ဆာလံကျမ်း 69
69
ကယ်တင်တော်မူရန် တောင်းလျှောက်ခြင်း
ဂီတမှူးအတွက်၊ “နှင်းပန်း” သံစဉ်၊ ဒါဝိဒ်၏ဆာလံ
1အို ဘုရားသခင်၊ အကျွန်ုပ်ကိုကယ်တင်တော်မူပါ။
အကြောင်းမူကား ရေသည် အကျွန်ုပ်၏လည်မျို#69:1 သို့မဟုတ် “စိတ်ဝိညာဉ်”။တိုင်အောင် ရောက်လာပါပြီ။
2အကျွန်ုပ်သည် နက်သောနွံထဲ၌နစ်နေပါပြီ။ ရပ်စရာမြေမာလည်းမရှိပါ။
အကျွန်ုပ်သည် နက်ရှိုင်းသောရေထဲသို့ရောက်နေပါပြီ။
လှိုင်းလုံးကြီးသည် အကျွန်ုပ်ကိုလွှမ်းမိုးပါပြီ။
3အကျွန်ုပ်သည် ဟစ်ခေါ်ရ၍ ပင်ပန်းပါပြီ။ အကျွန်ုပ်၏အာခေါင်သည် ခြောက်ပါပြီ။
အကျွန်ုပ်၏မျက်စိသည် အကျွန်ုပ်၏ဘုရားသခင်ကိုမျှော်ကြည့်ရ၍ အားအင်ကုန်ခန်းပါပြီ။
4အကျွန်ုပ်ကို အကြောင်းမဲ့မုန်းသောသူတို့သည်
အကျွန်ုပ်၏ဦးခေါင်းပေါ်ရှိဆံပင်များထက် ပို၍များပြားကြပါ၏။
အကျွန်ုပ်ကိုဖယ်ရှားသုတ်သင်လိုသည့် လှည့်ဖြားတတ်သော အကျွန်ုပ်၏ရန်သူတို့သည် အားကြီးကြပါ၏။#ဆာ 35:19၊ ယော 15:25။
အကျွန်ုပ်မလုယူခဲ့သည့်အရာကို အကျွန်ုပ်ပြန်ပေးရပါမည်လော။
5အို ဘုရားသခင်၊ ကိုယ်တော်သည် အကျွန်ုပ်၏မိုက်မဲမှုကို သိတော်မူ၏။
အကျွန်ုပ်၏အပြစ်များကို ကိုယ်တော့်ရှေ့မှဖုံးကွယ်ထား၍မရပါ။
6ကောင်းကင်ဗိုလ်ခြေအရှင်သခင်ထာဝရဘုရား၊
ကိုယ်တော်ကိုစောင့်မျှော်သောသူတို့သည် အကျွန်ုပ်ကြောင့် အရှက်မကွဲကြရပါစေနှင့်။
အို အစ္စရေးလူမျိုး၏ဘုရားသခင်၊ ကိုယ်တော်ကိုရှာသောသူတို့သည်
အကျွန်ုပ်ကြောင့် အသရေမပျက်ကြရပါစေနှင့်။
7အကြောင်းမူကား အကျွန်ုပ်သည် ကိုယ်တော်အတွက် ကဲ့ရဲ့ပြစ်တင်ခြင်းကိုခံရပါ၏။
အသရေပျက်ခြင်းသည် အကျွန်ုပ်၏မျက်နှာကို ဖုံးလွှမ်းပါပြီ။
8အကျွန်ုပ်သည် အကျွန်ုပ်၏ညီအစ်ကိုများအတွက် သူစိမ်းဖြစ်သွား၍
အကျွန်ုပ်မိခင်၏သားများအတွက် တစ်ပါးအမျိုးသားဖြစ်သွားပါပြီ။
9အကြောင်းမူကား ကိုယ်တော်၏အိမ်တော်အတွက် ထက်သန်သောစိတ်သည် အကျွန်ုပ်ကိုလွှမ်းမိုးလျက်ရှိပါ၏။
ကိုယ်တော်ကိုကဲ့ရဲ့ပြစ်တင်သောသူတို့၏ ကဲ့ရဲ့ပြစ်တင်သောစကားသည် အကျွန်ုပ်အပေါ်သို့ကျရောက်ပါ၏။#ယော 2:17၊ ရော 15:3။
10အကျွန်ုပ်သည် ငိုကြွေး၍ စိတ်နှလုံးပါလျက်အစာရှောင်သောအခါ
ထိုအမှုကြောင့် ကဲ့ရဲ့ပြစ်တင်ခြင်းခံရပါ၏။
11လျှော်တေအဝတ်ကို ဝတ်သောအခါ
လူတို့အတွက် ပြောစရာဖြစ်လာပါ၏။
12မြို့တံခါးဝတွင်ထိုင်နေသောသူတို့သည် အကျွန်ုပ်အကြောင်းကို တီးတိုးပြောဆိုကြပါ၏။
