Dɛnnda kiilaa 23

1Mí Pol tofa vanaa kialaa n'yamaa lelɛŋnda, mó dimi aa: «Puapilɛa nia, háá paalen nden hau, a kɔlkɛsiaa nuu kpow ya co Hala baalaa tosallo nuaa ni.» 2Mí Ananias bolle vana-solia-lasálàá dimul vanaa va Pol ikɛi-ya le ndu Pol sondoo lɔɔ. 3O kon mí Pol dimul ndu aa: «Hala co nɔm lɔɔ ni, nɔm co hoo maa cìì cɛi humbu-o. A cal le ya yamɛi kiolɔɔ mɛɛ tɔŋndo co yɛ, má dimul vannda le ya lɔɔ, nduyɛ o co lende le tɔŋndo dimi le.» 4Mí vanaa va Pol ikɛi-ya dimi aa: «Vɛ̀ɛ̀ mà yei bolle vanaa-solia-lasálàá!» 5Mí Pol muli aa: «Puapilɛa nia, i ve sina le maa bolle vanaa-solia-lasálàá o co ni. Kani fúú le, Sɛbɛ Hala-o dimi aa: ‹Dimi sɔɛi vɔɔnde a simlacinɔ vanaa nɔmnda o kɔɔ le.›»

6Pol sinaa maa Sadusia vanaa kialaa n'yamaa pum va ni, a pilla nda Faliisia, mó yonda nda o hɔl aa: «Puapilɛa nia, Faliisinɔɔ ya co ni, Faliisinɔɔ velu ya ni. Le tùú ya laalan maa vanaa vi-a tendulnin fulaa vanvílɛ́iya tɛɛn-ndo nda co yamɛi nii kiolɔɔ nuaa ni.» 7Mɛɛ o cii sɔɔn mun dimi, mí sɛɛngianndan la can Faliisia nda Sadusia tɛɛn, mí sɛ́lɔ́ɔ́ sɛyan. 8Mí Sadusia dimi maa vanaa vi-a muungu lɛnin yoomu le, mɛlɛkaa co le, ɲinaa co vɛlɛ le, kɛ mí Faliisia nda laalan maa kan kpow a co. 9Mí vannda cɔɔlu yonda taw, kɛ mí vanaa pɛɛkaa latɔŋnda pum, a va o kunda Faliisia coo-a can, má sɛɛngiaa, má dimi aa: «N ci ɲɛ-ɲɛ langbanɔɔ ho o tɛɛmbuu le. Bɔɔle ɲinaa, te kon te mɛlɛkanɔɔ soo o ndu lo nuaa ni.» 10Mɛɛ sɛɛngianndo tuulu kpɛikpɛi, mí siòònde bii simlacinɔ simlacia vanaa cɔwva kɛmɛa yɔŋii vannda ndáà sɛɛsiaa Pol. Le hee, mó dimul vanaa cɔvaa ndɔa maa a luɛi sɛ́lɔ́ɔ́ tɛɛn, mà soli Pol a kpaayaa le ndu mingio o kpakio nin.

11Diimandɔɔ icɔllo, mí Maalii cɔmnun Pol, mó dimul ndu aa: «Lueí yoomuan. A cii seile nilen tɛnda Yerusalɛm nanu, mɛɛ mà kɔ tɛnda vɛlɛ len Rɔm.»

A yii Pol dúmbú le ndu diyɔɔ

12Diimandɔɔ idiiyo, mí Yuifia pum yii dúmbóó, má mɛnan Hala o hɔl maa a dinin te, a kolnin vɛlɛ ɲɛ-ɲɛ le te a dii Pol te. 13Vanaa yii dúmbú kalaa-a ndáà hiow vanpiaandua belehiɔɔlu. 14Má kɔ komal bolii vanaa-solia-lasálàá a kaasoŋaa kɔlkalua, má dimul nda aa: «N cii ciɛ́ɔn cua Hala o hɔl maa n dinin te, n kolnin vɛlɛ le fɔ mì n dii fɔlɔn Pol. 15Lelan, la cɛlan niaa vanaa kialaa n'yamaa lelɛŋnda, mì la kɔ dimul simlacinɔ simlacia vanaa cɔvaa kɛmɛa, mò cuu niaa Pol, mì la dimi maa la yeema mì la tofa sɔɛi ndɔɛi lenin. Naa yɛ, n co pɔɔ toosian le ndu diyɔɔ lɔ́ɔ́ pá mò hun tiiya nanu.»

