Gɛlaɠaa 2
2
Kili-Mąąhəɠɛɛ pa mɛ̨nį
1Pantəkotə#2.1 Pantəkotə: mukulaa ɓaa a: hvóló pow-lɔɔli a tɛɛ, pakə hɛli puɔ pulu. hɛli həliɛ, galan nɛai ti kəlee ɲąąkpɔn ŋąą i kɛ kɛɛnąą tɔ̨nɔ̨ ɓa. 2Kpɔlɔ ti ŋąą ɓa, tín gɛnɛ̨ ta ə tɔɔ yələi, yɛ hvaŋą kɛnɛ̨ ta a kɛi tɛɛ; bɛlɛ́i ti di kɛ mu, ə naa laahvɛɛ. 3Hɛnŋaa di yɛɛ di tɛitɛi di mɛ̨i, di hee di nwuɔ̨ yɛ nu nɛ̨n gɛ pələ, yɛ ɓo a nwɔ̨n nən. 4Di kəlee di pilɛ a Kili-Mąąhəɠɛɛ, diɛ hįi woo takpɛli ɓo yɛ bələi Kili ə mąąlaa tɛɛ la di pɔ.
5Yaan, Ɉuifəɠaai Yálá wɛli kaa diɛ, di həɠə yɛnɛ̨ɛ̨ nąą kəlee di pa Ɉerusalɛmə a volói ti. 6Ɓɛlɔwai dín ti ə tɔɔ la, di kpɔn di kee ɓa a di kpulu. Di kwəi ə pili diɛ kpɔ kɛnɛ̨, mąąhɔlɔɓo, nu kəlee di kɛi galan nɛai ti woo mɛ̨n a di pɔ taai woo. 7Nu kpɔn ti kəlee kwəi piliɛ kɛ diɛ, diɛ kɛ diɛ:
A kɛ ti, nuą ŋɛ̨i hvaai, Galile nuą hvaa a diɛ? 8Gɛ pələ kaa ləi yai, nu kəlee kaa di woo mɛ̨n ɉii bɔ taai woo hu? 9Yaan, nu taɠaa kaa gu lɔwai di həɠə: Partə lɔi hu, Medi lɔi hu da Elamə lɔi hu, daɠaa di həɠə Mesopotami lɔi hu, Ɉude lɔi hu da Kapadosə lɔi hu, daɠaa di həɠə Pɔn lɔi hu, da Asi lɔi hu, 10daɠaa di həɠə Frizi lɔi hu, Pamfili, Eziptə lɔi hu, daɠaa di həɠə, Sirenaikə Libi lɔi hu, daɠaa di həɠə Romə daai, 11daɠaa kaa a Ɉuifəɠaa, daɠaa diɛ ɓo a nuąi lɔ Ɉuifəɠaa di wɔ kalan hu, nu taɠaa di həɠə Krɛtə da Arabə, kɛlaa ə mą kɛ ti, nu kəlee kaa Yálá kɛ mɛ̨nįɠaa mɛ̨n ɉii a bɔ taai woo.
12Di kəlee di kwəi ə pili diɛ, yii kpɔ kɛ mąąnɛ̨ɛ̨ di di kiliŋąhiɛ mą, di hvo kɛ gɔlɔn. Di kɛi mo di kee lɔwai diɛ kɛ mą: «Yii mukulaa ɓaa lə?» 13Kɛlaa, nu taɠaa di kɛi yɛlɛ kulɔ galan nɛa hu diɛ kɛ mą: «Daa pilɛ lɔɔ hu!»
Piɛrə woo hukulɔ woo
14Piɛrə ə muhəɠə ə tɔɔ da mɛlaa pow kɔ́w tanɔ̨n ti, ə mo kpɔ a nwoo kɛnɛ̨ yɛ diɛ: «Káái ɓaa Ɉuifəɠaa, da nuąi di kaa ɓɛ Ɉerusalɛmə, ka ka wəli tɔɔ nwóó ɓa a nɛlɛɛ. 15Nuąi ŋɛ̨i di hvo a lɔɔ honŋąa yɛ bələi ka káá ka kiliŋąhiɛi la, ka ɲɛ̨i kaa mą, yələwala hvaŋą liɛn lɔ ka ni gu kaa ɉu. 16Kɛlɛi, mɛ̨nį wɔlɔ Yálá kwəi mɛ̨nį hukulɔ mun Ɉoɛlə ə mo, ya ka ŋɛ̨i bɔ mɛ̨nį kaa kɛi:
17«‹Yálá ə mo yɛ diɛ: Yɛnɛ̨ɛ̨ ɲąą kpɛɛi lɔwai aa kɛi həli,
gáá pai nwɔ́ Kilii tɛɛi nu kəlee pɔ,
ka lon ɉinąą da ka lon nɛ̨ąą da Yálá nwɔ wɛlɛɛ laa həli,
ka wɔ hilɛlɛai diɛ mɛ̨nįɠaa kaa,
ɉulɔgoloɠaa diɛ hįi kaa.
