Dɛnnda kiilaa 27

A kɔɛ a Pol Rɔm

1Mɛɛ nda dimi le kɔla naalan o dɛ̀ndɔ̀ɔ́ nin Itali, má mal Pol a vanaa kaasoa pum simlacinɔ vanaa cɔvaa kɛmɛa rɔmnda o ba, diolan ndu Yulius. 2Mí n luɛi o dɛ̀ndɛ̀ fula Abramit, mó va kɔlan Asii-o nin, mí n kɔa. Aristark fula Maseduan o lɛŋnde Tesalonike len nin-ndo va naa ikɛi. 3Diimandɔɔ, mí n tiiya Sidɔn. Mí Yulius tosal Pol dɛnɛ kɛndɔɔ, mó mal ndu, mó kɔ yil caaŋaa ndɔa, mí kan a yɔngu ndu ɲɛm ndóò nɔ maako-on. 4Naa n faŋanndo lon, mí n demul kɔngɔɔ Siipre, lɛŋnde co o mɛnndan tɛɛn-nden. Kani hoeiye ve hɔŋ a kpengii naa n va kɔlan-nde le. 5Naa n taŋɔɔ mɛmma ihɛlma co Silisii a Pamfilii ikɛi-yan, mí n tiiya Mira o lɛŋnde Lisi len nin. 6Mí simlacinɔ vanaa cɔvaa kɛmɛa komal dɛ̀ndɛ̀ fula Alɛksandrii mo va kɔlan Italii-yo lon, mó luei naa lenin. 7Palɛi bɔɔ-bɔɔ n va kɔlan o mɛnndan coo o pɔm-pɔmbɔ. Lɔ́ɔ́ naa n kɔ tiiya o kobio Knide-o, mí n sanga taw, kani hoeiye cɛl naa le tiiyaa o kɔngɔɔ le. Mí n demul Krɛte a kpengii kɔngɔɔ Salmonee. 8Mí ɲɔɔ pala naa taw le hiovɔɔ, mí n tiiya o fondaa pum diolan Nɛɛ-Kɛndɛa-simiaa-ladɛ̀ndɛ̀a, o kobio Lasee ikɛi.

9Mí n hivi palɛi bɔɔ-bɔɔ lon, mí telen vɔw le kelaa o mɛnndan coo-o komal naa lon, kani paale biyaa sum-nden léè hiownun nin. Mí sila vanaa va dɛ̀ndɔ̀ɔ́ tɛɛnguuo-a aa: 10«Caaŋaa nia, i ce maa kɔlan ndan la venin kɔla kɛndɛ le. Te n cee le, dɛ̀ndɔ̀ɔ́ a ɲɛm co lenin-ndon co hunɔɔ itambu, mì naa pila bɛɛ n vi.» 11Kɛ ɲɛ vana dɛ̀ndɔ̀ɔ́ nda vana va dɛ̀ndɔ̀ɔ́ bollen-ndo dimio simlacinɔ vanaa cɔvaa kɛmɛa ndóò hiow laalan a ɲɛ Pol dimio. 12Handɔɔ o kon coo, nɛɛ simiaa dɛ̀ndɛ̀a kan ve fonda kɛndɛ le sialten hiovio lon te. Le hee, mí vanaa bɔɔ-bɔɔ va o dɛ̀ndɔ̀ɔ́ nin-nda yiyan le faŋanndo o fonda kon. O yiyan ndaa nin, ndáà yeema mì ndáà tiiya Fenikse, nɛɛ simiaa ladɛ̀ndɛ̀a o lɛŋnde Krɛte len nin pɛɛn, o co ba too a á ba paalen le del-lo tɛɛn-ndo. Lon ndáà yeema le sialten hivio ni.

