Acts 7

Stephen-aam Nallunairillra

1Tua-i agayulirten͞gunrem aptaa, “Piciuguq-qaa man'a qanellrat?” 2Elliin-llu kiugai, “Ilamaa, atamaa-llu, niicugnicia! Ucurnarqelria Agayun alairtuq Abraham-aamun Mesopotamia-metellrani Haran-aamun tekipailgan. 3Qanrulluku-llu, ‘Nunan yut'en-llu uniski upagluten-llu nunamun wii aperturarkamnun.’ 4Tua-i an'uq Chaldean-aarmiut nuniitnek, Haran-aami-llu uitaluni. Tuaken, atii tuquan, Agayutem nugtarcetaa nunamun uumun elpeci nunaksaguskengarpecen̄un. 5Nakmiin-llu nunautekaanek cikinritaa cakuinraungraan, wall'u it'gain tusvigkaqengraatgu, tau͡gaam akqaa cikirarkauniluku mat'umek, kinguvrinun-llu, elliin kinguakun akwarpak pikaatnek; tau͡gken Abraham-aaq irniangeksaunani. 6Agayun-llu qanellruuq, Abraham-aam kinguvri ayagarkauniluki nunakenrilkemeggnun, allrakuni-llu yuinaq yuinarni, teguaruluteng nangcimaarkauniluki. 7Nunalgutkelriit-llu taukut pisten͞guvikellrit qanercetaarciqanka, qanertuq Agayun, kinguakun-llu taiciqut kevgiurlua-llu mat'um nuniini.

8“Akquyutmek-llu cikiraa nuugiryaramek. Abraham-aaq-llu qetunranguq Isaac-aamek, nuugirluku-llu erenret pingayunelgatni. Isaac-llu qetunranguq Jacob-aamek, Jacob-aaq-llu ciuliamten̄ek qetunrangqellruuq, taukunek qula malrugnek cipnelegnek. 9Taukut-llu ciuliamta, ilaseng ciknakluku Joseph-aaq, tunellruat Egypt-aarmiunun; tau͡gaam Agayutem nayuraa; 10au͡g'aritelaraa-llu nanikuallrinek, cikirluku-llu unganaqmek umyuartumek-llu Pharaoh-m ciuqerranun taingan, Egypt-aarmiut atanerpiita. Taum-llu atanrurcetaa ellminun tungliuvkarluku Egypt-aarmiuni yum'ini-llu. 11Piitnaq-llu tut'uq Egypt-aarmiunun Canaan-aarmiunun-llu, nangteqluteng cakneq. Ciuliaput-llu taukut neqkamek unangesciigatut. 12Tau͡gaam Jacob-aaq niicami tun'arkanek mukaarkanek Egypt-aami, tuavet ayagcetai ciuliaput ciuqlirmek. 13Aipiriata-llu Joseph-aaq nallunrircetuq ellaitnun. Pharaoh-llu taringuq Joseph-aam kingunengqerrucianek. 14Joseph-aam-llu ullagcetaa atani Jacob-aaq, taisqelluku, ilai-llu yuinaat pingayun, akimiarmek cipluki. 15Tuaten Jacob-aaq upagtuq Egypt-aamun. Tuani-llu yuunrirtuq, ciuliaput-llu cali tuaten. 16Tungmagcartularait-llu Shechem-aamun, qungurvigmun-llu elliluki Abraham-aam kipukengaanun Hamor-am qetunrainek Shechem-aarmiunek akinek akilirluku.

17“Tau͡gaam Agayutem akqutii Abraham-aamun piciurtarkaurcan, yuut taukut amlleriut patagmek Egypt-aami. 18Atanengluteng-llu Egypt-aarmiut, Joseph-aam nallustiinek. 19Taum-llu iqlukun umyuartequtai yup'ut nanglluki-llu ciuliaput, irniarit egtelaasqelluki unguvavkaqsaunaki. 20Taum nalliini Moses-aaq-llu yuurtellruuq, mikelnguqegtaarauluni, iraluni-llu pingayuni atami eniini aulukumallruuq. 21Kiituani egcaaqaat, tau͡gaam Pharaoh-m panian nataqngamiu tegua anglicarluku-llu qetunraqnaluku. 22Moses-aaq-llu elitnaullruuq Egypt-aarmiut elisngait qaqilluki, maligngayunaqluni-llu qanellmikun caliamikun-llu.