18A tɛ̨ą mąą yələi ti, ŋą́ nwɔ́ Nį́į tɛɛi nwɔ́ tínuą ɉinąą da nɛ̨ą di pɔ,
mąą yələi ti hu, da kɛ Yálá nwɔ wəlɛɛ laa həli.
19Ŋą́ mɛ̨nįɠaa kɛ yələ kwəi, yii ɉuwu ta hvə ta kɛli,
ŋą́ kpalo mɛ̨nįɠaa kɛ lɔi mɛ̨i, ɲąmą da nwɔ̨n, ə lɛɛ lulu.
20Hvóló hu a kpinį, ŋąnin ə kpɔlu yɛ ɲąmą,
yili a gbɛa kɛ, Ną́mu nwɔ hvóló mąąwiaa kɛnɛ̨i hvo tɛɠa pa.
21Nąąlɔwai, nui a tomą Ną́mu Yálá pɔ pələ, nwun mąą a ɓo.›
22«Kaai ɓaa Israɛlə nu huwu, ka ka wəli tɔɔ nwoo ɓa: Jesus Nazarɛtə mun ŋɛ̨i Yálá ə nwɔ huwalawala lɛ kaa; mąąhɔlɔɓo, Yálá ə kpalo mɛ̨nį tamąą kɛ da kwəi pilimąą mɛ̨nįɠaa yaa ɉaalai ka lɔwai, yɛ pələi kaa kpinįi ka kili kaa la ɉu. 23Ɉulɔnui ti, yɛ bələi ə kɛ la a Yálá nwɔ mɛ̨nį pɛliɛ da nwɔ mɛ̨nį kɔ́lɔnŋąa, ká gwɛlɛ nuąi di hvo Yálá kɔ́lɔn diɛ, di gbanwo kolɔwa ɓa, di baa. 24Yálá ə́ gulɔ haa yəi, ə́ gɛ a vulú, ə gulɔ haa nwɔ mɔ̨nɔ̨ hu, mąąhɔlɔɓo, haa nwɔ huwalawalaa yee hva pɛli kɛ mą. 25Yaan Davidə ə mąą mɛ̨nį ɓo yɛ kɛ mą:
«‹Ɲɛ̨́i ə kɛ lɔ Ną́mu ɓa a yələ kəlee.
Gaa lɔ gwɛ́lɛ, ə gɛ, mą́ą́ hvo pa kpɛlin.
26Yili ɓə gɛi, níí laahvɛɛ a mɛ̨inɛ̨ɛ̨, ə lɛɛ gwəinɛ̨ɛ̨.
Ə mą kɛ gɔ́lɔ hvii aa kpɛɛ, ŋį́ vįitɔɔ kilitɔɔmąąlaa hu.
27Mąąhɔlɔɓo, hvó pai nɛ́ɛ́i haaɓɛlaa lɔwai,
hvó pai ə́ wɔ mąąhəɠə mun nɛɛi laa yɛ luwun kámą hu.
28Bələi nu ya tɛɛ la ə́ yɛnɛ̨ɛ̨ kɛ, yaa yili lɛ mą́ą́,
ya kɛ gwɛ́lɛ, yili ɓə a nááhvɛɛ a kwəinɛ̨ɛ̨.›
29«Ną́n nonnii, kwa pɛli kpɔ moi kaa a tɛ̨ą, kuɔ kaa: Gu kalaɓɔlɔ tɔɔmun Davidə aa haa, daa noo, gámą kaani háákələi gu lɔwai ɓɛ. 30Kɛlaa, ə kɛ a Yálá kwəi mɛ̨nį hukulɔ mun, gili ə kɛ kpɔ ɉu yɛ diɛ, Yálá aa nwoo kwɛlɛ mą, aa gwɛla yɛ mą: gáá pai ə́ huwu ta heei ə́ wɔ tɔɔ kpəlin hu. 31Davidə ə nu nwun mąąɓomun nwun mɛ̨nį haa ɓɛlaa lɔwai lɛɛ kwɛaa la, ə gaa, yɛ kɛ:
«‹Nu nwun mąąɓomun Yálá ə naakwɛlanmo,
hva pɛli kɛ lɛɛi ɲąmuątaa yee kɔn ma,
ɛlɛɛ, gɔlɔ hva pɛli kɛ luwun ɉii kámą hu.›
32«Jesus tii ɓə, ku kaa mąą mɛ̨nį ɓoi, Yálá ə gulɔ haaɓɛlaa lɔwai ə gɛ a vulu, ku kaa a yili mąą kɛla. 33Ə tɛ ə hee Yálá yee lɛlɛɛ mɛ̨i, Yálá ə nwɔ Kili-Mąąhəɠɛɛ tɛɛ bɔ yɛ bələi ə naakwɛlan mo la, ə gbɛŋąn gu mɛ̨i yɛ pələi ka káá gaai la, ɛlɛɛ, kaa mąą mɛ̨nį mɛ̨n na. 34Mąąhɔlɔɓɔ, Davidə kpinį, hvo tɛ yələkɔlɔn ɉu, kɛlaa, ə mo yɛ mą:
«‹Námu Yálá ə mo Ną́mu ɓa yɛ mą:
Pa ə́ hee ɲéé lɛlɛɛ mɛ̨i.
