Ɉaan 12

Mari ə wulɔ kun nɛ̨ɛ̨ pu Jesus kɔ́wɔ ɓa

(Matie 26.6-13; Markə 14.3-9)

1 Pakə hɛli ə lɛɛ pulu a hvoló mɛ̨ida, Jesus ə li Bɛtani Lazarə ŋɛ̨i ə nwun ə gulɔ haaɓɛlaa lɔwai di pɔ taai. 2Di Jesus nwɛalaa kɛ laa. Martə ɓə kɛi nuą kɔ̨nɔ̨n gɛ, Lazarə da Jesus ni kəlee ɓə kɛ laa. 3Mari ə nu mąątí wulɔ kun nɛ̨ɛ̨ həɠə, ɉɔ̨nwɔ̨ kɛnɛ̨, ə ɉiɛ Jesus kɔ́wɔ ɓa, yɛ mąą kələ a nwun nɛɠa. Gun ə bɛlɛ́n gəlee kulɔ. 4Jesus nwɔ kalan non dɔ̨nɔ̨ yai da kɛ mą Ɉudasə Iskariɔtə mun, yaa ɓə kɛi pa Jesus lɔwɔ́tɔɔi, ə mo yɛ diɛ: 5«Lə mɛ̨nį ɓa, yai di hvo kɛ nwulɔi ŋɛ̨i lɔwɔ́tɔɔ li a wali kwələ nwun ɉaaɓa, di dɛɛ yee hvowolo nuą pɔ?»

6Yee hvowolo nuą mąą liihɛlɛn hvo kɛ mą, yɛ yili ɓo. Ə kɛi mo tii mąąhɔlɔɓo, nwuąi kɛ, ɛlɛɛ, ya ɓa nwali ɓíi ə kɛ ɲəi; yii nwɔ̨nɔ̨ kɛi hɔlɔɓo, yɛ ɲee mąą laa yɛ ɉəɠə. 7Kɛlaa, Jesus yɛ mą: «Ka nɛ̨ɛ̨nui ŋɛ̨i lɛɛ laa; nów yələ mąą mɛ̨nį ɓə gaa mɛ̨nįi tii kɛi la. 8Yee howolo nuą, di kaa pai kɛi ka lɔwai a yələ kəlee, kɛlaa, nwɛ́i, və́ pai kɛi ka pɔ a yələ kəlee.»

Nuą di di muhəɠə Jesus da Lazarə diɛ

9Ɉuifəɠaa tamąą di bələ mɛ̨n diɛ mą: Jesus kaa Bɛtani, di həɠə diɛ li laa, ə gɛ, di Jesus kpinįi kaa, ɛlɛɛ, Lazarə ŋɛ̨i ə nwun ə kulɔ haa yəi, di di ɲɛ̨i tɔɔ mą. 10Ɉaláá laa həli nuą kpɛa-kpɛa di Lazarə baa mɛ̨nį kili tee di kwəi. 11Mąąhɔlɔɓo, Lazarə tii mąą mɛ̨nį ɓə gɛ Ɉuifə tamąą diɛ kulɔ la di pɔ, diɛ laa Jesus la.

Jesus ə tɛ Ɉerusalɛmə

(Matie 21.1-11; Markə 11.1-11; Lukə 19.28-40)

12Mąą yələ laaɓoɔ, nu kpulu kɛnɛ̨i tii pa ɉɛli ɓa, di mɛ̨n diɛ Jesus kaa pai Ɉerusalɛmə. 13Di gwala laaɠaa tee diɛ paa la Jesus laa kwiɛn ɉi, diɛ kɛ mą: «Hosana! Mąąwiɛ kɛ gu Nąmu ɓa, yai pai Ną́mu Yálá laa hu, Israɛlə tɔɔmun li.»

14Jesus ə hoohvaalən non gaa, ə tɛ ə hee mɛ̨i, yɛ bələi kɛ bɛ̨ɛ̨ la, yɛ kɛ mą:

15«Siɔn nɛ̨ɛ̨gbɛla! 'Hvo ɲɔw.

Ə́ wɔ tɔɔmun ka ŋɛ̨i pai, ɉiɛ hoohvaalən non mɛ̨i.»

16Mɛ̨nįi tii kɔ́wɔ tɔɔi lɔwai, Jesus nwɔ kalan nɛai di hvo kɛi gbaɠala kaa, kɛlaa, Jesus mąąwia pulu, di kili ə pu ɉu, diɛ kɛ: mɛ̨nį kɛ bɛ̨ɛ̨ mąą mɛ̨nį hu, aa gulɔ mą.