အကျွန်ုပ်သည် သေရည်သေရက်သောက်စားသော သူတို့၏တေးဖွဲ့သီဆိုစရာများဖြစ်ရပါ၏။
13အို ထာဝရဘုရား၊ အကျွန်ုပ်မူကား နှစ်သက်ဖွယ်သောအချိန်၌ ကိုယ်တော့်ထံ ဆုတောင်းပါ၏။
အို ဘုရားသခင်၊ ကိုယ်တော်၏ကြီးမားသောမေတ္တာကရုဏာနှင့်အညီ
ကိုယ်တော်၏ကယ်တင်ခြင်းနှင့်ဆိုင်သော သမ္မာတရားဖြင့် အကျွန်ုပ်ကိုထူးတော်မူပါ။
14အကျွန်ုပ်ကိုရွှံ့ထဲမှ ကယ်နုတ်တော်မူပါ။ နစ်စေတော်မမူပါနှင့်။
အကျွန်ုပ်ကိုမုန်းသောသူတို့ထံမှလည်းကောင်း၊ နက်ရှိုင်းသောရေထဲမှလည်းကောင်း
အကျွန်ုပ်ကယ်နုတ်ခြင်းခံရပါစေသော။
15ရေလှိုင်းလုံးကြီးသည် အကျွန်ုပ်ကိုမလွှမ်းမိုးပါစေနှင့်။
နက်သောရေသည်လည်း အကျွန်ုပ်ကိုမမျိုပါစေနှင့်။
တွင်းဝသည်လည်း အကျွန်ုပ်အပေါ်၌ ပိတ်မထားပါစေနှင့်။
16အို ထာဝရဘုရား၊ ကိုယ်တော်၏မေတ္တာကရုဏာသည်
ကောင်းမြတ်သည်ဖြစ်၍ အကျွန်ုပ်ကိုထူးတော်မူပါ။
ကိုယ်တော်၏ကြီးမားသောသနားစုံမက်ခြင်းနှင့်အညီ အကျွန်ုပ်ဘက်သို့လှည့်တော်မူပါ။
17ကိုယ်တော်၏အစေအပါးထံမှ မျက်နှာလွှဲတော်မမူပါနှင့်။
အကျွန်ုပ်သည် ဘေးဥပဒ်နှင့်ကြုံတွေ့နေရသည်ဖြစ်၍ အကျွန်ုပ်ကို အလျင်အမြန်ထူးတော်မူပါ။
18အကျွန်ုပ်၏စိတ်ဝိညာဉ်ထံသို့ချဉ်းကပ်၍ ရွေးနုတ်တော်မူပါ။
အကျွန်ုပ်၏ရန်သူများကြောင့် အကျွန်ုပ်ကိုရွေးနုတ်ကယ်တင်တော်မူပါ။
19အကျွန်ုပ်ခံရသောကဲ့ရဲ့ပြစ်တင်ခြင်း၊
အရှက်ကွဲခြင်းနှင့် အသရေပျက်ခြင်းတို့ကို ကိုယ်တော်သိပါ၏။
အကျွန်ုပ်၏ရန်သူအပေါင်းတို့သည် ကိုယ်တော်၏ရှေ့မှောက်၌ရှိကြပါ၏။
20ကဲ့ရဲ့ပြစ်တင်ခြင်းသည် အကျွန်ုပ်၏စိတ်နှလုံးကိုကျိုးပဲ့စေ၍
အကျွန်ုပ်သည် အလွန်စိတ်ပျက်အားငယ်လျက်ရှိပါ၏။
အကျွန်ုပ်သည် စာနာထောက်ထားမည့်သူကို စောင့်မျှော်သော်လည်း မရှိခဲ့ပါ။
နှစ်သိမ့်ပေးမည့်သူများကိုရှာသော်လည်း မတွေ့ခဲ့ပါ။
21သူတို့သည် အကျွန်ုပ်၏အစာအတွက် ဆေးခါး#69:21 သို့မဟုတ် “အဆိပ်”။ကိုကျွေး၍
အကျွန်ုပ်ရေငတ်သောအခါ ဝိုင်ချဉ်ကို တိုက်ကြပါ၏။#မ 27:48၊ မာ 15:36။
22သူတို့ရှေ့၌ရှိသောစားပွဲသည် ကျော့ကွင်းသော်လည်းကောင်း၊
လက်တုံ့ပြန်စရာသော်လည်းကောင်း၊ ထောင်ချောက်သော်လည်းကောင်း ဖြစ်ပါစေ။
23သူတို့၏မျက်စိသည် မမြင်နိုင်အောင်ကွယ်ပါစေ။ သူတို့၏ကျောသည်လည်း အစဉ်ကုန်းပါစေ။#ရော 11:10။
24ကိုယ်တော်၏အမျက်တော်ကို သူတို့အပေါ်သွန်းလောင်းတော်မူပါ။