16Kɛ mí tongoo Pol tuɛi sɔɛi dúmbú kon. Mó kɔa o kpakio nin, mó luɛi, mó kɔ dimul Pol. 17O kon mí Pol veelu simlacinɔ vanaa cɔvaa kɛmɛa pilɛ, mó dimul ndu aa: «Liila langbanɔɔ ho o simlacinɔ vanaa cɔvaa kɛmɛa lo, o nɔ sɔɛi pum le ndu tiiyallo.» 18Mó liila ndu, mó yaa ndu o simlacinɔ simlacia vanaa cɔvaa kɛmɛa lo, mó dimi aa: «Pol co o kaasoo-o veelu ya ni, mó dimul-la aa ya hun a langbanɔɔ ho o nɔm ndo, aa o nɔ sɔɛi pum le nɔm tiiyallo.» 19Mí simlacinɔ simlacia vanaa cɔvaa kɛmɛa kan bii langbanɔ felengi kon baa, má kɔa lándán, mó kɔ ɲuna ndu aa: «Yɛɛ nɛ n nɔ yɛ le ya dimullo?» 20Mó muli aa: «Yuifia cii cɛlan le nɔm komallo siɔdii, mà hun ke nda Pol, mà kɔɛ a ndu o vanaa kialaa n'yamaa lɛlɛŋnda lo. A hun dimulnin nɔm maa a yeema mà tofa sɔɛi ndɔɛi lenin. 21Kɛ hali mà laalan nda le. Kani vanaa pum co nda tɛɛn, a hiow n'van belehiɔɔlu. A cii mɛnan maa a dinin te, a kolnin vɛlɛ le fɔ mà dii ndu. A cii toosian, muli nɔmndo kínɛí nda co nihau cumndo nuaa ni.» 22Simlacinɔ vanaa cɔwva kɛmɛa ciiyo langbanɔ kon kuunaa maa o dimul vana-vana ɲɛ o dimul ndu kon-ndo le, mó mingi ndu.

A yɛɛ Pol o Felisi masa-ibungaa lo

23O kon kɔɔli, mí simlacinɔ simlacia vanaa cɔvaa kɛmɛa veelu simlacia vanaa cɔvaa kɛmɛa nda ŋiɔn, mó dimul nda aa: «La cuungiaa vanaa cɔwva kɛmɛ lediin a vanaa ɲaanun o soa coo-a belaŋɔmmɛw, a vanaa vuaa n'kɔɔa kɛmɛ lediin, mì niaa kpow la toosian le kɔlan Sesaree a lɛɛlɛ ŋɔmahiɔɔlundɔɔ icɔllo. 24La toosiaa vɛlɛ soa le kɔlan a Pol, mì la tiiya a ndu yɛngɛsɛɛ o Felisi masa-ibungaa lo.» 25O kon kɔɔli, mó sɛva vɛlɛ sɛbɔɔ ho aa:

26«Ya Klode Lisia co sɛbɔɔ ho sɛvaa ni. I yil vana bɛndoo Felisi, o co masa-ibungaa-o. 27Yuifia ndáà bii langbanɔ ho ni, ndáà yeema le ndu diyɔɔ. Yáà tueyɔɔ maa pilacieo Rɔm o co ni, mí viam vanaa nia cɔwva, má cɛw ndu. 28Yáà yeema mì yáà sina kɔlɔ Yuifia va ndu sɔɔn hɛɛnduuo coo-o, lelan yáà kɔɛ a ndu vanaa kialaa n'yamaa lelɛŋnda o hɔl ni. 29Mí ca maa le tɔŋnda ndala nda pila lan daama nda va ndu sɔɔn mun hɛɛnduuo coo ni, kɛ o tɛɛmbuu isɔɔ oo isɔɔ le, i ndóò bɛnda mì ndóò sɔla piɔ́mndo-e, te kon te mì ndóò sɔla kaasoo. 30O kon kɔɔli, yáà tueyɔɔ maa Yuifia a yii ndu dúmbú, fɔ́ɔ́fɔ̀, mí tuu le nɔm ndu yoo. I cii vanaa va ndu kan sɔɔn hɛɛnduuo coo-a dimul maa a kɔ bii sei ndɔɔ o nɔm ndo.»

31O kon mí vanaa cɔwva tosa mɛɛ nda dimul nda yɛ. Má cua Pol, má kɔa a ndu icɔl kon háá Antipatris. 32Diimandɔɔ, mí vanaa cɔvaa va kɔlan a n'pelu-a muungu o kpakio, má mal vanaa ɲaanun o soa coo-a kɔlan a Pol. 33Ndáà tiiyaa dɔ́ɔ́ Sesaree, má yɔngu masa-ibungaa sɛbɛ kalaa, má soaa ndu Pol o ba. 34Mɛɛ masa-ibungaa cii sɛbɛ kon dimi, mó ɲuna Pol nɛɛ o fula-a. Ndóò tueyɔɔ aa Silisii Pol fula ni, 35mó dimul ndu aa: «Lɔ́ɔ́ vanaa co nɔm sɔɔn hɛɛnduuo coo-a hunnin-ndo, i co nɔm ɲuna.» Mó dimul vannda le Pol mandaa o cɛi lemasa Herɔde-o nin.

Currently Selected:

Dɛnnda kiilaa 23: BKG

Highlight

Copy