Acts 12

James-aam Tuqucimallra Herod-aakun

1Taum nalliini agayuviim yui ilait teguvkarai Herod-aam atanrem nangcetnaluki. 2James-aaq-llu John-aam anelgutii qamiqurrircetaa nuussirpagkun.

An'gilam Peter Itengqallranek Anutaa

3Tua-i-llu Jews-aat umyugaat nall'arcamiu umyuartequq Peter-aaq-llu unaksugluku; wani-wa tamatum nalliini quulciiriyarailngurnek kelipartularviatni. 4Tua-i teguvkaraa, itercivigmun-llu pivkarluku, tarikevkarluku-llu anguyagten̄un akimiarmun ataucimek cipluku, cetamauqaqluteng pitaarluteng tarikestekainun; Paaskaaq pellukan tunenaluku yugnun. 5Peter tua-i itengqauq. Tau͡gaam agayuviim yuin piicautaat Agayutmun ilungluteng.

6Unugmi-llu tuani Herod-aamun anuteqatautiitni itercivigmek, Peter qavartuq anguyagtek akunliigni, malruinek-llu kalivneregnek qillerqumaluni, amiigem-llu elatiini tarikestek cali uitalutek. 7Alqunaq-llu, Atanrem an'gilaa nangengqauq caniani, tanqiim-llu tanqigiluku uitavia. Taum enuuleraa Peter caniqerrakun, tupaggluku, qanrulluku-llu, “Patagmek makten.” Kalivneret-llu tayarnerinek igtut. 8An'gilam-llu qanrutaa, “Naqugten, aluilitagken-llu cingirkek.” Ellii tua-i tuaten piuq. Qanrutenqigtaa-llu, “Ulikutan all'uku maligesnga.” 9Tua-i Peter an'uq maliggluku. Tau͡gaam an'gilamun picini ayuqucingeksaitaa, tau͡gaam qavangurturyukluni. 10Iluqliit tungliit-llu tarikestet kituamegneki, ikirtuqanun cavignun tekituq nunarpagnun anyaraulrianun. Taukut-llu ellmeggnek ikirtut. Anngamek-llu pekcaraq atauciq kiturluku an'gilam unitaa. 11Peter-llu ellangarcami qanertuq, “Ilumun, nallunaunani Agayutem an'gilani taivkallrullinia aviucarturlua Herod-aam unatainek, Jews-aat-llu tamarmeng picirkaqsaaqellratnek.” 12Neq'angcaami-llu Mary-m eniinun ullautuq, John-aam, Mark-amek atelgem aaniinun, tuani amlleret quyungqaut piicagluteng. 13Elaqlirmun-llu tukriaran arnaq pista Rhoda-mek at'lek an'uq paqluku. 14Elitaqngamiu Peter-aam erinii, quyaqerluni ikirutevkenaku itertuq qaneryartuqerluni, “Peter-gguq ikirtuqat elatiitni nangengqauq.” 15Ellaita tau͡gaam piat, “Usviipagcit.” Tau͡gaam ellii taqsuarirtuq piciuniluku. Tua-i qanertut, “An'gilaqellinia!” 16Tau͡gaam Peter tukriartu'rtuq. Cayaqlirluku ikirucamegteggu tangrramegteggu-llu alangaartut. 17Tau͡gaam elliin 'luucirararai nepaitesqelluki. Qanemcitai-llu qaillun Atanermun anuyuciminek itercivigmek, qanrutai-llu, “Mat'umek qaneryarturci James-aamun ukvelrianun-llu.” Tua-i-llu unitai allamun-llu ayagluni.

18Ercan-llu anguyagtet pek'ngut mianikevkenateng Peter-aam catairucianek. 19Herod-aam-llu yuarcecamiu nataqevkenaku-llu, tarikestet taukut qanercetaarai alerquulluki-llu ayaulluki tuqutesqelluki. Ellii-llu Herod-aaq Judea-mek atrartuq Caesarea-mun, tuani-llu uitamaluni.

Herod-aam Tuqullra

20Tyre-armiut Sidon-armiut-llu ilukegcitkenritai. Taumek yugugauluteng ullagaat Blastus-aamek atanrem taum igartiinek ililirluteng kaigavikaat kenegyagutesqelluteng, wani-wa nuniinek neqkanglaameng. 21Erneq-llu pillerkiurani tekican, Herod-aam aturani ucurnarqessuutni all'uki, qanercetaarvigmun aqumluni, qalarucimai. 22Yuut-llu qayagaut, “Agayutem erinaklinia, yuum erinakenritaa!” 23Egmianun-llu Atanrem (Agayutem) an'gilaan agturaa, Agayun ucurnarivkanrilaku; paralut-llu nerngatni yuunrirtuq.

24Tau͡gaam Agayutem qaneryaraa pikanirtuq amlleriinarluni-llu. 25Ukuk-llu Barnabas-aaq Saul-aaq-llu Jerusalem-aamek utertuk caliartek qaqicamegnegu. John-aaq-llu Mark-amek at'lek malikaak.

Currently Selected:

Acts 12: YPK

Highlight

Copy