Gɔwɔ tɔɔi 11
11
Ɲələi pɛ́lɛ́i ŋɛ̨i da kɛ mą: Babɛlə dɔɔ mɛ̨nį
1Gɛɛ nuą di hvo lɔi ŋąąkwɛlɛ di kee lɔwai, di hvaa woo yɛ kulɔ gee mu, Nąąlɔwai tii hu, yɛnɛ̨ɛ̨ nąą kəlee nuą woo ə kɛ tɔ̨nɔ̨, hį́i woo tɔ̨nɔ̨ lɔ ɓə di kɛi mo di kee lɔwai. 2Ɓɛlɔwai di kɛi li la voló həɠəi pələ, di nɛ̨ŋɛ̨ hu ta kaa Sinearə lɔi hu, di hee laa. 3Di nɛɛ mą di mo di kee ɓa diɛ mą: «Ka gu pɔlɔkɔw kɛ, gu mɔn.» Bɔlɔkɔw tii ə kɛ di yəi yɛ kwɛni, ya ɓə di kɛi bɛlɛ́ tɔɔ la. Di kɛi bɔlɔkɔw hee gee mɛ̨i a ləɠi-pɔlɔ. 4Yili pulu, di mo di kee ɓa diɛ mą: «Ka gu taa tɔ̨nɔ̨ tɔɔ a pɛlɛ, yɛ həli yələkɔlɔn ma, ə gɛ, gu laa ə kɛ mą, ɛlɛɛ, ə gɛ, gu hvo pa taɠa taɠa lɔi mɛ̨i nąą kəlee.»
5Yaan, Yai-Laa ə yɛɛ, ə gɛ, ə daai tii mąąkpɛɛ, ɛlɛɛ bɛlɛ́i ŋɛ̨i nuą kaa dɔɔi, ə gaa. 6Yai-Laa yɛ diɛ: «Nuą kəlee daa kɛ tɔ̨nɔ̨, di lawoo yɛ ɓo tɔ̨nɔ̨, diɛ hį́i woo tɔ̨nɔ̨ ɓo. Akɛ daa góló ɲɔ̨nwɔ̨mąn ŋɛ̨i kɔ́wɔ tɔɔ, hɛn da hva pɛli di yee pɔɔ hukalai, yii lɔpee da di yee too ɉu, gaa pai pɛlii. 7Yili ɓa, ka gu yɛɛ, ka gu di hvaa woo humo di la, ə gɛ, di hvo di kee hvaa woo ŋąą kaa.» 8Yai-Laa ə di hu taɠa lɔi mɛ̨i, di kpəla kɛa daai tii tɔɔ ɓa. 9Yili ɓə gɛ diɛ kɛ nąą laa ɓaa: Babɛlə. Mąąhɔlɔɓo, nąą ɓə Yai-Laa ə hį́i woo tamąą yɛɛ laa nuą lɔwai, di taɠa taɠa lɔi mɛ̨i.
Ə həɠə Sɛmə ɓa ə həli la Abrahamə ɓa
10Sɛmə huwuhu nuą laa ka: Sɛmə kaa kwɛlan ə kɛ a kwɛlan nwun dɔ̨nɔ̨, ə lon ɉulɔnu hɔlɔɓo diɛ kɛ mą: Arfasadə, ə ɉɔlɔɓo ɲánwąną tɛɛ pulu gwɛlan veelɛ lɔwai. 11Arfasadə hɔlɔɓoɔ pulu, Sɛmə ə kwɛlan nwun-nɔɔli kɛ, ə lon ɉinąą takpɛliɠaa da lon nɛ̨ąą hɔlɔɓo.
12Arfasadə kaa kwɛlan ə kɛ a kwɛlan bow haaɓa kɔ́w lɔɔli, yɛ Sɛla hɔlɔɓo. 13Sɛla hɔlɔɓɔ pulu, Arfasadə ə kwɛlan nwun-nąąn kwɛlan ɉaaɓa kɛ, ə lon ɉinąą takpɛliɠaa da lon nɛ̨ąą hɔlɔɓo.
