Dɛnnda kiilaa 12

A dii Nsaki, má mal Piɛr o kaasoo

1O telen kon, mí masaa Herɔde kandu vanaa pum yɛlen tollo o vanaa Hala-a tɛɛn. 2Mó tosa, má dii Nsaki, puapilɛ Nsaŋ-ndo a mɔɛi cɔwve. 3Mɛɛ o ce maa dɛnɛ kon hɛnan Yuifia, mó tosa vɛlɛ má bii Piɛr. O paale Kafo bulu toosian a lɛvɛn too len coo kon yɔŋnun ni. 4Mɛɛ o bii ndu, mó mal ndu o kaasoo, mó handu vanaa cɔwva a hiɔɔlu-hiɔɔlu kundalan tan hiɔɔlu le ndu hɔlten vaa coo. Ndóò yeema, te paale kafo-hiavaa-coo léè hiow pɛ, ndóò kelu ndu iyama vannda kpow o hɔl. 5Piɛr va o kaasoo, kɛ vanaa Krista-aa va Hala piɛiyo le ndu ɲɛkɛndɛi.

Mɛlɛkanɔ Hala-o soli Piɛr o kaasoo

6Icɔl Herɔde ndóò yeema le yamɛi ndɔɛi kiolɔɔ vannda o hɔl diimandɔɔ-o, Piɛr va o lɔan vanaa cɔwva nda ŋiɔn tɛɛn. O va o yɔlɔn, kpalilaa cumulaa va cumullo o dioo coo, 7mí mɛlɛkanɔ Hala-o fula o lepilɔɔ, mí ɲɛ-tengaa pia o cɛi kaaso kon nin. Mí mɛlɛkanɔɔ pilan Piɛr congoo, mó tindi ndu, mó dimul ndu aa: «Keleŋa cɔnɔn!» O kon mí yɔlɔn va ndu o ba-on n deli. 8O kon kɔɔli, mí mɛlɛkanɔɔ dimul ndu aa: «Baanun yáwlen mà yiinun samtalan.» Mí Piɛr tosa mɛɛ o dimi yɛ. Mí mɛlɛkanɔɔ dimul ndu vɛlɛ aa: «Vownun doma nɔm bɛndoo, mà hin ya kɔɔli.» 9Mí Piɛr fula o kaasoo, mó kɔa ndu kɔɔli. O yiyan te maa lekɛ́ndɛi ɲɛ mɛlɛkanɔɔ va kon tosaa-o yɔŋnun ni, kɛ mó yiyan maa vundulen o va cɔ kon ni. 10Má hiaw kunda tase vanaa va cumullo-a, o kon kɔɔli má hiaw o diinndɔɔ, má kɔ tiiyaa o dio icilin va le fulaa o bɛ́ɛ̀ o kobi kon nin-ndo. Mí dio kon kumbin a ba ndɔ. Má fula, má bii nɛiyo, mí mɛlɛkanɔɔ faŋan Piɛr o lepilɔɔ.

11O kon mí Piɛr sina ɲɛ yɔŋnun ndu-o, mó dimi aa: «I sina nihau maa toɲaa ni: Hala vem mɛlɛkanɔ ndɔɔ le ya solio o kpaaya Herɔde-o a ɲɛ Yuifia kpow ndáà nɔ o lakɔl le ya tosallo-o bɛngu ni.»

12Mɛɛ o bii yiyan kon bila, mó kɔa o Mari lo cɛinin, Mari kalaa Nsaŋ pɛɛn, Nsaŋ ndáà veelu aa Marke-o. Vannda va a cuungiannda lon taw, a va Hala piɛiyo. 13Ndóò lɔɔ dioo, mí buɛi laandoo pum, diolan Rɔde, hun le dioo kumbio. 14Mó sina Piɛr diomndo. O lo ɲaaloo dɔwnɔnndo, o yiyan ndɛ mò kumbi dioo le, mó muungu a kiltan le nda kɔlan dimullo maa Piɛr co o dio. 15Má dimul ndu aa: «Seemaa co nɔm o hɔl ni.» Kɛ mó baŋ kpíŋ aa ndu ni. O kon, má dimi aa: «Mɛɛ ɲinɛi ndɔɛi ni.» 16Piɛr ndu va dioo lɔɔ tuŋ. O mɛɛlulan, má kumbi dioo, má ca ndu, mí nda kpow dɔawnun kɔndɔfili. 17Mí Piɛr kpaa nda a ba, mó dɔwnun nda kona mɛɛ Mɛlɛka looku ndu soli o kaasoo yɛ. Mó dimul nda vɛlɛ aa: «La dimul Nsaki a puapilɛa tɔ̀a.» O kon kɔɔli, mó bii nɛiyo, mó kɔannun nɛɛ celen.

18A paale siaalen, mí sɛɛngian bɛndoo koma can vanaa cɔwva tɛɛn: ma va ɲuunianndo vellaa-velle le sinaa ba Piɛr hiow-vo. 19Mí Herɔde viam vannda le ndu nuwviaa, kɛ a seelun ndu le. O kon mó ɲuna kpalilla, mó dimul vannda le nda diwvo.

O kon kɔɔli, mí Herɔde faŋan Yuda, mó kɔa Sesaree, mó kɔ hivi telen pum lon.

Piɔ́m Herɔde-o

20Mí Herɔde tambu kɔl taw a vannda Tir a haa Sidɔn. Mí vanaa kan cɛlan le ndu komal-lo. Blastus, vana silaa ndɔɔ mala nda ni. O kon kɔɔli, má kɔa ndu ɲunaa lɛmɛɛ kɔlɲuloo muungu nda tɛɛn yɛ, kani o lɛŋnde masa kon nin ɲɛdiaa ndaa va fulaa ni. 21Paale nda cɛlan coo len tiiyaa, mí Herɔde vownun volɔɔla ndɔla lemasalan, mó cal o kpɛŋɛ lemasaa nin. Mó soaa o vannda lo. 22Mí vannda yonda aa: «Diom hala-o naa n co tueyɔɔ nuaa ni, o co diom vanaciee le.» 23Fɔ́ɔ́fɔ̀, le tùú ndu pila cennun maa Hala-o, mí mɛlɛkanɔ Hala-o lɔaa Herɔde, mí càá del ndu, mó vu.

24Kɛ sɔɛi Hala-e ndi va hiovɔɔ laci tuŋ. 25Barnabas nda Sol ciiyo baala ndaa tosaa, má mal Yerusalɛm, má muungun nda Nsaŋ-aa, o ndáà veelu vɛlɛ aa Marke-o.

Currently Selected:

Dɛnnda kiilaa 12: BKG

Highlight

Copy