Dɛnnda kiilaa 24

A hɛɛndu Pol sɔɔn coo

1Palɛi ŋuɛɛnu o kon kɔɔli, mí Ananias bolle vanaa-solia-lasálàá tiiya Sesaree nda kaasoŋaa kɔlkalua pum, a Tɛrtulus vana kɔɔsa le vannda-o. Má hun komal Felisi masa-ibungaa le sei Pol-lo biyɔɔ. 2Mó viam vannda le hunɔɔ a Pol, mí Tɛrtulus hɛɛndu Pol sɔɔn coo nuaa aa: «Vana bɛndoo, nɔm co tosaa ni mì n va o kɔlɲuloo nin bɛɛn-bɛɛn. Le tùú n co masalen tosaa ɲɛkɛndɛi-yo ɲɛ-ɲɛ co hiovɔɔ laci a bɛndaa le dɛnɛ kɛndɛ lɛŋnden nden nuaa ni. 3N co tɔnɔ kon sɔlaa nɔm o ba lɔ́ɔ́-lɔ́ɔ̀ nɛɛ-nɛɛ ka, nduyɛ n mel nɔm balika a kɔlta naalan kpow. 4Kɛ i yeema mì saangiaa nɔm te, lelan i co nɔm tɛɛlɔn, mà yiyan ya coo, mà yaŋ naa nilan le telen bingi. 5N ce maa vana vɔɔn-vɔɔndo langbanɔɔ ho co ni. Ndu co Yuifia co o lɛŋnden coo-a kpow sɔngɔlan mɛlio tɛɛn ni, mò va kunda lekaan Nasaria sɛinun-nda simndan laci. 6Ndóò yeema mì ndóò tɛɛmbuu diondɔɔ Cɛi-Hala-o, lelan naa n bii ndu ni. Náà n yeema mì náà n kelu ndu iyama mɛɛ tɔŋ naa dimi yɛ, 7kɛ mí Lisias, simlacinɔ simlacia vanaa cɔvaa kɛmɛa hun a kpaayaa, mó hialu naa ndu o ba, 8mó dimul vanaa va ndu kan sɔɔn hɛɛnduuo coo-a le hunɔɔ a ndu o nɔm ndo. Kɛ nduyɛ, te nɔm pila ɲuna pɛ langbanɔ ho, a canin lekɛ́ndɛi maa toɲaa sɔɔn naa n co ndu hɛɛnduuo coo-on co ni.»

9Mí Yuifia cɔɔlu sɔɛi ken tiinda, má dimi aa toɲaa ni.

Pol soo Felisi o hɔl le ndu pila cɛvɔnndo

10Mí masa-ibungaa tuulal Pol a ba le ndu sɔɛi keo, mí Pol cua sɔɛi aa: «I sinà maa o co nin vɔsilan taw, nɔm co vana kialaa n'yamaa o lɛŋnde naalen nden nin ni. Lelan a laalanndo ya co kɔɔsa ni. 11Nɔm pila tofa vɔ lenin fallo, o hiw vɔ bɛɛ palɛi tɔ́ a iŋiin te, mí kɔa Yerusalɛm le Hala biiloo. 12Kandɔɔ o Cɛi-Hala-o nin, kɔ bii o cɛila lekaandan nin, kɔlan háá ciee, vana-vana komal-la sɛɛngianndo a vana le, te kon te vana n'sɔɔ pei nin te. 13Nduyɛ, vannda háá tiwba mà cɔm toɲa kɛ́-kɛ̀ o sɔɔn nda co ya mun hɛɛnduuo coo sunsun-ndon nin te. 14Kɛ nduyɛ, o ya nɔla mì cɛl nɔm o hɔl-lo co hoo ni: Hala fuɲaa naa mamaa ya co biiloo ni, maa mɛɛ nɛila Mɛlɛka lan la co yɛ, ken nda nda co cɔu còòlan nuaa ni. Nduyɛ, i laalan ɲɛ-ɲɛ tɔŋndo a vanaa-tɛɛngaa-diom Hala-a dimi. 15Tiindan nda tiindan Hala ndaa-o koni ya bɛɛ nɔ ni, maa vanaa sandaa a vanaa sendu le-a kpow a muungunin yoomu. 16Lelan i co kindinndo lɔ́ɔ́-lɔ́ɔ̀, haliko mi va o sandaa Hala a vanndacieea o hɔl.

