Lukas 19

Si Isa duk si Sakkiyas

1Paꞌasek si Isa dem puwebo Ariha duk pabutas iye dem tengngaꞌ puweblohin. 2Niyaꞌ aꞌa maglahat laꞌi, ēnnen si Sakkiyas. Iye nakuraꞌ meꞌ aꞌa magpāku-pāku sukeyin duk dayahan iye. 3Batang teꞌed kitene si Isa, bang saꞌingge bantuknen, saguwaꞌ gaꞌi takitene peggeꞌ ekka teꞌed aꞌa bu pandak iye. 4Hangkan magubas iye padehellu amban meꞌ aꞌahin duk manaꞌik iye diyataꞌ kayu sikamol si higad lān, supaya takitene si Isa bang palabey laꞌi. 5Pagtekka si Isa si antag kayu miyaꞌan, padeheng iye duk pahangad duk paꞌinne, “O Sakkiyas. Duwaꞌi kew palakkes, peggeꞌ subey ku pahali si lumaꞌnu ellew inin.” 6Hangkan magdayiꞌ-dayiꞌ si Sakkiyas duwaꞌi duk kēgan iye moꞌo si Isa si lumaꞌne. 7Pagkale meꞌ aꞌahin pinaꞌin si Isa pu si Sakkiyasin, ngunub-ngunub siye, paꞌinde, “Na, weꞌey dang iye nuhut pī si lumaꞌ aꞌa dusehan miyaꞌan?” 8Ubus nengge Sakkiyas duk paꞌinne pu si Isa, “Tuwan, dan tengaꞌ alataꞌkun pangurungku si meꞌ mamiskinin. Duk bang niyaꞌ bakas tapalelongku, pabalikku si iye sīnnen ilapisan minampat.” 9Paꞌin si Isa si iye, “Ellew inin timbul ne kew duk meꞌ anak-andanun, peggeꞌ kaꞌu hep isab tubuꞌ Ibrahim. 10Aku, Anak Manusiyaꞌin, akaku mapitu si dunyahin miha meꞌ aꞌa matala amban Tuhanin duk nimbul siye.”

Dalilan sabab sīn pinangandelin

(Mateo 25:14-30)

11Sasang meꞌ aꞌahin pakale si meꞌ binissā si Isahin, inakahan isab siye weꞌ ne dambuwaꞌ dalilan peggeꞌ tapit ne siye si Awrusalam duk kannalde weꞌ pagtekkade laꞌi, tagnaꞌan Tuhanin ne pagbayaꞌne si meꞌ aꞌahin. 12Hangkan paꞌin si Isa magdalilanin, “Niyaꞌ dambuwaꞌ aꞌa bangsahan. Hap pī iye si lahat tala duk iye tagellal sultan laꞌi, ubus bu balik du iye si lahatne magsultan. 13Sōng patahalaꞌnen, ilinganan dahuꞌ weꞌ ne sampūꞌ meꞌ daraꞌakannen, duk inurungan siye dangan-dangan weꞌ ne dublun. Paꞌinne si siye, ‘Paglituhun bi iyan tiggelanku gaꞌi tekka.’ 14Saguwaꞌ kabunsihan aꞌa miyaꞌan weꞌ meꞌ aꞌa si lahatnen hangkan paglumikut ne iye, dinaꞌak sinduwehin weꞌ de pī paturul si iye magaka weꞌ gaꞌi siye mabayaꞌ weꞌ magsultan aꞌa miyaꞌan si siye.

