1 Kings 2

David-aam Nangenret Ayuqucirtuutai Solomon-aamun

1David-aam tuqullerkani mallgian, taisqaa qetunrani Solomon-aaq qanrulluku-llu nangnernek ayuqucirtuutminek: 2“Tuqullerkaqa tekituq. Ukveqkiu elpenek piyugngacin taqsuarinqeggluten-llu, 3aturluki-llu cat Atanrem Agayutvet alerquutai elpenun pisqellri. Niisngaluki tamalkuita alerquuteliari ellimerrutai-llu, igausngaciicetun Alerquutaini Moses-aam, natmun tamalkuan ayallren piluaqerniartuten callerpeni tamalkuan. 4Niisngakuvgu, piciurciiqaa Atanrem akqutni qanrutkellni wangnun kinguvemnun ataniularciqniluku Israel-aaq mulngakluteng niisngakatki alerquutai pektayiinateng ircaqumegteggun yuucimegteggun-llu tamalkirrluteng.

5“Cali allamek pitangqertuq. Neq'akan Joab-am pillra wangnun tuqullukek atanerruak Israel-aat anguyagtaitni, Abner-aaq qetunraa Ner-am, Amasa-llu qetunraa Jether-aam. Umyuaqan qaillun tuqutellrak nepaitellrem nalliini akinaurluku tuqurqillrak anguyautellrata nalliini. Elliin tuqutellruak pinarqutailnguuk angutek, tua-i-llu wani-wa wiinga cakviurutekluku tusngaluni wangnun tamana pillra, nangtequtekluki-llu wiinga kingunra. 6Qaillun pillerkan nallunritan; tuquvkararkaunritan tuqulaucikun.

7“Tau͡gaam nakleklukek qetunraak Barzillai-am Gilead-aamek auluklukek-llu, tua-i-wa naklekellruagnga qimagaullemni anelgutevnek Absalom-aamek.

8“Au͡gna-llu cali Shimei-aq qetunraa Gera-m, nunamek Bahurim-aamek Benjamin-aami. Aniqlaallruanga cakneq ernermi ayautemni Mahanaim-un, tau͡gaam pairtellranga Jordan-aami Kuigmi, wiinga piciulua akqellruaqa atrakun Atanrem tuqutauvkarngaitniluku. 9Tau͡gaam elpet ayagcecaqunaku anucimirqecetaarpek'naku. Nallunritan qaillun pillerkan, elpet-llu pinritevkaryaqunaku tuqutauvkallerkaa.”

Tuqullra David-aam

10David-aaq tuquuq tungmagcimaluni-llu David-aam Nunarpiini. 11Angayuqaullruuq Israel-aani allrakuni yuinaagni malrugni (40), atanirturiluni malrunlegni allrakuni Hebron-aami, yuinaq-llu qulmek cipluku pingayunek (33) allrakuni Jerusalem-aami. 12Solomon-aam enairaa atani David-aaq atanrurrluni, atanirturillra-llu caqtaarpek'nani elkarcimaluni takarnarqellria-llu pinia ayagniluaqaumaluni.

Tuqullra Adonijah-m

13Tua-llu Adonijah, aanangqellria Haggith-aamek, ayagtuq Bathsheba-mun, tauna Solomon-aam aanakaa. “Man'a-qaa yugnikutnguuq nunatellren?” Bathsheba aptuq.

“Tuaten piuguq,” Adonijah-m kiugaa, 14kingunertaa-llu, “Qanerkangqertuq elpenun.”

“Cauga?” arnaq aptuq.

15Adonijah-m-llu kiugaa, “Nallunritan atanrurtarkaurtellruyaaquciqa yuut-llu tamarmeng Israel-aami neryuniurutkellruluku. Tau͡gaam tuaten pillruvkenani, anelgutka angayuqrurtellruuq tua-i-wa Atanrem pisqutekngaku. 16Waniwa-llu ataucimek piyuumiutengqertua; niitenricaqunii.”

“Cauga?” Bathsheba aptuq.

17Kiuguq, “Ataki Angayuqaq Solomon-aaq kaigavikeqerru—nallunritaqa niitenrilngaitaaten—cikiisqellua Abishag-amek Shunammite-amek nuliqsagutniarqa.”

18Bethsheba qanertuq, “Ilumun-wa; angayuqaqa qanellgutkeciqaqa pitekluten.”

19Tua-i Bathsheba-m ullagaa angayuqaq qalarucarturluku Adonijah pitekluku. Angayuqaq nangertuq ciuniurluku aanani cikvikluku-llu. Aqumluni-llu atanruviminun allamek-llu aqumllermek itrutelluki aqumevkaraa tallirpilirneminun. 20Aanii qanertuq, “Angenrilngurmek kaigaviksugamken; niitenricaqunii.”

“Ca piyullren qanrutkiu, aanaa; tua-i-wa niitenrilngailamken.”

21Kiugaa, “Anelgutevnun Adonijah-mun Abishag-aq nulirqevkarru.”

22“Ciin pisia Abishag-aq tunesqelluku Adonijah-mun?” angayuqam aptaa. “Apesnga-llu atak atanruvik aqumlleqa tunesqelluku elliinun. Tua-i-wa amaqliungan wangnun, Joab-ankuk-llu Abiathar-aq-llu agayulirta ililirturluku!” 23Tua-i-llu Solomon-aaq piciulriamek akqiuq Atanrem atrakun, “Ataki Agayutem tuquskilia akilircetenrilkumku Adonijah unguviinek mat'umek aptellra pitekluku! 24Atanrem elkartellruanga asvaunii atama David-aam aqumllerranun atanruvigmun; akqutni piciurtellrua tailluku-llu angayuqauvik wangnun kinguvemnun-llu. Piciulua qanertua unguvalriakun Atanerkun Adonijah tuqucimaarkauniluku mat'umi ernermi!”

