Matthew 4

Jesus-aam Naspaamallra

1Jesus-aaq tua-i Anernerem yuilqumun ayautaa, tuunrangayagmun naspaamasqelluku. 2Neraituq-llu ernerni yuinaagni malrugni unugtuumaita, nutaan-llu kaingluni. 3Picetaarilriim-llu ullagaa qanrulluku, “Agayutem Qetunraqkaten teggalqut ukut kelipaurteski.” 4Tau͡gaam kiugaa, “Igausngauq, ‘Keliparrlainaq yuum yuutekenritaa, tau͡gaam qaneryaraq tamalkuan Agayutem qanranek anlleq.’” 5Tua-i tuunrangayiim ayautaa nunarpagnun kenciknarqelrianun, agayuviim-llu kangranun nangerngavkarluku. 6Qanrutaa-llu, “Agayutem Qetunraqkaten unavet igten; igausngiin, ‘An'gilani ellimerciqai elpet pitekluten; taukut-llu tegumiaqeciqaatgen, it'gaten teggalqunun kalgucetevkenaki.’” 7Jesus-aam qanrutaa, “Igausngauq cali, ‘Ataneq Agayuten naspaayunaitan.’” 8Cali tuunrangayiim ayautaa ingrirpiim qertuqapigtellriim kangranun, ellamiut-llu angayuqauviit tamalkuita kenegnartaciat elliinun tangercetai qanrulluku-llu, 9“Makut tamalkuita elpenun cikiutekciqanka ciisqumiggluten ciuqamnun ciktaarvikekuvnga.” 10Jesus-aam qanrutaa, “Au͡g'a, tuunrangayaak, igausngiin, ‘Atanrem Agayutvet ciuqerrani ciktaararkauguten, kevgiurluku-llu tauna kiingan.’” 11Nutaan tuunrangayiim unitaa; tangerrluku-llu, an'gilat ullagluku kevgiuraat.

12Jesus-aaq-llu niicami John-aam itercimacianek, tuaken ayagtuq Galilee-amun. 13Nazareth-aarmiunek-llu upagtuq Capernaum-aamun, nanvarpiim cen̄iinun, Zebulun-aam Naphtali-m-llu yaaqsinrilkiignun, 14tua-i piciurtuq cali Isaiah-kun prophet-aakun qanrutkumalria waten, 15“Zebulun-aam nunii, Naphtali-m-llu nunii, nanvarpiim cen̄iini, Jordan-aam-llu akilirnera, Agayumanrilnguut-llu nuniit, Galilee-am ilii, 16tan'germi uitalriit yuut tanqigpagmek tangertut, cali-llu tuqum talinrani uitalriit tanqiim erutai.”

Jesus-aam Caliaminek Ayagnillra

17Tamana engelekluku Jesus-aaq qaneryariungellruuq qanraqluni, “Umyualinqigci, Agayutem angayuqauvia ukaqsigian.”

18Nanvarpiim-llu cen̄iini piyuallermini amaqliqelriik tangrrak, Simon-aaq (Peter-aamek at'lek) anelgutii-llu Andrew, kuvyamek civcilriik nanvamun, neqsulriaruamek. 19Qanrutak-llu, “Maligtegnga, yugnek cangyaurceciiqamtek.” 20Kuvyasek-llu egmian unitaak maliggluku-llu. 21Tuaken-llu ayakaniami allagnek amaqliqelriignek tangertuq, James-aamek Zebedee-am qetunraanek, anelgutiinek-llu John-aamek; taukuk angyamtuk atasek ilakluku, kuvyamegnek-llu ilaarturilutek. Tua-i cali taisqak. 22Egmian-llu angyaq unitaak atasek-llu, maliggluku-llu.

23Jesus-aaq-llu Galilee-ami tamiini ullagtaarutuq, agayuviitni qaneryariurluni, Angayuqauviim-llu qaneryarartaa qalarutekluku, anirturiluni-llu naulluulrianek apqucilegnek-llu yugnek. 24Elliin-llu caliara Syria-mi niitnauguq. Taumek elliinun ullautait naulluulriit, ayuqenrilngurnek apqucilget, akngialriit anernerrlulget-llu, qistetulit-llu, pektesciigalnguut-llu; elliin-llu anirturai. 25Yugugaat-llu maligtaat, Galilee-amek Decapolis-aamek-llu, Jerusalem-aarmiut-llu Judea-m-llu yuin, Jordan-aam-llu akianek.

Currently Selected:

Matthew 4: YPK

Highlight

Copy