17Nąąlɔwai, nu kpului tii kɛ Jesus pɔ, yɛ Lazarə nwun na yɛ kulɔ gámąi; di kɛi Jesus mąą kɛla hvaa ɓo. 18Mɛ̨nįi gɛ nu kpulu kɛnɛ̨ yɛ pa Jesus laa kwiɛn ɉii la, ya ɓaa, mąąhɔlɔɓo, di mɛ̨n diɛ Jesus aa gbalo mɛ̨nį tii kɛ. 19Farisiɛ̨ɠaa diɛ di kee ɓa: «Ka káá nąą kaai, gu hva pɛli mɛ̨nį ta kɛi, nuą kəlee daa hvilɛn bulu.»

Jesus ə ɉaa mɛ̨nį hukulɔ

20Hį́i takpɛliɠaa di pa Ɉerusalɛmə kwɛli hvilɛn ɉii Yálá, a ɉɛli yələ. 21Filipə yai a həɠə Bɛtsaida, Galile lɔi hu, di lɛɠɛ mą diɛ mą: «Nąn, ku kaa bɔ ku Jesus kaa.»

22Filipə ə li ə nwoo hukulɔ Andre ɓa, di nu hveelɛi də li di mo Jesus ɓa. 23Jesus ə di woo pulu pənə yɛ diɛ: «Nu Lon mąąwiɛi lɔwai aa həli. 24A tɛ̨ą kpɔ-kpɔ gáá moi kaa, mɔ̨nun ɉuwi da bili, a wala haai, yaa tɔ̨nɔ̨ lɔ ɓə a kɛ lɛɛ. Kɛlaa yaamun, a haai, ya ɓə a ɓɔn na, ə kɛnɛ̨, yɛ ɓa a damąą. 25Nui a nwɔ yɛnɛ̨ɛ̨ wɛli la kɛ, yɛ viɛlaɓo Yálá ɓa; a kulɔ ɲəi. Kɛlaa, nui a gili kulɔ ɲɛnɛ̨ɛ̨ ŋɛ̨i hu Yálá mąą mɛ̨nį ɓa; a ɉɔlɔɓo ɲɛnɛ̨ɛ̨i kpɛɛ hvo mą ɉu. 26Nui a kɛ ə tí mą́ą́, ə hvilɛn búlú. Ɓɛi gáá laa, nąą ɓə nwɔ́ tímun gaa laa. Ɛlɛɛ, nui a tí mą́ą́, Ną́n a mąąwiɛ.

27«Yiihu, lii kələn gwəi aa hvə mą́ą́, ŋą́ kɛ kpɔ lə; Ną́n! Ŋą́ pɛli kɛi yɛ́ gulɔ ɉu? Yaan, mɛ̨nįi ŋą́ paa la, nąąlɔwai aa həli. 28Ną́n, ə́ laa mąąwiɛ!»

Nąąlɔwai woo ta ə kulɔ yələi, yɛ diɛ: «Ŋą́ą́ náá mąąwiɛ, gáá nwɔ̨nɔ̨ pai mąąwiɛi.»

29Nu kpului tii kɛ laa, di nwooi tii mɛ̨n, diɛ mą: «Yələ gbąnąą ka tii gɛ.»

Daɠaa diɛ kɛ: «Yálá nwɔ malaka ta ka tii mɛ̨nį ɓoi mą.»

30Jesus ə tinɛ̨n yɛ diɛ: «Ɲą́ą́ mą́ą́ mɛ̨nį hvəə nwoo tii ə tɔɔ la, kɛlaa, ka mąą mɛ̨nį ɓə. 31Yiihu, ɲɛnɛ̨ɛ̨ ŋɛ̨i kiti teei lɔwai a həli, di kaa pai gití kalai ɉu tɔɔmun ma, di gbɛ. 32Yii ɓaa a nwɛ́i, da pa dɛ́ yələi, gáá pai nu kpulu kəlee yalai bɔ́ pələ.»

33Ɉaai Jesus ə kɛi pa moi, ya ka tii ə kɛi mo diɛ nwooɠaa tii hu. 34Nuą tii kəlee di nwoo pulu pənə diɛ mą: «Ku mɛ̨n dɔ́n ɉɛɓɛ́ hu, diɛ kɛ: Nwun mąąɓomun Yálá ə naakwɛlanmo haa hvo mą. Gɛ pələ kaa ləi yaai, ə́ kaa kɛi diɛ: di kaa pai Nu Lon dɛi yələi? Akɛti, gbɛɛ ɓə a Nu Lon tii?»

