Ɉaan 19
19
1Nąąlɔwai, Pilatə ə mo di Jesus kɛlɛ a galakpa. 2Ɉolahiɠaa di ɲąąlən gɛ a kálán di ɉee nwun ma yɛ tɔɔ ɓɔlɔ, di ɓɛlɛkpɛɛ mąą həɠə too gwaną. 3Di lɛɠɛ kɛa ma diɛ kɛ mą: «Ɉuifəɠaa di wɔ tɔɔmun, ə́ yii kpɛli!»
Yili pulu diɛ nwun nowa.
4Pilatə ə pənə ə kulɔ ɲɛ̨nɛ̨ɛ̨ yɛ Ɉuifəɠaa diɛ: «'Ka tɔɔ, ŋį́ paa la, ə gɛ, ka gɔlɔn kaa və́ hɔn nɔpee ta kaa li mą.»
5Di kulɔ a Jesus ɲɛ̨nɛ̨ɛ̨, ɲąąlən gálán ɉeɛ nwun ma, mɛlɛkpɛɛmąą hələi tii yɛ ɓo gwaną. Pilatə yɛ diɛ: «Nu kpɔ ka.»
6Yii lɔ Ɉaláá laa həli nuą da di wɔ galidəɠaai di Jesus kaa, di kəlee di tómą diɛ kɛ mą: «'Gbanwo kolɔwa ɓa, 'gbanwo kolɔwa ɓa.»
Pilatə yɛ diɛ: «Ka ɉon kaa kpinįi ka gbanwo kolɔwa ɓa, nwɛ́i, və́ hɔn nɔpee ta kaa li mą.»
7Ɉuifəɠaa diɛ mą: «Tɔ́n gaa ku yəi, yɛi: mąąnɛ̨ɛ̨ nu taaləi ŋɛ̨i ə haa, mąąhɔlɔɓo, aa gbɔwɔ kɛ a Yálá Lon.»
8Nwoo tii mɛ̨n Pilatə ə mo, ə ɲɔ̨w kpɔ kɛnɛ̨. 9Pilatə ə pənə ə lɔ yɛ Jesus ɓa: «Mįnɛ̨ ɓə ə́ həɠə laa?»
Kɛlaa Jesus hvo kpɛli nwoo pulu pənə.
10Pilatə yɛ Jesus ɓa: «Hvó nwóó pulu pənəi? Hvó gɔlɔn yɛ kɛ ŋą́ pɛli ŋį́ ə́ lɛɛ ə́ kpɔɔ ɓa, a wala kɛ tii, ŋį́ ə kpanwo kolɔwa ɓa?»
11Jesus ə́ nwoo pulu pənə yɛ mą: «Hvá pɛli kɛ mɛ̨nį lɔpee ta kɛi a ɲą́ą́, akɛ hvo həli li həɠə yələi. Yili ɓə gaa mą, nui nɔ́wɔ́ tɔɔ yɛ́, nwɔ nɛ̨ŋɛ̨n kɛnɛ̨i ə́ nwɛi ɓa.»
12Ə həɠə nąąlɔwai ɓa, Pilatə ə kɛi Jesus kulɔ pələ kwɛli di yəi. Kɛlaa, Ɉuifəɠaa di kɛi kpɔlɔ tómą diɛ kɛ mą: «Akɛ yá tee ɉulɔnui ŋɛ̨i ɓa, Sesarə mɛlan vaa a yɛ́. Mąąhɔlɔɓo, nui lɔpee a gbɔwɔ kɛ a tɔɔmun, Sesarə ɲowo li.»
13Nwooi tii mɛ̨n Pilatə ə mo, ə Jesus kulɔ ɲɛnɛ̨ɛ̨, Pilatə kpinįi ə li ə hee kiti tee kpəlin ɉu, ɓɛi da kɛ mą: kɛɛnąą muhəɠɛɛ, Ɉuifə woo hu, da kɛ mą: Gabata. 14Vóloi tii di kɛi mɛ̨nį kɛ la, ə kɛ a pakə hɛli mąąyii. Hvoló tɛɛ nwun ma kɛa, Pilatə yɛ Ɉuifəɠaa diɛ: «Ka wɔ tɔɔmun ka!»
15Di kəlee di tómą diɛ mą: «Ə haa! Ə haa! 'Gbanwo kolɔwa ɓa.»
Pilatə yɛ diɛ: «Ɲį́ ka wɔ tɔɔmun gbanwoi kolɔwa ɓa?»
Ɉaláá laa həli nuą kpɛa-kpɛa di nwoo pulu pənə diɛ mą: «Tɔɔmun da kpɛli hvo ku yəi, ə kulɔ Sesarə pulu.»
