Yahiya 5

Pamakoleꞌ aꞌa laꞌi si limbuhin

1Gaꞌ tiggel puwas inin, pataked disi Isa hap Awrusalam peggeꞌ niyaꞌ kādjaꞌan meꞌ Yahudihin laꞌi. 2Laꞌi si Awrusalam niyaꞌ limbu, ēnnen bang si bissā Yahudi, limbu Betsata. Limbu inin si bihing dambuwaꞌ meꞌ tarangka padiyaleman hap Awrusalamin, inēnan tarangka bili-bili. Niyaꞌ lime lumaꞌ-lumaꞌ pasayindungan si bihing limbu miyaꞌan. 3Tuꞌu si meꞌ lumaꞌ-lumaꞌ inin, ekka meꞌ aꞌa saki pabāk. Niyaꞌ siye pessek, niyaꞌ pengkaꞌ duk niyaꞌ matey baranden. (Inagad-agad weꞌ de paseyibuwa boheꞌ dem limbuhin. 4Peggeꞌ bang patekka niyaꞌ malaꞌikat Tuhanin pī dem limbu ngutaꞌul boheꞌin. Duk madumehellu mapī dem boheꞌin, pagubus kutaꞌul boheꞌin, kawuliꞌan bisan ine sakinen.) 5Niyaꞌ dambuwaꞌ aꞌa laꞌi tellumpūꞌ duk walun tahun ne sakinen. 6Takite si Isa iye pabāk-bāk laꞌi duk kataꞌuhanne weꞌ tiggel ne saki aꞌa miyaꞌan. Manjari tilew si Isa iye, paꞌinne, “Bayaꞌ ke kew koleꞌ?” 7Nambung aꞌa sakihin, paꞌinne, “Aweꞌ, Tuwan. Saguwaꞌ gaꞌ niyaꞌ mengket aku pī dem limbu bang ne kutaꞌul boheꞌin. Duk sasangku pe paꞌinsud pī, niyaꞌ ne dumehellu amban aku.” 8Paꞌin si Isa si iye, “Kuwat kew, boꞌohun pabākannun bu nu ne lumengngan.” 9Magtawus aꞌahin koleꞌ. Binoꞌo weꞌ ne pabākannen bu lumengngan ne iye.

Na, ellew miyaꞌan, ellew Sabtuꞌ, ellew liꞌi meꞌ Yahudihin. 10Hangkan pagkite meꞌ nakuraꞌ Yahudihin aꞌa makawuliꞌanin magboꞌo pabākannen, paꞌinde, “Hoy! Ellew liꞌi maꞌin. Langgalannu saraꞌten bi pamoꞌonu pabākannu iyan.” 11Sambunganne siye, paꞌinne, “Aꞌa mamakoleꞌ akuhin, daꞌakne binoꞌo si aku pabākankun duk daꞌakne ku lumengngan.” 12“Sine aꞌa mangandaꞌak kaꞌuhin?” paꞌinde. 13Saguwaꞌ gaꞌ kataꞌuhanne bang sine, peggeꞌ ekka teꞌed aꞌa laꞌi si higad limbu duk magtawus si Isa tahalaꞌ.

14Puwas inin, takasuwaꞌ si Isa aꞌa bakas masakihin laꞌi dem langgal hadjehin. Paꞌin si Isa si iye, “Payamanun, koleꞌ ne kew. Hangkan lebbahanun ne dusenun, kaw pe niyaꞌ pasōng laꞌat tekka si kaꞌu.” 15Manjari tahalaꞌ aꞌahin duk pī iye ngakahan meꞌ nakuraꞌ meꞌ Yahudihin weꞌ si Isa makoleꞌ iyehin. 16Hangkan hep si Isa kinuntarahan teꞌed weꞌ meꞌ nakuraꞌ meꞌ Yahudihin, peggeꞌ pinakoleꞌ weꞌ ne aꞌa sakihin baytu ellew liꞌi. 17Manjari sambungan si Isa siye, paꞌinne, “Samaku Tuhanin luwal maghinang sampay maꞌin, damikkiyan aku, maghinang ku isab.” 18Peggeꞌ kuweꞌ miyaꞌan sambung si Isahin, hangkan tinuyuꞌan teꞌed iye pinapatey weꞌ de, dumaꞌin hadja peggeꞌ langgalanne saraꞌ ellew liꞌihin, saguwaꞌ peggeꞌ paꞌinne isab weꞌ Tuhanin Samanen, hātinen pasaliꞌne dinen si Tuhanin.