23“Yuinaagnek-llu malrugnek allrakungami, umyugaan tekitai ilani Israel-aam kinguvri, paqcugluki-llu. 24Iliit-llu tangrramiu nangcimalria camek pitkaunani, ilinakaa yuurulluku-llu, nangetruyistii-llu tauna Egypt-aarmiu kaugturaa tuqulluku. 25Umyuarteqluni anirturtekaucini taringumayukluku ilaminun taukunun, Agayutmek cingumaluni, tau͡gaam taringenritaat. 26Unuaquan-llu ilagketnek callulriignek tekicami kenegyagutevkangnaqsaaqak qanerluni, ‘Ukuuk, ciin ilakullutek callugcetek?’ 27Tau͡gaam ciumuanran cingqeraa, qanrulluku, ‘Kia atanrurtaten cuqcisten͞gusqelluten-llu wangkugni? 28Tuquteqatararpenga-qaa tuqucillrucirpetun Egypt-aarmiumek akwauvaq?’ 29Mat'umek qanran, Moses-aaq alingluni qimagtuq Midian-aarmiut nuniitnun. Tuani-llu uitallermini qetunranguq malrugnek.

30“Allrakut-llu yuinak malruk pelluata, tuani Ingrim Sinai-am yuilqurtaani, an'gilam alairvikaa, kenerkun napayaarmi ekualriakun. 31Tauna Moses-aam irr'ikngamiu malkaniraa, Agayutem-llu eriniinek niituq qanelriamek waten: 32‘Ciuliarpet Agayutkaatnga, Abraham-aam-llu Agayutkaanga, Isaac-aam-llu Jacob-aam-llu.’ Moses-aaq-llu uulegtuq alingami tangvagciiganaku-llu. 33Agayutem-llu qanrutaa, ‘Sap'akigken yuukek, wani-wa nangengqaviin tauna kenciknarqelriaruuq. 34Ilumun tangrraqa nangtequciat yum'a Egypt-aami uitalriit, neplillrat-llu niitaqa, waniwa-llu atrartua anirturnaluki. Tua-i kitaki, Egypt-aamun ayagcetnaamken.’ 35Wani-wa Moses-aaq imna, yuin ciuniunritellrat qanerluteng, ‘Kia atanrurtaten cuqcisten͞gusqelluten-llu?’ Tauna Moses-aaq Agayutem ayagcetlinia atanrusqelluku anirturisten͞gusqelluku-llu, ikayuqluku tauna an'gilaq tangellra napayaarmi. 36Tua-i elliin anutellrui, nallunailkutnek irr'inarqelrianek-llu pirraarluni Egypt-aami, imarpigmi-llu Kavirlimek at'legmi, yuilqumi-llu allrakurrluni yuinaagnek malrugnek. 37Waniwauguq tauna Moses-aaq Israel-aam yuinun qanlleq waten, ‘Agayun prophet-aamek elpecen̄un kelgiciquq ilavci iliitnek, kelgumallrucimtun wiinga.’ 38Wani-wa-llu cali taunguuq agayumalriani uitalleq yuilqumi, an'gilami-llu qalarucetlermini Sinai-am Ingriani, ciuliamten̄i-llu; nang'arkaunrilngurnek-llu qaneryaranek unangellruuq wangkutnun cikiutekaminek.

