Lukas 9

Pinalengngan weꞌ si Isa tindegne sampūꞌ duk duwehin

(Mateo 10:5-15; Markus 6:7-13)

1Manjari ilinganan weꞌ si Isa tindegne sampūꞌ duk duwehin pī si iye duk inurungan siye weꞌ ne balakat duk kapatut pangandaꞌag meꞌ seyitan duk magpakawuliꞌ meꞌ bayuꞌ-bayuꞌan saki. 2Ubus pinalengngan siye weꞌ ne magmahalayak sabab pagbayaꞌan Tuhanin. Dinaꞌak isab siye magpakawuliꞌ meꞌ masakihin. 3Duk paꞌinne si siye, “Daꞌa kaꞌam magboꞌo ine-ine si palengngananbin. Daꞌa kaꞌam moꞌo tungkud atawa bāg atawa kinakan atawa sīn. Duk daꞌa kaꞌam moꞌo badjuꞌ pagsayinanbi. 4Antag-antag kalumaꞌan katekkahanbi, bang kaꞌam dinaꞌak manaꞌik weꞌ aꞌa si lumaꞌne, laꞌi ne kaꞌam patennaꞌ tiggelanbi laꞌi si lahat miyaꞌan. 5Duk bang niyaꞌ kalumaꞌan papīhanbi bu meꞌ aꞌahin gaꞌi ngaddatan kaꞌam, tahalaꞌ kaꞌam amban kalumaꞌan miyaꞌan. Pagpaganun bi dahuꞌ leppug bettisbin, tandaꞌ weꞌ muwas ne kaꞌam si siye, ubus bu tahalaꞌ ne kaꞌam.” 6Manjari lumengngan ne meꞌ tindeg si Isahin duk ilatag weꞌ de meꞌ kalumaꞌanin. Antag-antag katekkahande, minahalayak weꞌ de aka-aka mahāpin duk pinakawuliꞌ weꞌ de meꞌ masakihin.

Si Herod gaꞌi magkataꞌu-taꞌu

(Mateo 14:1-12; Markus 6:14-29)

7Manjari inin, takale weꞌ si Herod, sultan si lahat Jalilin, kēmon meꞌ bakas tahinang si Isahin. Gaꞌi iye magkataꞌu-taꞌu peggeꞌ niyaꞌ meꞌ aꞌa magpaꞌin weꞌ si Isa miyaꞌan si Yahiya magpandi-pandi aꞌahin koꞌ, ellum balik amban kamateynen. 8Magpaꞌin isab sinduwehin weꞌ si Nabi Eliyas miyaꞌan pabagala tuꞌu si dunya. Niyaꞌ pe isab sinduwe magpaꞌin weꞌ si Isa koꞌ miyaꞌan dambuwaꞌ meꞌ nabi awwalley ellum balik. 9Paꞌin si Herod, “Si Yahiya bakas daꞌakku pinunggelan. Sine enteꞌ aꞌa takaleku inaka-aka inin?” Duk piha-piha si Herod bang saꞌingge pakakitene si Isahin.

Pamakan si Isa meꞌ aꞌa lime ngibuhin

(Mateo 14:13-21; Markus 6:30-44; Yahiya 6:1-14)

10Na, meꞌ aꞌa bakas kawakilan weꞌ si Isahin magtipun ne balik pī si iye. Inaka-akahan weꞌ de si Isa kēmon meꞌ bakas tahinangden. Manjari binoꞌo siye weꞌ si Isa pī tudju puweblo Betsaida, siye-siye du hadja. 11Sakaliꞌ inin kataꞌuhan weꞌ meꞌ aꞌa mabanesin, paturul siye. Sinagina siye weꞌ si Isa duk inusihatan siye weꞌ ne sabab pagbayaꞌan Tuhanin, duk pinakawuliꞌ weꞌ ne kēmon meꞌ masakihin.

