Zan 4
4
Yesu ɓɔɠɔ lɛɛ vai ga Samali nuiti
1Maliɠii suɠwɛɛni ga Faliziɛinti ti mɛnini ga Yesu ɠa kaladopo mɔinmɔin sɔlɔɔsu, ta toɠa ɓatizei wosu é leʋe Zan ʋa. 2(Tama gaamazu Yesu ɓɔɠɔi mu ge la ɠɛni ɓatize wosu, kɛlɛ ná-kaladopoiti ka ti ɠɛni naa ɠɛɛzu.) 3É zeɠeni Zudé yooi zu, é ɠale ma Galilé yooi zu.
4Tama kɛni nɔ a la leʋe ga Samali ʋele. 5É zeelini Samali laa wolai gila su, nii daaseigi ɠɛni ga Sikaal, ná maa la ɠɛni ɠoozani zou ɓuɠai ʋa, nii Zakɔɓe feeni ná-doun zunui Zozɛfe ʋɛ. 6Miná ɠa Zakɔɓe ná-ziɛyeɠei ɠɛni ná. Tɛi Yesu ɓɔlɔni ga siɛi, é zeini ziɛyeɠei laaʋɛ, folo gaalɔgai ɠɛni de kpekpe.
7Samali anzanui gila ge ʋaani ziɛ zaɠazuʋɛ. Yesu ɠɛ ma: «Soma kae è kɔ̀ ziɛi zu, gè ɓɔɔle.» 8(Ná-kaladopoiti ti liini taazuʋɛ ga ti ɠɔnɔ geya.)
9Samali anzanui ɠɛni ma: «Ɗa ga Zuifui, lee vaa zu è kpɔɔle ɗɛi valizu mà, nɛ̀i gè ga Samali nu?» (Tɔɔzei Zuifuiti ti ɠɛni Samali nuiti maalaasu fai pɛ su.)
10Yesu ɠɛni ma: «Ni è ɠɛni vebɛanii ɠwɛɛ, nii GALA ge pɔ é fe è ʋɛ, ta nui nii é ɠɛɛzu è ma: ‹Kɔ̀ kpɔɔle ɗɛi zu,› ɗɔun mu ka è ɠɛa kpɔɔle ɗɛi valizu ma, tama a la zɛnvu su ɗɛi ve è ya.»
11Anzanui ɠɛni ma: «Maliɠii, ziɛ zaɠa ɲaka la è ya, naa ʋoluma ziɛyeɠei zuɠoozaʋɛ, mini ɠa è ɗa zɛnvu su ɗɛi naa zeɠezu ná? 12Ade-mɛmɛwola Zakɔɓe nii é ziɛyeɠei nii vea de ya, tɔ ɓɔɠɔi é ma ɗɛi ta ɓɔleni, ta ná-doun zunuiti, naa ʋɛɛ ná-togani ɓulugiti ba. Ɗa ɠisiɛzu ga è ɓaɠoʋɛ ba ɓaa?»
13Yesu gooɠaaʋoteni, é ɠɛ ma: «Zɔi nɔpɛ é ɓɔɔlezu ga ziɛyeɠei nii zu ɗɛi, kpɔɔle wɔin ɠa ma nu zo ʋolu. 14Kɛlɛ zɔi a ɓɔɔlena ga ziɛi nii gè feezu zea, kpɔɔle wɔin la mɔ soga pɛ. Ziɛi nii nà fe zea, naa ɠa ɠɛ koozu ga ziɛungi, ma ɗɛi ɠa yɛ ɠulazu, é ɠɛ bɛ ga ɠɔoɠɔ zɛnvui.»
15Anzanui ɠɛ ma: «Kalamɔn, ziɛi naa ve zèa, nii a kɛ kpɔɔle wɔin mina mɔ sò, naa ʋolu gè mina mɔ ʋa ʋɛ ziɛ zaɠazu.»
16Yesu ɠɛni ma: «Li, è bo è-zinigi ma, wo ʋa ʋɛ.» 17Anzanui gooɠaaʋoteni, é ɠɛ ma: «Gè la zini bɛ.» Yesu ɠɛni ma: «Gaama ɠa è ya ga è ɠɛ ma: ‹Gè la zini bɛ.› 18Tɔɔzei è zeiɗa zini bɛ ná zeizu ɠɛ lɔɔlu, tɔ ɠa é ba zunui nii è zea niizu, è-zini ge la ga naa, naa maaʋele ma, è gaama wogɛ.»
