Luke 24
24
Maktellra
1Nitilim erenrin ciuqliatni, erqaarallrani, qungumun tekitut tepkegcilriit upingalteng tekiulluki. 2Teggalquq-llu tangrraat qungumek akagcimaluni. 3Itrameng-llu Atanrem Jesus-aam temii nataqenritaat. 4Tua-i-llu taumek alangaarinanratni, tangerrluku, angutek malruk qitngirnarqelrianek aturalgek nangengqauk caniatni. 5Tatamngata-llu nunamun-llu puc'ata taukuk qanrutakek, “Ciin unguvalria yuarceciu tuqumalriit nuniitni? 6Maantenrituq, maktellruuq. Neq'akiciu qaillun elpecen̄un qanellra cali Galilee-ametnermini, 7qanerluni, ‘Yuum Qetunraa assiilngiumalriit unataitnun tunumaarkauguq ussukcaucimaarkauluni-llu, erenret-llu pingayuatni maktarkauluni.’” 8Tua-i qaneryarat neq'akait. 9Qunguq-llu unilluku elitnaurat qulen ataucimek cipnelget allat-llu qanrucarturait. 10Elitnauranun-llu qaneryartulriit waniwaugut Mary Magdalene, Joanna-llu, Mary-llu James-aam aanii, allanek cali ilangqerrluteng. 11Qanellrit-llu qanengssaguaruyukait ukveqevkenaki-llu. 12Peter tau͡gaam nangertuq, qungumun-llu aqvaqurluni, pull'uni uyangtaa, tangerrluki-llu 'lumarrat allakaumaluteng, eneminun-llu utertuq, pillrit tamakut alangaarutekluki.
Emmaus-amun Ayalriik
13Tangerrluku-llu ernermi taumi ilagket Emmaus-amun ayagtuk, tamana mile-anek malrunlegnek yaaqsigtauq Jerusalem-aamek. 14Qalarutkakek-llu tamakut pillret tamalkuita. 15Qalarusnginanragni apqaurullutek-llu, Jesus-aaq mallgutuq, ilaulluni-llu maligtak. 16Tau͡gaam iikek tangerciigatevkaumauk elitaqesciigatevkarluku. 17Qanrutak-llu, “Camek qaneryarangqerpakarcetek piyuallerpetegni?” Arulairtuk-llu angniinatek. 18Aipaan-llu Cleopas-aamek atelgem kiugaa, “Elpet-qaa kiivet, Jerusalem-aami allanrulriani makuni ernerni, tuani pillrit nalluaten?” 19Aptak-llu, “Canek?” Qanrutaak-llu, “Jesus-aaq Nazareth-aarmiu pitekluku pillrit, tauna prophet-aaruluni caliamikun, qaneryaramikun-llu pinilriaruluni, Agayutem yuut-llu takuatni. 20Qaillun-llu agayulirten͞gunret atanirturtemta-llu tunellrukiit, tuqucesqumaluku, kelistamun-llu ussukcautelluku. 21Tau͡gaam wangkuta neryuniullruyaaqukut taunguyukluku Israel-aat anirturtekaat. Wani-wa-llu ernerpak erenret pingayuurtut tamakut kinguatni. 22Tuamta-llu cali, arnartamta ilaita alangaarcetaitkut unuayaarmi qungumun ayallruluteng, 23temii-llu nataqevkenaku, tailuteng-llu qanertut an'gilagnek tangerrniluteng, unguvacianek qanelriignek. 24Ilamta-llu ilaita qunguq paqtaat, tangerrluku-llu arnat qanellruciicetun. Ellii tau͡gaam tangenrritaat.” 25Tua-i qanertuq elkegnun, “Ukugni ayuquciilnguugni, ukverciiganatek-llu prophet-aat qanellritnek! 26Christ-aq-qaa picirkiumallrunrituq nangteqlermikun ucurnarillerkaminun tekitarkauluni?” 27Moses-aam-llu prophet-aat-llu kalikait ayagniutekluki, ellii pitekluni igausngalriit tamalkuita elkegnun taikanirai.