ကိုယ်တော်၏ပြင်းထန်သောအမျက်တော်သည် သူတို့ကိုကျော်နင်းလွှမ်းမိုးပါစေ။
25သူတို့၏နေရပ်စခန်းသည် လူသူကင်းဝေးရာအရပ်ဖြစ်ပါစေ။
သူတို့၏တဲများ၌ နေထိုင်သောသူမရှိပါစေနှင့်။#တ 1:20။
26အကြောင်းမူကား သူတို့သည် ကိုယ်တော်ဒဏ်ခတ်ထားသောသူကို လိုက်လံညှဉ်းဆဲကြပြီး
ကိုယ်တော်ဒဏ်ရာရစေသောသူတို့၏ ဒုက္ခဝေဒနာအကြောင်းကို ပြောဆိုကြပါ၏။
27သူတို့၏ဒုစရိုက်အပေါ် ဒုစရိုက်ကိုထပ်၍တိုးစေတော်မူပါ။
သူတို့သည် ကိုယ်တော်၏ဖြောင့်မတ်ခြင်းထဲသို့ ဝင်ရောက်ခွင့်မရှိပါစေနှင့်။
28သူတို့သည် အသက်စာစောင်မှ ပယ်ဖျက်ခြင်းခံရ၍
ဖြောင့်မတ်သောသူတို့ထဲတွင် စာရင်းဝင်ခြင်းမရှိပါစေနှင့်။
29အကျွန်ုပ်မူကား အဖိနှိပ်ခံရ၍ နာကျင်နေပါ၏။
အို ဘုရားသခင်၊ ကိုယ်တော်၏ကယ်တင်ခြင်းသည် အကျွန်ုပ်ကိုလုံခြုံစွာစောင့်ရှောက်ပါစေသော။
30ငါသည် ဘုရားသခင်၏နာမတော်ကို သီချင်းဖြင့်ချီးမွမ်း၍
ကိုယ်တော်ကြီးမြတ်တော်မူကြောင်းကို ကျေးဇူးတော်ချီးမွမ်းခြင်းဖြင့် ဖော်ပြမည်။
31ထာဝရဘုရားသည် ထိုအမှုကို နွားတည်းဟူသော
ချိုနှင့်ခွာများဖြင့်ပြည့်စုံသောနွားထီးထက် နှစ်သက်တော်မူလိမ့်မည်။
32စိတ်နှိမ့်ချသောသူတို့သည် ထိုအမှုကိုမြင်၍ ဝမ်းမြောက်ကြလိမ့်မည်။
ဘုရားသခင်ကိုရှာသောသူတို့၊ သင်တို့၏စိတ်နှလုံးသည် ရှင်သန်ပါစေသော။
33အကြောင်းမူကား ထာဝရဘုရားသည် နွမ်းပါးသောသူတို့ကို နားညောင်းတော်မူ၏။
အချုပ်အနှောင်ခံရသောမိမိ၏လူတို့ကိုလည်း မထီမဲ့မြင်ပြုတော်မမူပေ။
34ကောင်းကင်နှင့်မြေကြီး၊ သမုဒ္ဒရာနှင့်
သမုဒ္ဒရာ၌လှုပ်ရှားသွားလာတတ်သောသတ္တဝါအပေါင်းတို့သည်
ကိုယ်တော်ကိုချီးမွမ်းကြပါစေသော။
35အကယ်စင်စစ် ဘုရားသခင်သည် ဇိအုန်ကိုကယ်တင်၍
ယုဒပြည်ရှိမြို့များကို ပြန်လည်တည်ဆောက်တော်မူလိမ့်မည်။
ထိုအခါ သူတို့သည် ထိုအရပ်တွင်နေထိုင်လျက် ၎င်းကိုပိုင်ဆိုင်ကြလိမ့်မည်။
36ကိုယ်တော့်အစေအပါးတို့၏သားမြေးစဉ်ဆက်တို့သည် ထိုအရပ်ကိုအမွေဆက်ခံရကြလိမ့်မည်။
ကိုယ်တော်၏နာမတော်ကို မြတ်နိုးသောသူတို့သည်လည်း ထိုအရပ်၌နေရကြလိမ့်မည်။
Currently Selected:
ဆာလံကျမ်း 69: MSBU
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
MYANMAR STANDARD BIBLE©
Copyright © 2012, 2014, 2017, 2021 by Global Bible Initiative