Ɉaan 8
8
Wɛlikɛ nɛ̨ɛ̨nu
1Jesus ə li Olivə yee ɓa. 2Yələ wala piinɛ̨ɛ̨, ə həɠə ə pa Yálá hee pɛlɛ́ mu. Nu kpulu kɛnɛ̨ɛ̨ ə lɛɠɛ mą, ə hee yɛ di mąąkwɛli. 3Dɔ́n galamɔ̨ɔ̨ɠaa da Farisiɛ̨ɠaa di pa a nɛ̨ɛ̨nu ta bɔ, yii di gulɔ wɛli pɛlɛ mu. Di paa la Jesus pɔ, di ɉee nu kpulu lɔwai. 4Diɛ Jesus ɓa: «Mąąkwɛli kɛmun, di nɛ̨ɛ̨nui ŋɛ̨i kulɔ kpɔlɔ ŋɛ̨i wɛli pɛlɛ mu. 5Yaan, Moisə nwɔ tɔ́n hu, ə mo guɔ yɛ: nɛ̨ɛ̨nu taa ləi ŋɛ̨i, mąąnɛ̨ɛ̨ ku ɉɔɔ a kwɛni ə haa. Ə kaa kɛi lə?»
6Nuąi tii kɛi yili kɛi, di kɛ bɔ di Jesus hon vaa woo hu; əgɛ; di mąą ɲąba lɔ. Kɛlaa, Jesus ə nwun vilɛn, yɛ hɛɓɛ́ pɛ̨ɛ̨ nɔi ɓa a ɲeekpiɛ. 7Yii kɛa di lamu mąąnikɛi, ə nwun muhəɠə, yɛ diɛ: «Nui gaa ka lɔwai, hvo ta nɛ̨ŋɛ̨n ɉəɠə li, mąą nu ə kwɛni tɔlɔɔ həɠə, ə nɛ̨ɛ̨nui ŋɛ̨i hɔɔ la.»
8Ə pənə ə nwun vilɛn yɛ hɛɓɛ́ pɛ̨ɛ̨ nɔi ɓa. 9Yii kɛa di nwoo tii mɛ̨n di kɛi kulɔ tɛitɛi ə gɔwɔ tɔɔ nu pɔlɔ pɔlɔɠaa diɛ, ə lɛɛ a Jesus yaa tɔ̨nɔ̨ gbən. Nɛ̨ɛ̨nui tii nwɛi, ə lɛɛ laa. 10Jesus ə nwun muhəɠə, yɛ nɛ̨ɛ̨nui tii ɓa: «Nɛ̨ɛ̨nu, nuą ŋɛ̨i pa a yɛ́ ɓɛ, di wɔ? Nu ta hvo hɔlɔɓo li yii a ə́ kiti tee?»
11Nɛ̨ɛ̨nui tii ə Jesus woo pulu pənə yɛ mą: «Ną́mu, nuą tii kəlee daa li.»
Jesus yɛ mą: «Ɲą́ą́ gbɛli, və́ ə́ kiti teei. 'Li, kɛlaa, hvo kɛa nɛ̨ŋɛ̨n ɉəɠə.»
Jesus kaa a yɛnɛ̨ɛ̨ kɛɛpono
12Jesus ə pənə ə mo nuą tii kɛ laa diɛ, yɛ diɛ: «Gáá a yɛnɛ̨ɛ̨ kɛɛ pono. Nui a hvilɛn búlú, hva hiɛ kpinį hu. Kɛɛ ponoi a yɛnɛ̨ɛ̨ hva kpɛɛ nu pɔ a ɉɔlɔɓo.»
