2 Makabe 12
12
Ɉudasə ə Ɉope nuą da Ɉamnia nuą nwąną kulo
1Di kpɛɛ a nwoolamąą mɛ̨nįɠaa ɲɛ̨i kulaa, Lisiasə ə pənə ə li tɔɔmun bɔ, Ɉuifəɠaa diɛn, di ɓo di pɔyɛa kólóɠaa ɓa. 2Kɛlaa gbahvalamąɠaa kɛ nɔiɠaa hu, Timote da Ɉɛneusə lon Apoloniusə, da Hieronimə da Demofɔn, Siprə mun Nikanɔrə pɛ́lɛɛ diɛ, di hvo kɛi tee Ɉuifəɠaa pulu, di kɛ lɔ di hvii kpɛɛ mɛ̨nį hu. 3Ɉope nuą di ɲɛ̨ni mɛ̨nį kɛnɛ̨ɛ̨ ta kɛ. Ɉuifəɠaa kɛ di kɔwɔmɛ̨i, di yiliɠaa tolu da di nɛ̨ąni da di lonnii di wɔ yá ɲɛ kələnŋąą hu, diɛ kpįnį lee daa kɛ di pɛli tɔwɔ, diɛ kɛ diɛ, yowolaa ta kpɛli hvo gu lɔwai, 4yii da daai nuą daa kɛ mɛ̨nį yili ɓo a nu kəlee mąą mɛ̨nį, Ɉuifəɠaa di hvaa di woo ti ɓa, diɛ gbaɠala lɛ ti diɛ kɛ di kaa liilaa pɔ, ɛlɛɛ kiliŋąhiɛ ɲɔ̨nwɔ̨ɔ̨ hvo di kwəi, kɛlaa həlii di mo gboloyá heąi, di di pili gboloyá hu; di kɛ a nu nwun veelɛ. 5Ɲɛ̨nin mɛ̨nį ti di gɛ a Ɉudasə nwɔ lɔi hu nuą, ə bələ mɛ̨n, ə mo nwɔ nuą diɛ, 6di Yálá hvɛli, yai a giti teemun dələnmoɔ, diɛ kea li di káá-yɔwɔɠaa paa nuą kaai. Ɓɛi di kɛi gələnŋąą kpulon naa ə nąą kələn kwii heąi, ə gələnŋąą kələn da nuąi kɛi di mąąkilɛ laa. 7Kɛlaa yii daa kɛ daa laa kpulun, ə li; ə naa gwəi yɛ kɛ gaa pənəi ə pa ə Ɉope nuą di wɔ taa kəlee wolo. 8Di nwəli-lon doo ɉu, diɛ kɛ mą Ɉamnia nuą kaa kɛ bɔ di mɛ̨nį taalei ti ta kɛ lɔ a Ɉuifəɠaa di pɔɔli diɛ; 9ə wolo Ɉamnia nuą diɛ kwiheą, ɓɛi di kɛi gələnŋąą kpulon nąą, da gələnŋąą, ə nwɔ̨n bili di hu, diɛ nwɔ̨n nen gaa kpɔ Ɉerusalɛmə, nąą kweaa a kilə pow nąąn.
