Yahiya 18

Paniggew si Isahin

(Mateo 26:47-56; Markus 14:43-50; Lukas 22:47-53)

1Pagubus si Isa ngampun si Tuhan, tahalaꞌ iye duk meꞌ tindegnen pī si dambiyaꞌ sapaꞌ inēnan Kidron. Niyaꞌ laꞌi kabbun duk hap pī siye dem kabbun miyaꞌan. 2Kataꞌuhan si Judas antag miyaꞌan peggeꞌ daran hep si Isa duk meꞌ tindegnen magtipun-tipun laꞌi. Si Judas hep inin mamuddihan si Isahin. 3Manjari pinanduꞌan weꞌ si Judas meꞌ sundalu bangsa Romahin duk meꞌ guwaldiya langgal hadjehin pī si kabbun miyaꞌan. Meꞌ guwaldiya inin pinatuhut si iye weꞌ meꞌ Pariseohin duk meꞌ nakuraꞌ imamin. Magbessi siye duk maglaꞌal duk magboꞌo payitaꞌan. 4Kataꞌuhan si Isa kēmon sōng maꞌumantag si iyehin hangkan pī iye pasampang si siye duk paꞌinne, “Sine pinihabin?” 5Paꞌinde, “Piha kami si Isa, aꞌa amban lahat Nasaretin.” “Aku ne hep,” paꞌin si Isa. Si Judas, mamuddihan si Isahin, laꞌi isab nengge-nengge duk meꞌ aꞌahin. 6Pagpaꞌin si Isa, “Aku ne hep,” pasuhut siye duk hebbaꞌ siye. 7Manjari tilew si Isa siye balik, paꞌinne, “Sine teꞌ pinihabin?” Nambung siye, paꞌinde, “Si Isa, aꞌa amban Nasaretin.” 8Manjari paꞌin si Isa, “Bakas ne kaꞌam akahanku weꞌ aku ne. Bang asal aku du aꞌa pinihabin, na, tiyaꞌ ne ku. Daꞌa sakupun bi meꞌ saweꞌku inin.” 9Paꞌinne inin supaya tuman bakas pinaꞌinne si Samane, Tuhanin, paꞌinne, “O Ammaꞌ, gaꞌ niyaꞌ lepas bisan dangan meꞌ aꞌa pinasukuꞌnu si akuhin.”

10Magbessi hep si Simon Petros. Manjari inurus weꞌ ne bessinen duk pineddang weꞌ ne daraꞌakan imam nakuraꞌin. Iye matewwaꞌin tayingene kanawanin duk magtawus butas. Ēn daraꞌakan inin si Malkus. 11Paꞌin si Isa pu si Petros, “Isihun balik bessinun dem tagubanne. Akuhanku kēmon kabinasahan inin peggeꞌ inin pinasukuꞌ si aku weꞌ Samakun.”

Binoꞌo si Isa pu si Annas

12Manjari siniggew si Isa weꞌ meꞌ sundaluhin duk meꞌ kapitanden duk meꞌ guwaldiya Yahudihin duk iningketan iye weꞌ de. 13Binoꞌo iye weꞌ de pī pu si Annas dehellu. Si Annas inin matoꞌa si Kayapas, imam nakuraꞌin tahun miyaꞌan. 14Si Kayapas hep inin mangurung pikilan si meꞌ nakuraꞌ Yahudihin pagpaꞌinne weꞌ si kahāpande bang niyaꞌ dambuwaꞌ matey gantiꞌ meꞌ aꞌahin kēmon.

Masuwey si Petros weꞌ dumaꞌin iye tindeg si Isa

(Mateo 26:69-70; Markus 14:66-68; Lukas 22:55-57)

15Paturul si Simon Petros pu si Isa duk dambuwaꞌ isab tindegne. Tindeg si Isa dambuwaꞌ inin magkilale duk imam nakuraꞌin hangkan tumuhut iye pu si Isa padiyalem pī si lame lumaꞌ imam nakuraꞌin. 16Saguwaꞌ si Petros taꞌamban laꞌi si bukut tarangka. Manjari paluwas balik tindeg si Isa magkilale duk imam nakuraꞌin, duk maꞌid iye si dende tungguꞌ tarangkahin, hangkan taboꞌone si Petros padiyalem si lame. 17Tinilew si Petros weꞌ dendehin, paꞌinne, “Dumaꞌin ke kew dambuwaꞌ meꞌ tindeg aꞌa tasiggew miyaꞌan?” Masuwey si Petros, paꞌinne, “Dumaꞌin.” 18Sangem miyaꞌan haggut, hangkan meꞌ daraꞌakanin duk meꞌ guwaldiyahin magpakellum ebbut duk laꞌi siye magtengge ngaliput ebbutin ngindāng. Pī isab si Petros patuhut si siye ngindāng.

Binistiga si Isa weꞌ imam nakuraꞌin

(Mateo 26:59-66; Markus 14:55-64; Lukas 22:66-71)

19Manjari si Annas, iye bakas imam nakuraꞌin, tinilew-tilew weꞌ ne si Isa sabab meꞌ tindegnen duk sabab pagtoloꞌnen. 20Nambung si Isa, paꞌinne, “Luwal ku magtoloꞌ si meꞌ kaꞌekkahan aꞌa, kuweꞌ dem meꞌ kalanggal-langgalan duk dem langgal hadje pagtipunan kēmon meꞌ Yahudihin. Gaꞌ niyaꞌ bakas pagtoloꞌku tinapuk. 21Weꞌey aku tinilewnun? Tilewun meꞌ bakas makakale panoloꞌkun. Tilewun siye bang ine panoloꞌku si siyehin. Kataꞌuhande du.” 22Pagbissā si Isa inin, magtawus iye sinampak weꞌ dambuwaꞌ meꞌ guwaldiya malaꞌihin duk paꞌinne pu si Isa, “Gaꞌ niyaꞌ addatnu. Daꞌa sambunganun imam nakuraꞌin sa iyan.” 23Paꞌin si Isa si guwaldiyahin, “Bang salaꞌ binissāku si imam nakuraꞌin, akahanun kēmon aꞌa si paghukuman inin bang ine masalaꞌ si binissākun. Saguwaꞌ bang gaꞌ salaꞌ binissākun, weꞌey ku sampaknu?” 24Manjari dinaꞌak ne si Isa weꞌ si Annas binoꞌo pī pu si Kayapas, imam nakuraꞌin. Iningketan pe iye.