15“Saguwaꞌ masi du iye ginellal sultan. Pagbalikne si lahatne, daꞌakne ilinganan pī si iye meꞌ daraꞌakanne bakas inurunganne dublunin supaya kataꞌuhanne bang piye untungden dangan-dangan. 16Pī dehelluhin si iye duk paꞌinne, ‘Tuwan, dublunnu dambuwaꞌin makaꞌuntung sampūꞌ dublun.’ 17‘Hāp hininangnun,’ paꞌin amunen, sultanin. ‘Daraꞌakan hāp kew. Tapangandelan kew si meꞌ kuweꞌahat, hangkan urungante kew kapatut magbayaꞌ si sampūꞌ puweblo.’ 18Ubus pī isab kaduwe daraꞌakanin si iye duk paꞌinne, ‘Tuwan, dublunnu dambuwaꞌin makaꞌuntung lime dublun.’ 19Paꞌin sultanin si iye, ‘Hāp. Kaꞌu isab magbayaꞌ kew si lime puweblo.’ 20Manjari pī isab dambuwaꞌin duk paꞌinne, ‘Tuwan, o, tiyaꞌ du dublunnun. Pinutus weꞌ ku pinahāp-hāp dem panyitu duk inennaꞌ weꞌ ku. 21Tinalew ku si kaꞌu peggeꞌ gaꞌi kew maꞌaseꞌ si aꞌa. Eddoꞌnu dumaꞌin si kaꞌuhin duk paganinu manggaꞌ bakas pagluꞌugannun.’ 22Paꞌin sultanin si iye, ‘Kaꞌu iyan daraꞌakan laꞌat duk bulasan. Si meꞌ bissānu miyaꞌan hukumte kew. Kataꞌuhannu hatiꞌ weꞌ gaꞌi ku maꞌaseꞌ. Kataꞌuhannu weꞌ eddoꞌku dumaꞌin si akuhin, duk paganiku manggaꞌ bakas pagluꞌugankun. 23Na, weꞌey gaꞌ papīnu sīnkun si bangku duk nganak? Manjari pagbalikku pitu, taꞌeddoꞌku siꞌ sampay anaknen.’ 24Manjari paꞌin sultanin si meꞌ manengge matapitin, ‘Eddoꞌun bi dublunin amban iye duk pangurungun bi pī si manguntung sampūꞌin.’ 25‘Saguwaꞌ Tuwan,’ paꞌinde, ‘niyaꞌ ne sampūꞌ dublunnen.’ 26Paꞌin sultanin, ‘Akahante kaꞌam, weꞌ aꞌa tapangandelanin, inurungan pe namba. Saguwaꞌ manggaꞌi tapangandelanin, bisan kuweꞌahat bakas pinangandel si iyehin, ineddoꞌ du amban iye. 27Na, meꞌ bantaku miyaꞌan,’ paꞌin sultanin, ‘meꞌ aꞌa manggaꞌi mabayaꞌ weꞌ aku magsultan si siyehin, boꞌohun bi siye pitu duk papateyun bi tuꞌu si matahanku.’ ”

Pamahadjede si Isahin papīne si Awrusalamin

(Mateo 21:1-11; Markus 11:1-11; Yahiya 12:12-19)

28Pagubus inin bissā si Isa, lumengngan iye padehellu amban siye tudju Awrusalam. 29Pagtapit ne iye si meꞌ kalumaꞌan Betpage duk Betani, laꞌi si kūd Jaitun, ngandaꞌak iye duwangan tindegne padehellu. 30Paꞌinne si siye, “Pī kaꞌam si kalumaꞌan si dehelluhanbi miyaꞌan, duk pagtekkabi laꞌi ngite kaꞌam iyan anak asnu dinagtel, gaꞌ pe bakas kasakeyan. Lekkahanun bi duk boꞌohun bi pitu. 31Bang niyaꞌ nilew kaꞌam bang weꞌey lekkahanbi, paꞌinun bi, ‘Niyaꞌ kagunahan Panuhutanin si iye.’ ”

32Manjari hap pī ne meꞌ dinaꞌaknen si kalumaꞌan miyaꞌan duk takitede kēmon sa pangaka si Isa si siyehin. 33Sasangde mangalekkahan anak asnuhin, paꞌin meꞌ dapuꞌnen si siye, “Hoy, weꞌey lekkahanbi anak asnu iyan?” 34Nambung siye, paꞌinde, “Niyaꞌ guna Panuhutanin si iye.” 35Manjari binoꞌo ne weꞌ de asnuhin pu si Isa duk ilampiruhan weꞌ de duk meꞌ semmekde, ubus bu pasakey ne si Isa. 36Sasangne mapīhin, binellat weꞌ meꞌ aꞌahin meꞌ semmekden si lān palabeyannen.

