Zan 21
21
Laavɔ ɠale ɓɛɛi
1Ku ɠɛɛni fele, naa ʋoluma Yesu ɓɔɠɔ lɛɛni mɔnɔ ga ná-kaladopoiti Tiɓeliyade ɗɛ wolai laaʋɛ. Wɛlɛ ʋelei é ɠɛɛni la: 2Simon Piyɛlɛ ʋe, Tomase ʋe nii é lolisu ga Yoogi, naa ʋɛɛ Nataniyɛle ʋa, nii é ɠɛni ga Kana nui Galilé yooi zu, ta Zeɓedé ná-doun zunuiti ba, ta kaladopo felegɔ ɠiligaa ti ɠɛni ada ɠila. 3Simon Piyɛlɛ ɠɛni ti ma: «Nà liizu kale ɓɛɛzuʋɛ.» Ti ɠɛni ma: «Gá ɓalaa gá ʋilɛsu è ʋolu, ade li.» Ti zɛba ti li, ti lɛɛni keingi gila su. Kɛlɛ ti kpidii pɛ kɛɛni, ti la kale ɠila kpalaa soni.
4Geelaalaosuʋɛ Yesu ɠɛni loni ziɛlaʋɛ, kɛlɛ kaladopoiti ti la ɠɛni kwɛɛni ga tɔ ʋe. 5Yesu ɠɛni ti ma: «Doungoa, daamiani ko ɠa wo ya nɛi?» Ti ɠɛni ma: «Ɓa-o.» 6É ɠɛni ti ma: «À tumɔi ʋili ga keingi yeezazu ʋelei, wa ta zɔlɔɔ.» Ti tumɔi ʋilini, kɛlɛ ti la mɔ ɠɛni zoosu ti ʋa mɛɛn, kalei mɔin ʋelei ma.
7Kaladopoi nii Yesu nɛɛni ʋɛ, naa ɠɛni ma: «Maliɠii ʋe!» Tɛi Simon Piyɛlɛ mɛnini nɔ feya ga Maliɠii ʋe, tama tɔɔzei kɔba ɲakai ɠɛni de, é ná-seɠei looni ɠɔba, gaama é ʋili kpoloɗɛi ɠa. 8Kaladopoi zɔiti ti ʋaani ga keingi, ti ɗa tumɔi mɛɛn, nii daaveni ga kaleiti, tɔɔzei ti maaɠoozani kakei ʋa nɔ ga mɛtɛlɛ ungila (100) kɛɠala.
9Ti zeeliai ma kakei ma, ti tiɠi abui ɠaani gaazogai, kalei laani ga, ta ɓului. 10Yesu ɠɛni ti ma: «À ʋa ga kalei nii wo sogai nɔ ɠani feya.»
11Simon Piyɛlɛ lɛɛni keingi zu ʋolu, é tumɔi mɛɛn, é pili zooi ma. Tumɔi laaveni ga kale ɓaaza gola ungila puulɔɔlu maazu saʋagɔ (153), tumɔi wola laaveni ɠana ga kaleiti, kɛlɛ é la ɠɛni ʋalini ga. 12Yesu ɠɛni ti ma: «À ʋa, wo daamii wo.» Kaladopoi tanɔpɛ ge la ɠɛni zooni é ʋa gaazaɠa ga: «Ɓɛ ɠa ga ɗe?» Ti ɠɛni kwɛɛni ɠɛzɛɠɛzɛ ga Maliɠii ʋe. 13Yesu maaɓuɠani, é ɓului zeɠe, é fe ti ya, ʋele nɔ ɠana ɓalaa é kɛɛni la ga kalei. 14Ná zeizu zaʋasiɛi ɠɛni ga naa Yesu ɗa ɓɔɠɔ lɛ ga ná-kaladopoiti, buzeɠea ʋoluma, é ɠula saai ya.
Yesu Piyɛlɛ ʋilɛ fai ʋolu ná-botii zu
15Tɛi ti ɓeni ga daamii wo, Yesu ɠɛni Simon Piyɛlɛ ma: «Simon, Zan ná-doun zunui, nɛ̀ɛʋɛ è ʋɛ nɛi é leʋe niiti tɔnɔi ʋa?» Piyɛlɛ gooɠaaʋoteni, é ɠɛ ma: «Ungo, Màliɠii, è kwɛni ga è nɛɛʋɛ bɛ̀,» Yesu ɠɛ ma: «Nà-baala ziʋoiti daazɔbo.»