Kapatut Anakin

19Sambungan si Isa meꞌ nakuraꞌ miyaꞌan, paꞌinne, “Sabennal akahante kaꞌam, gaꞌ teꞌed niyaꞌ tahinangku bang baran-baranku hadja. Saguwaꞌ ine-ine takiteku hinang Samakun, iye isab miyaꞌan hininangkun. Kēmon hininang Samanen iye du isab hininang Anaknen. 20Peggeꞌ kinalasahan ku weꞌ Samaku Tuhanin, duk pinakitaꞌu weꞌ ne si aku kēmon hininangnen. Duk si pasōngan pahinangne pe ku iyan meꞌ hinangan pasōng balakatan amban meꞌ tahinangku ilabeyin, ubus bu kēmon kaꞌam ulaliꞌ manamal. 21Samaku Tuhanin makapakellum aꞌa matey. Damikkiyan isab aku, Anak Tuhanin, tapakellumku sine-sine kabayaꞌanku. 22Duk dumaꞌin Samakun Tuhanin mangahukum me manusiyaꞌin. Saguwaꞌ pinangurung weꞌ ne si aku kapatut mangahukum manusiyaꞌin kēmon, 23supaya kēmon aꞌahin, pahadjede ku kuweꞌ pamahadjede Tuhanin. Sine-sine gaꞌi mahadje Anak Tuhanin, gaꞌi du isab pahadjene Samaku Tuhanin, iye mamapitu akuhin.

24“Sabennal akahante kaꞌam, sine-sine makakale meꞌ panoloꞌkun duk kahagad si mamapitu akuhin, ellum iye salama-lama. Gaꞌi iye tewwaꞌ hukuman Tuhanin. Gaꞌi ne iye legga Tuhanin saguwaꞌ ellum iye salamalama. 25Sabennal akahante kaꞌam,” paꞌin si Isa, “taꞌabut ne waktuhin, kēmon manggaꞌ pe makahagadin, meꞌ dalil pateyin, kalede suwalakun, aku Anak Tuhanin. Duk kēmon makakalehin pinakellum du. 26Samakun poꞌon umulin, duk aku inin poꞌon umulin kuweꞌ Samakun du, sabab kapatut pinangurungne si akuhin. 27Duk kaꞌurungan ku isab weꞌ Samakun kapatut ngahukum meꞌ manusiyaꞌin, peggeꞌ aku iye inēnan Anak Manusiyaꞌin. 28Daꞌa kaꞌam ulaliꞌ si bissāku inin,” paꞌin si Isa. “Niyaꞌ waktu si pasōngan, kēmon pateyin kalede du suwalakun. 29Pagkalede, paguwaꞌ siye amban dem kubulde. Meꞌ aꞌa bakas maghinangan mahāpin, paguwaꞌ duk ellum siye salama-lama si surgaꞌ. Duk meꞌ aꞌa bakas maghinangan malaꞌatin, paguwaꞌ du isab duk tewwaꞌ hukuman Tuhanin siye, duk ilegga siye.”