12Pagkohap ne teꞌed, pī si iye tindegne sampūꞌ duk duwehin duk paꞌinde si iye, “Daꞌakun ne meꞌ aꞌa inin pī si meꞌ kalumaꞌan mapaliputin duk si meꞌ lahat diyataꞌin miha kinakande duk patulihande, peggeꞌ lahat gaꞌi hep inin tantu papituhan aꞌa.” 13Saguwaꞌ paꞌinne si siye, “Kaꞌam ne mamakan siyehin.” Paꞌinde, “Luwal maniyaꞌ si kamitu, lime kayuꞌ pan duk duwe kenna - luwal bang pī kami melli kinakan para si meꞌ aꞌa mabanes inin.” 14(Peggeꞌ niyaꞌ lime ngibu meꞌ lella malaꞌihin.) Paꞌin si Isa si meꞌ tindegnen, “Daꞌakun bi siye ningkoloꞌ lime-limempūꞌ da tumpuk.” 15Tinuhut weꞌ de pangandaꞌakan si Isahin duk pinatingkoloꞌ ne weꞌ de meꞌ aꞌahin kēmon. 16Manjari ineddoꞌ weꞌ si Isa pan lime kayuꞌin duk kenna duwehin, bu mayam iye magdiyataꞌ langit magpasalamat si Tuhan. Ubus bu binahagiꞌ-bahagiꞌ weꞌ ne panin duk pinangurung weꞌ ne si meꞌ tindegnen, dinaꞌak pangurung si meꞌ aꞌahin. 17Mangan siye kēmon duk esso siye. Ubus tinipun weꞌ meꞌ tindeg si Isahin lukas meꞌ aꞌahin, niyaꞌ sampūꞌ duk duwe bakaꞌ pennoꞌ.

Magbennal si Petros sabab si Isa

(Mateo 16:13-19; Markus 8:27-29)

18Dambuwaꞌ ellew sābu si Isa ngampun dendangan, patapit meꞌ tindegnen pī si iye. Manjari tilewne siye, paꞌinne, “Ine paꞌin meꞌ aꞌahin, sine koꞌ ku?” 19Nambung siye, paꞌinde, “Niyaꞌ meꞌ aꞌa magpaꞌin weꞌ kaꞌu koꞌ si Yahiya magpandi-pandi meꞌ aꞌahin. Saguwaꞌ sinduwehin isab magpaꞌin weꞌ si Nabi Eliyas koꞌ kew. Duk niyaꞌ pe isab magpaꞌin weꞌ kaꞌu koꞌ dambuwaꞌ meꞌ nabi masaley ellum balik.” 20“Saguwaꞌ bang kaꞌam,” paꞌin si Isa, “ine paꞌinbi? Sine teꞌ ku?” Nambung si Petros, paꞌinne, “Kaꞌu Almasihin, tapeneꞌ Tuhan magbayaꞌin.”

Pinaꞌal weꞌ si Isa kamateynen

(Mateo 16:20-28; Markus 8:30–9:1)

21Sinessaꞌan teꞌed siye weꞌ si Isa weꞌ subey siye gaꞌi magaka-aka bisan pu sine bang sine iye. 22Duk paꞌin si Isa pe, “Aku inin, Anak Manusiyaꞌin, ekka kabinasahan subey sandalanku duk gaꞌi du ku pinagmasi weꞌ meꞌ kabahiꞌanin, duk meꞌ nakuraꞌ imamin, duk meꞌ guru si saraꞌ āgamahin. Pinapatey du ku duk katellu ellewnen ellum du ku balik.”

23Manjari paꞌinne si siye kēmon, “Bang niyaꞌ aꞌa mabayaꞌ nuhut aku, subey iye tuhutne kinabayaꞌankun, dumaꞌin kinabayaꞌannen. Duk subey isab iye moꞌo olom pamapateyan iyehin kahabaꞌ ellew, hātinen, maglillaꞌ nandal kabinasahan duk bisan pe matey. Manjari makajari ne iye nuhut aku. 24Peggeꞌ,” paꞌin si Isa, “bang aꞌahin ellegne umulnen, gaꞌ niyaꞌ umulne salama-lama. Saguwaꞌ bang aꞌahin gaꞌi ellegne umulnen duk maglillaꞌ pe matey hawal tuyuꞌne manuhut akuhin, taga umul du iye salama-lama. 25Peggeꞌ aꞌahin, bisan pe tepe si iye kēmon alataꞌ dem dunyahin, gaꞌ du niyaꞌ gunane bang gaꞌi tepe si iye umul salama-lamahin duk ilegga pe iye. 26Sine-sine iyaꞌ magpatampal si meꞌ aꞌa weꞌ tindegku iye duk weꞌ nuhut iye toloꞌkun, aku Anak Manusiyaꞌin, iyaꞌ du ku isab ngilale iye tindegku bang ku balik pitu liput weꞌ sahayaku, duk sahaya Samaku Tuhanin, duk meꞌ malaꞌikatne masutsihin. 27Sabennal akahante kaꞌam,” paꞌin si Isa, “niyaꞌ kaꞌam matuꞌu inin gaꞌi matey bang gaꞌi dahuꞌ takitebi pagbayaꞌ Tuhanin.”