Ɉudasə ə Kaspin taa hon
(1 Makabe 5.9-54)
10Ə mąą tɛ gɛɛ nąą ti ɓa a pələ kələn dɔnɔ̨ da nwɔ kɔlaɠaa; ə kɛi li pɛlɛ́i Timote ɓa; Arabəɠaa di wolo mą; di kɛ yɛ nu waa lɔɔli, di kɔwɔ ɲą da hoogilɛhəɠənuą nwun nɔɔli. 11Di gɔ kpɔ laa a nąą kpɔluɔ, gɔ ə nɛ̨ɛ̨ Ɉudasə nwɔ holahiɠaa diɛ, Yálá nwɔ kpɔmąą haalai; Arabəɠaa di nɛ̨ɛ̨mąą hvə Ɉudasə ɓa diɛ kɛ ə ɲee too di yei, di di woo kwɛlɛ diɛ kɛ di kaa pai taatɛlɛɛɠaa tɛɛi bɔ, ɛlɛɛ diɛ gbaan dee mɛ̨ni huwui lɔpee gəlee hu. 12Ɉudasə ə gaa yɛ kɛ da pɛli kpɔ mą a nelee diɛ gbaan dee mɛ̨nį tamąą hu, ə hvaa mą di kpɛla ɲowolaa ɓa, di di yee too geehu, yiiɠaai ti diɛ li di pɔɔli. 13Ɉudasə ə kɔ pɛ́lɛ́ taa ta ɓa, mąątinɛnŋąą a mąąkpɛ-hįį, ɛlɛɛ nu huwu humɔɔ ɓə kɛ laa. Di kɛi kɛ mą Kaspin. 14Daa nuą kili tɔɔ pələ di wɔ hįįnwąnąi hu walawala pələ ɓa da di kɔnɔ̨n gɛ diɲą geemɛ̨i, di kɛi tuwo a ɲɔ̨nwɔ̨, diɛ Ɉudasə nwɔ holahiɠaai lalan, ə mą kɛ Yálá, diɛ pələɠaa ɓo hva pɛli ɓoi. 15Kɛlaa Ɉudasə da nwɔ nuą di yɛnɛ̨ɛ̨ pilɛɛ geemɛ̨i ɲąąwooɓomun vɛli, yai ti Ɉeriko pu, a Ɉosue nwɔɔ yələ, wulu kpono mɛ̨nį da kɔ́ kɔ maɉin mɛ̨nį hvo kɛ ɉu, yili pulu di wolo ɉįį nwąną ɓa a hu wala-walalaa. 16Yálá ə hvaa mą, di daa hon; di paa ɓo kɛ, ɉu hva pɛli kulɔi, powa-yá ə kɛ nąą kwɛlɛ ɲąą kɛnɛ̨ɛ̨ a mɛtrə nwun ɉaaɓa ɲee mɛ̨ida, ɲąmąi yɛɛ ɉu, ə kɛ yɛ da naa hvɛɛ la.
Karniɔn kɔ́i
(1 Makabe 5.37-44)
17Di həɠə laa, di li a kilə nwun dɔnɔ̨ ɲeehaaɓa ɲɔ̨nwɔ̨nmą; di həli Karasə Ɉuifəɠaai ti da kɛ diɛ Tubi lonnii di pɔɔli. 18Di hvo Timote kaa la; aa kɛ həɠə laa, hvo mɛ̨nį lɔpee ta kɛi, kɛlaa aa kɛ kɔkulaa kpulu ta wolo kɛnɛ̨ lɛɛ kɛɛnąą ta ɓa di walaa kpɔ a mɔlɔɔ. 19Dosite da Sosipatɛrə, Makabe nwɔ kɔkulaa nwun nąmįnąą li kɛ, di li laa, nuąi kɛ daa ti hu a Timote nwɔ nuą di di paa, di tɛɛi nu waa pow hu. 20Makabe nwɛi, ə nwɔ kɔlaɠai ɓɛlaɓo a gbulu pɛlɛ-pɛlɛɛ, ə nuą tɔɔ di nwun na, ə bələ həɠə yɛ li pɛlɛi Timote ɓa; nu waa nwun dɔnɔ̨ pulu waa pow hveelɛ di kɔwɔɲą ɓə kɛ yili yei, bɛlɛɛ hoogilɛhəɠənuą waa hveelɛ pulu nwun nɔɔli ɓa. 21Di mo Timote ɓa diɛ mą: Ɉudasə kaa pai ə mo di li a nɛ̨ąą da nɛapɛlɛɛ da diɛ̨ɠaa gɛɛnąą ti da kɛ mą Karniɔn mą, mąąhɔlɔɓo kɔ́ hva pɛli kɛ gɛɛnąą ti kulɔi, nu həli laa walaai kɛ laa, bələɠaa ɲąą kolo pələ ɓa nɔi kəlee hu. 22Ɉudasə nwɔ kɔkulaa kpulu ɓə di gaa tolo-tolo, ɲɔw ə pili di yowoɠaa hu, di mąą yɛ kpɛlin Yálái ti a mɛ̨nį kaa, yɛ gbɔwɔ lɛ, mąą mɛ̨nį ɓa, di bu ɲą a gilɛ, pələ kəlee, diɛ di keeni haɠa, diɛ di keeni nwąną a di wɔ kɔ́ kɔ ɓowaɠaai. 