Mateo 7

Sabab ngandiyawaꞌan saweꞌne

(Lukas 6:37-38, 41-42)

1“Daꞌa kaꞌam ngandiyawaꞌan saweꞌbi duk kaꞌam gaꞌi hukum Tuhanin, 2peggeꞌ bang kaꞌam kuweꞌ bantuk ngahukum saweꞌbi, damikkiyan du isab kaꞌam hukum Tuhanin. Duk bang saꞌingge kaꞌam nakesan saweꞌbi, kuweꞌ miyaꞌan du isab takesan si kaꞌamin. 3Kaꞌu, mangandiyawaꞌan saweꞌnun, weꞌey iye tatīknun hapak-hapak dem mata saweꞌnun, bu kaꞌu batang kayu dem matanun, bu gaꞌi tatīknu. 4Saꞌingge kapagpaꞌinnu si saweꞌnun, ‘Bagay, tuhun koꞌ, ānante hapak-hapak dem matanu lu,’ bang niyaꞌ batang kayu dem di matanun. 5Kaꞌu iyan magmā-mā hadja. Ānanun dahuꞌ batang kayuhin amban dem matanu iyan, ubus pastiꞌ ne pamayamnun ngānan hapak-hapak dem mata saweꞌnun.

6“Daꞌa kaꞌam ngurung ine-ine sutsi si meꞌ asu, kaw kaꞌam balikde kinekkeb. Daꞌa lakasanun bi meꞌ mutsaꞌbin si bawi, kaw hadja diꞌik-diꞌikande.”

Māku-māku kaꞌam ubus inurungan du kaꞌam

(Lukas 11:9-13)

7“Māku-māku kaꞌam ubus inurungan du kaꞌam; miha kaꞌam ubus ngasuwaꞌ du kaꞌam; makipadiyalem kaꞌam ubus ilukahan du kaꞌam. 8Peggeꞌ kēmon mamākuhin inurungan du, mamihahin ngasuwaꞌ du, duk makipadiyalemin ilukahan du. 9Sine kaꞌam tuꞌu, bang anakbin māku kinakan si kaꞌam, urunganbi ke iye batu? 10Atawa bang māku iye kenna, urunganbi ke iye sawe? 11Kaꞌam, bisan kaꞌam dusehan, taꞌu du kaꞌam ngurungan anakbin meꞌ bayuꞌ-bayuꞌan mahāpin. Pasōng pe teꞌed Tuhanin, Samabi si surgaꞌin, pangurungne du si kaꞌam meꞌ bayuꞌ-bayuꞌan mahāpin bang kaꞌam māku si iye.

12“Ine-ine kabayaꞌanbi hinang aꞌa si kaꞌam, damikkiyan isab hinangun bi si siye, peggeꞌ iyan hāti saraꞌ si Musahin duk panoloꞌ meꞌ kanabihanin.”

Tarangka makiputin

(Lukas 13:24)

13“Paꞌasek kaꞌam amban tarangka makiputin. Luha tarangkahin duk mura tinuhut lān hap narkaꞌin. Ekka aꞌa nuhut lān miyaꞌan. 14Saguwaꞌ kiput tarangkahin duk hunit tinuhut lān tudju surgaꞌin. Kulang aꞌa mangasuwaꞌ iyehin.”

Sabab kayu duk buwaꞌne

(Lukas 6:43-44)

15“Pahatul-hatul kaꞌam, kaw kaꞌam taboꞌo weꞌ meꞌ nabi gaꞌi bennal. Si luwasan hāp addatden, saguwaꞌ dem ateyde, laꞌatan siye kuweꞌ dalil asu bingis. 16Takilalebi siye si meꞌ hinanganden, kuweꞌ kayuhin kataꞌuhan si buwaꞌne. Gaꞌi kite bi ngeddoꞌ buwaꞌ ubas amban puhung atawa buwaꞌ biyabas amban sampinit. 17Kayu mahāpin hāp buwaꞌnen saguwaꞌ kayu manggaꞌi mahāpin gaꞌi isab hāp buwaꞌnen. 18Kayu mahāpin gaꞌi buwaꞌ gaꞌi hāp duk kayu manggaꞌi mahāpin gaꞌi buwaꞌ hāp. 19Kēmon kayu manggaꞌi magbuwaꞌ mahāpin tinebbengan duk ilakasan dem ebbut ineggas. 20Sa iyan du isab takilalebi meꞌ nabi manggaꞌi mabennalin si meꞌ hinanganden.”

Gaꞌi kaꞌam takilaleku

(Lukas 13:25-27)

21“Dumaꞌin kēmon luwal manabbut ēnkun tapī si pagbayaꞌan Tuhanin, saguwaꞌ luwal hadja meꞌ aꞌa manuhut kabayaꞌan Samaku si surgaꞌin. 22Bang taꞌabut ne ellew pangahukum manusiyaꞌin, ekka iyan aꞌa magpaꞌin si aku, ‘Kaꞌu Panuhutan kamihin, peggeꞌ bakas kami magpalataꞌ bissā Tuhanin weꞌ balakat ēnnun, duk bakas kami magpaluwas meꞌ seyitan duk bakas kami maghinang ekka hinangan makaꞌulaliꞌ weꞌ balakat ēnnun.’ 23Ubus paꞌinku iyan si siye, ‘Gaꞌi kaꞌam takilaleku. Tahalaꞌ kaꞌam amban aku, kēmon kaꞌam maghinangan malaꞌatin.’ ”

Duwe bayuꞌan magpatengge lumaꞌ

(Lukas 6:47-49)

24“Manjari, sasuku pakale si meꞌ bissāku miyaꞌan duk tuhutne, kuweꞌ iye aꞌa pandey teꞌed mikil ngahinang lumaꞌne diyataꞌ batu. 25Manjari tekka ulanin duk dunuk boheꞌin duk tewwaꞌ lumaꞌin weꞌ baliyu mabasagin. Saguwaꞌ gaꞌ hebbaꞌ lumaꞌin peggeꞌ hininang diyataꞌ batu. 26Duk sasuku pakale si meꞌ bissāku miyaꞌan bu gaꞌi du tuhutne, kuweꞌ iye aꞌa dupang maghinang lumaꞌ diyataꞌ umus. 27Manjari tekka ulanin duk dunuk boheꞌin duk tewwaꞌ lumaꞌin weꞌ baliyu mabasagin. Magtawus hebbaꞌ lumaꞌin duk jadjag teꞌed.”

28Pagubus inin bissā si Isa, ulaliꞌ meꞌ aꞌahin pagkalede usihatnen, 29peggeꞌ magbiddaꞌ teꞌed usihat si Isahin duk usihat meꞌ guru si saraꞌ āgamahin. Peggeꞌ taga balakat si Isa bang iye missā.

Currently Selected:

Mateo 7: yakV

Highlight

Copy