Dɛnnda kiilaa 13

A hɛli Barnabas nda Sol le kɔlan baala Hala-o tosaa

1Vanaa-tɛɛngaa-diom Hala-a a vanaa pɛɛkaa latɔŋnda pum a va vanaa Krista-aa tɛɛn Antiɔs: Barnabas, Simeɔn o ndáà ke diolan aa Vana-Tiŋio-o, Lusius fula Sirɛne-o, Manaɛn sul nɛɛ pilɛ nda Herɔde-o, Herɔde va masalen tosaa Kalile-o pɛɛn, a Sol. 2Paale pilɛ, a va Mɛlɛka biiloo ma va o sumndo nin, mí Hala Kɔl-Diandaa dimul nda aa: «La kɛsul-la Barnabas nda Sol landɔ le baalaa tosaa, o ya hɛli nda-o. » 3O kon, ndáà ciiyo sumndo biyɔɔ a Hala piɛiyo, má handu nda balan coo, má mal nda kɔlan.

Barnabas nda Sol kɔɛ Siipre

4Mí Hala Kɔl-Diandaa viam Barnabas nda Sol, má kɔa Selesii, má can ndon, má luɛi o dɛ̀ndɔ̀ɔ́ nin, má kɔa Siipre. 5Ndáà tiiyaa Salamine, má kandu vannda sɔɛi Hala-e tiiyallo o cɛila lekaanda Yuifia nin. Nsaŋ va nda ikɛi le nda malaa. 6Má kei o lɛŋnde ibungale va o mɛnndan tɛɛn-nden nin kpow, háá má kɔ tiiya Pafɔs. Má komal vana viamaa yavaa pum, óò siingun ndu pila vana-tɛɛngaa-diom Hala-o lon-ndo, diola ndɔlan Bar-Yeesu, Yuifinɔɔ o va ni. 7Ndu va Sɛrsius Polus masa-ibunga ndóò kendu kɔl taw-vo ikɛi ni. Mí Sɛrsius Polus kon viam vannda, má veelu Barnabas nda Sol, kani ndóò yeema mì ndóò tuei sɔɛi Hala-e. 8Kɛ mí Bar-Yeesu vana viamaa yavaa, o diola ndɔlan la va kon o krɛkiei nin aa Elimas-o simul nda, mó va vɛlɛ nɛilan nuwviaa le masa-ibungaa faŋaa o laalanndo coo. 9O kon mí Hala Kɔl-Diandaa va Sol ndáà veelu vɛlɛ aa Pol-lo nin-ndo tosa, mó tofa Elimas ciŋ, 10mó dimi aa: «Nɔm vana pɛ ho a kɔlkalu vɔɔndo, mà pia vɛlɛ a vannda huiyo-o sei, nɔm po ɲina vɔɔndo, nɔm vana yeema ho dɛnɛ sandaa kɛ́-kɛ̀ loo. Lɔ́ɔ́ kuɛɛ n pɛngi yɛnin nɛila sandaala Mɛlɛka lan tunduuo? 11Sunsun, Mɛlɛka co nɔm lɔɔ, mà suma. Haa mì telen pum hiow, a cinin ɲɛ-tengaa ipalaa le.» Fɔ́ɔ́fɔ̀, mí ɲumndan ma toal Elimas o hɔl. Mó muungu iyaanayaanai vannda nuwviaa le ndu baa biyɔɔ. 12Masa-ibungaa cɔu dɛnɛ kon, mó laalan, mí pɛɛkula o sɔla a Mɛlɛka o kɔɔ lan la pilan ndu kɔllo.

Pol nda Barnabas kɔɛ Antiɔs o lɛŋnde Pisidii len nin

13Mí Pol a vanaa va ndu kɔɔli-a a luɛi o dɛ̀ndɔ̀ɔ́ nin Pafɔs, má muungu Pɛrkɛn#13.13 Pɛrkɛn: Diola kobio ho o falansiei nin aa Perge. Náà n bɛnda mi náà n hivi ndu aa Pɛrse, kɛ yɔŋii naa muulian ndu a lɛŋnde Pɛrse len, lelan naa n cua diola ndɔla kpeekpeilan o krɛkiei nin ni aa Pɛrkɛn. o lɛŋnde Pamfilii len nin. Mí Nsaŋ mɛi nda lon, mó muungu Yerusalɛm. 14Má can Pɛrkɛn, má hiaw Antiɔs o lɛŋnde Pisidii len nin. Má kɔ luɛi o cɛi lekaanndo pum nin o paale pɛngiaalen coo, má cal. 15Ndáà ciiyo sɛbɛ tɔŋndo a sɛbɛla vanaa-tɛɛngaa-diom Hala-a dimio, mí simlacia cɛi lekaan kon dimul nda aa: «Puapilɛa naa, te la nɔ pɛ isɔɔ le vannda yoomuan lueiyo, mɛɛ la dimi.»

