Yahiya 20

Kaꞌellum si Isa balikin

(Mateo 28:1-8; Markus 16:1-8; Lukas 24:1-12)

1Subu-subu pe teꞌed ellew Ahadin, lindem pe, hap pī si kubul si Mariyam, dende amban Magdalahin. Takitene weꞌ bakas inānan ne batu tampeng kubulin. 2Hangkan magubas iye pī ngakahan si Simon Petros duk tindeg si Isa dambuwaꞌ kinalasahannen. Paꞌinne si siye, “Gaꞌ ne laꞌi Panuhutanten bi. Niyaꞌ bakas ngānanne amban dem kubul. Inday, gaꞌi kataꞌuhan kami bang antag pamoꞌohande iyehin.”

3Manjari si Petros duk tindeg dambuwaꞌin magtawus hap pī si kubul. 4Magubas siye saguwaꞌ dambuwaꞌin lakkes amban si Petros duk dehellu iye tekka laꞌi si kubul. 5Pakokkoꞌ iye pasīp padiyalem kubul duk takitene saput si Isahin laꞌi. Saguwaꞌ gaꞌ iye padiyalem. 6Manjari tekka ne si Simon Petros amban dambulihanne duk nalus pī padiyalem kubul. Takitene saputin laꞌi. 7Takitene isab pīs-pīs bakas pamutus kōk si Isahin, gaꞌ magdānun duk saputin saguwaꞌ seddilihan dine ilikid. 8Manjari dambuwaꞌin, iye madumehellu matekka si kubulin, padiyalem isab. Pagkitene saputin, kahagad iye weꞌ ellum ne si Isa balik. 9Niyaꞌ du tasulat dem kitab sabab si Isa weꞌ subey iye ellum balik amban kamateynen, saguwaꞌ gaꞌ pe miyaꞌan tahātide. 10Manjari hap lumaꞌ ne siye.

Pakite si Isa pu si Mariyam, dende amban Magdalahin

(Mateo 28:9-10; Markus 16:9-11)

11Saguwaꞌ si Mariyam nengge-nengge ne paꞌin laꞌi si bihing kubul magtangis. Sasangne magtangisin, pakokkoꞌ iye pasīp dem kubul. 12Ngite iye duwe malaꞌikat magsemmek poteꞌ ningkoloꞌ laꞌi si antag bakas pamabākan si Isahin, dangan si antag kōkne duk dangan si antag bettisne. 13Paꞌin meꞌ malaꞌikatin si iye, “Dende, weꞌey kew magtangis?” Nambung Mariyam, paꞌinne, “Peggeꞌ iyuꞌ ubus boꞌode tahalaꞌ bangkey Panuhutankun, bu gaꞌi kataꞌuhanku bang antag pamoꞌohande iyehin.” 14Pagubus inin bissāne, pahaleng iye duk takitene si Isa nengge-nengge laꞌi, saguwaꞌ gaꞌ takilalene weꞌ si Isa miyaꞌan. 15Paꞌin si Isa si iye, “Dende, weꞌey kew magtangis? Sine pinihanun?” Kannal Mariyam weꞌ aꞌa miyaꞌan tungguꞌ kabbunin. Paꞌinne si aꞌahin, “Tuwan, bang kaꞌu mangeddoꞌ bangkey si Isahin, akahanun ku bang antag pamoꞌohannu iyehin, duk ku tapī ngeddoꞌne balik.” 16Paꞌin si Isa si iye, “Mariyam.” Magtawus harapne si Isa duk paꞌinne si bissā Yahudi, “O Rabbuni.” Hātinen, “Guru.” 17Paꞌin si Isa si iye, “Daꞌa ku kaputanun peggeꞌ gaꞌ pe ku tapoleꞌ pī si Samakun. Saguwaꞌ pī kew si meꞌ pungtinaꞌikun duk akahanun siye weꞌ moleꞌ ku pī si Samakun duk Tuhankun. Iye du isab Samabin duk Tuhanbin.” 18Hangkan hap pī ne Mariyam, dende amban Magdalahin, si meꞌ tindeg si Isahin ngakahan siye, paꞌinne, “Bakas kiteku Panuhutanten bi.” Duk inakahan ne siye weꞌ ne meꞌ bakas pinaꞌin si Isa si iyehin.