35Jesus yɛ diɛ: «Kɛɛ pono kaa ni ka pɔ a lɔwai ta wolo. Ɓɛlɔwai kɛɛ ponoɔi la, ka hiɛ, ə gɛ, kpinį hvo pa ka hon, mąąhɔlɔɓo, nui a hiɛ kpinįi hvo dɔwɔ kɔ́lɔn. 36Ɓɛlɔwai kɛɛ pono kaa ni la ka pɔ, ka laa kɛɛ pono la, ə gɛ, ka kɛ a kɛɛ pono lonni.»

Jesus ə kpɛɛ lɔ a nwooɠaa tii ɓoɔ, ə kulɔ di lɔwai ə now diɛ.

Ɉuifəɠaa di hvo laa Jesus la

37Bələi mąn Jesus ə kpalo mɛ̨nį tamąą kɛ la di ɲɛ̨i ɓa, di hvo laa na. 38Ya ɓə ə gɛ, mɛ̨nį ŋɛ̨i Yálá kwəi mɛ̨nį hukulɔ mun Esai ə mo, naa ə hon, yaai ə kɛ la mą:

«Ną́mu, nwəlɛɛ ŋɛ̨i ku mo, gbɛɛ ɓə laa na?

Gbɛɛ ɓə Ną́mu ə nwɔ yəi kɛnɛ̨ laa lɛ mą?»

39Mɛ̨nįi gɛ nuą di hvo laa nwoo tii la, Esai tii ə pənə ə nwun nɛ, yɛ mą:

40«Ə di ɲɛ̨i pu, ə di kili walawala, əgɛ, di ɲɛ̨i hvo pa kɛɛ kaa,

ɛlɛɛ, di kili hvo pa mɛ̨nį hukpɛ; diɛ pɛli di hɔn mɛ̨ɛ̨ pənəi.

Və́ pa di mąą ɲɔ̨nŋąą kpɛɛ.»

41Esai Jesus nwɔ mąąwiɛ kaa, ya ɓə gɛ yɛ mo la tii.

42Ə mą kɛ tii, ɲɛ̨i tɔwɔ nuą lɔwai, damąą di laa Jesus la. Kɛlaa, di hvo kɛ bɔ di hvo di kpɔwɔ lɛ, ə gɛ, di hvo pa di kpɛ Yálá hvɛli pɛlɛ́ mu, mąąhɔlɔɓo, di kɛi ɲɔ̨w Farisiɛ̨ɠaa diɛ. 43Nuą tii di wɛi, mąąwiɛlaai a həɠə nuą pɔ, ya ɓə di kɛi gwɛli, ə tɛɛ yii a həɠə Yálá yəi mą.

44Nąąlɔwai, Jesus ə kɛi mo kpɔ a nwoo kɛnɛ̨ yɛ kɛ diɛ: «Nui a laa ná, ɲą́ą́ lɔ hvəə ə laa ná, a kɛ tii nui dɔ́ɔ́ ya ka tii aa laa na. 45Nui a gáá, aa nui dɔ́ɔ́ gaa. 46Ɲą́ą́i a kɛɛ pono, ŋą́ pa yɛnɛ̨ɛ̨, ə gɛ, nui lɔpee a laa ná, hvo lɛɛ kpinį hu. 47Nui a nwóó mɛ̨n, a wala bɔ mɛ̨nį kɛ, ɲą́ą́ hvəə ŋą́ gití tee. Mąąhɔlɔɓo, və́ kɛ pa li yɛnɛ̨ɛ̨ kiti tee mɛ̨nį ɓa. Kɛlaa, ŋą́ pa, yɛnɛ̨ɛ̨ nwun mąąɓo mɛ̨nį ɓa. 48Nui a lənə mą́ą́, ɛlɛɛ, a wala laa nwóó la, aa gití teemun ɉɔlɔɓo. Nwooi ŋą́ mo, ya ɓə pai mąą nu kiti teei yɛnɛ̨ɛ̨ ŋąąkpɛɛ yələ. 49Və́ gbɔ́wɔ́ mąą mɛ̨nį ɓoi, kɛlaa, Ną́n dɔ́ɔ́, nwooi ə bu ná, ya ɓə gáá naa həlii, gɛ́ mo kaa. 50Ɛlɛɛ, ŋą́ gɔlɔn gɛ́ nwɔ tɔ́n nwoo kaa a ɓalo hva kpɛɛ. Yii Ną́n ə bu ná, ya ɓə gáá moi.»

Currently Selected:

Ɉaan 12: BKPDCG

Highlight

Copy