28Ciunerteng-llu nuna mallgiamegteggu kituryuguartuq. 29Taukuk cumigglutek unayaqaak qanerlutek, “Nayurkuk, unukataan erenrirluni-llu,” tua-i-llu itertuq uitallguteknalukek. 30Nervigmi-llu aqumgallgutekngamikek, kelipaq tegua atawaqaasqelluku-llu, itumterraarluku-llu elkegnun tunaa. 31Nutaan iikek uitut, elitaqluku-llu; catairrluni-llu. 32Qanruyutuk-llu, “Anirtima ircaqupuk nutngarpakartuk piyuallemegni qallaucakuk, qaneryarat-llu wangkugnun taikanillrani.” 33Sass'ami-llu taumi nangertuk, Jerusalem-aamun-llu utertuk, taukut-llu qulen ataucimek cipnelget ilait-llu quyungqaluki tekitakek. 34Taukut-llu qanertut, “Ataneq ilumun maktellruuq, Simon-aamun-llu tangercetuq!” 35Elkek-llu qanemciuk piyuallermeggni pillermeggnek, qaillun-llu elitaqucimegnek kelipamek itumcillrani.
Elitnauraminun Alaillra
36Tuaten-llu qallasnginanragni, Jesus-aaq tungaunani tangercetuq akunliitni nangengqaluni, qanrulluki-llu, “Uitanqegcici.” 37Tau͡gaam ellait alangaartut alingeqapiggluteng, alangrumek tangerrsukluteng. 38Qanrutai-llu, “Ciin tatamececi, umyuarpeciuggun-llu nalirruggluci? 39Tangerciki unatenka it'ganka-llu. Wanguunga tungaunii, cavcia yuvrirlua-llu, alangru kemengqenrilan enrunani-llu wangtun.” 40Waten-llu qanrraarluni unatni it'gani-llu ellaitnun nasvagai. 41Cali nalirrugpakaata angnim ugaani, paqnayugluteng-llu, qanrutai, “Neqkautengqertuci-qaa maani?” 42Neqmek-llu keniumalriamek cikiraat. 43Elliin-llu neraa takuatni.
44Qanrutai-llu, “Nauwa, elpecen̄etlemni qanrut'lallruamci, Moses-aam alerquutaini prophet-aat-llu igaitni piicautelegni-llu, wii piteklua igausngalriit piciurtarkauniluki.” 45Nutaan taringellerkaitnun qaneryarat ellaitnun taikanirai. 46Qanrutai-llu, “Waten igausngauq, Christ-aq nangteqerkauguq, erenret-llu pingayuatni maktarkauluni. 47Elliin-llu atrakun umyualinqigcaraq assiilnguiryaraq-llu qalarutkumaarkauguq yugni tamaitni, Jerusalem-aamek ayagnirluni. 48Elpeci-llu makunek nallunrilnguuguci. 49Tangerrluku-llu, wiinga Atama akqutkellra elpecen̄un ayagceciiqaqa; tau͡gaam elpeci nunarpagni uitaurqici pinimek quyinermek pingllerkarpeci engeliinun.”
Pakmavircecimallra
50Ayautai-llu Bethany-mun, unatni-llu yaggluki atawaqaasqai. 51Atawaqaasqen͞ginanermini-llu avtai qilatmurucimaluni. 52Ellaita-llu ciktaarvikaat, Jerusalem-aamun-llu utertut angniqapiggluteng. 53Agayuvigpagmeterrlainartut-llu Agayun nanrarluku.
Currently Selected:
Luke 24: YPK
Highlight
Share
Copy
Want to have your highlights saved across all your devices? Sign up or sign in
Yupik Bible © 2012 American Bible Society. All rights reserved.