Pakite si Isa si meꞌ tindegnen

(Mateo 28:16-20; Markus 16:14-18; Lukas 24:36-49)

19Pagsangem ne ellew Ahad miyaꞌan, magtipun meꞌ tindeg si Isahin dem lumaꞌ. Binagat weꞌ de meꞌ gawangin peggeꞌ tinalew siye si meꞌ nakuraꞌ Yahudihin. Bessuwang si Isa nengge si tengngaꞌde duk paꞌinne si siye, “Karayaw sanyang dem ateybin.” 20Manjari pinakitehan weꞌ ne si siye meꞌ paliꞌ tangannen duk paliꞌ seddinen. Kēgan teꞌed meꞌ tindegnen pagkitede Panuhutanden. 21Paꞌin si Isa balik si siye, “Karayaw sanyang dem ateybin. Kuweꞌ pangandaꞌak Samaku aku mapituhin, damikkiyan iye du isab pangandaꞌakanku kaꞌamin.” 22Ubus iye missā, nihup iye pī si siye duk paꞌinne, “Tayimaꞌun bi ne Niyawa Sutsihin. 23Bang ampunbi duse aꞌahin ampun Tuhanin du isab duseden. Bang gaꞌi ampunbi, gaꞌi du isab ampun Tuhanin.”

Si Isa duk si Tomas

24Waktu paguwaꞌ si Isa si meꞌ tindegne miyaꞌan, baytu gaꞌ laꞌi si Tomas. Si Tomas inin dangan meꞌ tindeg si Isa sampūꞌ duk duwehin, ugey-ugeynen si Kambal. 25Manjari inakahan si Tomas weꞌ de, paꞌinde, “Bakas takite kami Panuhutanten bi.” Saguwaꞌ paꞌin si Tomas, “Bang gaꞌi du takiteku duk duwe mataku inin duk tasagsadku meꞌ paliꞌ lansang si pat tangannen duk bang gaꞌi du taꞌantanku paliꞌ si seddinen, asal gaꞌi ku kahagad.”

26Paglabey da simana, magtipun ne isab meꞌ tindeg si Isahin dem lumaꞌ duk laꞌi ne si Tomas. Bagat meꞌ gawangin saguwaꞌ bessuwang si Isa nengge si tengngaꞌde duk paꞌinne, “Karayaw sanyang dem ateybin.” 27Manjari paꞌinne pu si Tomas, “Payamanun meꞌ tangankun. Sagsadun. Pasōngun tangannun pitu duk antanun paliꞌ seddikun. Daꞌa ne kew duwe-duwehan. Kahagad ne kew teꞌed.” 28Sambat si Tomas saꞌ, “Kaꞌu Panuhutankun duk kaꞌu Tuhankun.” 29Paꞌin si Isa si iye, “Hangkan ke kew kahagad peggeꞌ takitenu ne ku? Asal kēgan teꞌed meꞌ makahagad si akuhin bisan ku gaꞌ kitede.”

Weꞌey kitab inin sinulat

30Ekka pe meꞌ hinangan makaꞌulaliꞌ seddili tahinang si Isa si pagmatahan meꞌ tindegnen, gaꞌ tasulat naꞌan si kitab inin. 31Saguwaꞌ meꞌ sinulat matuꞌu inin, sinulat supaya du kahagadbi weꞌ si Isa asal Almasihin ne, Anak Tuhanin, duk supaya kaꞌurungan kaꞌam umul salama-lama sabab sandelbi si iyehin.

Currently Selected:

Yahiya 20: yakV

Highlight

Copy