Dɛnnda kiilaa 25

A kɔɛ a Pol o Fɛstis lo

1Fɛstis tiiyaa o lɛŋnde len nin, palɛi ndii yáá o kon kɔɔli, mó can Sesaree le kɔlan Yerusalɛm. 2Mí bolii vanaa-solia-lasálàá a simlacia Yuifia sim ndu o hɔl, má cɛɛŋun Pol coo. 3Má baŋnun Fɛstis tɛɛlɔnndo maa o tosal nda dɛnɛ kɛndɔɔ, mò cɛl mò mingi Pol Yerusalɛm. Nduyɛ, ndáà cii nin Pol dúmbú yii le ndu diyɔɔ nɛi-tɛɛn. 4Kɛ mí Fɛstis muli aa: «Pol co o kaasoo Sesaree, ya pila co muungu lon sunsun.» 5Mó dimi vɛlɛ aa: «Te dɛnɛ vɔɔndo langbanɔ kon tosa ni, mɛɛ simlacia niaa liila ya Sesaree lon, mà kɔ cɛɛŋun ndu coo.» 6Mí Fɛstis tosa palɛi ndii ŋɔmaa, te kon te tɔ́ kpafii nda tɛɛn, o kon kɔɔli, mó kɔa Sesaree. Diimandɔɔ, mó kɔ cal nɛɛ kialaa n'yamaa, mó dimul vannda le hunɔɔ a Pol. 7Telen nda hin a ndu-o, mí Yuifia fula Yerusalɛm-nda balu ndu, má hɛɛndu ndu sɔɔn vɔɔnndon coo, kɛ a nɔla mun cɔmndo a toɲa le. 8Kɛ mí Pol kɔɔsa aa: «I tɛɛmbuu ɲɛ-ɲɛ a tɔŋ Yuifia o kɔɔ le, te kon te a Cɛi-Hala-o, te kon te vɛlɛ a Sesar le.»

9Fɛstis ndóò yeema mì ndóò tosa dɛnɛ hɛnan Yuifia-o, o kon mó ɲuna Pol aa: «Vɛ̀ɛ̀ a yeema mà kɔɛ Yerusalɛm, mà kɔ kiolu nɔm iyama ya o hɔl lon le dɛnɔɔ ho?» 10Mí Pol muli aa: «O fonda kialaa n'yama Sesar-o ya co isisi nuaa ni, nɛɛ nda bɛnda mà kelu ya iyama-a. Nɔm pila sinà sɔɛi he ɲɛkɛndɛi maa i tɛɛmbuu ɲɛ-ɲɛ a Yuifia le. 11Nduyɛ, te i tɛɛmbuu yɛ pɛ isɔɔ, i ya bɛnda mì sɔla piɔ́mndo-e, i kɛɛ le. Kɛ te toɲa oo toɲa co o sɔɔn nda co ya hɛɛnduuo coo-on nin te, mɛɛ vana-vana melnin ya nda o ba le, o Sesar lo ya co lakɔ kɔɔsɔ ni.» 12Fɛstis ciiyo tundɔɔ nda vanaa ndɔa silaa, mó muli aa: «O Sesar lo n co lakɔ ni, mɛɛ a co lakɔ o ndu lo.»

A kɔɛ a Pol o masaa Akripa lo

13Palɛi pum o kon kɔɔli, mí masaa Akripa nda Berenise kɔa Sesaree le Fɛstis yilɔɔ. 14Le mɛɛ nda va palɛi bɔɔ-bɔɔ cii lon yɛ, mí Fɛstis cɔm masaa a dɛnɛ Pol-lo o kɔɔ aa: «Langbanɔ Felisi mɛi o kaasoo-o pum co nanu. 15Lɔ́ɔ́ ya kɔɛ Yerusalɛm-ndo, mí bolii vanaa-solia-lasálàá a kaasoŋaa kɔlkalua a cɛɛŋun a ndu o kɔɔ, má dimul-la maa ya yaala ndu le ndu diyɔɔ. 16Mí mulul nda maa rɔmnda dema vana yaala le piɔ́m sɔla le, te o co mì vana kon kɔɔsa fɔlɔn nda vanaa bii sei ndɔɔ-a, mà cɔm tɛɛmbuula nda bii sei ndɔɔ lan te. 17Lelan ndáà hunɔɔ nanu, i cum te, mí cal nɛɛ kialaa n'yamaa diimandɔɔ, mí dimul nda le hunɔɔ a langbanɔ kon. 18Mí vanaa bii sei ndɔɔ-a hun, kɛ a cɔm tɛɛmtuu kɛ́-kɛ̀ a ndu o kɔɔ mɛɛ ya va yiyanndo yɛ le. 19Sɛɛngianndo kínɛí va nda tɛɛn o sɔɛi dina ndaa coo a o sɔɛi langbanɔɔ pum coo ni. Langbanɔ diolan aa Yeesu, o vi mí Pol va dimio maa o co yoomu-o. 20Mɛɛ sɔɛi kalɛi dɔw ya kɔndɔfili, mí ɲuna Pol te Yerusalɛm ndóò yeema ni mì nda kɔ kiolu ndu iyama. 21Kɛ mó dimi maa a manda sɔɛi ndɔɛi háá mì masa-bɛndoo sinà a ndi kɔɔ. Le hee mí dimul vannda le ndu mandaa háá lɔ́ɔ́ ya yaanin ndu o Sesar lo-o.» 22Mí Akripa dimul Fɛstis aa: «Ya bɛɛ, i yeema mì tuei ndu diom.»

Mí Fɛstis muli aa: «Siɔdii fɔ́ɔ́fɔ̀, a co ndu diom tuɛyɔɔ.»

23O kon diimandɔɔ, mí Akripa nda Berenise hun o biilu lemasaa nin, má luɛi o cɛi kialaa n'yamaa nin nda simlacinɔ simlacia vanaa cɔvaa kɛmɛa a simlacia va o kobi kon nin-nda pum. Mí Fɛstis dimul vannda le hunɔɔ a Pol. 24O kon kɔɔli, mí Fɛstis cua sɔɛi, mó dimi aa: «Masaa Akripa a niaa vanaa co nanu-a kpede, kámáá la ce langbanɔɔ ho! Yuifia kpow a bii ya seiyo Yerusalɛm a Sesaree ciee nanu a deŋio maa o bɛnda mò sɔla piɔ́mndo. 25Ya yɛ, i ci tɛɛmbuu kɛ́-kɛ̀ o bɛnda mò sɔla piɔ́mndo le. Kɛ le tùú ndu pila yeema le kɔlan o masa bɛndoo lo-o, mí ca maa o co fisa mò kɔɛ. 26I nɔ sɔɛi kpeekpei ya sɛval masa bɛndoo a ndu o kɔɔ le, lelan ya veelu ndu niaa kpow o hɔl ni, kɛ taama-taama nɔm masaa Akripa, haliko telen naa n ɲunanin ndu-o, mì sɔla ɲɛ pum le sɛvaa. 27I ci ken dɛnɛ kɔlkalu le vana kaasoo yɔɔ Rɔm te, te i cɔm dɛnɛ o tɛɛmbuu-o vakpa le.»

Currently Selected:

Dɛnnda kiilaa 25: BKG

Highlight

Copy