Luke 3

John-aam Angllurcecistem Caliara

1Allrakut akimiaratni Tiberius-aam Caesar-aam atanvaullrani, Pontius-aaq Pilate-aaq atanruluni Judea-mi, Herod-aaq-llu atanerruaruluni Galilee-ami, anelgutii-llu Philip-aaq atanerruaruluni Abilene-ami, Annas-aaq Caiaphas-aaq-llu agayulirten͞gunrullragni. 2Tuani Agayutem qaneryaraan John-aaq, Zacharias-aam qetunraa, tekitaa yuilqumtellrani. 3Jordan-aam-llu avatiinun tekituq qalarutekluku-llu anglluryaraq umyualinqigtesqun assiilnguut au͡gautekaat. 4Igaumaciatun Isaiah-m igaini, “Yuilqumi qayagalriim erinii, ‘Atanrem tumkaa elluaqcarciu pekcararkai-llu nalqigcarciki. 5Ilutulriit imiumaciqut, ingrit qemit-llu tamarmeng elavcimaciqut, nalqialnguut-llu nalqigcimaciqut, manialnguut-llu manigcimaluteng. 6Yuut-llu tamarmeng Agayutem anirturitii tangerciqaat.’”

7Yugugaat-llu ellminun anglluryartulriit qanrutai, “Elpeci, ciissirpiit piyagaitni! Kia elpengcartaci avitesqelluku eq'uqertii tekitarkaq? 8Taumek naugiluci yuucirpeciuggun umyualinqigtellerci nasvagciu, qankunavkenaci-llu umyuarpeciuggun, ‘Abraham-aaq ciuliaqaput’. Wani-wa qanrutamci Agayun makunek teggalqunek kinguverkiuryugngauq Abraham-aamun. 9Maa-i-llu napat aciit piqertuutarmek ellivikumaut. Taumek napa atsangyunrilnguq assilrianek, kepumaarkauguq kenermun-llu muriulluku.” 10Yugugaat-llu aptaat, “Wangkuta-mi qaillun piciqseta?” 11Kiugai-llu, “Malrugnek paltuungqellriim piilnguq avguskiliu, neqkautellek-llu tuaten pili.” 12Akiliqurautnek-llu quyurcistet anglluryarturtut, apluku-llu, “Elitnauristaa, qaillun-mi wangkuta piciqseta?” 13Qanrutai-llu, “Akiliquraun picirkiumalria cipnissuaranriqiciu.” 14Anguyagtet-llu aptaat, “Tua-i-llu wangkuta, qaillun piciqseta?” Kiugai-llu, “Uayanrilkiciu yuk picilirpek'naku-llu, akiliutevcen̄ek-llu elaraksaunaci.”

15Yuut-llu utaqalgilriatun ayuqngata, John-aaq-llu paqnakngatgu Christ-auyukluku, taungunricukluku-llu, 16John-aam tamalkuita qanrutai, “Wiinga-wa merkun angllurcet'laramci, tau͡gaam wangni angenrulria agiirtuq, taum aluilitagken cingigkenek angicillerkaqa ancurtukaqa; taum angllurceciiqaaci Anernerkun Tanqilriakun, kenerkun-llu. 17Aklayuutmek carririssuutmek tegumiangqertuq, mukaarkat caranglluirviat aklatarkauluku carrirluku, nutaan-llu mukaarkat qemaggviminun qemaggluki, carangllugkuat-llu ekuavkarluki nipsuilngurmek.”

18Qarutaarutnek ayuqenrilngurnek qarutaarai, qaneryaraqegtaarnek-llu yuut qalarulluki. 19Tau͡gaam Herod-aaq atanerruaq, cangakellruani anelgutmi nulirra Herodias-aaq pitekluku, cali-llu Herod-aam elluanrilnguut pillri tamalkuita pitekluki, 20tamakunun tamalkuitnun tapeqluku John-aaq itercetaa.

Jesus-aam Angllullra

21Tua-i-llu yuut tamarmeng anglluumariata, Jesus-aaq-llu anglluumarian piicallrani, qilak ikirtuq, 22Anerneq-llu Tanqilria atrartuq elliinun temlegtun yaqulegtun. Erinatanguq-llu qilagmek qanerluni, “Qetunraqamken kenekluten, ilukegcitkamken.”

Jesus-aam Ciuliari

23Jesus-aaq-llu ayagnillruuq elicungcariluni allrakungqerluni tayima yuinaq qulmek cipluku, yuut paqnayuuciicetun Joseph-aamek atangqerrluni, tauna-llu atangqerrluni Heli-amek, 24tauna-llu Matthat-amek, tauna-llu Levi-amek, tauna-llu Melchi-amek, tauna-llu Janna-mek, tauna-llu Joseph-aamek, 25tauna-llu Mattathias-aamek, tauna-llu Amos-aamek, tauna-llu Nahum-aamek, tauna-llu Esli-mek, tauna-llu Nagge-amek, 26tauna-llu Maath-amek, tauna-llu Mattathias-aamek, tauna-llu Semein-aamek, tauna-llu Joseph-aamek, tauna-llu Joda-mek, 27tauna-llu Joanan-amek, tauna-llu Rhesa-mek, tauna-llu Zerubbabel-aamek, tauna-llu Shealtiel-aamek, tauna-llu Neri-mek, 28tauna-llu Melchi-amek, tauna-llu Addi-mek, tauna-llu Cosam-aamek, tauna-llu Elmodam-amek, tauna-llu Er-amek, 29tauna-llu Jose-mek, tauna-llu Eliezer-aamek, tauna-llu Jorim-aamek, tauna-llu Matthat-amek, tauna-llu Levi-amek, 30tauna-llu Simeon-aamek, tauna-llu Judah-mek, tauna-llu Joseph-aamek, tauna-llu Jonan-aamek, tauna-llu Eliakim-aamek, 31tauna-llu Melea-mek, tauna-llu Menan-aamek, tauna-llu Mattatha-mek, tauna-llu Nathan-aamek, tauna-llu David-aamek, 32tauna-llu Jesse-mek, tauna-llu Obed-aamek, tauna-llu Boaz-amek, tauna-llu Salmon-aamek, tauna-llu Naasson-aamek, 33tauna-llu Aminadab-amek, tauna-llu Aram-amek, tauna-llu Esrom-aamek, tauna-llu Phares-aamek, tauna-llu Juda-mek, 34tauna-llu Jacob-aamek, tauna-llu Isaac-aamek, tauna-llu Abraham-aamek, tauna-llu Thara-mek, tauna-llu Nachor-amek, 35tauna-llu Saruch-aamek, tauna-llu Ragau-amek, tauna-llu Phalec-aamek, tauna-llu Heber-aamek, tauna-llu Sala-mek, 36tauna-llu Cainan-aamek, tauna-llu Arphaxad-aamek, tauna-llu Shem-amek, tauna-llu Noah-mek, tauna-llu Lamech-aamek, 37tauna-llu Mathusela-mek, tauna-llu Enoch-aamek, tauna-llu Jared-aamek, tauna-llu Mahalaleel-aamek, tauna-llu Cainan-aamek, 38tauna-llu Enos-aamek, tauna-llu Seth-amek, tauna-llu Adam-aamek, tauna-llu atangqellruuq Agayutmek.

Currently Selected:

Luke 3: YPK

Highlight

Copy