Kapinda bantuk si Isahin

(Mateo 17:1-8; Markus 9:2-8)

28Palabey walum bahangi amban pamissā si Isa inin, binoꞌo weꞌ ne si Petros duk Yahiya duk si Yakub pī diyataꞌ punu duk ngampun iye laꞌi si Tuhan. 29Sasangne mangampunin, pinda luwenen duk semmeknen sahaya teꞌed duk asal poteꞌ manamal. 30Manjari bessuwang niyaꞌ duwe lella magbissā duk si Isa. Siye inin disi eymulla Musa duk eymulla Eliyas. 31Pabagala siye laꞌi duk sahaya du isab kēmon puhuꞌden. Magbissā siye sabab sōng kamatey si Isahin laꞌi si puweblo Awrusalam sa panganggaraꞌ Tuhan iyehin. 32Na, disi Petros duk meꞌ saweꞌnen kapatuli hep, saguwaꞌ ngape siye duk takitede sahaya si Isahin duk duwangan manengge si bihingnen. 33Manjari inin, sakaliꞌ sōng tahalaꞌ ne duwanganin amban si Isa, paꞌin si Petros pu si Isa, “Tuwan, hāp peggeꞌ tiyaꞌ kami tuꞌu. Ngahinang kami tellu payad-payad. Dambuwaꞌ si kaꞌu, dambuwaꞌ pu si Musa, duk dambuwaꞌ pu Nabi Eliyas.” (Missā ne hadja iye saguwaꞌ gaꞌ taꞌāb-ābne bang ine binissānen.) 34Sasangne pe mamissāhin, niyaꞌ inalak paguwaꞌ duk kalandungan siye, duk kadahitan siye sakaliꞌ ne siye kalandungan weꞌ inalakin. 35Duk niyaꞌ suwala amban dem inalakin magpaꞌin, “Anakku inin pineneꞌkun. Pakalehun bi iye.” 36Pagubus suwala miyaꞌan missā, si Isa saꞌ dendangan takiteden. Gaꞌ siye mabehe, duk masa īꞌ gaꞌ siye magaka bisan pu sine sabab bakas takitede miyaꞌan.

Si Isa makawuliꞌ nakanak lella pasayedan seyitan

(Mateo 17:14-18; Markus 9:14-27)

37Pagsasumuhin, pagdumurul ne siye amban punuhin, banes teꞌed aꞌa pasampang pu si Isa. 38Niyaꞌ lella amban dem kaꞌekkahanin ngalingan, paꞌinne, “O Tuwan, pabuyuꞌ-buyuꞌ ku si kaꞌu, kaꞌaseꞌanun anakkun, anakku inin dambuwaꞌ-buwaꞌ. 39Peggeꞌ pasayedan iye weꞌ seyitan. Bessuwang hadja iye magkolehak ubus ngoral ne iye duk magpaspadan sampay magbukal behenen. Duk meke iye lebbahan seyitanin bang pekkengan ne iye duk bebbag ne puhuꞌnen. 40Bakas pināku weꞌ ku si meꞌ tindegnu inin pakipaluwasku seyitanin, saguwaꞌ gaꞌ tapaluwasde.” 41Paꞌin si Isa si meꞌ aꞌahin, “Kaꞌam, meꞌ aꞌa kuweꞌitu inin, salaꞌ teꞌed pamikilbin. Gaꞌ teꞌed niyaꞌ sandelbi si Tuhan. Taman sumiyan pe ku tuꞌu si kaꞌam? Taman sumiyan pe ku nandalan addatbin meke kaꞌam kahagad?” Manjari paꞌinne si sama nakanakin, “Boꞌohun anaknun pitu.” 42Sasang hap pī pe nakanakin, hinantakan iye diyataꞌ bulak weꞌ seyitanin duk magpaspadan iye. Saguwaꞌ inamāhan weꞌ si Isa seyitanin duk pinakawuliꞌ weꞌ ne nakanakin. Ubus bu sinōngan weꞌ ne si samanen. 43Kēmon aꞌa malaꞌihin ulaliꞌ manamal pagkitede balakat Tuhanin.

Inaka weꞌ si Isa balik sabab kamateynen

(Mateo 17:22-23; Markus 9:30-32)

Sābu meꞌ aꞌahin pe magulaliꞌ sabab meꞌ hinangan si Isahin, paꞌin si Isa si meꞌ tindegnen, 44“Indananun bi teꞌed meꞌ bissāku si kaꞌam inin. Aku, Anak Manusiyaꞌin, sinōngan du ku iyan si antanan meꞌ aꞌa.” 45Saguwaꞌ gaꞌ tahātide bissāne miyaꞌan peggeꞌ tinapukan amban siye supaya gaꞌi tahātide. Duk gaꞌ siye makatawakkal nilew iye bang ine hāti pinaꞌinnen.

