Ɉaan 21
21
Jesus ə gbɔwɔ lɛ nwɔ kalan nɛa mɛ̨ihveelɛ ɓa
1Yili pulu, Jesus ə gbɔwɔ lɛ nwɔ̨nɔ̨ nwɔ kalan nɛai diɛ Tiberiadə gboloyá#21.1 Tiberiadə gboloyá: Galile bówa laa ta li kɛ. kwɛlɛ. Bələi ə gbɔwɔ lɛ la bələ ka. 2Simɔn Piɛrə, Tomasə yai da kɛ mą: Didimə, Natanaɛlə yai həɠə Kana Galile lɔi hu, Zebede lon ɉinąą hveelɛi da kalan nɛa hveelɛ di kɛ di kee pɔ. 3Simɔn Piɛrə yɛ diɛ: «Gáá lii hɔ̨nwɔ̨lee kpɛi.»
Diɛ kpɛli diɛ mą: «Gu kəlee ɓə lii.»
Di li, di tɛ kələn da hu; di yii kpɔ hɔ̨nwɔ̨lee kpɛi, di hvo hɛn da hɔlɔɓo. 4Yələ wala pɔ, Jesus ə kɛ tɔɔni gahin ŋą. Kɛlaa, galan nɛa di hvo kɛ gɔlɔn diɛ kɛ Jesus li. 5Jesus yɛ diɛ: «Lɛapɛlɛɛ! Kaa hɔ̨nwɔ̨lee hon?»
Diɛ mą: «Kpaa-o!»
6Jesus yɛ diɛ: «Ka diŋɛ̨n bili gələn mamįiyee hu pələ, ka káá pai da hɔlɔɓoi.»
Di diŋɛ̨n bili, di hvo kɛa pɛli ɲalai ɉɔ̨nwɔ̨lee kɛnɛ̨ pələ ɓa ɉu. 7Galan non ti nwɛli ə kɛ Jesus ɓa, yɛ Piɛrə ɓa: «Ną́mu Jesus ka tii!»
Yii lɔ Piɛrə ə mɛ̨n diɛ kɛ mą: «Ną́mu ka tii», aa mą nwɔ həɠəi həɠə aa doo gwaną mąąhɔlɔɓo, ə kɛ a gbuwulu, ə too ɲái. 8Galan nɛa yiiɠaa tii di pa a gələn gbukpu ɓa, di diŋɛ̨n ɲąla, naahvɛɛ a hɔ̨nwɔ̨lee; mąąhɔlɔɓo, di mąą hvo kɛ kwɛa li gbukpu ɓa, ə kɛ lɔ a yee laa mą nwun veelɛ ɲɔ̨nwɔ̨mą. 9Yii kɛa di kulɔ gələn ɉu di hvilɛn, di nwɔ̨n gaa ɲá kwɛlɛ, hɔ̨nwɔ̨lee laa ŋą, lɛɠɛ laa gwɛlɛ. 10Jesus yɛ diɛ: «Ɉɔ̨nwɔ̨lee ti ka ɉon, ka paa a da.»
11Simɔn Piɛrə ə tɛ gələn ɉu, ə diŋɛ̨n ɲąla ə bu nɔi ɓa, hɔ̨nwɔ̨lee kpɛa-kpɛa nwun dɔ̨nɔ̨ yee lɔɔli kɔ́w haaɓa yɛ ɓo ɉu. Bələi mąn tii ɉɔ̨nwɔ̨lee tamąąi kɛ la, diŋɛ̨n ɲɛli ta hvo tee ɉu. 12Jesus yɛ diɛ: «'Ka pa ka kɔ̨nɔ̨n mįi.»
Galan nɛai tii dɔ̨nɔ̨ kpɛli hvo pɛli mąąnikɛi, di gɔlɔn gea kɛ, diɛ Jesus li. 13Nąąlɔwai, Jesus ə nɛɠɛ da ɉɔ̨nwɔ̨lee həɠə, ə ŋąąkwɛlɛ diɛ.
14Ə həɠə Jesus nwun ŋąą ɓa haaɓɛlaa lɔwai, gɛɛ gbɔwɔ lɛi nwɔ kalan nɛa diɛ ɉaaɓa nąą ka ti, yɛ gbɔwɔ lɛ nwɔ kalan nɛai diɛ.
15Di kpɛɛ kɛa a di kɔ̨nɔ̨n mį́ɛ, Jesus yɛ mą Simɔn Piɛrə ɓa: «Simɔn Ɉaan lon, nwɛ́li kaa yɛ́ ə tɛɛ ə́ ɓɛlaa diɛ?»
Ə nwoo pulu pənə yɛ mą: «Ną́mu, ə́ gɔlɔn yɛ́ ə́ wɛli kaa mą́ą́.»