23Ɉudasə ə hvilɛn di pulu kpɔ a nwala-walaa yɛ gɛɛkalanuą ti paa, nu waa pow haaɓa kpɔ ɓə ə di nwun na pili ti. 24Timote yaa kpįnį lee, Dosite da Sosipatɛrə di wɔ holahiɠaa di ɉon; ə kɛi di mąąnɛ̨ɛ̨ a gbanalaa kɛnɛ̨ yɛ di ɓo mą ə li lɔ ti kpɛli-kpɛli, mąąhɔlɔɓo di tamąą di kaayɔwɔɠaa da di nąn nonnii di kɛ ɲee kɔn ma yii yan da pɛli di paai. 25Ə nwoo kwɛlɛ geemɛ̨i pow-lee-pow, yɛ gaa pai nuą tii tɛɛi nɛ̨ŋɛ̨kpɛlɛɛ, yɛ bələi ə gwɛla la, di nɛɛ laa yɛ li, di nąn nonnii nwun mąąɓo mɛ̨nį ɓa. 26Ɉudasə ə li Karniɔn da Atargateiɔn, Ɉudasə ə nu waa pow hveelɛ kɔw lɔɔli nwun dee laa.
Ɛfrɔn da Sitopolisə
(1 Makabe 5.45-54)
27Kpɛɛ ə mo a gɔ́ kalaa ɲowoɠaa diɛ, yɛ di paa tii, ə li a nwɔ kɔlaɠai, ə pɛlɛ Ɛfrɔn ɓa, taa walawala ta li kɛ, nąą ɓə Lisaniasə ə kɛ laa. Lanŋąą a kpakólóɠaa di kɛ tɔɔni ɉįį nwąną mɛ̨i tɔwɔ, diɛ kɔ́ kpɔ a di hvaŋą kɛnɛ̨, kwɛni gbuwulu pili hɛnŋaa di kɛ laa kpɔ tamąą da kɔkɔ́ kwɛlihnŋaa kpɔ kɛnɛ̨. 28Kɛlaa Ɉuifəɠaa di Nąmu hvɛli, yaai a di yowoɠaa hvaŋą hu kala; di daa hon, di nu waa pow hveelɛ gɔw lɔɔli laa nɔi ɓa, a nuą tii kɛ daa kwəi pələ. 29Di həɠə laa, diɛ li Sitopolisə, a kilə nwun dɔnɔ̨ kilə pow Ɉerusalɛmə ɓa. 30Kɛlaa Ɉuifəɠaa tii kɛ laa di mo diɛ Sitopolisə nuą di di hon a nɛlɛɛ di di yee hee di mu a nɛlɛɛ a ɲəlei di kɛ la mɔ̨nɔ̨ hu. 31Ɉudasə da nwɔ holahiɠaa di nuą tii hɛɠɛɛɓo, diɛ diɛ, di di hvaŋą lɔ kpɔnmąą tɛɛi lɔ tii di huwu pɔ tɔwɔ pələ. Di pənə di pa Ɉerusalɛmə, ɉu hvo kwɛa, diɛ nɔwɔ hɛli pu.
Di kɔ́ pɛlɛ Gɔrgiasə ɓa
32Pantəkotə hɛli puɔ pulu, di bələ hon diɛ li pɛlɛi Gɔrgiasə ɓa Idume lɔi ɲąąwooɓomun. 33Gɔrgiasə ə kulɔ ə ɓo nu waa haaɓa nwun na da hoo gilɛhəɠənuą nwun nąąn. 34Di gɔ yili ɲą, Ɉuifəɠaa taɠaa di too. 35Dosite laamun da, yai kɛ Bakenɔrə nuą pɔ, hoogilɛhəɠəmun da ɉu wala-walaa aa kɛ Gɔrgiasə hon a mąą həɠə, yɛ ɲala, yɛ kɛ ə nɛ̨ŋɛ̨n naamui tii hon a vulú; kɛlaa Trasə hoo gilɛhəɠəmun da ə pa ə wolo Dosite ɓa, ə mowon dee mą, Gɔrgiasə ə kulɔ ɲei, ə pu ə li Marisa. 36Ɛsdriasə nwɔ nuą daa kɛ lamu gɔi, diɛ too di hvįįkpɛɛ pələ ɓa. Ɉudasə ə Nąmu hvɛli, yɛ kɛ ə kpɔnmąą tɛɛ di pɔ, ɛlɛɛ, ə tɔɔ di ɲɛ̨itɔwɔ gɔ hu, 37ə naa tɛ wələ mu, a di keeni kɔlɔn nwoo gɔ hu, a di nanni pɔ taai woo, di yee ə tɛɛ Gɔrgiasə nwɔ nuą diɛ.