13 Farisiɛ̨ɠaa diɛ Jesus ɓa: «Ə kaa ə́ kpɔɔ mąą kɛla hvaa ɓoi? Ə wɔɔ kɛla hvaai tii hvo a tɛ̨ą.»
14Jesus ə di woo pulu pənə yɛ diɛ: «Ŋą́ą́ kɛi gbɔ́wɔ́ mąą kɛla hvaa ɓoi, yili kaa a tɛ̨ą. Mąąhɔlɔɓo, ɓɛi ŋą́ həɠə laa, da ɓɛi gaa lii laa, ŋą́ nąą kɔ́lɔn. Kɛlaa ka wɛi ɓɛi ŋą́ həɠə laa, da ɓɛi gaa lii laa, ka hvo nąą kɔ́lɔn. 15Ka wɛi, ka kiti tee lɔ yɛ pələi nuą kiliŋąhiɛ pələ kaa la; kɛlaa nwɛ́i, vá nu ta kiti tee. 16Ŋą́ mą kɛ gáá kiti teei, ŋą́ dee a tɛ̨ą. Mąąhɔlɔɓo, ɲą́ą́ dɔ̨nɔ̨ hvəə, nui dɔ́ɔ́, kwá yaa ɓə. 17Ka wɔ tɔ́n ɉɛɓɛ́ hu, bɛ̨ɛ̨i mun hɔlɔɔ diɛ mą: nu hveelɛ nwɔ kɛla woo kaa a tɛ̨ą. 18Ŋą́ gbɔ́wɔ́ mąą kɛla hvaa ɓo, Ną́n Yálá ŋɛ̨i dɔ́ɔ́, yaa kpɛli yɛ mą́ą́ kɛla hvaa ɓo.»
19Farisiɛ̨ɠaa di mo mą, diɛ mą: «Ə nąn gaa mį?»
Jesus yɛ diɛ: «Ka hvo gɔ́lɔ́n, kaa hvo Ną́n gɔlɔn. Ə li kɛ ka gɔ́lɔ́n, kai Ną́n gɔlɔn.»
20Jesus ə kɛ tɔɔni Yálá kɔ́ hɛn ɲąŋą kwɛlɛ yɛ nwooɠaa tii ɓo, ɓɛlɔwai ə kɛi nuą mąąkwɛli la Yálá hee pɛlɛ́ mu. Nu ta hvo pɛli ɉon ɉi, mąąhɔlɔɓo, ɲələ hvo ni kɛ ɉəli li.
Ka hva pɛli lii ɓɛi gáá lii laa
21Jesus ə mo nwɔ̨nɔ̨ diɛ, yɛ diɛ: «Gáá lii, ka káá pai gwɛ́lii, kɛlaa, ka káá pai haai ka kɛ nɛ̨ŋɛ̨n ɉu. Ɓɛi gáá lii laa, ka hva pɛli lii laa.»
22Ɉuifəɠaa diɛ mą: «Kɛi gaa moi mą: ‹Ɓɛi gáá lii laa, ka hva pɛli lii laai, akɛti yɛ mɔ̨ɔ̨ gbɔwɔ paa?›»
23Jesus yɛ diɛ: «Ka káá a lɔi mɛ̨i nuą, ɲą́ą́n gɛ́ ɓo a yələkɔlɔn ɉu mun. Ka káá a ɲɛnɛ̨ɛ̨ ŋɛ̨i hu nuą, kɛlaa, nwɛ́i, və́ a ɲɛnɛ̨ɛ̨ ŋɛ̨i hu mun da. 24Mɛ̨nįi gɛ gɛ́ kɛ kaa: ka káá pai haai ka kɛ nɛ̨ŋɛ̨n ɉu, akɛ ka wala laa na kaa diɛ: ‹Ɲą́ą́ ɓə gáá a Yaai Gaa Lɔ Laa›.»
25Diɛ Jesus ɓa: «Gbɛɛ ɓaa a yɛ́?»
Jesus ə di woo pulu pənə yɛ diɛ: «Yii kpɔ tii ŋą́ mo kaa tɔlɔɔ, ya ɓə gáá la. 26Yii vilɛn ŋąąi kaa, mɛ̨nį tamąą kaa laa, gɛ́ pɛli moi, ə ɓo a ka kiti tee mɛ̨nį. Mąąhɔlɔɓo, nui dɔ́ɔ́ gaa a tɛ̨ą. Yii ŋą́ mɛ̨n yaa tii na, ya ɓə ŋą́ naa həli yɛnɛ̨ɛ̨ nuą diɛ.»
27Nuą tii di hvo gbaɠala kaa akɛ: Nąn Yálá ka tii ə kɛi mąą mɛ̨nį ɓo diɛ. 28Jesus, yɛ diɛ: «Ɓɛlɔwai ka káá pai Nu Lon tɛi la yələi, nąąlɔwai ɓə ka káá pai gɔlɔn ɉii la, kaa kɛ diɛ: Ɲą́ą́ ɓə gáá a Yaai Gaa Lɔ Laa. Ka káá pai gɔlɔn ɉii kaa diɛ: Və́ mɛ̨nį ta lɔpee kɛi gbɔ́wɔ́ ɓa, ɛlɛɛ, yii Ną́n ə mąąkwɛli mą, ya ɓə ŋą́ mo. 29Nui dɔ́ɔ́, gaa bɔ́, hvo kɛ ɲą́ą́ dɔ̨nɔ̨ nɛ́ɛ́ li. Mąąhɔlɔɓo, niiɓa lɔ ɓə gáá gɛi a yələ kəlee.»