Meꞌ saksiꞌ si Isahin

30Paꞌin si Isa, “Gaꞌ niyaꞌ tahinangku bang baran-baranku hadja. Ngahukum ku hadja kuweꞌ pangandaꞌakan Samaku akuhin. Hangkan bentel hukumankun. Peggeꞌ dumaꞌin tinuyuꞌanku hininangin kinabayaꞌankun, saguwaꞌ kinabayaꞌan Tuhan mamapitu akuhin. 31Bang aku hadja missā sabab dikun, gaꞌi du ku kahagadbi. 32Saguwaꞌ niyaꞌ seddili naksiꞌan aku. Kataꞌuhanku weꞌ panaksiꞌne si akuhin asal bennal.” 33Paꞌin si Isa pe, “Bakas kaꞌam ngandaꞌak meꞌ aꞌabi pī pu Yahiya. Duk inaka weꞌ Yahiya mabennalin sabab aku. 34Saguwaꞌ dumaꞌin pangandelankun saksiꞌ manusiyaꞌ. Bissāku hadja inin sabab Yahiya supaya kaꞌam timbul. 35Si Yahiya kuweꞌ dalil payitaꞌan kayat ngurung dantaꞌ si pikilan manusiyaꞌ duk sinna kaꞌam si dantaꞌnen, hātinen si panoloꞌnen, bisan daddaliꞌ hadja. 36Saguwaꞌ niyaꞌ saksiꞌ si aku pasōng basagnen amban panaksiꞌ Yahiyahin. Iye ne meꞌ hinang bakas tahinangkun. Meꞌ hinangku inin amban pangandaꞌakan Samaku Tuhanin duk daꞌakne si aku inubus. Asal meꞌ hinang hininangku ne inin naksiꞌan aku weꞌ Samaku Tuhanin mamapitu akuhin. 37Duk Samakun, iye mamapitu akuhin, saksiꞌanne ku isab. Saguwaꞌ gaꞌ bakas takalebi suwalanen duk gaꞌ bakas takitebi bayhuꞌnen. 38Duk gaꞌ lapalnen paꞌessep dem ateybi peggeꞌ gaꞌ kaꞌam kahagad si aku, iye pinapitune si kaꞌamin. 39Kaꞌam iyan, magtuyuꞌ teꞌed kaꞌam ngadjiꞌ kitabin, peggeꞌ tapikilbi bang kaꞌam ngadjiꞌ ngasuwaꞌ umul kaꞌam salama-lama si surgaꞌ. Bu kitab inin ne magaka sabab akuhin. 40Saguwaꞌ gaꞌi kaꞌam ngatu patuhut si aku, bu aku makaꞌurungan kaꞌam umul gaꞌ tamanannen.”

41Paꞌin si Isa pe si meꞌ nakuraꞌ meꞌ Yahudihin, “Dumaꞌin inapaskun sanglitan manusiyaꞌ ku. 42Saguwaꞌ kataꞌuhanku bang ine dem ateybin. Kataꞌuhanku gaꞌ niyaꞌ lasabi si Tuhan. 43Bisan ku pitu inurungan kapatut amban Samaku Tuhanin, gaꞌi du ku kahagadbi. Saguwaꞌ bang niyaꞌ aꞌa seddili pitu magkapatutan dine, kahagadbi iye. 44Saꞌingge pakahagadbi si akuhin bang iye kabayaꞌanbin sanglitan saweꞌbin kaꞌam? Gaꞌi iye apasbi sanglit amban Tuhanin, Tuhan dambuwaꞌ-buwaꞌin. 45Daꞌa pikilun bi weꞌ sumbungte kaꞌam si Samaku Tuhanin laꞌi si ellew paghukum. Dumaꞌin aku saguwaꞌ si Musa, mamasampay si kaꞌam saraꞌ tinuhutbin, iye manumbung kaꞌamin. 46Bang bennal kaꞌam kahagad pu si Musa, subey kaꞌam kahagad si aku peggeꞌ sabab aku hep sinulatne dem kitabin. 47Saguwaꞌ peggeꞌ gaꞌi kahagadbi meꞌ sinulat si Musahin, saꞌingge pakahagadbi meꞌ bissākun?”

Currently Selected:

Yahiya 5: yakV

Highlight

Copy