Jesus yɛ mą: «Nwɔ́ ɓɛlaa lonnii laahɔnmo.»
16Veelɛnąą, Jesus yɛ Simɔn ɓa: «Simɔn Ɉaan lon, nwɛ́li kaa yɛ́?»
Simɔn yɛ mą: «Oowei! Ną́mu ə́ gɔlɔn gbɔ yɛ́ ə́ wɛli kaa mą́ą́.»
Jesus yɛ mą: «Kɛ́ a nwɔ́ ɓɛlaaɠaa mɛ̨i kaamun.»
17Ɉaaɓanąą, yɛ mą: «Simɔn Ɉaan lon, nwɛ́li kaa yɛ́?»
Piɛrə kwəi hvo nɛ̨ɛ̨, mąąhɔlɔɓo, Jesus aa mąąnikɛ gee mɛ̨i hveelɛ, ɉaaɓanąą ka ti, yɛ kɛ mą: «Nwɛ́li kaa yɛ́?» Simɔn ə Jesus woo pulu pənə yɛ mą: «Ną́mu, ə́ mɛ̨nį kəlee kpaɠala kɔ́lɔn, ə́ gɔlɔn gbɔ yɛ́ diɛ, ə́ wɛli kaa mą́ą́.»
Jesus yɛ mą: «Nwɔ́ ɓɛlaaɠaai laahɔnmo.» 18Jesus yɛ mą: «Gáá moi yɛ́ a tɛ̨ą, ɓɛlɔwai ə́ kɛ la a hulɔnon, ə́ kɛi yala tɔɔ, ɓɛi lɔpee ya kɛ bɔ, yɛ li laa, kɛlaa, ya pa pɔlɔi, ə́ kaa pai ə́ yee haŋąi, nu takpɛli ə yala tɔɔ ə́ hąą, ɓɛi hvo bɔ, yɛ li laa a yɛ́.» 19Ə yili ɓo tii, ə gɛ bələi Piɛrə kaa pai haai la a Yálá mąąwiɛ pələ, yɛ nɛ mą. Yili pulu, yɛ mą: «Hvilɛn búlú.»
Galan non nwɛli ə kɛ Jesus ɓa nwɔ kɛla woo ka
20Galan non nwɛli ə kɛ Jesus ɓa, a yai kɛ tunwɔ̨n ŋąą kɛ Jesus kɛŋɛ la ɓɛlɔwai di kɛi laa mį́i kɛ la, yɛ kɛ Jesus ɓa: «Gbɛɛ ɓə pai ə́ lɔwɔ́tɔɔi?» Piɛrə ə tinɛ̨n, ə gaa yɛ pa. 21Ɓɛlɔwai Piɛrə ə gaa la, yɛ Jesus ɓa: «Nui ŋɛ̨i yaan, lə mɛ̨nį ɓə pai kɛi la?»
22Jesus ə nwoo pulu pənə yɛ mą: «Ŋą́ kɛ bɔ gɛ́ ə lɛɛ yɛnɛ̨ɛ̨ ə lɛɛ la ɉu ŋą pənə ŋį́ pa, ə́ wɔ lə mɛ̨nį ɓə ɉu? Ə́ wɛi, hvilɛn nɔ búlú.»
23Nwoo tii ɓə galan nɛa di daɠa-taɠa di kee lɔwai, diɛ kɛ mą: Jesus yɛ galan non tii hvo pai haai. Yaan, hvo kɛ kɛ li Piɛrə ɓa: «Galan non tii hvo pai haai.» Kɛlaa, yaamun, ə kɛ mą: «Akɛ ŋą́ kɛ bɔ ə lɛɛ yɛnɛ̨ɛ̨ ə lɛɛ ɉu ŋį́ pənə ŋį́ pa, ə́ wɔ lə mɛ̨nį ɓə ɉu?»
24Galan non tii ɓə mɛ̨nįɠaa ŋɛ̨i mąą kɛla woo ɓoi, ɛlɛɛ, yɛ bɛ̨ɛ̨. Ku laai na, kuɔ diɛ: mɛ̨nįɠaa ŋɛ̨i ə mo, gaa a tɛ̨ą.
Nwoo laa kulɔ
25Jesus ə mɛ̨nį takpɛliɠaa tamąą kɛ, akɛ kwa gəlee tɛitɛi pɛ̨ɛ̨ kɛ, nwɔ́ɔ́ kwəi, yɛnɛ̨ɛ̨ nąą kəlee hva pɛli kɛ ɉɛɓɛ́ mu.
Currently Selected:
Ɉaan 21: BKPDCG
Highlight
Share
Copy
Want to have your highlights saved across all your devices? Sign up or sign in