16O kon, mí Pol can, mó kpaa vannda a ba, mó dimi aa: «Niaa Israɛlla a niaa vanaa nɔ siòòŋii Hala-e-a, la yaŋ nilan. 17Hala Israɛlla hɛli fuɲaa naa mamaa. Mó tosa má kui telen nda va Esipte-o. O kon kɔɔli, mó soli nda o lɛŋnde len nin a kpaaya ndɔɔ. 18Mó dɔaw nda balo o lɛŋnde veselɛilen nin vɔsilan belehiɔɔlu. 19O kon kɔɔli, mó tɛɛmbuu vanaa-mangalaa-isɔɔa súúlan tan ŋɔmmɛw o lɛŋnde Kanaan-nden nin, mó ke nda lɛŋnde vanaa kan kɛ́ɔ. 20Kon kpow tosan o vɔsilan kɛmɛ lehiɔɔlu beleŋuɛɛnu bɛngu.

O kon kɔɔli, mó ke nda vanaa kialaa n'yamaa háá o telen Samiɛl-lo. 21O kon mí nda pila ɲuna masaa, mí Hala ke nda Sol, po Kis-o, fulaa o polale Bɛnyamɛn-nden nin, mí ndu tosa nda masalen coo vɔsilan belehiɔɔlu. 22O kon kɔɔli, mí Hala kɛɛ Sol, mó hɛli David, mó siinguu ndu masaa. Mí Hala tɛnda seile ndɔlen aa: ‹I saalun David po Yisai-yo, o ya hini kɔl-lo, o tosanin ɲɛ-ɲɛ ya yeema.› 23Mí Hala soli Yeesu, Vana Ciindiaa Israɛlla o polale ndɔlen coo mɛɛ ndu Hala dimi yɛ. 24Lɔ́ɔ́ pá mí Yeesu hun, mí Nsaŋ pɛɛku Israɛlla kpow maa a mangala kela nda vɔɔndo, mà sɔla yinɔɔ. 25Telen Nsaŋ va baala ndɔɔ siowvo-o, mó ɲuna aa: ‹O yiyan niaa nin, vana súú yɛɛ nɛ ya co yɛ? O co vana niaa co cumndo-o le ya co le. Ndu hunnin o ya kɔɔli, i co bɛɛ co ya timbi ndu samtalan o n'pelu le.›

26Puapilɛa nia, niaa fula o polale Abraham-nden nin, mí la nɔ siòòŋii Hala-e, mí la va naa tɛɛn nanu-a, naa Hala cuu sɔɛi cindɛi he ni. 27Vanaa va Yerusalɛm-nda a simlacia ndaa a sina Yeesu le, a bii sɔɔn vanaa-tɛɛngaa-diom Hala-a va nda dimullo o palɛi pɛngiaa yɛ́-yɛ́-i coo-on te. Kɛ má yaala Yeesu mɛɛ vanaa kan dimi yɛ le sɔɔn mun peeloo. 28A sɔla nɛi oo nɛi ndáà yaala ndu le piɔ́mndo sɔlaa le, kɛ nduyɛ, má ɲuna Pilate maa o viom vannda ma dii ndu. 29Telen nda cii ɲɛ-ɲɛ Sɛbɛ-Hala-o dimi a ndu o kɔɔ-o dimio, má tuisi ndu o yɔm singafilaa coo, má kumbu ndu o sɛiyo nin. 30Kɛ mí Hala mingi ndu yoomu fulaa vanvílɛ́iya tɛɛn. 31Mí vanaa kɔɛ ndu kɔɔli Yerusalɛm fulaa Kalile-a a ca ndu o palɛi bɔɔ-bɔɔ bɛngu. Nda co sisa seyaa ndɔa vannda o hɔl ni. 32Naa bɛɛ, Yoongu Kɛndɛ kon naa hin niaa tiiyallo ho ni: o Hala ndóò dimi le fuɲaa naa mamaa-o, 33o cii ndu peelu le naa a mingi o mingi Yeesu yoomu fulaa vanvílɛ́iya tɛɛn-ndo, naa cuavaa ndaa imamaa pɛɛn, maa mɛɛ o co o sɛvaa o Sɛbɛ condii lisɛi nin bolle ndii ŋiin yɛ aa:

‹Nɔm co po nuu ni!

