သုတ္တံကျမ်း 1
1
သုတ္တံကျမ်း၏ရည်ရွယ်ချက်
1ဒါဝိဒ်၏သားတော်၊ အစ္စရေးဘုရင်၊ ရှောလမုန်၏သုတ္တံစကားများ။
2ဤစကားတို့သည် ဉာဏ်ပညာနှင့်ဆုံးမပဲ့ပြင်ခြင်းကို သိရှိစေရန်အတွက်လည်းကောင်း၊
အသိဉာဏ်နှင့်ဆိုင်သောစကားတို့ကို
နားလည်စေရန်အတွက်လည်းကောင်း၊
3ပညာသတိနှင့်ဆိုင်သောဆုံးမပဲ့ပြင်ခြင်း၊ ဖြောင့်မတ်ခြင်း၊ တရားမျှတခြင်းနှင့်
သမာသမတ်ရှိခြင်းကို ရရှိစေရန်အတွက်လည်းကောင်း၊
4အသိဉာဏ်နည်းပါးသောသူတို့အား
ဆင်ခြင်ဉာဏ်ကိုပေး၍
လူငယ်တို့အား အသိပညာနှင့်အလိမ္မာဉာဏ်ကို
ပေးရန်အတွက်လည်းကောင်း ဖြစ်ကြ၏။
5ပညာရှိသောသူသည် နားထောင်၍
ပညာတိုးပွားပါစေ။
အသိဉာဏ်ရှိသောသူသည်လည်း
လမ်းညွှန်မှုများရရှိပါစေ။
6ဤသည်ကား သုတ္တံစကား၊ ဥပစာစကားမှစ၍
ပညာရှိတို့၏စကားများနှင့် သူတို့၏ပဟေဠိများကို
နားလည်စေရန်အတွက်ဖြစ်၏။
7ထာဝရဘုရားကိုကြောက်ရွံ့ခြင်းသည်
အသိပညာ၏အရင်းအမြစ်ဖြစ်၏။
ဆိုးမိုက်သောသူတို့သည်
ဉာဏ်ပညာနှင့် ဆုံးမပဲ့ပြင်ခြင်းကို မထီမဲ့မြင်ပြုတတ်ကြ၏။
မကောင်းသောလမ်းကို ရှောင်ကြဉ်ခြင်း
8ငါ့သား၊ သင့်ဖခင်၏ဆုံးမပဲ့ပြင်ခြင်းကို နားထောင်လော့။
သင့်မိခင်၏သွန်သင်ချက်ကိုလည်း မပစ်ပယ်နှင့်။
9အကြောင်းမူကား ထိုအရာတို့သည်
သင်၏ဦးခေါင်းအတွက် တင့်တယ်သောပန်းဦးရစ်၊ သင်၏လည်ပင်းအတွက် လည်ဆွဲဖြစ်ကြလိမ့်မည်။
10ငါ့သား၊ အပြစ်သားတို့သည် သင့်ကိုသွေးဆောင်လျှင်
မလိုက်လျောနှင့်။
11အကယ်၍ သူတို့က “ငါတို့နှင့်အတူလိုက်ခဲ့လော့။
တစ်စုံတစ်ယောက်ကိုသတ်ဖြတ်ရန် ငါတို့ချောင်းမြောင်းကြစို့။
အကြောင်းမရှိဘဲ အပြစ်ကင်းသောသူကို ပုန်းအောင်းတိုက်ခိုက်ကြစို့။
12မရဏာနိုင်ငံကဲ့သို့ သူတို့ကို အရှင်လတ်လတ်ဝါးမျိုလျက်
သေတွင်းထဲသို့ တစ်ကိုယ်လုံးဆင်းသွားရသူများကဲ့သို့ ဖြစ်စေကြစို့။
13ငါတို့သည် အဖိုးတန်သောစည်းစိမ်ဥစ္စာမျိုးစုံကို တွေ့ရှိ၍
လုယက်ပစ္စည်းများဖြင့် ငါတို့အိမ်ကိုပြည့်စေကြမည်။
14ငါတို့နှင့် ဆိုးတူကောင်းဖက်ပူးပေါင်းလော့။
ငါတို့အားလုံး ပိုက်ဆံအိတ်တစ်အိတ်တည်းထဲမှ ဝေမျှသုံးစွဲကြစို့”ဟု ဆိုလျှင်လည်း
15ငါ့သား၊ သူတို့နှင့်အတူ ထိုလမ်းကိုမလိုက်နှင့်။
သူတို့သွားရာလမ်းသို့မလိုက်မိစေရန် သင်၏ခြေကိုထိန်းချုပ်လော့။
16အကြောင်းမူကား သူတို့၏ခြေသည် မကောင်းမှုပြုရာသို့ပြေးသွား၍
သူတို့သည် လူကိုသတ်ဖြတ်ရန် လျင်မြန်ကြ၏။#ရော 3:15။
17အမှန်စင်စစ် မည်သည့်ကျေးငှက်၏မျက်စိရှေ့၌မဆို
ပိုက်ကွန်ကိုထောင်လျှင် အလဟဿဖြစ်၏။
18ထိုသူတို့သည် ကိုယ့်ကိုယ်ကိုယ်သတ်ဖြတ်ရန် ချောင်းမြောင်း၍
ကိုယ့်အသက်ကိုကိုယ် ပုန်းအောင်းတိုက်ခိုက်နေကြခြင်းသာဖြစ်၏။