Sine tamanan malangkewin

(Mateo 18:1-5; Markus 9:33-37)

46Dambuwaꞌ ellew magsuweyan meꞌ tindeg si Isahin bang sine siye tamanan malangkewin. 47Kataꞌuhan si Isa bang ine dem pikilanden, hangkan ngeddoꞌ iye dambuwaꞌ nakanak dikiꞌ duk pinatengge weꞌ ne si bihingne. 48Manjari paꞌinne si siye, “Bang niyaꞌ aꞌa bu sabab sandelne si akuhin ngaddatan nakanak dikiꞌ kuweꞌ inin, aku inaddatannen. Duk bang niyaꞌ ngaddatan aku, addatanne isab Tuhanin, mamapitu aku si dunyahin. Sine-sine kaꞌam tamanan madiyawaꞌ pagateynen, iye iyan tamanan malangkewin.”

Manggaꞌi manguntarahan kaꞌamin bēbbeg amban kaꞌam

(Markus 9:38-40)

49Manjari missā Yahiya, paꞌinne, “Tuwan, niyaꞌ dambuwaꞌ aꞌa tadugpak kami, sabbutne ēnnun pagpaluwasne seyitan amban meꞌ aꞌa. Pinages iye weꞌ kami peggeꞌ dumaꞌin iye saweꞌte bi.” 50Saguwaꞌ paꞌin si Isa si iye, “Daꞌa iye pagesun bi. Peggeꞌ manggaꞌi manguntarahan kaꞌamin, bēbbeg amban kaꞌam.”

Gaꞌ si Isa inaddatan si kalumaꞌan laꞌi si lahat Samariya

51Manjari inin, peggeꞌ sōng taꞌabut ne waktu paꞌangkat si Isa hap surgaꞌin, magtuyuꞌ teꞌed iye pī hap Awrusalam. 52Niyaꞌ meꞌ aꞌa daꞌakne pī padehellu amban iye. Hangkan lumengngan ne meꞌ dinaꞌakne miyaꞌan duk hap pī siye si kalumaꞌan laꞌi si lahat Samariya manyap pahalihan si Isa laꞌi. 53Saguwaꞌ meꞌ aꞌa si kalumaꞌan miyaꞌan gaꞌ ngatu patennaꞌan si Isa laꞌi, peggeꞌ kataꞌuhande weꞌ tudju Awrusalam lengngannen. 54Pagkataꞌuhan inin weꞌ duwe tindegnen, si Yakub duk Yahiya, paꞌinde pu si Isa, “Tuwan, mabayaꞌ kew bang kami ngandaꞌak ebbut laboꞌ amban diyataꞌ langit duk siye ubus matey?” 55Saguwaꞌ hinarap duwanganin weꞌ ne bu inamāhan. 56Manjari palanjal siye pī si kalumaꞌan seddili.

Meꞌ arak mapatuhut pu si Isahin

(Mateo 8:19-22)

57Sasangde malumengnganin, niyaꞌ aꞌa missā pu si Isa, paꞌinne, “Tuwan, mabayaꞌ ku nuhut kaꞌu tungan-tungan papīhannu.” 58Nambung si Isa, paꞌinne, “Gam pe meꞌ pāhangin niyaꞌ lowangde duk meꞌ manuk-manukin niyaꞌ sabakande. Saguwaꞌ aku, Anak Manusiyaꞌin, gaꞌ niyaꞌ bisan pahalihanku.”

59Paꞌin si Isa si aꞌa dambuwaꞌin, “Nuhut kew aku.” Saguwaꞌ nambung aꞌahin, paꞌinne, “Aweꞌ, Tuwan, saguwaꞌ pī ku dahuꞌ hap lumaꞌ. Pagubus kubulku samakun, balik saꞌ ku pitu nuhut kaꞌu.” 60Paꞌin si Isa, “Ambat mamateyin kinubul weꞌ meꞌ aꞌa manggaꞌ niyaꞌ umulde salama-lamahin. Saguwaꞌ kaꞌu, pī kew lumengngan magmahalayak sabab pagbayaꞌan Tuhanin.”

61Niyaꞌ isab dangan, paꞌinne pu si Isa, “Nuhut ku kaꞌu, Tuwan, saguwaꞌ tiyaꞌ ku dahuꞌ pī nabiyaꞌ si meꞌ aꞌa lumaꞌkun.” 62Saguwaꞌ paꞌin si Isa si iye, “Bang aꞌahin magbadjaꞌ bu luwal maghalengan, gaꞌi hāp. Damikkiyan bang aꞌahin nuhut aku bu alal iye si meꞌ taꞌambannen, gaꞌi iye pataꞌ pinagbayaꞌan weꞌ Tuhanin.”

Currently Selected:

Lukas 9: yakV

Highlight

Copy