ယေရမိအနာဂတ္တိကျမ်း 27

ဘေဘီလုံဘုရင်၏ထမ်းပိုး

1ယောရှိမင်းကြီး၏သားတော် ယုဒဘုရင်ယောယကိမ်မင်းကြီး နန်းတက်စ၌ ထာဝရဘုရား၏နှုတ်ကပတ်တော်သည် ယေရမိထံသို့ရောက်လာ၏။ 2ထာဝရဘုရားက “ကြိုးများ၊ ထမ်းပိုးများကိုပြုလုပ်ပြီး သင်၏ပခုံး#27:2 တိုက်ရိုက်ပြန်ဆိုလျှင် “သင်၏လည်ပင်း”။ပေါ် တင်လော့။ 3ထို့နောက် ဂျေရုဆလင်မြို့ရှိ ယုဒဘုရင်ဇေဒကိမင်းကြီးရှိရာသို့ ရောက်လာသော သံတမန်တို့မှတစ်ဆင့် ဧဒုံဘုရင်၊ မောဘဘုရင်၊ အမ္မုန်ဘုရင်၊ တိုင်ရာဘုရင်၊ ဆီဒုန်ဘုရင်တို့ထံသို့ ကြိုးနှင့်ထမ်းပိုးတို့ကို ပေးပို့လော့။ 4သူတို့၏သခင်တို့အားလည်း အစ္စရေးလူမျိုး၏ဘုရားသခင် ကောင်းကင်ဗိုလ်ခြေအရှင်ထာဝရဘုရားက 5‘ကြီးမားသောတန်ခိုးနှင့် လက်ရုံးတော်ကိုဆန့်လျက် ကမ္ဘာမြေကြီးနှင့် မြေမျက်နှာပြင်ပေါ်ရှိ လူနှင့်တိရစ္ဆာန်တို့ကို ဖန်ဆင်းခဲ့သူမှာ ငါပင်ဖြစ်၍ ငါပေးလိုသောသူအား ငါပေးပြီ။ 6ယခု ဤပြည်အားလုံးကို ငါ့အစေအပါး ဘေဘီလုံဘုရင်နေဗုခဒ်နေဇာမင်းကြီးလက်သို့ ငါအပ်ပြီ။ တောရိုင်းတိရစ္ဆာန်များကိုပင် သူ၏အစေကိုခံရန် ငါအပ်လေပြီ။ 7သူ၏နိုင်ငံအဆုံးမရောက်မီအထိ လူမျိုးအပေါင်းတို့သည် သူနှင့်သူ၏သားမြေးတို့ထံ၌ အစေခံရလိမ့်မည်။ ထို့နောက်မှ သူသည် လူမျိုးကြီးများ၊ တန်ခိုးကြီးသောဘုရင်များထံ အစေခံရလိမ့်မည်’ဟု မိန့်တော်မူ၏။

8တစ်ဖန် ထာဝရဘုရားက ‘ဤလူမျိုး၊ ဤနိုင်ငံသည် ဘေဘီလုံဘုရင်နေဗုခဒ်နေဇာမင်းကြီးကို အစေမခံ၊ ဘေဘီလုံဘုရင်၏ထမ်းပိုးကို မထမ်းလျှင် ဤလူမျိုးကို ဓားဘေး၊ ငတ်မွတ်ခေါင်းပါးခြင်းဘေး၊ ကပ်ရောဂါဘေးတို့ဖြင့် ငါဒဏ်ခတ်မည်။ ထိုဘုရင်၏လက်ဖြင့် ရှင်းရှင်းဖျက်ဆီးပစ်မည်။ 9သို့ဖြစ်၍ သင်တို့သည် ဘေဘီလုံဘုရင်ကို အစေခံရမည်မဟုတ်ဟု ဆိုသော ပရောဖက်များ၊ ဂမ္ဘီရအတတ်ပညာရှင်များ၊ အိပ်မက်နိမိတ်ရသူများ၊ ဗေဒင်ဆရာများနှင့် မှော်ဆရာများ၏စကားကို နားမထောင်ကြနှင့်။ 10သင်တို့အား သင်တို့၏ပြည်မှ အဝေးသို့လွင့်ထွက်သွားစေရန်နှင့် ငါသည် သင်တို့ကိုနှင်ထုတ်၍ သင်တို့ပျက်စီးသွားစေရန် သူတို့သည် မဟုတ်မမှန်ပရောဖက်ပြုဟောပြောကြ၏။ 11သို့သော် ဘေဘီလုံဘုရင်၏ထမ်းပိုးကိုထမ်း၍ ထိုဘုရင်ကိုအစေခံသောလူမျိုးကို သူတို့၏နေရင်းပြည်၌ ငါထားမည်။ နေရင်းပြည်၌ ထွန်ယက်လုပ်ကိုင်ရလိမ့်မည်။ နေရင်းပြည်၌ နေထိုင်ရလိမ့်မည်’ဟူ၍ မိန့်တော်မူကြောင်း ဆင့်ဆိုစေလော့”ဟု ငါ့အား မိန့်ဆို၏။