37Pagtapit ne si Isa si Awrusalam, laꞌi ne si padurulan kūd Jaitun, kēmon meꞌ tindegne mabanesin magsukul si Tuhan duk pinudji iye weꞌ de pinapales sabab meꞌ hinangan balakat bakas takitede hininang si Isahin. 38Paꞌinde, “Pudjite bi sultan inin, iye pinapitu weꞌ Tuhanin! Sanyang laꞌi si surgaꞌ duk pinudji teꞌed Tuhanin!” 39Niyaꞌ meꞌ Pariseo laꞌi dem kaꞌekkahan meꞌ aꞌahin. Paꞌinde pu si Isa, “Tuwan, pagesun meꞌ tindegnun. Daꞌakun siye padeheng nanglitan kaꞌu.” 40Nambung iye, paꞌinne, “Akahante kaꞌam, weꞌ bang gaꞌi siye inin mabehe, meꞌ batu si lān inin asal ngellang mudji aku.”

Magtangis si Isa sabab puweblo Awrusalamin

41Pagtapit-tapit ne si Isa si puweblo Awrusalam duk takitene ne meꞌ kalumaꞌanin, magtangis iye hawal aseꞌne si meꞌ aꞌa puweblo miyaꞌan. 42Paꞌinne, “Bang siꞌ hadja tahātibi bisan ellew inin bang ine subey hininangbin supaya kaꞌam ngasuwaꞌ kasanyangan. Saguwaꞌ asal gaꞌi tahātibi. 43Makaꞌaseꞌ-aseꞌ teꞌed kaꞌam peggeꞌ niyaꞌ du iyan meꞌ ellew tekka, iliput lahatbin weꞌ meꞌ bantabin. Ngahinang siye iyan kutaꞌ bulak liputde kaꞌam inelletan duk kaꞌam gaꞌi lumahi. 44Lubude iyan kēmon kalumaꞌanbin hangkan gaꞌ iyan niyaꞌ nengge meꞌ batu pinagbangkat-bangkatin dem puweblobi iyan. Duk kēmon kaꞌam maglahat luꞌu diyalemin, papateyde du. Umantag du inin si kaꞌam peggeꞌ gaꞌ pegmasibi waktu pamakite Tuhan aseꞌne si kaꞌamin.”

Pī si Isa dem langgal hadjehin

(Mateo 21:12-17; Markus 11:15-19; Yahiya 2:13-22)

45Manjari pagtekka si Isa dem puweblo Awrusalam, paꞌasek iye pī dem langgal hadjehin duk binudjew weꞌ ne meꞌ aꞌa magdagang-dagang malaꞌihin 46duk paꞌinne si siye, “Tasulat dem kitab, paꞌin Tuhanin, ‘Lumaꞌkun inēnan du lumaꞌ pangampunan.’ Saguwaꞌ kaꞌam,” paꞌin si Isa, “hininang weꞌ bi lumaꞌ Tuhanin kuweꞌ lumaꞌ patapukan meꞌ aꞌa panangkew.” 47Magtoloꞌ si Isa ellew-ellew dem langgal hadjehin. Meꞌ nakuraꞌ meꞌ imamin duk meꞌ guru si saraꞌ āgamahin duk sampay meꞌ aꞌa mabangsahanin miha-miha lān supaya si Isa tapapateyde. 48Saguwaꞌ gaꞌ niyaꞌ tahinangde peggeꞌ kēmon aꞌahin sinna teꞌed pakale si meꞌ bissānen.

Currently Selected:

Lukas 19: yakV

Highlight

Copy