30Ɓɛlɔwai Jesus ə kɛi nwooɠaa tii ɓo la, nu tamąą di laa na.
Lɛɛ gbɔwɔ ɓa da luwɔlaa
31Ɉuifəɠaai laa Jesus la, ə mo diɛ, yɛ diɛ: «Akɛ ka kanąn nwɔ́ liɛwooɠaa diɛ, ka káá kpɔ a nwɔ́ kalan nɛa leeleeɠaa. 32Ka káá pai tɛ̨ą kɔ́lɔn ɉii, dɛ̨ą tii kaa pai ka nwun mąąɓoi.»
33Nuą tii diɛ Jesus ɓa: «Ku kaa a Abrahamə huwu; ku hvo ta luwɔlaa kɛ li nu ta yee mu. A kɛ pələ kɛ ləi, yɛ kɛ diɛ: ku kaa pai kɛɛi ku gbɔwɔ ɓa?»
34Jesus yɛ diɛ: «A tɛ̨ą kpɔ-kpɔ gáá moi kaa, nɛ̨ŋɛ̨n ɉəɠəi, gaa, a nɛ̨ŋɛ̨n nwɔ luwɔ. 35Luwɔ kaa a li mun, hva lɛɛ pɛlɛ́n; nu lon nwɛi, gaa a bɛlɛ́n non a yələ kəlee. 36Akɛ Nu lon a ka nwun mąąɓo, ka kɛ kpɔ a lɛɛ gbɔwɔ ɓa nuą leelee. 37Ŋą́ gɔlɔn gbɔ gɛ́ diɛ: Abrahamə huwu ɓaa a kaa, kɛlaa, ka hvilɛn ŋąąi búlú báá mɛ̨nį ɓa; mąąhɔlɔɓo, nwóó wɛli hvo kaa. 38Yii ŋą́ mɛ̨n Ną́n na, ya ɓə gáá moi kaa, Yii kaa kpɛli ka mɛ̨n ka nąn na, ya ɓə ka káá gɛi.»
39Di nwoo pulu pənə, diɛ mą: «Ku kalaɓɔlɔ ɓaa Abrahamə.»
Jesus yɛ diɛ: «Akɛ Abrahamə huwu ɓaa a kaa, ka Abrahamə túwɔ́ pələ həɠə. 40Kɛlaa, pələi mąn ŋą́ą́ tɛ̨ą ɓo la kaa, yii ŋą́ mɛ̨n Yálá la; ka hvilɛn ŋąąi lɔ búlú kaa ka báá. Abrahamə hvo kɛ túwɔ́ li tii. 41Kɛlaa, ka wɛi, ka nąn dúwɔ́ pələ ka ŋɛ̨i ka káá gɛi.»
Di nwoo pulu pənə diɛ mą: «Ku hvo ɓaa a wɛli lonnii, ku nąn gaa lɔ tɔ̨nɔ̨, ya ɓaa a Yálá.»
42Jesus yɛ diɛ: «Akɛ ka nąn ɓaa a Yálái, ka li nwɛ́li la kɛ. Mąąhɔlɔɓo, ŋą́ həɠə Yálá pɔ, naa hu ɓə gáá la ɓɛ. Və́ kɛ pa li gbɔ́wɔ́ ɓa, kɛlaa, yaa tii ɓə dɔ́ɔ́. 43Lə mɛ̨nį ɓa ka hvo nwóó ŋąą kai? Mąąhɔlɔɓo, ka hva pɛli ɉu gbɛɛ ɓoi. 44Ka nąn ɓaa a nąnį, niiɓa ɓə ka káá bɔ kaa gɛ. Ə həɠə kpɔ yɛnɛ̨ɛ̨ kɔ́wɔ tɔɔ yələ ɓa, paa lɔ ɓə nwɛli kaa mą. Hvo ta tɔɔ li tɛ̨ą pələ mɛ̨i, mąąhɔlɔɓo, hvo tɛ̨ą kɔ́lɔn. A kɛi lɛɛ mɛ̨nį ɓo, a gulɔ gbɔwɔ kɛ pələ hu, mąąhɔlɔɓo, gaa a lɛɛmun, yɛ ɓo a lɛɛ nąn. 45Nwɛ́i, tɛ̨ąi ŋɛ̨i gáá moi kaa, ya ɓə ka hvo laai la ná. 46Gbɛɛ ɓə a ta ɉón gɛ́ nɛ̨ŋɛ̨n ɉəɠə? Akɛti, lə mɛ̨nį ɓa ŋą́ą́ kɛi tɛ̨ą ɓo kaa, ka hva laa ná? 47Nui gaa a Yálá nwɔɔ, a nwəli tɔɔ Yálá woo ɓa. Gɛ mɛ̨nį ka hvo a Yálá nwɔɔɠaa, ya ɓə gɛi ka hvo ka wəli tɔɔi la nwóó ɓa.»