19Anzanui Yesu wooɠaaʋoteni, é ɠɛ ma: «Kalamɔn, nà kaazu ga ɗa ga GALA goo wo nu. 20Gi-mɛmɛwolani ti ɠɛni GALA dɛbizu gizei nii ma, wɔun wo ɠɛ kɛni Zeluzalɛme nɔ ɠa nu maanɛai è GALA dɛbi ná.»
21Yesu ɠɛni ma: «La nɔ̀un da, yeeɠɛɠalai ta ɠa ʋaazu, wo la mɔ Kɛɛ lɛbia niima ɠizei ma ɓaa Zeluzalɛme. 22Wɔun nii wo dɛbizu, wo la kwɛɛ, kɛlɛ gɔun nii gi dɛbizu, gi kwɛni, tɔɔzei Zuifui nuɓusɛiti gi ʋɔ bɛ ɠa kizo fai zɔlɔɔsu ná. 23Kɛlɛ yeeɠɛɠalai ta ɠa ʋaazu, tɔun paaʋɛ na vɔlɔ naama ziɛgi zu, lɛbiya ve nu ɠiteɠitegiti ta lɛbiyai ve Kɛɛ ʋɛ ga zɛnvui ta gaamai maaʋele, tɔɔzei naa ɠɛɠala lɛbiya ve nuiti ka Kɛɛ ti ɠaiziɛzu. 24GALA ka ga zɛnvui. Naa ɠa é ba, zɔiti nɔpɛ ti dɛbizu, kɛni ti dɛbi ga Zɛnvui ta gaamai maaʋele.»
25Anzanui ɠɛ ma: «Gè kwɛni ga Mesi ɠa ʋaazu, nii é ga Kilista. A ʋaana, toɠa fai pɛ zɔɠɔzulɛ ga giye.» 26Yesu ɠɛ ma: «Naa ɠa é ga ze, nɛ̀i gè ɓɔɛzu è ʋɔ.»
27Naama yeeɠɛɠalai zu, Yesu ná-kaladopoiti ti ʋaani. Ti wola laavɔɔni ga ti naa ɠa, ti ɗa yɛpɛ ta anzanui. Kɛlɛ tanɔpɛ ge la ɠɛni gaazaɠani ga: «Lee ɠa è pɔ?» ɓaa «Lee vaa zu è ɓɔɛzu pɔ?»
28Anzanui ná-ziɛ ɲakai yɛni ná, é lɛ taazuʋɛ, é ɠɛ nuiti ma: 29«À ʋa, wo zunui ta ʋɛtɛ, nii é naa pɛ suɠula mà, nii pɛ gè kɛa. Nii lɛi é ʋa ɠɛ ga Kilista ɓaa?» 30Nuɓusɛiti ti ɠulani taai ʋa, ti li Yesu ʋɔ bɛ.
31Naama ziɛgi zu ná-kaladopoiti ti ɓɔini da, ti ɗa ɠɛ ma: «Kalamɔn, daamii wo.» 32Kɛlɛ é ɠɛni ti ma: «Daamiani ka zèa ga gè mii, nii wo la kwɛɛ.» 33Kaladopoiti ti ɠɛni ɓɔɠɔ ɠaazaɠasu, ti ɗa ɠɛ ma: «Nu ɠili ge ʋa ɠɛ ʋaani ga daamiani pɔ mu ɓaa?»
34Yesu ɠɛni ti ma: «Kɔ̀nɔgi ɠa ga gè tèʋe nui yiimai ɠɛ, ta gè ná-botii laazeeli, nii é feai zèa. 35Kɛbɛ wa ɠɛɛzu ma: ‹É yɛga ga alu naanigɔ, molo leʋei zeeli,› kɛlɛ? Nɔ̀un nà bosu wo ma ga: À ɠaazuwuzeɠe, wo kpalagiti ka, moloiti mɔɔʋɛ na, ti ɠɛʋele ɓɛtɛai teʋe vai ma. 36Zɔi é moloi leʋezu, naa ɠana zalai zɔlɔɔsu, é ɗa molo ɠaeiti gaalɛ ba ɠɔoɠɔ zɛnvui ma vaa zu, naa ɠa a kɛ molo vaza nui ta teʋe nui ti pɛ ti ɠoozunɛ ʋɔɔma. 37Naazu faalaalii nii ɠɛa ga gaama: ‹Ta ɠa fazasu, taɠili ge ɗa teʋe.› 38Gè wo leʋegɛ moloi leʋezu nii wo la bolini, nii nu ɠiligaa ti boliai, ta-wotii zu ɠulanumai ɠa wo teʋeai.»