16Yili ɓə gɛ Pilatə ə Jesus tɛɛ di pɔ gbanwo mɛ̨nį ɓa kolɔwa ɓa.
Jesus kpanwo mɛ̨nį
(Matie 27.32-44; Markə 15.21-32; Lukə 23.26-43)
Nuą di ɉon gɛa. 17Jesus ɓə nwɔ kolɔwa həɠə, di kulɔ la taai, diɛ li ɓɛi da kɛ mą: Nwun gonon ɲee ɓa (Ɉuifə woo hu, da kɛ mą: Gɔlgota). 18Nąą ɓə di gbanwo laa kolɔwa ɓa, da mɛ̨nį ɲɔ̨n gɛ nuą hveelɛ, dɔ̨nɔ̨ ə ɓo ɲee yiihu, dɔ̨nɔ̨ ə ɓo ɲee yiihu.
19Pilatə ə hɛɓɛ́ ta pɛ̨ɛ̨ di gbanwo Jesus nwun mɛ̨i. Ɉɛɓɛ́i tii pɛ̨ɛ̨i kɛ diɛ kɛ mą: «Jesus Nazarɛtə mun Ɉuifəɠaa di wɔ tɔɔmun.» 20Ɉɛɓɛ́i tii, Ɉuifəɠaa tamąą di kɛi mo, mąąhɔlɔɓo, ɓɛi ŋɛ̨i di Jesus kpanwo laa kolɔwa ɓa, naa lɛɠɛɛ kɛ taai ɓa; ɛlɛɛ, di bɛ̨ɛ̨ a hį́i woo haaɓa: Hebreu woo, Latɛn woo da Grɛkə woo. 21Ɉuifəɠaa di wɔ haláá laa həli nuą kpɛa-kpɛa diɛ Pilatə ɓa: «Hvó bɛ̨ɛ̨ yɛ́ kɛ mą: ‹Ɉuifəɠaa di wɔ tɔɔmun›, kɛlaa, yá kɛ mą: ‹Nui ŋɛ̨i yɛ gaa a Ɉuifəɠaa di wɔ tɔɔmun.›»
22Pilatə yɛ diɛ: «Yii ŋį́ bɛ̨ɛ̨, bɛ̨ɛ̨ li!»
23Ɓɛlɔwai gɔ́kulááɠaa di Jesus kpanwo la kolɔwa ɓa, di nwɔ həɠəɠaai həɠə di ŋąąkwɛlɛ ɉu nąąn, di tɛitɛi kəlee di da hɔlɔɓo; ə lɛɛ a wɔ həɠə kwɛa tɔ̨nɔ̨ yii kɛ ɉɔlɔɔn bɔɔ hvo kɛ mą, ə həɠə gɔn ma, ə lɛɛ la ɉu ə yɛɛ gɔwɔ la. 24Ɉolahiɠaa diɛ di kee ɓa: «Mąą hvo nɛ̨ɛ̨li gu hvo ɉu ɓɛla, kɛlaa, ka gu gɔ́ a kpɛɛn.»
Yili ə kɛ tii ə gɛ, mɛ̨nįi Yálá laawoo hɛɓɛ́ ə mo bɔ mɛ̨nį ə kɛ, yai ə kɛ mą:
«Di mą́ą́ həɠəɠaa ɲąąkwɛlɛ di kee lɔwai,
Di nwɔ́ həɠə muhəɠəi kɔ́ a kpɛɛn.»
Bələ ɓə gɔ́kulááɠaa di gɛ la.
25Jesus nwɔ kolɔwa kwɛlɛ, Jesus nee ə kɛ laa tɔɔni da nee gaayɔwɔ Mari yai kɛ a Klopasə nɛ̨ą, da Mari Magdala mun. 26Ɓɛlɔwai Jesus ə nee kaa la tɔɔni, nwɔ kalan non ŋɛ̨i nwɛli ə kɛ mą gwɛlɛ, Jesus ə mo nee ɓa, yɛ mą: «Nɛ̨ɛ̨nu! Ə́ lon ga.»
27Yɛ nwɔ̨nɔ̨ nwɔ kalan non ma: «Ə́ lee ka.»
Ə həɠə kɛa ɲələ ɓa, galan non tii ə Mari həɠə da yaa di li.
Jesus haa mɛ̨nį
(Matie 27.45-56; Markə 15.33-41; Lukə 23.44-49)
28Yii kɛa Jesus ə gaa yɛ mɛ̨nį kəlee ɲąą aa pɛli, əgɛ mɛ̨nįi Yálá laawoo hɛɓɛ́ ə mo bɔ mɛ̨nį kɛ, yɛ diɛ: «Kpələ wɛli aa ɉón.»
