Genesis 13
13
Abram-aankuk Lot-aaq-llu Avtellrak
1Abram-aaq ayagtuq Egypt-aamek nuliani akluni tamalkuita malikluki. Lot-aam-llu maliggluku Negeb-aamun, 2Abram-aaq tukuupiallruuq tukuuterluni qusnginek, kuluvagnek, cali-llu suulutaanek qerrirlinek-llu. 3Ayagtuq-llu Negeb-aamek Bethel-aaq tekilluku, pelatekaqerraallerminun akuliignun Bethel-aankuk Ai-aq-llu, 4ekuavilillerminun. Tuani Abram-aam piicagvikaa Ataneq.
5Lot-aaq, Abram-aam malikellra, nakmiin ungungssiutengqertuq qusnginek, qusngirngalngurnek, kuluvagnek-llu, cali ilaluni pisterluni-llu. 6Tua-i amllerrameng tamakut ungungssiutekek maramek nervigkaiturluteng, ataucimi-wa uitallerkaak piviinani. 7Nakukutengluteng-llu Abram-aam Lot-aam-llu ungungssiutegkenka qaunqestait. Tamatum nalliini Perizzite-at Canaanite-at-llu cali tamaani nunami uitallruut.
8Tua-llu Abram-aam Lot-aaq qanrutaa, “Nakukullunuk uitayunaitaakuk qusngiliurtetuumamegnuk, tungayakngamegnuk. 9Nuna avatemegni tangrru. Avvluten wangnek ayakina piyullerpenun. Wiinga piyulqenrilkevnun ayagniartua.”
10Lot-aam-llu kiarcami tangrraa Jordan-aam kuignayua mel'irluni tamarmi naucetaarviatun Atanrem#13.10: Atanrem Naucetaarvia: uum naucetaarvik Eden-aami piluku piuq. ayuqluni-llu cali Egypt-aatun Zoar-am tungiini. Tuaten ayuqellruuq Atanrem piunrirpailgakek Sodom-aankuk Gomorrah-llu. 11Tua-i Lot-aam Jordan-aam avatii cucukaa piknaluku ayagluni-llu calaratmun; tua-i tuaten pilutek uniyutellruuk. 12Abram-aaq Canaan-aami uitallruuq, Lot-aaq-llu nunaliluni nunarpiit akuliitni kuignayugmi. Uitaluni-llu Sodom-aam yaaqsinrilkiini. 13Sodom-aam yui arenqiatut assiilnguq cakneq aturluku inglulirluku-llu Ataneq.
Abram-aaq Upagtuq Hebron-aamun
14Lot-aaq ayiin Atanrem Abram-aaq qanrutaa, “Tuaken nangerngallerpenek nacessgu yaaqvaq tamalkuan. 15Tangerqen nuna tamalkuan cikiutekciqaqa elpenun kinguverpenun-llu, pikesqelluku akwarpak. 16Kinguveten-llu amllertarivkarciqanka nunam urraatun. Kia imum nunam urraa naaqsugngakuniu kinguveten-llu naaqsugngayarai. 17Piyualuten paqesgu tamana nuna, cikiutekciqngamku elpenun.” 18Tua-i Abram-aaq uitallerminek nugtartuq uitavigkiurluni-llu yaaqsinrilkiitni napat kenciknarqelriit Mamre-mi. Tauna Hebron-aam nuniini uitauq, tuani-llu ekuavililuni Atanermun.
Currently Selected:
Genesis 13: YPK
Highlight
Share
Copy
Want to have your highlights saved across all your devices? Sign up or sign in
Yupik Bible © 2012 American Bible Society. All rights reserved.
