Mateo 9

Si Isa makawuliꞌ aꞌa matey barannen

(Markus 2:1-12; Lukas 5:17-26)

1Pasakey si Isa magdem bangkaꞌ duk palipag siye pī si dambiyaꞌ lamew, pī balik si puweblone. 2Niyaꞌ meꞌ aꞌa pī si iye moꞌo aꞌa matey barannen. Pabāk iye diyataꞌ pabākanne. Pagtakite si Isa weꞌ sandel teꞌed siye si iye, paꞌinne si aꞌa mamatey barannen, “Pahāpun ateynun, bagay, taꞌampun ne meꞌ dusenun.” 3Niyaꞌ laꞌi meꞌ guru si saraꞌ āgama. Paꞌinde dem ateyde, “Missā aꞌa inin kuweꞌ Tuhanin iye.” 4Saguwaꞌ kataꞌuhan si Isa bang ine pinikilden duk paꞌinne si siye, “Weꞌey teꞌ laꞌat tapikilbin? 5Ine mamurahin, pinaꞌin, ‘Inampun ne dusenun,’ atawa, ‘Dongaꞌ kew bu nu ne lumengngan.’ 6Pakoleꞌku aꞌa inin supaya kataꞌuhanbi weꞌ aku, Anak Manusiyaꞌin, taga kapatut tuꞌu si dunya ngampun meꞌ duse.” Manjari paꞌin si Isa si aꞌa mamatey barannen, “Dongaꞌ kew, boꞌohun pabākannun bu nu ne hap lumaꞌ.” 7Manjari dongaꞌ aꞌa masakihin duk hap lumaꞌ ne iye. 8Pagkite meꞌ aꞌahin miyaꞌan, asekan talew siye. Pinudji weꞌ de Tuhanin peggeꞌ ngurung iye kapatut si manusiyaꞌ ngahinang kuweꞌ miyaꞌan.

Binoꞌo Mateo weꞌ si Isa

(Markus 2:13-17; Lukas 5:27-32)

9Palanjal ne si Isa billaꞌi. Na, paglanjalne, ngite iye dambuwaꞌ aꞌa inēnan Mateo ningkoloꞌ laꞌi si upisinane pagbayed-bayedan sukeyin. Paꞌin si Isa si iye, “Dayiꞌ kew, nuhut kew aku.” Manjari kuwat si Mateo duk nuhut ne iye si Isa.

10Manjari mangan si Isa laꞌi si lumaꞌ Mateo. Ekka isab meꞌ aꞌa magpāku-pāku sukey duk meꞌ aꞌa dusehan sinduwehin hap pī duk ningkoloꞌ siye mangan pasumbayaꞌ pu si Isa duk meꞌ tindegnen. 11Niyaꞌ meꞌ Pariseo laꞌi. Pagkitede inin, paꞌinde si meꞌ tindeg si Isahin, “Weꞌey gurubin palamud magkakanan duk meꞌ aꞌa magpāku-pāku sukey duk meꞌ aꞌa dusehan sinduwehin?” 12Pagkale si Isa inin, paꞌinne si siye, “Meꞌ aꞌa saki hep hap doktolin. Bang meꞌ makoleꞌin, gaꞌ niyaꞌ gunane hap doktol. 13Hapalun bi bang ine hāti bissā inin tasulat dem kitab, pinaꞌin, ‘Gaꞌi mahalgaꞌ si aku kulubanin. Saguwaꞌ iye kabayaꞌankun weꞌ maꞌaseꞌ kaꞌam si saweꞌbi.’ ” Paꞌin si Isa pe, “Dumaꞌin ku pitu miha meꞌ aꞌa mabentelin, saguwaꞌ pitu ku miha meꞌ aꞌa dusehanin.”

Panilew sabab pagpuwasehin

(Markus 2:18-22; Lukas 5:33-39)

14Manjari hap pī meꞌ tindeg Yahiyahin pu si Isa duk paꞌinde, “Saꞌingge iyan, kami duk meꞌ Pariseohin magpuwase. Weꞌey gaꞌi magpuwase meꞌ tindegnun?” 15Sambungan si Isa siye si dalilan. Pasaliꞌne meꞌ tindegnen si meꞌ aꞌa si pagkawinan. Paꞌinne, “Suse ke meꞌ aꞌa si pagkawinanin samantaꞌan laꞌi pe si siye pangantin lellahin? Gaꞌi. Saguwaꞌ si sinōng inin, bang ineddoꞌ ne amban siye pangantin lellahin, meke ne siye muwase.”

16Manjari magdalilan si Isa sabab panoloꞌ matuꞌuhin duk panoloꞌnen. Paꞌinne, “Gaꞌ niyaꞌ aꞌa matopak tela baꞌahu, gaꞌ pe kadekdakan, pī si semmek andang. Peggeꞌ bang sa īꞌne, garet balik semmek maꞌandangin duk namba ngaluha garetnen.” 17Pinasaliꞌ isab weꞌ si Isa toloꞌnen si boheꞌ ubas baꞌahu inisi dem puyuꞌ kuwit kambing. Paꞌinne, “Gaꞌ du isab niyaꞌ ngisi boheꞌ ubas baꞌahu, mukal-mukal pe, dem puyuꞌ andang. Peggeꞌ bang sa īꞌne, buslad puyuꞌin. Manjari buꞌus boheꞌ ubasin duk magkaꞌat puyuꞌin. Saguwaꞌ subey inisi boheꞌ ubas baꞌahuhin dem puyuꞌ baꞌahu. Manjari saliꞌ-saliꞌ siye gaꞌi magkaꞌat.”