Masuwey balik si Petros weꞌ dumaꞌin iye tindeg si Isa

(Mateo 26:71-75; Markus 14:69-72; Lukas 22:58-62)

25Si Simon Petros laꞌi pe nengge-nengge ngindāng. Tinilew iye weꞌ meꞌ saweꞌne magtenggehin, paꞌinde, “Dumaꞌin ke kew isab tindeg aꞌa miyaꞌan?” Masuwey iye, paꞌinne, “Dumaꞌin.” 26Manjari dambuwaꞌ daraꞌakan imam nakuraꞌin, baꞌan aꞌa bakas mabutas tayingene weꞌ si Petrosin, missā. Paꞌinne pu si Petros, “Dumaꞌin ke kew bakas takiteku laꞌi si kabbunley nuhut iye?” 27Masuwey balik si Petros, paꞌinne, “Dumaꞌin aku.” Manjari magtawus tingkowak manukin.

Si Isa si harapan Gubnul Pilatus

(Mateo 27:1-2, 11-14; Markus 15:1-5; Lukas 23:1-5)

28Subu-subu pe binoꞌo si Isa amban lumaꞌ si Kayapas pī si astanaꞌ gubnul bangsa Romahin, saguwaꞌ gaꞌ padiyalem meꞌ nakuraꞌ Yahudihin dem astanaꞌ peggeꞌ bang siye padiyalem dem lumaꞌ dumaꞌin Yahudi, batal siye duk gaꞌi ne siye makajari palamud magjamu-jamu laꞌi si Kādjaꞌan Pangessebanin. 29Hangkan paluwas Gubnul Pilatus pī si siye duk tilewne siye, paꞌinne, “Ine panuntutanbi aꞌa inin?” 30Nambung siye, paꞌinde, “Gaꞌi boꞌo kami aꞌa inin pitu si kaꞌu bang gaꞌ niyaꞌ dusene.” 31Paꞌin Pilatus si siye, “Kaꞌam ne iye ngahukumne nuhut saraꞌbin.” Nambung meꞌ Yahudihin, paꞌinde, “Gaꞌ niyaꞌ kapatut kami ngalaboꞌan sine-sine hukuman pinapatey.” 32Kēmon inin umantag supaya tuman bakas pinaꞌin si Isahin bang saꞌingge kamateynen. 33Manjari padiyalem balik si Pilatus dem astanaꞌ duk dinaꞌak weꞌ ne si Isa binoꞌo pī si iye. Paꞌinne pu si Isa, “Toꞌo ke weꞌ kaꞌu sultan bangsa Yahudihin?” 34Nambung si Isa, paꞌinne, “Amban di pikilannu ke manilew aku inin atawa niyaꞌ ke meꞌ aꞌa seddili bakas ngakahan kaꞌu sabab aku?” 35Nambung Pilatus, paꞌinne, “Weꞌ Yahudi ku? Meꞌ bangsanu du duk meꞌ nakuraꞌ imambin hep manōngan kaꞌu pitu si akuhin. Weꞌey, ine teꞌ dusenun?” 36Nambung si Isa, paꞌinne, “Pagsultanankun dumaꞌin tuꞌu si dunya. Bang pagsultanankun tuꞌu si dunya, asal nungkaꞌ meꞌ tindegkun duk ku gaꞌi tasiggew weꞌ meꞌ nakuraꞌ Yahudihin. Aweꞌ, pagsultanankun dumaꞌin tuꞌu si dunya inin.” 37Paꞌin Pilatus, “Bang sa iyan, sultan kew hatiꞌ?” Paꞌin si Isa, “Kaꞌu ne magpaꞌinin weꞌ sultan ku. Iye sababnen hangkan ku inanakan duk hangkan ku pitu si dunya, supaya ku kapagtoloꞌ sabab mabennalin. Kēmon manuhut mabennalin pakale du si aku.” 38Paꞌin Pilatus, “Ine teꞌ mabennalin?”

Si Isa hinukum weꞌ pinapatey

(Mateo 27:15-31; Markus 15:6-20; Lukas 23:13-25)

Pagubus inin bissā Pilatus, paguwaꞌ iye balik pī si meꞌ Yahudihin duk paꞌinne si siye, “Gaꞌ niyaꞌ takasuwaꞌku jānne pangahukumanku aꞌa inin. 39Saguwaꞌ katagamanbin kahabaꞌ taꞌabut Kādjaꞌan Pangessebanin, maluwas ku dambuwaꞌ pilisu. Bayaꞌ ke kaꞌam bang paluwasku kaꞌam sultan meꞌ Yahudihin?” 40Magkalolop meꞌ aꞌahin, paꞌinde, “Daꞌa bang aꞌa iyan. Kabayaꞌan kamihin si Barabbas.” Si Barabbas inin mundu.

Currently Selected:

Yahiya 18: yakV

Highlight

Copy