16Yesu ɠɛni ma ʋolu, ná zeizu velesiɛi: «Simon, Zan ná-doun zunui, nɛ̀ɛʋɛ è ʋɛ nɛi?» Piyɛlɛ gooɠaaʋoteni, é ɠɛ ma: «Ungo, Màliɠii, è kwɛni ga è nɛɛʋɛ bɛ̀,» Yesu ɠɛ ma: «Nà-baalagiti makɛ.»
17É ɠɛni ma ná zeizu zaʋasiɛi: «Simon, Zan ná-doun zunui, nɛ̀ɛʋɛ è ʋɛ nɛi?» Naa Piyɛlɛ wola yiiɓɔlɔni, ga Yesu gaazaɠa fai zu ná zeizu zaʋasiɛi, é ɗa ɠɛ ma: «Nɛ̀ɛʋɛ è ʋɛ nɛi?» É gooɠaaʋoteni, é ɠɛ ma: «Màliɠii, è fai pɛ kwɛɛ, è kwɛni ga è nɛɛʋɛ bɛ̀.» Yesu ɠɛ ma: «Nà-baalagiti daazɔbo. 18Gè bo è ma ga gaamai, siɛgi zu è ɠɛni la ga buzeɠe niinɛgi, è ɠɛni zaamaɠilizu ɗa ɓɔɠɔi, è li ʋɛ ná nɛai è ʋɛ, kɛlɛ siɛgi zu è wɔlɔzaɠasu da, ɗa è-yeeiti buzeɠe, nu ɠili ge è zaamaɠili, é li ga ɗe ʋɛ è la ɠɛa pɔ ga è li ná.» 19Naama wooiti su, Yesu ɠɛni pɔ ga é dɛɛ ʋelei Piyɛlɛ ʋaazu zaazu la, é ɠɛ ga lɛbiya GALA bɛ. Siɛgi zu Yesu ɓeni la ga naama wooiti bo, é ɠɛni Piyɛlɛ ma: «Ʋilɛ pòlu.»
20Piyɛlɛ latini, é wɛlɛ ʋolu, é kaladopoi zɔi ɠa, nii é nɛɛni Yesu ʋɛ, é ɗa ʋa ga ti ʋoluʋelei. Kaladopoi naa ɠa, siɛgi zu ti ɠɛni daamii wosu da, é laani Yesu ɠekesu, é gaazaɠa, é ɠɛ ma: «Màliɠii, ɓɛ ɠa é è yaavazu?» 21Siɛgi zu Piyɛlɛ kaani la, é ɠɛni Yesu ma: «Màliɠii, lee ɠa é ʋaazu ɠɛɛzu ga nuu?»
22Yesu gooɠaaʋoteni, é ɠɛ ma: «Ni a nɛɛna bɛ̀ ga é yɛ vulua eyɛsu gè ʋa ʋolu, ɗa-vaa ɓɛgele ɠa é naa zu? Ɗɔnɔi, ʋilɛ nɔ pòlu.» 23Naama wooi vazani ɠɛɛɠɛlointi saama ga kaladopoi naa la zaazu. Tama Yesu la ɠɛni ɠɛɛni ma é la zaazu, kɛlɛ é ɠɛni ma nɔ: «Ni a nɛɛna bɛ̀ ga é yɛ vulua eyɛsu gè ʋa ʋolu, ɗa-vaa ɓɛgele ɠa é naa zu?»
24Kaladopoi naa ɠa é niima vaiti bosu, ta é ti zɛʋɛai, tama ade kwɛɛ ga nii é bosu, gaamai ʋe.
25Yesu faa mɔinmɔin kiligaa ɠɛɛni ʋolu. Ni naa ɠilagilagi pɛ ge zɛʋɛni, nà ɠisiɛzu ga ma zɛʋɛiti ti la ɠɛni vɔniga anɛɛ eteai ɠɔlɔkɔlɔmaʋɛ ná pɛ su.
Currently Selected:
Zan 21: GDZ
Highlight
Share
Copy
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
