tuu falun naan a falun felengia co ɲɛdiaa pilɔɔ dioo nda masaa-a. O kon, a tosa a naa mɛɛ n canin naa yɛ.» 14Mí langbanɔ kon cɛl tuu kon, mó mɛɛndan nda o palɛi tɔ́ bɛngu. 15O palɛi ken mɛɛlulan, mó ca maa a sɔla falun kɛndɔn, má celul, má hiaw felengia va ɲɛdiaa lemasaa dioo-a. 16Kandɔɔ ɲinkon, mí langbanɔ va nda mandaa-o faŋa ɲɛdiaa a mɔima nda va nda yɔngoo-an, mó va nda lam lapeo daama yɔngoo. 17Mí Hala ke felengia hiɔɔlua kan sinapɛngoo a dɛnɛ sinaa pɛɛkaa o sɔɛi mangalɛi a o kɔlkaloo nin. Daniɛl ndóò nɔla vɛlɛ vunduan a lɔma sɔlaan kɔlɔɔ sinaa.
18Tuma masaa Nebukanɛsar kelu le felengia nda hɛli kan-nda ndu cuuo-o tiiya, mí bolle vanaa baalaa masaa hun a nda o ndu lo. 19Mí masaa dɔaw baltan a nda kpow, kɛ vana pilɛ bɛɛ ve maa Daniɛl, Hanania, Mikaɛl a Asaria o vanaa kan tɛɛn te. O kon, má kandu baalaa le ndu. 20Lɔ́ɔ́-lɔ́ɔ̀ masaa ndóò ɲuuniaa nda pɛ o sɔɔn dɛnɛ sinan a o sɔɔn kɔlkalon coo, ndóò ce maa ndáà hiow vanaa mangalaa a vanaa viamaa yavaa va o lɛŋnde ndɔlen nin-nda kpow bɛmbɛ tɔ́.
21Mí Daniɛl lo baalaa tosaa o masaa lo cɛinin háá vɔsi tase Siris sul masaa-o.
Currently Selected:
Daniɛl 1: BKG
Highlight
Share
Copy
Want to have your highlights saved across all your devices? Sign up or sign in
© Alliance Biblique en Guinée