Ɉudasə ə halaa kulɔ haanuą mąą mɛ̨ni ɓa
38Ɉudasə ə nwɔ nuą ɲąąkpɔn, di li Adulamə daai; kɛlaa nɔwɔ hu voló mɛ̨ihveelɛnąn ni kea kɛ, di di mąą həɠə, a di yíi pələ, di vįitɔɔ yələ kɛ gɛɛnąą tii ɓa. 39Bulu ɓa yələ laaɓoɔ, di pa Ɉudasə kaai, viɛlaɓoɔ kɛ, nuą tii haa di powa həɠə mɛ̨nį ɓa, diɛ li di looi, da di kaayɔwɔɠaa, di nąnni kámą hu. 40Nuąi tii haa di hɛnŋąą kaa di wɔ həɠəɠaa mu, a Ɉamnia haliɠaa mąąwiɛ hɛnŋąą, ɛlɛɛ yan, gaa a hɛn mąą tɔn dɔɔ kɛ Ɉuifəɠaa diɛ. Nu kəlee ə gbaɠala kaa kɛa diɛ kɛ nuąi tii haa nwun ni kɛ. 41Di kəlee di lúwɔ too Nąmu túwɔ pələ ɓa, kiti teemun ɉaŋąą, a loo mɛ̨nįɠaa too ponoŋą, 42diɛ Yálá hvɛli, diɛ kɛ nɛ̨ŋɛ̨n tii nuą di ɉəɠə, ə waa diɛ hva-hva; gɔ kulaa kpəɠíɛ Ɉudasə ə nuą liɛwooɓo, di di kpɔwɔ laa hɔn mo nɛ̨ŋɛ̨n dɔwɔ; hvo gaai mɛ̨nįi laa ɉaanuą diɛ, a di wɔ nɛ̨ŋɛ̨n laa pɔɔ, gaa a di ɲɛ̨i ɓa mɛ̨nį; daa haa, ɉu hvo nii kwɛa li. 43Ə wali hon nu tɛitɛi yei, a waa hveelɛ, ə dɛɛ Ɉerusalɛmə, diɛ pɛli nɛ̨ŋɛ̨n mąąhvaalɛɛ halaa kulɔi la; ə yili kɛ kpɔ tii a ɉaŋąą, a kaalonnaa kpɔɔ-kpɔɔ, yɛ gili hvilɛn na ti haanuą nwun mɛ̨nį ɓa. 44Gbala ə tɔɔ, ə li kɛ ɉolahiɠaa tii too gɔ hu, di kili hvo kɛ tɔɔ li di nwun mɛ̨nį haanuą lɔwai ɓa, Yálá hvɛliɛ haanuą diɛ, nwun və li kɛ mą, ə li lɔ kɛ a kilikpɛɛgwəi mɛ̨nį; 45a kɛ ə kɛi giliŋąhiɛ, yɛ kɛ nuąi da haa a mąąhəɠɛɛ, di hvɛla lɛlɛɛ kaa heeni di tɔwɔ, kili lɛlɛɛ li, Yálá maahon gili li; yili ɓə gɛ yɛ nuą mąą hvoloon ɉalaai tii kulɔ, haanuą mąą mɛ̨nį ɓa, diɛ pɛli di kɛ nɛ̨ŋɛ̨nŋąą mąąhvaalɛɛi.
Currently Selected:
2 Makabe 12: BKPDCG
Highlight
Share
Copy
Want to have your highlights saved across all your devices? Sign up or sign in