Hoeyii fùkù-fùkùei

13Hoeiye kandɔɔ hɔŋndo ɲɛ-pɔmbɔ fulaa a ba too, má yiyan maa tuu ndaa naŋ. Má timbi dɛ̀ndɔ̀ɔ́, má can Krɛte demullo. 14Kɛ telen bingi o kon kɔɔli, mí hoeyii fùkù-fùkùei fula o pembun co o lɛŋnde co o mɛnndan tɛɛn-nden coo, hoeyii fùkù-fùkùi nda veelu aa hoyii maluaŋnde a ba paalen le can-ndo-e toal o pembun lɛŋnde co len o mɛnndan tɛɛn-nden. 15Mí i hiiluu dɛ̀ndɔ̀ɔ́, n tiwba ndu hɔlla mingio a ba hoeiye i va fulaa-o le, mí n mɛinun, n va le vu. 16Mí n kei o lɛŋnde pɔmbɔle va o mɛnndan tɛɛn-nden a ba too, lɛŋnde len diolan Koda. Mí n sanga taw le dɛ̀ndɛ̀ pɔmbɔ mala vana o dɛ̀ndɔ̀ɔ́ nin-ndo biyɔɔ. 17Vanaa ɲaanun dɛ̀ndɔ̀ɔ́-a heeloo dɛ̀ndɛ̀ pɔmbɔ kon o dɛ̀ndɔ̀ɔ́ nin, má bayiaa yoei o dɛ̀ndɔ̀ɔ́ balɔɔ le naa malaa. Kani siòònde va naa yɔŋii naa n kɔ deli o kunda n'sióóndo coo Sirte o kɔngɔ, má tuisi kolala va la toandaa o dɛ̀ndɔ̀ɔ́ coo lan, mí dɛ̀ndɔ̀ɔ́ lo hiŋnɔnndo o mɛnndan coo lende. 18Hoeyii fùkù-fùkùei va hiovɔɔ laci a naa palaa tuŋ. Diimandɔɔ, má mal ɲɛm va o dɛ̀ndɔ̀ɔ́ nin-ndon baa pilɔɔ o mɛnndan nin. 19O paale yàándɔlen, mí nda pila mɛli ɲɛla va o dɛ̀ndɔ̀ɔ́ coo le ndu ɲindɔɔ lan o mɛnndan nin. 20Palɛi bɔɔ-bɔɔ, n tiwba paalen a loeon cɔu le, hoeiye va ifùkù-fùkùei tuŋ. O mɛɛlulan, mí n yiyan maa n ve cinda le.

21Mí ɲɔɔ viaw háá, vanaa va o dɛ̀ndɔ̀ɔ́ nin-nda di ɲɛ-ɲɛ le. O kon mí Pol sim nda tɛɛn, mó dimul nda aa: «Te niáà tuei pɛ ya diom maa n faŋan Krɛte le, n ve sanga mì náà n tɛɛmbuu ɲɔɔn mun nuaa le. 22Kɛ sunsun, la luei yoomuan, kani vana-vana vinin niaa tɛɛn te, dɛ̀ndɔ̀ɔ́ koni co hunɔɔ itambu ni. 23Kani mɛlɛkanɔ Hala nɔ ya baa coo-o, o ya co baalaa tosallo-o sɔɔnguu ya ikɛi cɛi icɔl, 24mó dimul-la aa: ‹Siòòŋii bii nɔm te Pol. Mɛɛ mà kɔ sim masaa Sesar o hɔl. Tofa vɔ, Hala tosal nɔm dɛnɛ kɛndɔɔ niaa vanaa niaa co kɔlan o mɛnndan coo-a kpow.› 25Lelan la luei yoomuan, kani i laalan Hala, mɛɛ o dimul-la-e ɲɔɔ yɔŋnunnin ni. 26Kɛ mɛɛ mì n tol o kɔngɔɔ pum o lɛŋnde co o mɛnndan tɛɛn-nden lepum.»

27Malɔ tɔ́ a lehiɔɔlundɔan ma va icɔl kon ni, hoeiye i va dɛ̀ndɔ̀ɔ́ ɲindɔɔ ba-ba fee o mɛmma ihɛllan Adriatike coo. Di-tɛɛndo kandɔɔ le tiiya, mí vanaa va dɛ̀ndɔ̀ɔ́ ɲaanɔnndo-a a sina maa n ve lɛ kɔngɔɔ levil te. 28Má vuu ɲɛ lusulaa pum o mɛnndan nin, má ca maa mɛtɛlɛlan beleyaa a laŋɔmmɛw ma va yingilaa ni. Ndáà hiovɔɔ lon ɲɛ-pɔmbɔ, má tuu vɛlɛ, mó bɛnda yingilaa mɛtɛlɛlan bidiin a laŋɔmaa. 29Má buulan, yɔŋii dɛ̀ndɛ̀ naa ndóò kundun o powtan, le hee má vuu songbalta n'cilinnda simi dɛ̀ndɔ̀ɔ́ lan tan hiɔɔlu a makɔɔ le cumndo mì paalen léè sɛ. 30Mí vanaa va dɛ̀ndɔ̀ɔ́ ɲaanɔnndo-a tuisi dɛ̀ndɛ̀ pɔmbɔ mala vana o mɛnndan nin-ndo o vionnɔnndo nin le fulanndo, ma va tosaa maa mɛɛ vana baa songbal o dɛ̀ndɔ̀ɔ́ laci. 31Kɛ mí Pol dimul simlacinɔ vanaa cɔwva aa: «Te vannda lo o dɛ̀ndɔ̀ɔ́ nin te, la sɔlanin cindaa le.» 32O kon mí vanaa cɔwva kilikili yoei dɛ̀ndɛ̀ pɔmbɔɔ, má mɛli ndi, mí i kɔannun o mɛnndan coo.