39“Ciuliamta tau͡gaam niisnganritaat, peggluku-llu ellmeggnek. Umyuamegteggun tau͡gaam uterrluteng Egypt-aamun. 40Aaron-aamun qanerluteng, ‘Agayutnguanek pilikut ciuliurtekamten̄ek. Wani-wa una Moses-aaq Egypt-aamek ayaucetlerput qaillun picia nalluarput.’ 41Kuluvaguamek-llu pilillruut ernerni taukuni. Cikiutnek-llu ekuagiut agayutnguamun taumun, nunaniryuutekluku-llu unatmeng caliaqellrat. 42Tau͡gaam Agayutem ulurai peggluki-llu kevgiuresqelluki qiliim aklurugainun igausngaciicetun prophet-aat kalikaitni, ‘Israel-aam yuini ukuut, ungungssinek-qaa tuqucimalrianek ekuagarkanek-llu yuilqumi cikiqengellruuci wangnun allrakuni yuinaagni malrugni? 43Moloch-aam-llu pelatekaa napartarci, agayutnguam-llu Rephan-aam agyartaa nalugluku, taukut piliaqelci ciktaarviknaluki. Wiinga-llu ayauciiqamci Babylon-aam yaatiinun.’

44“Ciuliaput pingqellruut Pelatekamek Atanrem Uitavianek yuilqumi. Tauna piliaqumallruuq Agayutem alerqullruciatun Moses-aaq pilisqelluku maliggluku tangellra ayuqucirkaan. 45Kinguqliita-llu ciuliamta tauna tekiutaat Joshua-mek ciuliqagterluteng, nunaksagucartullermeggni agayumanrilnguut, Agayutem anevkallrin, nuniit. Tuaten-llu atulartuq David engelkarrluku. 46David-llu, Agayutem nunanikngani, eneliyugyaaquq Agayutem uitavigkaanek, Jacob-aam Agayutiin. 47Solomon-aam tau͡gaam enelillrua. 48Tau͡gaam Quyinrulria uitanrituq unatetgun pilimalriani. Tuaten prophet-aam qanellratun, 49‘Qilak atanruvikaqa, nuna-llu it'gama tusngavikaat; qaillun ayuqelriamek eneliciqsia, qaillun-llu ayuqelriamek mernuinercirvingqerciqsia? Ataneq qanertuq, 50Unatma-qaa piliaqenritait tamalkuita makut?’ 51Elpeci piyunailngurni, ircaqurpeciuggun-llu ciutevciuggun-llu anglluumanrilngurni. Anerneq Tanqilria qessakelararci, ciuliarpecetun, tuaten-llu elpeci pilartuci, 52Naliit prophet-aat nangtellrunritatki ciuliarpeci? Tuqutelarait-llu Ellualriim tekitarkam qanrutkestai, elpeci-llu tauna tunellruarci tuqulluku-llu. 53Alerquutet ciuniullruyaaqaci an'gilatgun taicimalriit, tau͡gaam atunritaci.”

Tuqutaullra

54Tamana niicamegteggu qenngut, agluquteng-llu keggluki eq'uqercameng tungiinun. 55Tau͡gaam Stephen, Anernermek Tanqilriamek imiumimi, qilagmun ciungqauq. Agayutem-llu ucurnarqucia tangrraa, Jesus-aaq-llu Agayutem tallirpiani nangengqalria. 56Qanertuq-llu, “Tangerrluku, qilak tangrraqa ikingqaluni, Yuum-llu Qetunraa Agayutem tallirpiani nangengqaluni.” 57Taukut tau͡gaam qayagpagtut, ciuteteng-llu umkarluki ataucikun curukaraat Stephen. 58Anqerrutaat-llu nunat elatiitnun teggalqunek-llu miluquluku. Nallunairinguallret-llu aturateng yuugait yun'erra'armun-llu qaunqevkarluki Saul-aamek at'legmun. 59Tuani-llu miluqullratni Stephen-aaq, piicagtuq qanerluni, “Ataneq Jesus-aaq, anerneqa ciuniurru.” 60Ciisqumiggluni-llu qayagpagtuq, “Ataneq, assiilngillrat man'a ellaitnun tuc'ecaqunaku.” Mat'umek-llu qanrraarluni anernerirtuq.

Currently Selected:

Acts 7: YPK

Highlight

Copy