Kandɔɔ hau, ya co fuɲa nɔm ni.›

34Mí Hala ndóò dimi maa o solinin ndu fulaa vanvílɛ́iya tɛɛn, kɔɔle ndɔlen le sinin te. Mó dimi aa:

‹I kenin niaa ɲɛm diandan

ya tuu le David-on, n vana nɔla laalanndo handɔɔ coo-on.›

35O co vɛlɛ o sɛvaa nɛɛ celen aa:

‹A melnin vana lo o lediom coo a nɔm-ndo siɔu o sɛiyo nin te.›

36Nduyɛ, David ciiyo Hala baalaa tosallo mɛɛ ndu Hala ndóò tuu yɛ, mó vu, má kumbu ndu fuɲaa ndɔa mamaa ikɛi, mó sia. 37Kɛ vana Hala mingi yoomu fulaa vanvílɛ́iya tɛɛn-ndo si le.

38-39Lelan, puapilɛa nia, mɛɛ mì la sina maa: o ndu Yeesu nin niaa tuɛi yoongu malɔɔ lahakio ni. Tɔŋ Moise-o tiwba niaa baŋaa le. Kɛ vana-vana laalan pɛ Yeesu, Yeesu baŋa ndu a hakila ndɔlan kpow. 40Lelan, la caa taw, yɔŋii ɲɛ vanaa-tɛɛngaa-diom Hala-a dimi a niaa o kɔɔ-o yɔŋnun niaa aa:

41‹La tofa vɔ, niaa vanaa pɛɛsaa pɛ haa nin-nda.

Kɔndɔfillo bii niaa mì la cuu,

kani i co dɛnɛ pum tosa o telen niaa,

hali vana ce dɛnɛ kon-ndo hun dimul bɛɛ niaa,

la laalannin te.›»

42Pol nda Barnabas fulaa o cɛi lekaando nin, mí vannda tɛɛlun nda maa a muungu vɛlɛ o paale pɛngiaale celen coo, mà cɔɔlu isɔɔ o sɔɔn mun coo. 43Bɔŋanndo cuvɔɔ, mí Yuifia bɔɔ-bɔɔ a vanaa sina Hala le-a, a va o kaannde Yuifia-a a del Pol nda Barnabas kɔɔli. Má suukan nda ndaa, má luei nda yoomuan maa a hiow laci a kɛndɛi Hala-e tiindanndo.

44Paale pɛngiaalen lepilten tiiyaa, vana dimi tuŋ maa mí vanaa va o kobio nin-nda kpede a cuungian le sɔɛi Maalii-e nilan yaŋɔɔ. 45Yuifia cɔu sɛ́lɛ́ kon, mí paŋalaa pia nda nin, má sɛɛngiaa Pol, má del ndu yeowlan. 46O kon, mí Pol nda Barnabas dimul nda a tiindanndo kpendekele aa: «Ndóò bɛnda mì naa n dimul niaa fɔlɔn sɔɛi Hala-e. Kɛ le mɛɛ niaa co ndi kɛɔ, mì niaa pila va cɔnɔnndo maa la co vanaa bɛnda mì la sɔla yoomu fɛɛn-fɛɛn te yɛ, n co mulin o vanaa co N'Yuifi le-a lo. 47Kani ɲɛ Maalii dimul naa-o co hoo ni aa:

‹I siinguu nɔm ɲɛ-tengaa vanaa-mangalaa-isɔɔa,

haliko ma yoo vannda cindaa

o lɛŋnden mɛɛlulan di.›»

48Vanaa co N'Yuifi le-a tueyɔɔ sɔɔn mun, má dɔawnun ɲaale, má can sɔɛi Hala-e candɔɔ. Mí vanaa Hala ndóò hɛli le cinda fɛɛn-fɛɛndo sɔlaa-a kpow a laalan. 49Mí sɔɛi Maalii-e i tiw o lɛŋnde len nin kpow. 50Kɛ mí Yuifia luei vanlaandua lebɛaa nɔ siòòŋii Hala-e-a a vanpiaandua va vannda simndan laci o kobi kon nin-nda sɔɔn nin. Má luɛi Pol nda Barnabas yɛlen tollo, má toaw nda o bungɛi ken nin. 51O kon, má koaŋ cundu va nda o n'pelu-o, má kɔannun Ikoniɔm. 52Mí kaandennda pia a ɲaaloo a á Hala Kɔl-Diandaa.

Currently Selected:

Dɛnnda kiilaa 13: BKG

Highlight

Copy