33Lɔ́ɔ́ paalen le hun siɔ, mí Pol veelu nda le dioo, mó dimi aa: «Paale tɔ́ a lehiɔɔlundɔlen le co hau nuaa ni, la co sumndo biyɔɔ, la co ɲɛ-ɲɛ dio le. 34Lelan, la hun dio baloo, kani o bɛnda mì yoomula niaalan la sɔla baŋaa. Hali yiinden ten lepilɛ le faŋanin vana pilɛ o lebol niaa tɛɛn te.» 35Mɛɛ o cii kon dimi, mó cua buloo, mó piɛi Hala nda kpow o hɔl. O kon kɔɔli, mó yimiyimi ndu, mó dia. 36O kon mí nda kpow a sɔla yoomuma sɛnɛi, má dia. 37Kpow-kpow, n va n'van kɛmɛ lediin belaŋɔmmɛw a vanaa ŋɔmpum o dɛ̀ndɔ̀ɔ́ nin. 38Mɛɛ vana-vana pim, má vuu maalon o mɛnndan nin haliko mi dɛ̀ndɔ̀ɔ́ ndóò muungu fefele.

Dɛ̀ndɔ̀ɔ́ tambu

39Mɛɛ paalen le sɛ, vanaa va dɛ̀ndɔ̀ɔ́ ɲaanɔnndo-a sina lɛŋnde len te, kɛ má ca peo pum a dáá, má kindikindin le kɔlan dɛ̀ndɔ̀ɔ́ simio lon. 40Má tiimbuu songbalta n'cilinndan le dɛ̀ndɔ̀ɔ́ yɔɔ o mɛnndan coo. Má tiimbuu vɛlɛ yoei va i baiyaa o ɲɛ vana muli dɛ̀ndɔ̀ɔ́ hɔlla le kɔlan-ndo-e. O kon kɔɔli, má tondu kolaa o dɛ̀ndɔ̀ɔ́ laci haliko mi hoeiye ɲindu ndu, má kɔa a kpengii dáá kon. 41Kɛ mí dɛ̀ndɔ̀ɔ́ kɔ baŋnun o kunda n'sióóndo pum o peela bɔŋanndan tan tiɔn, mí dɛ̀ndɔ̀ɔ́ haw. Mí ciŋii dɛ̀ndɔ̀ɔ́ sɔɔŋan o sioondon nin, o biŋin te. Mí hoeyii fùkù-fùkùei tɛɛmbuu dɛ̀ndɔ̀ɔ́ a makɔɔ. 42Vanaa cɔwva ndáà yeema mì ndáà diw vanaa kaasoa, yɔŋii vana pilɛ o nda tɛɛn ndóò saana mì ndóò ɲaanun. 43Kɛ mí simlacinɔ vanaa cɔvaa kɛmɛa, óò yeema le Pol ciindiaa-o kuuna nda le kon tosaa. Mó dimul vanaa caa sanaa-a maa nda deli fɔlɔn o peelo, mà tiiya o kɔngɔ, 44mì a tɔ̀a nda kɔɛ nda kɔɔli o pɛngɔn coo, te kon te o yɔmii tɔ̀ɛi dɛ̀ndɛ̀ tambu-o coo. O kon mí nda kpow a fula o kɔngɔ, ɲɛ-ɲɛ yɔŋnun nda le.

Currently Selected:

Dɛnnda kiilaa 27: BKG

Highlight

Copy