29Ya-ləɠi ta ə kɛ laa, naahvɛɛ a lɔɔ kpona, gɔ́kulaa di isopə kpinįn gbɔn da ɓa, di nɔ nɔɔ kpona hu, di nɛɠɛ naaləi. 30Yii kɛa ə nɔɔ kponai tii ta kpələ, yɛ diɛ: «Mɛ̨nį kəlee aa pɛli ɉu. Ə nwun vilɛn, nįį ə kulɔ.»
Di Jesus hɔɔ goo pɛlɛi a kpala
31Yɛ bələi volói tii ə kɛ la a Ɉuifəɠaa di wɔ hɛli mąąyii yələ. Di hvo kɛ bɔ, nu powa hvo lɛɛ kolɔwa ɓa a túwɔ́ hvóló. Volói tii ə kɛ di ɲɛ̨i ɓa a hvóló mąąwia, pakə hɛli mąą mɛ̨nį ɓa. Di mo Pilatə ɓa diɛ mą: nuą ŋɛ̨i kolɔwa ɓa, mo di di kɔ́wɔɠaa yali, di di kulɔ nwulu ɓa. 32Ɉolahiɠaa di nu tɔlɔɔ da veelɛnąą kɔ́wɔɠaa yali, diɛi ŋɛ̨i di da Jesus ni di kpanwo kolɔwa ɓai 33Di həliɛ kɛa Jesus ɓa, di gaa diɛ mą aa gbɛa haa, di hvo gɔwɔ yali. 34Kɛlaa, gɔ́kulaa tɔ̨nɔ̨ ə Jesus hɔɔ bɛlɛi a kpala, ŋąmą da ya di kulɔ. 35Nui mɛ̨nįi ŋɛ̨i nąą kaa, ya ɓə mąą kɛla hvaa ɓoi; mɛ̨nįi tii yaan ə mo, gaa a tɛ̨ą. Ə gɔlɔn yɛ tɛ̨ą ka tii ə mo, ya ɓə a gɛ kaa kpɛli ka laa na. 36Yaan, mɛ̨nį tii ə kɛ, ə gɛ, mɛ̨nį Yálá laawoo hɛɓɛ́ ə mo bɔ mɛ̨nį ə kɛ, yai ə kɛ mą: «Gɔw tɔ̨nɔ̨ kpɛli hu hvo pai yalii.» 37Yálá laawoo hɛɓɛ́ nąą takpɛli kaa laa, yɛ kɛ diɛ: «Nui ŋɛ̨i ka ɉɔɔ bɛlɛi a kpala, ka káá pai pənəi ka gaa.»
Di Jesus powa loo
(Matie 27.57-61; Markə 15.42-47; Lukə 23.50-56)
38Mɛ̨nįɠaa tii kəlee tɛɛ pulu, Ɉosɛfə Arimate mun, ə kɛ a Jesus nwɔ kalan non ta loo hu, mąąhɔlɔɓo, ə kɛi ɲɔ̨w Ɉuifə nwun nąmįną diɛ ya ɓə li, ə Jesus powa hu hvɛli Pilatə ɓa. Pilatə ə hvaa mą. Ɉosɛfə ə li, ə bowa kulɔ nwulu ɓa. 39Nikodɛmə tii ta li Jesus pɔ a kpinį, yaa kpɛli ə mąątí wulɔ kun-nɛɛ hveelɛ humu (mirə wulɔ da alowɛsə wulɔ) a gee, ə kɛ a tuku tɔ̨nɔ̨ da gbulɔ. 40Ɉosɛfə da Nikodɛmə di Jesus powa mąą kpinįn gɛ a həɠə, di wulɔ kun-nɛɛɠaa pu mą, yɛ bələi Ɉuifəɠaa da gɛ la di wɔ nu powa loo mɛ̨nį hu. 41Ɓɛi tii di Jesus kpanwo laa kolɔwa ɓa, yɛa ta ə kɛ laa, kámą təɛ nįnɛ̨ ə kɛ laa, di hvo ni kɛ nu laa li ɉu. 42Ɉuifəɠaa di wɔ hɛli ɲɛ̨i tɔwɔ pɛli mɛ̨nį ɓa, da gámąi tii mąą lɛɠɛ pələ diɛ, di Jesus powa loo laa.
Currently Selected:
Ɉaan 19: BKPDCG
Highlight
Share
Copy
Want to have your highlights saved across all your devices? Sign up or sign in