39Samali nui ma mɔinmɔin ge laani Yesu la tɔɔzei naa ʋa, nii anzanui boni ti ma ga: «É naama vaiti pɛ boga mà, nii gè kɛa.» 40Siɛgi zu Samali nuiti ti ʋaani la Yesu ʋɔ bɛ, ti maanɛɛnɛni ga é yɛ ti ɠoba. Yesu yɛni ná folo felegɔ laawu. 41Ti wola mɔinni mɔnɔ ti ɠidaaleʋe ma, tɔɔzei daawooi ʋa. 42Ti ɠɛni ɠɛɛzu anzanui ma: «Gi ɠidaaleʋea ma, kɛlɛ naa la mɔ ga nii è bogai gi ma, kɛlɛ giya ɓɔɠɔi gi goomɛniga, gi kwɛni niina ga tɔ ɠa é ga eteai Ɠizo Nu ɠitei.»
Laavɔɔ vai velesiɛi Galilé
43Naama volo felegɔi leʋegai ma, Yesu zeɠeni ná, é li Galilé yooi zu. 44Tɔɔzei tɔ ɓɔɠɔ é ɠɛni ma: «Unfema nɔpɛ ge la ɗa ga ve GALA goo wo nu ʋɛ kpɔɠɔ yooi zu.» 45Siɛgi zu é zeelini la Galilé yooi zu, Galilé nuiti ti yeezeini bu ga koozunɛɛi. Mazɔlɔɔ nii pɛ é kɛɛni Zeluzalɛme, Pake fɛti zu, ti naati kaani, tɔɔzei tiya ɓalaa ti lɛɛni fɛti zu.
46Yesu ɠaleni ma Kana, Galilé yooi zu, ʋɛ é ziɛi valiboni ná ga dɔɔi. Tama masagi ná-botiɠɛ nu wolai gila ge ɠɛni Kapɛɛlɛnawume, nii ná-doun zunui ɠɛni zeeɓɛzu. 47Siɛgi zu é mɛnini la ga Yesu ɠalega ma Galilé yooi zu, é zeɠe Zudé yooi zu, é liini Yesu ʋɔ bɛ, é maanɛɛnɛ ga naa li, é ná-doun zunui ɠɛdɛ, nii é ɠɛnina zaazu.
48Yesu ɠɛni ma: «Ni wo la laavɔɔ vaiti ta maaɓɛlɛ vaiti pɛtɛni, wo la ɠidaaleʋea.» 49Masagi ná-botiɠɛ nu wolai ɠɛni ma: «Màliɠii, yei fala, dòun zunui mina ʋa zaazu.» 50Yesu ɠɛni ma: «Li, è-loun zunui ɠa vulua.» Zunui naa laani Yesu wooi la, é ɠale ma, é li.
51Tɛi é ɠɛni galema ʋelei zu, ná-botiɠɛ nuiti ti ʋaani daaɠomisu, ti ɠɛ ma: «È-loin ɠa vulua.» 52É ti ɠaazaɠani ga yeeɠɛɠala ɓɛgele ɠa é tɔɔzeini la ga tago ɗa zoloo. Ti gooɠaaʋoteni, ti ɠɛ ma: «Wogi, folo dɛkpɛgai, kɔlɔkpadimai zeɠeni ba.» 53Doun kɛɛɠɛi kwɛɛni ga naama ziɛgi zu ɠa Yesu ɠɛni la ma: «È-loun zunui ɠa vulua.» É zo názu ma, tɔ ɓɔɠɔi naa ʋɛɛ ná-pɛlɛyeɠei ʋa, ti pɛ ti ɠidaaleʋeni. 54Laavɔɔ vai velesiɛi ɠana Yesu kɛɛni Galilé, seɠeai ma Zudé.
Currently Selected:
Zan 4: GDZ
Highlight
Share
Copy
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