Jesus da Abrahamə
48Ɉuifəɠaa di nwoo pulu pənə, diɛ mą: «Akɛ tii, tɛ̨ą kaa ku pɔ, kuɔ kɛ yɛ: Samari mun mąą a yɛ́, ɛlɛɛ, ɲį́nɛ̨n gaa ə́ pulu.»
49Jesus yɛ diɛ: «Kpaa! Ɲįnɛ̨n və búlú. Kɛlaa, gáá Ną́n mąąwiɛi; kaan, kaa mɛ́lɛ́kpɛɛmą́ą́. 50Və́ pa li gbɔ́wɔ́ nwɔ mąąwiɛ kwɛli. Nu ta kaa laa yɛ pa nwɔ́ mąąwiɛ tɛɛi, ya ɓə pai dɛ̨ą ɓoi. 51Gáá tɛ̨ą ɓoi kaa, nui a nwóó hon, hva haa.»
52Ɉuifəɠaa diɛ mą: «Kwaa gɔlɔn kuɔ diɛ: ɲį́nɛ̨n gaa ə́ pulu. Abrahamə aa haa, Yálá kwəi mɛ̨nį hukulɔ nuą diɛ kpɛli daa haa; yili ɓə ya kɛ diɛ: ‹Nui a nwóó hon hva haa kɔ́lɔn a yələ ta!› 53Ku kalaɓɔlɔ Abrahamə aa haa, gaa ə́ kwəi ə́ pɔlɔ-pɔlɔɔi ə́ tɛɛ mą? Yálá kwəi mɛ̨nį hukulɔ nuą kpɛli mąn daa haa, ə́ kaa ə́ kpɔɔ kaai yɛ gbɛɛ?»
54Jesus ə di woo pulu pənə yɛ diɛ: «Ŋą́ kɛi gbɔ́ɔ́ mąąwiɛ ɲą́ą́ gbíníí, nwɔ́ɔ́ mąąwiɛ hva kɛ a hɛn da. Ną́n mə gaa mą́ą́wiɛi, a yaa ŋɛ̨i ka káá kɛi diɛ: ‹Kuɔ Yálá lii.› 55Ka hvo gɔlɔn, kɛlaa, nwɛ́i ŋą́ gɔlɔn. Akɛ ŋą́ kɛ diɛ: ‹Və́ Ną́n gɔlɔn›, ŋą́ kɛ a lɛɛ mun yɛ bələi ka káá la. Kɛlaa, ŋą́ gɔlɔn, ɛlɛɛ, ŋą́ nwoo hon. 56Ka kalaɓɔlɔ Abrahamə kwəinɛ̨ɛ̨ mɛ̨nį ɓa kɛ, ə ɲɛ̨i tɔɔ mą́ą́; kɛlaa, ə mą kɛ tii, ə gáá, gwəi ə nɛ̨ɛ̨.»
57Yili ɓə gɛ, Ɉuifəɠaa diɛ mą: «Ə kaa kwɛlan və kpɛli nii kɛ li pow lɔɔli, yɛ kɛ diɛ ə́ Abrahamə kaa!»
58Jesus yɛ diɛ: «A tɛ̨ą kpɔ-kpɔ gáá moi kaa, gɛɛ Abrahamə hvo kɛ hɔlɔɓo a lon, ɲą́ gbɛa kɛ laa.»
59Nąąlɔwai, di kwɛni həɠə diɛ kɛ di Jesus hɔɔ la, kɛlaa, ə now ə kulɔ Yálá hee pɛlɛ́ mu.
Currently Selected:
Ɉaan 8: BKPDCG
Highlight
Share
Copy
Want to have your highlights saved across all your devices? Sign up or sign in
