Ɉaan 16
16
1«Ŋą́ mɛ̨nįɠaa tii kəlee ɓo kaa, ə gɛ, ɲąąhɛn mɛ̨nį a həli kaa, ka hvo pa laa na pələ lɛɛ. 2Di kaa pai kɛi ka kpɛi Yálá hvɛli pɛlɛ́ɠaa mu; yələ ta kaa pai ɉəlii, nui a ka ta paa, yɛ kɛ gaa Yálá mąąwiɛi ka tii. 3Di kaa pai kɛi túwɔ́i tii, mąąhɔlɔɓo, di hvo Ną́n gɔlɔn, di hvo nwɔ̨nɔ̨ ɲą́ą́ gɔ́lɔn. 4Gáá yiliɠaa ɓoi tii kaa, ə gɛ, nąąlɔwai a həlii, kaa ka kiliŋąhiɛ nwóóɠaa diɛ.
«Və́ ni kɛ yili ɓo li kaa a gɔwɔ tɔɔ yələ, mąąhɔlɔɓo, ŋį́ kɛ ni ka pɔ.»
Kili-Mąąhəɠɛɛ kɛ kólo
5«Yiihu kɛa, nui dɔ́ɔ́, gáá lii bɔ, kɛlaa, ka hvo kɛa mą́ą́nin kɛ, kaa kɛ mą́ą́: ‹Mįnɛ̨ ɓə ə́ kaa lii laa?› 6Nwoo ŋɛ̨i ŋį́ mo kaa, aa ka liihɛlɛn. 7Kɛlaa, ə mą kɛ tii, gáá tɛ̨ą ɓoi kaa, yii viɛlaɓoɔ ka mąą mɛ̨nį ɓa, ya ɓaa: Hvo kɛli ŋį́ li. Yaan, a kɛ ŋą́ wala li, ka mąąkɔ̨nwɔ̨mun hva pɛli pai. Kɛlaa yaamun, ŋą́ li, gáá lii dɔɔi ə pa ka pɔ. 8Ɓɛlɔwai gaa pai pai la, ya ɓə pai tɛ̨ą lɛi nuą diɛ, yii hvilɛn na nɛ̨ŋɛ̨n mɛ̨nį ɓa, yii hvilɛn na tələnmo mɛ̨nį ɓa da yii hvilɛn na Yálá nwɔ kitii ɓa. 9Da kɛ di kpɔwɔ ɓowoi nɛ̨ŋɛ̨n mɛ̨nį hu, mąąhɔlɔɓo, di hvo laa li ná. 10Yii hvilɛn na tələnmo mɛ̨nį ɓa, gáá lii Ną́n pɔ, ka hvo kɛa pai gáái. 11Yii hvilɛn na gití mɛ̨nį ɓa, ɲɛnɛ̨ɛ̨ ŋɛ̨i hu tɔɔmun nwɛi, gití a gbɛa tee.
12«Mɛ̨nį tamąą kaa gwə́i, yii mąąnɛ̨ɛ̨ ŋį́ mo kaa, kɛlaa, gəlee kpaɠala hvo pai lɛɛi kaa. 13Dɛ̨ą Kilii tii nwɛi a pa kɛa, gaa pai ka mąąkwɛlii tɛ̨ą mɛ̨nį kəlee ɓa. Hvo pai gbɔwɔ woo ɓoi, kɛlaa yii kpɔ a mɛ̨n, ya lɔ ɓə a mo, mɛ̨nįɠaai pai kɛi yɛ ɉukulɔ kaa. 14Gaa pai mą́ą́wiɛ pələ lɛi kaa, mɛ̨nį yiiɠaai da həɠə ɲą́ą́ bɔ diɛ ɓə gaa pai kɛi nɛi kaa. 15Yii lɔpee gaa Ną́n yəi, ɲą́ą́ bɔ́ɔ́ li. Mɛ̨nįi gɛ gɛ́ kɛ kaa: yii a həɠə ɲą́ą́ bɔ́ ya ɓə gaa pai moi kaa yaa li.»
Liihɛlɛn mąą kaa pai pənəi a kwəinɛ̨ɛ̨
16«Ɉu hvo kɛa kwɛa li gɛ́ pa həɠəi ka pɔ. Ɉu hva nwɔ̨nɔ̨ kwɛa, ka pənə ka gáá.»
17Nwɔ́ kalan nɛa taɠaa diɛ kɛ di kee ɓa: «Nwoo ŋɛ̨i gaa moi, mukulaa ɓaa a lə? Yai gaa kɛi mą: ‹Ɉu hvo kɛa kwɛa li gɛ́ pa həɠəi ka pɔ. Ɉu hva nwɔ̨nɔ̨ kwɛa, ka pənə ka gáá.› A wala kɛ tii, yii ŋɛ̨i ə kɛ mą: ‹Gáá lii Ną́n pɔ?› 18Kɛi ŋɛ̨i nwɔ̨nɔ̨ gaa moi diɛ: ‹Ɉu hvo kwɛa li› mukulaa ɓaa a lə? Nwooi kpɔ yɛ ə mo, ku hvo gɔlɔn ɉii.»