Anak si Jairusin duk dende mangantan semmek si Isahin

(Markus 5:21-43; Lukas 8:40-56)

18Sasangne pe mamissā si siyehin, niyaꞌ tekka pī dambuwaꞌ nakuraꞌ si langgal. Pasujud iye pu si Isa duk paꞌinne, “Bahu matey du anakku dende-dendehin. Saguwaꞌ bisan sa īꞌen, dayiꞌ kew bettadun tangannun si iye duk ellum du iye.” 19Manjari pī ne si Isa nuhut duk meꞌ tindegnen.

20Manjari, niyaꞌ laꞌi dende saki, luwal paguwaꞌan lahaꞌ. Sampūꞌ duk duwen tahun ne kemuwe kasakinen. Pī iye patapit si bukutan si Isa bu pī inantan weꞌ ne tuggu badjuꞌ si Isahin. 21Paꞌinne dem pikilanne, “Bang hadja taꞌantanku badjuꞌnen asal kawuliꞌan ku.” 22Manjari padeheng si Isa duk hinarap weꞌ ne meꞌ aꞌa si dambulihannen. Pagkitene dendehin, paꞌinne si iye, “Pahāpun ateynun, dende. Kawuliꞌan ne kew peggeꞌ sandel kew si aku.” Duk magtawus kawuliꞌan dendehin.

23Pagtekka si Isa laꞌi si lumaꞌ nakuraꞌin, ngite iye meꞌ aꞌa magsuling duk banes aꞌa magmatey. 24Paꞌinne si siye, “Pī kaꞌam tahalaꞌ. Dumaꞌin hep matey dendehin, saguwaꞌ tuli hadja.” Pinagsayehan iye weꞌ de. 25Pagubus ne dinaꞌak pabukut meꞌ aꞌahin, padiyalem si Isa si bilik dendehin duk inantan weꞌ ne tangannen duk dongaꞌ ne dendehin. 26Manjari, aka-aka sabab inin ngabawag si tibuꞌukan lahat miyaꞌan.

Duwe aꞌa pessek pinakawuliꞌ weꞌ si Isa

27Palanjal ne si Isa billaꞌi. Sasangne si lānin, niyaꞌ duwe aꞌa pessek paturul si iye. Ngalingan siye papales, paꞌinde, “O tubuꞌ Sultan Daꞌud, maꞌaseꞌ ne kew si kami.” 28Manjari pagdiyalem si Isa dem lumaꞌ, patapit pī si iye meꞌ aꞌa pessek miyaꞌan. Paꞌin si Isa si siye, “Kahagad ke kaꞌam weꞌ tapakawuliꞌku kaꞌam?” “Aweꞌ, Tuwan,” paꞌinde. 29Manjari inantan weꞌ si Isa mataden. Paꞌinne, “Tahinang ne si kaꞌam sa kinahagadbin.” 30Manjari ngite ne siye. Sinessaꞌan siye weꞌ si Isa gaꞌi dinaꞌak magaka-aka bisan pu sine. 31Saguwaꞌ tahalaꞌ siye duk magaka-aka siye sabab si Isa si meꞌ kalahat-lahatan laꞌi.

Pinakawuliꞌ weꞌ si Isa aꞌa umewin

32Pagtahalaꞌ meꞌ aꞌa miyaꞌan, niyaꞌ ne isab meꞌ aꞌa tekka pī duk niyaꞌ aꞌa umew binoꞌo weꞌ de. Puꞌunne umew peggeꞌ pasayedan seyitan iye. 33Pagubus pinaluwas weꞌ si Isa seyitanin, kapamissā ne aꞌa maꞌumewin. Ulaliꞌ teꞌed meꞌ aꞌa mabanesin. Paꞌinde, “Gaꞌ pe kite bi bakas ngite sa inin si kēmon lahat Israꞌil.” 34Saguwaꞌ paꞌin meꞌ Pariseohin, “Kaꞌurungan iye balakat weꞌ nakuraꞌ meꞌ seyitanin hangkan iye kapagpaluwas meꞌ seyitan.”

Maꞌaseꞌ si Isa si meꞌ aꞌahin

35Manjari lumengngan si Isa ngalatag kēmon meꞌ puweblohin duk meꞌ kalumaꞌanin. Magtoloꞌ iye dem meꞌ langgal duk magmahalayak iye aka-aka hāp sabab pagbayaꞌ Tuhan si meꞌ aꞌahin. Pinakoleꞌ weꞌ ne meꞌ aꞌahin bisan ine bayuꞌan sakiden. 36Pagkitene meꞌ aꞌa mabanesin, maꞌaseꞌ iye manamal si siye, peggeꞌ sasew siye bu gaꞌ niyaꞌ nabang siye. Kuweꞌ siye meꞌ bili-bili gaꞌ niyaꞌ ngipat siye. 37Manjari paꞌinne si meꞌ tindegnen, “Meꞌ aꞌahin kuweꞌ dalil tanaꞌ sarang ne pinagani. Luha tanaꞌin saguwaꞌ kulang mamaganihin. 38Hangkan subey kaꞌam māku-māku si Tuhan, iye dapuꞌ tanaꞌin, supaya iye ngandaꞌak meꞌ aꞌa pī maganine.”

Currently Selected:

Mateo 9: yakV

Highlight

Copy