25Tua-i Angayuqam Solomon-aam ellimerraa Benaiah-q, tauna an'uq tuqulluku-llu Adonijah.

Abiathar-am Ancimallra Joab-am-llu Tuqullra

26Tua-i-llu Angayuqaq Solomon-aaq qanertuq Abiathar-amun agayulirtem̄un, “Ayii nunavnun Anathoth-aami. Elpet tuqucimanarquten, tau͡gaam wiinga tuqucessngaitamken watua, tua-i-wa qaunqesten͞gullruavet Atanrem Akqutiin Yaassiiganun nayullerpeni ataka David-aaq, pillgucillruluku-llu arenqiallugutaini.” 27Tua-i-llu Solomon-aam ayagtelluku Abiathar-aq kevgiullranek agayulirten͞guluni Atanermun, piciurrluku Atanrem qanellra Shiloh-mi agayulirta Eli-aq kinguvri-llu piluki.

28Joab-aq niituq qaillun pillratnek. (Elliin piyuumiutellruamiu Adonijah Absalom-aaq pivkenaku.) Tua-i qimagtuq Atanrem pelatekaanun teguluki-llu ekuaviim kangirai.#2.28: ekuaviim kangirai: tangrru 1.50. 29Qanemcimek niicami Angayuqam Solomon-aam Joab-aq qimagniluku pelatekamun canianetniluku-llu ekuaviim, Solomon-aaq ayagceciuq kevgamek apcarturtelluku Joab-aq ciin qimaucianek ekuavigmun. Joab-aq kiuguq qimallruniluni Atanermun alingami Solomon-aamek. Tua-i Angayuqam Solomon-aam ayagcetaa Beniah tuqucesqelluku Joab-aq. 30Ayagtuq-llu pelatekamun Atanrem tuanelvianun qanerluni-llu Joab-amun, “Angayuqam anesqaaten.”

“Qang'a.” Joab-aq kiuguq. “Tuquciqua wani.”

Beniah-llu utertuq angayuqamun qanrulluku-llu Joab-am qanellranek.

31“Pii Joab-am qanellratun.” Solomon-aaq kiuguq. “Tuqulluku tungmaggluku-llu. Nutaan wii wall'u David-aam kinguvri pinarqutairutniartukut Joab-am pillranun tuqutellermini pinarqenrilnguut angutet. 32Atanrem anucimirqecetaarciqaa Joab-aq tamakut tuqucimallret pitekluki, elliin pillri nalluvkarluku ataka David-aaq. Joab-aq tuqucillruuq malrugnek angutegnek pinarqutailnguugnek ellmini assinrulriignek: Abner-aamek atanirturtiit anguyagtain Israel-aam, Amasa-llu, atanirturtiit anguyagtain Judah-m. 33Anucimirqecetaarutiit tuqucimallrata tuciiquq Joab-amun kinguvrinun-llu akwarpak. Tau͡gaam Atanrem cikiumaarkaugai David-aam kinguvri aqumgalriit elliin aqumllerani piluaqautmek.”

34Tua-i Beniah ayagtuq pelatekaanun Atanrem tuanlucian tuqulluku-llu Joab-aq, tungmagcimauq-llu nunamini yuilqumi. 35Angayuqam-llu Beniah atanrurtaa anguyagten̄un enairluku Joab-aq, Zadok-aq-llu agayulirta elliluku Abiathar-am eniinun.

Tuqullra Shimei-am

36Tua-llu angayuqam taisqaa Shimei-aq qanrulluku-llu, “Eneli pikavnek maani Jerusalem-aami. Tuanetniartuten ayagyaqunak-llu nunarpagnek. 37Ayakaquvet kiturluku kuicuar Kidron Brook-aq, ilumun tuquarkauguten—elpet-llu tau͡gaam avalitnguarkauguten.”

38“Ilumun-wa, Elpet Takarnarqellriami,” Shimei-aq kiuguq. “Wiinga qanllerpetun piciqua.” Taumek Jerusalem-aami uitamauq ak'anun.

39Tau͡gaam allrakut pingayun kinguatni, malruk Shimei-am teguak ayakallruuk Gath-armiut angayuqratnun, Achish-aq qetunraa Maacah-m. Shimei-am niitellermini Gath-amluciak, 40aqumgavilirraarluku ciulvani ayagtuq Angayuqamun Achish-aamun Gath-ami, kiarrnalukek teguagni. Nataqak-llu ut'rullukek-llu. 41Solomon-aam niicamiu Shimei-am pillra, 42aqvavkarluku qanrutaa, “Akqivkallruamken atrakun Atanrem ayaasqevkenak Jerusalem-aamek. Aarcirtullruamken-llu tuaten pikuvet, ilumun tuquarkauniluten. Maligutellrunrituten-qaa qanerluten-llu niiciiqnilua? 43Ciin-mi tua-i navegciu akquten narurrluku-llu alerquuteka? 44Elpet nallunritqapiararan tamalkuan narurcillren atamnek David-aamek. Atanrem anucimirqecetaarciqaaten tamana pitekluku. 45Tau͡gaam atawaqerceciiqaanga wiinga, elliin-llu David-aam angayuqauvia asvairiciqaa akwarpak.”

46Tua-llu angayuqam ellimerrutminek cikiraa Beniah, anluni-llu tuqutaa Shimei-aq. Solomon-aam tua-i waniwa piyullni atuqapiarangaa.

Currently Selected:

1 Kings 2: YPK

Highlight

Copy