17I faŋan Yerusalɛm, o co nin hau vɔsilan a vɔsilan, i muungu nanu le vanaa bala fondoa co o lɛŋnde nilen nin-nda ɲɔɔn keo a le sálàlan solio. 18Lɔ́ɔ́ nda komal-la o Cɛi-Hala-o nin-ndo, yáà cii nin faleŋii dindiannde tosa. Sɛ́lɛ́ ve ya ikɛi le, i mel sɔngɔ oo sɔngɔ le. 19Kɛ mí Yuifia fula o lɛŋnde Asii len nin-nda pum kɔ cenelan ya, má hɛɛnduu ya sɔɔn coo. Ndóò bɛnda mì ndáà va nanu, mì ndáà cɔm nɔm sɔɔn kɛ́-kɛ̀ nda co ya hɛɛnduuo ho coo. 20Te o co yɛ kon te, mɛɛ vanaa co haa nanu-a cɔm tɛɛmbuu ya tɛɛmbuu lɔ́ɔ́ ya va vanaa kialaa n'yamaa lelɛŋnda o hɔl-lo, 21faŋanndo o sɔɛi ya yonda mí dimi nda kpow o hɔl-le kɔɔli maa: ‹Le tùú ya laalan a tendul vanvílɛ́iya o kɔɔ-o ya co hau nanu le ya yamɛi kiolɔɔ nuaa ni.›»

22Felisi ndóò síná kaannde Krista len ɲɛkɛndɛi, le hee mó mingi kɔɔsɔɔ le paale celen, mó dimul nda aa: «Lɔ́ɔ́ Lisias simlacinɔ simlacia vanaa cɔvaa kɛmɛa hunnin-ndo, i kelu sɔɛi he iyama.» 23O kon, mó dimul vana cumulaa cɛi kaasoo le Pol hɔlla landɔɔ coo, kɛ mò va ndu yɔnyɔlaa ɲɛ-pɔmbɔ, mò va vɛlɛ cɛlɔɔ mì caaŋaa ndɔa va ndu lueyɔɔ yilɔɔ.

Pol soo Felisi nda Drusille laa ndɔɔ o hɔl

24Palɛi bɔɔ-bɔɔ o kon kɔɔli, mí Felisi hun a Drusil laa ndɔ, Yuifinɔɔ laa ndɔ kon va ni. Mó viam vannda, má kɔa Pol kɔɔli. Mí Felisi yaŋ nilan o ɲɛ Pol dimi a Yeesu Krista laalanndo o kɔɔ-o coo. 25Kɛ telen Pol va sɔɛi a sandei o kɔɔ-o, a mɛɛ vana nɔla kɔl nɔmndo yɛ, mó va vɛlɛ sɔɛi a yamɛi co hunɔɔ kiolɔn-nde o kɔɔ-o, mí siòònde bii Felisi, mó dimul ndu aa: «O va pɔɔ nuaa! A tiwba mà kɔɛnnun pɔɔ. I koma sɔla pɛ fondaa, i co nɔm vɛlɛ veelu.» 26O va vɛlɛ yiyanndo maa Pol va ndu volion ke. Lelan, mó va ndu veeloo cuɛi-cuɛi le baltan nda ndu. 27Vɔsila tiɔn o kon kɔɔli, mí Pɔrsius Fɛstis muungu masa-ibungaa o fonda Felisi-o. Kɛ le tùú Felisi ndóò yeema ndu pila siingɔɔnndo vana kɛndɔɔ Yuifia o hɔl-lo, mó mal Pol o kaasoo.

Currently Selected:

Dɛnnda kiilaa 24: BKG

Highlight

Copy