ဇေဒကိမင်းကြီးကို သတိပေးခြင်း

12ငါသည် ထိုစကားအလုံးစုံတို့ကို ယုဒဘုရင်ဇေဒကိမင်းကြီးအား လျှောက်တင်၏။ “အရှင်သည် ဘေဘီလုံဘုရင်၏ထမ်းပိုးကိုထမ်း၍ ထိုဘုရင်နှင့် သူ၏လူများကို အစေခံလျက် အသက်ရှင်ပါလော့။ 13ဘေဘီလုံဘုရင်ကို အစေမခံသောလူမျိုးသည် ဓားဘေး၊ ငတ်မွတ်ခေါင်းပါးခြင်းဘေး၊ ကပ်ရောဂါဘေးတို့ဖြင့် သေရမည်ဟု ထာဝရဘုရားမိန့်တော်မူသည့်အတိုင်း မင်းကြီးနှင့်မင်းကြီး၏လူတို့သည် အဘယ်ကြောင့် ထိုကဲ့သို့သေရပါမည်နည်း။ 14‘သင်တို့သည် ဘေဘီလုံဘုရင်ကို အစေခံရမည်မဟုတ်’ဟု ဆိုသော ပရောဖက်တို့၏စကားကို နားမထောင်ကြနှင့်။ သူတို့သည် မဟုတ်မမှန်ပရောဖက်ပြုဟောပြောကြ၏။ 15ထာဝရဘုရားက ‘ငါသည် သူတို့ကိုမစေလွှတ်။ သင်တို့ကို ငါနှင်ထုတ်၍ သင်တို့နှင့် သင်တို့အား ပရောဖက်ပြုဟောပြောသောပရောဖက်တို့ ပျက်စီးခြင်းသို့ရောက်စေရန် သူတို့သည် ငါ့နာမဖြင့် မဟုတ်မမှန်ပရောဖက်ပြုဟောပြောကြ၏’ဟူ၍ မိန့်တော်မူပြီ”ဟု ငါဆင့်ဆို၏။

16ထို့နောက် ငါက ယဇ်ပုရောဟိတ်များနှင့် ပြည်သူပြည်သားအပေါင်းတို့အား “ထာဝရဘုရားက ‘ထာဝရဘုရား၏အိမ်တော်အသုံးအဆောင်များကို ဘေဘီလုံမြို့မှ အမြန်ဆုံးပြန်ယူဆောင်လာမည်ဟု သင်တို့အား ပရောဖက်ပြုဟောပြောသော ပရောဖက်တို့၏စကားကို နားမထောင်ကြနှင့်။ သူတို့သည် မဟုတ်မမှန်ပရောဖက်ပြုဟောပြောကြ၏။ 17သူတို့၏စကားကို နားမထောင်ကြနှင့်။ ဘေဘီလုံဘုရင်ကို အစေခံ၍ အသက်ရှင်ကြလော့။ အဘယ်ကြောင့် ဤမြို့သည် ပြိုပျက်ရာအရပ်ဖြစ်ရပါမည်နည်း။ 18သူတို့သည် ပရောဖက်ဖြစ်၍ ထာဝရဘုရား၏နှုတ်ကပတ်တော်သည် သူတို့နှင့်အတူရှိမည်ဆိုလျှင် ထာဝရဘုရား၏အိမ်တော်၊ ယုဒဘုရင်၏နန်းတော်၊ ဂျေရုဆလင်မြို့၌ ကျန်ရစ်သောအသုံးအဆောင်များကို ဘေဘီလုံမြို့သို့ယူဆောင်မသွားရန် ကောင်းကင်ဗိုလ်ခြေအရှင်ထာဝရဘုရားအား တောင်းပန်ကြစေ’ဟု မိန့်တော်မူ၏။ 19ကောင်းကင်ဗိုလ်ခြေအရှင်ထာဝရဘုရားက ဤမြို့၌ကျန်ရစ်သော တိုင်များ၊ ရေကန်၊ တွန်းလှည်းများ၊ အခြားအသုံးဆောင်ပစ္စည်းများနှင့်ပတ်သက်၍ ဤသို့မိန့်တော်မူ၏။ 20ဘေဘီလုံဘုရင်နေဗုခဒ်နေဇာမင်းကြီးသည် ယောယကိမ်၏သား ယုဒဘုရင်ယေခေါနိမှစ၍ ယုဒပြည်၊ ဂျေရုဆလင်မြို့၌ရှိသောမှူးမတ်များအားလုံးကို ဂျေရုဆလင်မြို့မှ ဘေဘီလုံမြို့သို့ ဖမ်းခေါ်သွားသောအခါ ထိုအသုံးအဆောင်တို့ကို မယူသွားဘဲချန်ထားခဲ့၏။ 21ထိုသို့ ထာဝရဘုရား၏အိမ်တော်၊ ယုဒဘုရင်၏နန်းတော်နှင့် ဂျေရုဆလင်မြို့တွင် ကျန်ရစ်သောအသုံးအဆောင်ပစ္စည်းများနှင့်ပတ်သက်၍ အစ္စရေးလူမျိုး၏ဘုရားသခင် ကောင်းကင်ဗိုလ်ခြေအရှင်ထာဝရဘုရားက 22‘ထိုအသုံးအဆောင်တို့ကို ဘေဘီလုံမြို့သို့ ယူဆောင်သွားကြလိမ့်မည်။ ငါအကြည့်အရှုကြွလာမည့်နေ့အထိ ထိုမြို့တွင် ထားကြလိမ့်မည်။ ထို့နောက်မှ ထိုအသုံးအဆောင်တို့ကို ပြန်ယူဆောင်လာ၍ ဤနေရာ၌ထားမည်’ဟူ၍ မိန့်တော်မူသည်”ဟု ဆင့်ဆို၏။

Currently Selected:

ယေရမိအနာဂတ္တိကျမ်း 27: MSBU

Highlight

Copy