19မတရားသောအကျိုးစီးပွားကို တပ်မက်သောသူတိုင်း၏လမ်းတို့သည် ထိုကဲ့သို့ဖြစ်ကြ၏။
ထိုသို့သောအကျိုးစီးပွားသည် ၎င်းကိုပိုင်ဆိုင်သောသူတို့၏အသက်ကို နုတ်ယူတတ်၏။
ဉာဏ်ပညာ၏ကြွေးကြော်သံ
20ဉာဏ်ပညာသည် လမ်းပေါ်၌ကြွေးကြော်၍
လမ်းဆုံများ၌ မိမိအသံကိုလွှင့်တတ်၏။
21ဆူညံသောလမ်းထိပ်မှ ဟစ်ခေါ်၍
မြို့တံခါးအဝင်ဝတို့၌မြွက်ဆိုသောစကားဟူမူကား
22“အသိဉာဏ်နည်းပါးသောသူတို့သည် အသိဉာဏ်နည်းပါးခြင်းကိုနှစ်သက်လျက်၊
ပြက်ရယ်ပြုတတ်သောသူတို့သည် မိမိတို့၏ပြက်ရယ်ပြုခြင်း၌မွေ့လျော်လျက်၊
မိုက်မဲသောသူတို့သည် အသိပညာကိုမုန်းတီးလျက်
မည်မျှကြာအောင်နေကြဦးမည်နည်း။
23ငါဆိုဆုံးမသောစကားကို လိုက်နာကြလော့။
ကြည့်ရှုလော့။ ငါသည် ငါ၏ဝိညာဉ်ကို သင်တို့အပေါ်သို့သွန်းလောင်းမည်။
ငါ၏စကားများကို သင်တို့အား သိစေမည်။
24သို့သော် ငါခေါ်သောအခါ သင်တို့သည် ငြင်းပယ်ကြ၏။
ငါ့လက်ကိုဆန့်တန်းသောအခါ မည်သူမျှ အလေးမထားကြ။
25သင်တို့သည် ငါပေးသောအကြံဉာဏ်အားလုံးကို လျစ်လျူရှုကြပြီး
ငါ၏ဆိုဆုံးမခြင်းကိုလည်း အလိုမရှိကြ။
26ထို့ကြောင့် သင်တို့ဘေးဒုက္ခရောက်သောအခါ ငါရယ်မောမည်။
ကြောက်မက်ဖွယ်ဘေးသည် သင်တို့ထံသို့ရောက်သောအခါ ငါပြက်ရယ်ပြုမည်။
27ကြောက်မက်ဖွယ်ဘေးသည် လေပြင်းမုန်တိုင်းကဲ့သို့
သင်တို့အပေါ်သက်ရောက်သောအခါ၌လည်းကောင်း၊
ဘေးဒုက္ခသည် လေပွေကဲ့သို့ သင်တို့ထံရောက်လာသောအခါ၌လည်းကောင်း၊
ဆင်းရဲဒုက္ခနှင့်ဘေးဥပဒ်သည် သင်တို့အပေါ်သက်ရောက်သောအခါ၌လည်းကောင်း
28သူတို့သည် ငါ့ကိုခေါ်ကြလိမ့်မည်။ သို့သော် ငါသည် ထူးမည်မဟုတ်။
သူတို့သည် ငါ့ကိုကြိုးစား၍ရှာကြလိမ့်မည်။ သို့သော် ငါ့ကိုတွေ့ရကြမည်မဟုတ်။
29အကြောင်းမူကား သူတို့သည် အသိပညာကိုမုန်း၍
ထာဝရဘုရားအား ကြောက်ရွံ့ခြင်းကို မရွေးချယ်ကြ။
30ငါ၏အကြံဉာဏ်ကိုအလိုမရှိကြ။
ငါ၏ဆိုဆုံးမစကားအားလုံးကိုလည်း မထီလေးစားပြုခဲ့ကြ၏။
31ထို့ကြောင့် သူတို့သည် မိမိတို့ပြုမူကျင့်ကြံသောအမှုအရာ၏အသီးကိုစား၍
မိမိတို့၏အကျင့်အကြံများနှင့် ဝအီကြလိမ့်မည်။
32အကြောင်းမူကား အသိဉာဏ်နည်းပါးသောသူတို့သည်
မိမိ၏လမ်းလွဲဖောက်ပြန်မှုကြောင့် သေကြရ၏။
မိုက်မဲသောသူတို့သည်လည်း
မိမိကိုယ်မိမိအားရကျေနပ်မှုကြောင့် ပျက်စီးကြရ၏။
33သို့သော် ငါ့စကားကိုနားထောင်သောသူသည် ဘေးကင်းလုံခြုံစွာနေရ၍
ဘေးအန္တရာယ်ကို မကြောက်ဘဲ အေးချမ်းစွာနေရလိမ့်မည်။”
Currently Selected:
သုတ္တံကျမ်း 1: MSBU
Highlight
Share
Copy
Want to have your highlights saved across all your devices? Sign up or sign in
MYANMAR STANDARD BIBLE©
Copyright © 2012, 2014, 2017, 2021 by Global Bible Initiative