19Yii kɛa Jesus ə gɔlɔn yɛ di kaa bɔ di mąąni kɛ, ə mo diɛ, yɛ diɛ: «Nwoo ŋɛ̨i ŋį́ mo ya ɓə ka káá mukulaa kwɛlii ka kee lɔwai? Yai ŋį́ kɛ mą: ‹Ɉu hvo kwɛa li gáá pai həɠəi ka pɔ, ɉu hva nwɔ̨nɔ̨ kwɛa ka pənə ka gáá.› 20A tɛ̨ą kpɔ-kpɔ gáá moi kaa, ka káá pai wɔlɔi, kaa ka woolaa, kɛlaa, nąąlɔwai, a kɛ a kwəinɛ̨ɛ̨ yɛnɛ̨ɛ̨ nuą diɛ. Ka liihɛlɛn ŋąąi, ka wɔ liihɛlɛn mąą kaa pai pənəi a kwəinɛ̨ɛ̨. 21Ɓɛlɔwai nɛ̨ɛ̨nu a kɛ kwəinwąną kɛi la, nii a kɛ a gələn ŋąą gwəi, mąąhɔlɔɓo, nwɔ mɔ̨nɔ̨ mį́i lɔwai aa ɉəli. Kɛlaa, a naayɛɛ kɛa, nwɔ mɔ̨nɔ̨i tii kili a kpɛɛ ŋą́; mąąhɔlɔɓo, aa nu kan ɉɔlɔɓo. 22Bələ kpɔlɔ ɓə ka káá la yiihu. Kɛlaa, ɓɛlɔwai gu kaa pai pənəi gu gu kee kaa la a nįnɛ̨, ka kwəi a nɛ̨ɛ̨, nu ta hva pɛli gwəinɛ̨ɛ̨i tii kulɔi ka yəi.
23«Mąą yələi tii, ka hvo kɛa pai mą́ą́nin kɛ mɛ̨nį lɔpee ta ɓa. A tɛ̨ą kpɔ-kpɔ gáá moi kaa, ka hɛn da hvɛli Ną́n ma náá hu, a dɛɛ ka pɔ. 24Ka hvo ta hɛn da hvɛli li náá hu. Ka hɛn da hvɛli ka ɉɔlɔɓo, ya ɓə a gɛ ka wɔ kwəinɛ̨ɛ̨ laa ə kulɔ.»
Jesus yee aa tɛɛ yɛnɛ̨ɛ̨ ɓa
25«Ŋą́ mɛ̨nįɠaai tii kəlee ɓo kaa hanwon ɉu, kɛlaa, lɔwai ta kaa pai ɉəlii, və́ pai kɛa mɛ̨nį ɓoi kaa tii. Kɛlaa, yii hvilɛn na Ną́n mąą mɛ̨nį ɓa, ŋą́ mo kaa a ɉuponoɔ. 26Ɲələi tii a həli, kaa kpinįi ka káá pai kɛi Ną́n vɛlii. Və́ kɛi kaa: gáá pai Ną́n vɛlii ka mąą mɛ̨nį ɓa, 27ka wɛli kaa Ną́n ma, mąąhɔlɔɓo nwɛ́li kaa kaa, ɛlɛɛ, kaa laa na kaa: ŋą həɠə Yálá pɔ. 28Ŋą́ həɠə Ną́n bɔ gɛ́ pa yɛnɛ̨ɛ̨, ya ka tii nwɔ̨nɔ̨ gáá həɠəi yɛnɛ̨ɛ̨ gɛ́ li Ną́n bɔ.»
29Nwɔ́ kalan nɛai diɛ mą: «Ə́ kaa kɛa mɛ̨nį ɓoi a ɉu ponoɔ̨, hanwon və ɉu. 30Kwaa gɔlɔn gɛa, kuɔ, Ə́ mɛ̨nį kəlee kɔ́lɔn, nu ta nwɔ mąąni kɛ hvo kɛa yɛ́, yili ɓə gɛi kwaa laa na kuɔ ə́ həɠə Yálá pɔ.»
31Jesus ə di woo pulu pənə yɛ diɛ: «Kaa laa kɛa na tii? 32Lɔwai ta kaa pai həli, aa gbɛamun həli, ka káá pai taɠa-taɠai, ka ɲą́ą́ dɔ̨nɔ̨ nɛ́ɛ́, nu kəlee yɛ li a dee. Kɛlaa ə mą kɛ tii, ɲą́ą́ dɔ̨nɔ̨ hvəə, Ną́n gaa bɔ́. 33Gáá mɛ̨nįɠaa tii ɓoi kaa, kaa pɛli liilaa hɔlɔɓoi ɲə́i. Ka káá pai mɔ̨nɔ̨ mįi yɛnɛ̨ɛ̨, kɛlaa, ka ka lii kpələ, ɲéé aa tɛɛ yɛnɛ̨ɛ̨ ɓa.»
Currently Selected:
Ɉaan 16: BKPDCG
Highlight
Share
Copy
Want to have your highlights saved across all your devices? Sign up or sign in