35Ə lɛɛ la ɉu, ŋą́ ə́ yowoɠaa pɛlɛ ə kɔ́wɔ mu yɛ haɠa.›
36«Mąąnɛ̨ɛ̨ Israɛlə nu huwu kəlee di gɔlɔn diɛ kɛ: Jesus ŋɛ̨i ka gbanwo kolɔwa ɓa, ya ɓə Yálá ə gɛ a hɛn gəlee Ną́mu da nuą ɓalomun.»
Nuąi lɔ gbɔn ɉu tɔlɔɔ tɔlɔɔ
37Nwooi ti mɛ̨n di mo, di kwəi ə pili diɛ, di Piɛrə da mɛlaa di mąąni kɛ diɛ mą: «Ku nąn nonnii, lə ɓə kani mąąnɛ̨ɛ̨ ku gɛ?»
38Piɛrə ə di woo ŋąą pənə yɛ diɛ: «Ka kpɛla mɛ̨nį ɲɔ̨n ma, ka ka hɔn mąą pənə, di ka mąąwaa Jesus Kristə laa hu, ə gɛ, ka wɔ nɛŋɛ̨nŋaa mąąhvaa ə lɛɛ, ká Kili-Mąąhəɠɛɛ yəi mɛ̨inɛ̨ɛ̨ hɔlɔɓo. 39Mąąhɔlɔɓo, kaa ɓə Yálá ə naakwɛlan mo kaa, da ka lonnii, ə mą kɛ nuą yiiɠaai di heɛ kaa kwɛa la, ə mą kɛ nuą yiiɠaai ku Ną́mu Yálá kaa pai di təlii.»
40Piɛrə ə mɛ̨nį tamąą ɓo diɛ, yɛ di kilaa pono, yɛ di hvaŋąlɔ, yɛ kɛ diɛ: «Ka hvaa mą ka ka yee hee ka ɓalo mɛ̨nį mu, ka kulɔ nwun napili nuą pɔ.»
41Nuą tamąą di di yee hee Piɛrə woo mu, di di mąąwaa. Volói ti, nu waa haaɓa ɲɔ̨nwɔ̨mąn ə hɔlɔɓo; ə pɛlɛ galan nɛa diɛ.
Galan gbɔn dɔlɔɔ tɔlɔɔ
42Di hvaŋąlɔɔ kɛ gɛlaɠaa di wɔ mąąkwɛli woo ɓa, yeelɔ gee hu yɛnɛ̨ɛ̨ hu yɛ leegaaɠaa, diɛ di yee lɔ kɔwɔ tɔnɔ̨ hu, diɛ Yálá hvɛli gee ɓa. 43Ɲɔw ə kɛ nu kəlee hu, gbala ə tɔɔ, gbalo mɛ̨nįɠaa da kwəi pilimąą mɛ̨nįɠaa gɛlaɠaa di kɛi gɛ, mąą mɛ̨nį ɓa. 44Laa na nuą kəlee yee lɔ kɛ gee hu, di yəi hɛnŋąa kəlee pɛlɛɛ gee ɓa. 45Di kɛi di yəi hɛnŋąa lɔwɔ́tɔɔ, diɛ nwali ɲąąkwɛlɛ di kee lɔwai, yɛ pələi di mąą kpaanŋąa di kɛ la. 46Di hvaŋąlɔɔ kɛ, diɛ di ɲąąkpɔn Yálá hee pɛlɛ́ mu, diɛ kɔ̨nɔ̨n mįi gee ɓa di yəi bɛlɛ́nŋąą, a kwəinɛ̨ɛ̨ da lii nɛ̨ɛ̨ gwəi. 47Di kɛi Yálá hɛɠɛɛɓo di wɛli yɛ ɓo nu kəlee ɓa. Hvóló kəlee, Ną́mu Yálá ə kɛi laa na nuą ta pɛlɛ ma.
Currently Selected:
Gɛlaɠaa 2: BKPDCG
Highlight
Share
Copy
Want to have your highlights saved across all your devices? Sign up or sign in