14Sɛla kaa kwɛlan ə kɛ a kwɛlan bow haaɓa, yɛ Ebɛrə hɔlɔɓo. 15Ebɛrə hɔlɔɓoɔ pulu, Sɛla ə kwɛlan nwun-nąąn kwɛlan ɉaaɓa kɛ, ə lon ɉinąą takpɛliɠaa da lon nɛ̨ąą hɔlɔɓo.
16Ebɛrə kaa kwɛlan ə kɛ a kwɛlan bow haaɓa kɔ́w nąąn, yɛ Pɛlɛgə hɔlɔɓo. 17Pɛlɛgə hɔlɔɓoɔ pulu, Ebɛrə ə kwɛlan nwun-nąąn, kwɛlan bow haaɓa hɔlɔɓo, ə lon ɉinąą takpɛliɠaa da lon nɛ̨ąą hɔlɔɓo.
18Pɛlɛgə kaa kwɛlan ə kɛ pow haaɓa, yɛ Reu hɔlɔɓo. 19Reu hɔlɔɓoɔ pulu, Pɛlɛgə ə kwɛlan nwun-veelɛ kwɛlan mɛ̨inąąn gɛ, ə lon ɉinąą takpɛliɠaa da lon nɛ̨ąą hɔlɔɓo. 20Reu kaa kwɛlan ə kɛ a kwɛlan bow haaɓa kɔ́w hveelɛ, yɛ Serugə hɔlɔɓo. 21Serugə hɔlɔɓoɔ pulu, Reu ə kwɛlan nwun-veelɛ kwɛlan mɛ̨ihveelɛ kɛ, ə lon ɉinąą takpɛliɠaa da lon nɛ̨ąą hɔlɔɓo.
22Serugə kaa kwɛlan ə kɛ pow haaɓa yɛ Nahɔrə hɔlɔɓo. 23Nahɔrə hɔlɔɓoɔ pulu, Serugə ə kwɛlan nwun-veelɛ kɛ, ə lon ɉinąą takpɛliɠaa da lon nɛ̨ąą hɔlɔɓo.
24Nahɔrə kaa kwɛlan ə kɛ a kwɛlan bow hveelɛ kɔ́w mɛ̨inąąn, yɛ Tɛra hɔlɔɓo. 25Tɛra hɔlɔɓoɔ pulu, Nahɔrə ə kwɛlan nwundɔ̨nɔ̨ kwɛlan bow kɔ́w mɛ̨inąąn gɛ, ə lon ɉinąą takpɛliɠaa da lon nɛ̨ąą hɔlɔɓo.
26Tɛra kaa kwɛlan ə kɛ pow mɛ̨ihveelɛ, ə lon ɉinąą haaɓa hɔlɔɓo, diɛ ɓaa: Abramə, Nahɔrə da Haran. 27Tɛra huwuhu nuą la laa ka: Tɛra ə Abramə, Nahɔrə, da Haran di hɔlɔɓo. Haran lon maa Lɔtə. 28Haran ə haa nąn Tɛra tɔwɔ ɓɛi ŋɛ̨i di gaa laa Urə daai Kalde nuą pɔ lɔi. 29Abramə ə Sarai həɠə a nɛ̨ą, Nahɔrə ə Haran lon nɛ̨ɛ̨nu Milka həɠə a nɛ̨ą. Yiska ə kɛ a Haran lon dɔ̨nɔ̨. 30Lon və kɛ Sarai ɓa, ə kɛ a kpomąnɛ̨ą.
31Tela ə non Abramə həɠə da Haran lon Lɔtə yai kɛ a mąnįn, ə bɛlɛ non nɛ̨ą Sarai ɓa, yai kɛ a Abramə nɛ̨ą, da diɛni di həɠə Urə daai Kalde nuą pɔ lɔi, diɛ li Kanaan lɔi hu, di li ɓɛi ŋɛ̨i da kɛ mą Haran, di hee laa. 32Tera kaa kwɛlan ə kɛ a kwɛlan nwun-veelɛ kwɛlan nɔɔli, ə haa Haran lɔi hu.
Currently Selected:
Gɔwɔ tɔɔi 11: BKPDCG
Highlight
Share
Copy
Want to have your highlights saved across all your devices? Sign up or sign in
