Acts 17

Thessalonica-mi Pek'ngarcillrat Paul-aankuk Ingluklukek

1Tua-i-llu pelluumariamegteggu Amphipolis Apollonia-llu, Thessalonica-mun tekitut, Jews-aartarmek agayuvigtalegmun. 2Paul-aam-llu piciryaraminek itervikai, Sabbath-aani-llu pingayuni qallatellgutkaqluki Qaneryaranelngurnek, 3qanrulluki taringnaqluni aassaqutevkenaki-llu, Christ-aq tuqucimallruniluku ataam-llu unguillruniluku, qanerluni-llu, “Tauna Jesus-aaq, wii qalarutkelqa Christ-auguq.” 4Ilait-llu ukvertut ilaulluteng-llu Paul-aankugnun Silas-aaq-llu; Greek-aat-llu Agayutmek qigcigyulriit arnat-llu piuranrita ilait. 5Tau͡gaam Jews-aat ciknaluteng, tegutut yuk'egtaunrilngurnek yuunginat ilaitnek, quyurciluteng-llu yugugarnek nep'ngarceciut tuani nunani. Jason-aam-llu enii curukaraat tegungnaqluki-llu eniinelnguut yugnun anutnaluki. 6Unakesciigalamegteki-llu Jason-aaq, anelgutain-llu ilait teguluki, ullautait nunat atanrata ciuqerranun, qanerluteng, “Ukut angutet ellamek tamalkuan nep'ngevkarilriit taigut watua maavet, 7Jason-aam-llu eneminun ciuniullrui, Caesar-aam-llu picirkiutainun ingluliutut, qanerluteng allamek atanertangqerrniluku, Jesus-aamek.” 8Makut-llu niicamegteki yuut, nunam-llu atanrin, umyugait pek'ngartut. 9Jason-aaq ilai-llu akqivkaumariamegteki nepaitesqelluki, ayagcetait.

Berea-rmiut Qaneryaraq Yuvriraat

10Agayumalriit-llu egmian Paul-aankuk Silas-aaq-llu ayagcetagket Berea-rmiunun unugmi. Tekicamek-llu tuavet Jews-aat agayuviatnun itertuk. 11Taukut umyuangqenruut Thessalonica-mi uitalriani, tua-i Qaneryaraq akurtuamegteggu umyuamegteggun upingaluteng, yuvriraqluki-llu Qaneryarat unuaquaqan ilumun piciuciatnek. 12Taumek amlleret ukvertut, Greek-aat-llu arnat ilait takarnarqelriit angutet-llu ilait. 13Tau͡gaam Jews-aat Thessalonica-mi uitalriit taringameng Paul-aaq qalarucianek Qaneryaramek Berea-mi, tuavet tekitut aakulaggluki pek'ngartelluki-llu yuut. 14Taumek anelgutkelriit egmian Paul-aaq ayagcetaat imarpiim engeliinun, tau͡gaam Silas-aankuk Timothy-llu tuanllutek cali. 15Tau͡gaam Paul-aaq maligtestain ayautaat Athens engelkarrluku ayagluteng-llu, alerquumaluteng elliinek Silas-aankugnun Timothy-llu ullaasqelluni patagmek.

Athen-aarmiut Paul-aam Qalarutai

16Tua-i-llu Paul-aaq utaqalgillermini Athen-aami, umyugaa pektuq tangrramiu agayutnguanun caumaciat. 17Taumek qallatellgutkellrui agayuvigmi Jews-aat allat-llu Agayutem qigcikestai; tuniarvigmelnguut-llu qallatellgutkaqluki erenret tamaita. 18Tua-i-llu picirkangtulit Epicurean-aat Stoic-aat-llu quyurrvikaat ilait qanerluteng, “Canek una caunrilngurnek qallata?” Ilait-llu qanerluteng, “Qanerkangqerrsugnarquq allayugnek agayutnek.” Tua-i qalarutekngaku Jesus-aaq unguillrucia-llu. 19Tua-i-llu ayautaat quyurrvigmun Areopagus, qanerluteng, “Ayuqucingevkarkut mat'um ayuqucirtuutvet nutaram caucianek. 20Tua-i niicecavkut tangnerranarqelrianek, taumek taringyugyaaqaput makut cauciit.” 21Tua-i tamarmeng Athen-aarmiut allanret-llu tuanelnguut calinrilameng allamek tau͡gaam qallacugluteng niicugluteng-llu allayugnek.

22Paul-aaq-llu nangerrluni qertulriamun Mars Hill-amek, qanertuq, “Elpeci Athen-aarmiuni, taringua tamaitnun ukvertaucirpecen̄ek. 23Tua-i kitullemni tangertua ciktaarvigmek igartangqerrluni waten ‘Nallunriumanrilngurmun Agayutmun.’ Taumek tauna nallutmun ciktaarvik'lallerci, ellii qanrutkeqatarqa elpecen̄un. 24Agayun ellarpagmek piurcilleq tuanelngurnek-llu tamalkuitnek, ellii Atanruluni qilagmun nunamun-llu, agayuvigni uitanrituq unatetgun piliani. 25Aulukumangaituq-llu yuut unataitgun, camek nuuqitellriatun, tua-i Ellii cikirturilriaruami unguvamek tamalkuitnun anernermek-llu, canek-llu tamaitnek. 26Yuut-llu tamalkuita ataucimek aulirai nunam qaingani tamiini, uitasqelluki picirkirluki nunakirluki-llu. 27Tua-i ellaitnun yuaresqelluku Agayun, piyunarqekan nallunriisqelluku nataqesqelluku-llu ellii, tua-i-wa yaaqsinricaaqngakut tamamta. 28Elliini-wa unguvaukut pekluta-llu elliikun-llu piurtellruluta, igartevci iliita qanellruciatun, ‘Elliin-wa kinguveqaakut.’ 29Tua-i-llu Agayutem kinguveqkakut, umyuarteqsunaitukut Agayun akitun suulutaatun, teggalqutun-llu, ayuqsukluku yugkun taqumaluku. 30Tamakut-llu yuum nallumini pillri Agayutem imumirpak nallungualarai, tau͡gaam watua yuut tamalkuita tamiini umyualinqigtesqai. 31Tua-i-wa elliin elkartellruamiu erneq ellarpiim qanercetaarumallerkaa elluakun, tuaggun elliin picirkiullermikun yugkun, tauna elliin nallunrircetellrua yugnun tamalkuitnun unguircetlermikun tuqumek.”

32Niicameng-llu tuqumalriim maktellerkaanek, ilaita temciarautekaat, allat-llu qanerluteng, “Niicugninqigciiqamteggen man'a pitekluku.” 33Paul-aam-llu unitai. 34Tau͡gaam yuut ilaita maligtaat, ukverameng. Taukut ilakaat Dionysius qaillukuartet iliit, arnaq-llu Damaris-aamek aterluni allat-llu cali.

Currently Selected:

Acts 17: YPK

Highlight

Copy