Zan 14

Yesu ɠa é ga Pelei, ta Gaamai, naa ʋɛɛ Zɛnvui ʋa

1Yesu ɠɛni ma: «Wo-yii mina ɓɔlɔ. Wo ɠidaaleʋea GALA ma, à ɠidaaleʋe nà ɓalaa mà. 2Seizu mɔinmɔin ka Kɛ̀ɛ ná-pɛlɛi wu. Ni naa laade, nà la zoo ɠale ɠɛɛzu ma: ‹Nà liizu, gè seizu ɓɛtɛ wo ʋɛ›? 3Tama nà liina, gè seizu ɓɛtɛ wo ʋɛ, nà ʋaazu ʋolu, gè wo zeɠe, naa ɠa a kɛ, ʋɛ gè ná, wa ɓalaagi, wo ɠɛ miná. 4Ʋɛ gè liizu ná, wo naama ʋelei ɠwɛɛ.»

5Tomase ɠɛni ma: «Màliɠii, gi la kwɛɛ ʋɛ è liizu ná, gá zoo naama ʋelei ɠwɛɛsu ɠale?»

6Yesu gooɠaaʋoteni, é ɠɛ ma: «Nà ɠa gè ga pelei, ta gaamai, ta zɛnvui. Nu nɔpɛ ge la ʋa Kɛ̀ɛ ʋɔ, kɛni é leʋe ga nɔ̀un pɔ pelei. 7Ni wo ɠɛni kwɛ̀ɛ, wo ɓena Kɛ̀ɛ ɓalaagi ɠwɛɛ. Tama vɔlɔ wo kwɛni niina, wo kaa ɓalaa.»

8Filipe ɠɛni ma: «Màliɠii, Ɠɛɛɠɛ lɛ ga giye, naa ɠa gi yiilɛi.» 9Yesu gooɠaaʋoteni, é ɠɛ ma: «Ada ʋolu kaite, Filipe, ná pɛ su, è la nɔ̀un kwɛɛ? Zɔi nɔpɛ é kàa, naama nui Kɛ̀ɛ ɓalaa kaa. Toɠa ɠale mu è ɠɛɛzu ma: ‹Ɠɛɛɠɛ lɛ ga giye›? 10È la laani da ɓaa ga gìliʋɛ Kɛ̀ɛ ʋa, Kɛ̀ɛ ɓalaagi ɠiliʋɛ nɔ̀un ba? Wooi niiti gè ti wosu wo ma, nà ɓɔɠɔ lɛi gè ʋa ɠɛ nɔ ti ɠulazu yiima, kɛlɛ Kɛ̀ɛ nii é zeini zìimaʋɛ, naa ɠa é ná-botiiti kɛɛzu ɠana. 11À la dà ga, gìliʋɛ Kɛ̀ɛ ʋa, Kɛ̀ɛ ɓalaagi ɠiliʋɛ nɔ̀un ba. Ni naa laade, à ɠidaaleʋe tɔun ɓalaa niima ɠɛɛwotii maaʋele zu.

12«Gè bo wo ma ga gaamai, zɔi nɔpɛ é laazu dà, naama nui ɓalaa ka niima ɠɛɛwotiiti kɛ, niiti gè ti ɠɛɛzu. Toɠa taɠiligaa ɠɛ vɔlɔ, niiti ti ɓaɠoai niiti ba gè ti ɠɛai, tɔɔzei nà ga li Kɛ̀ɛ ʋɔ bɛ. 13Tama nii nɔpɛ wa falina ga dàaseigi, nà naa ɠɛ, naa ɠa a kɛ Ɠɛɛɠɛ ná-lɛbiyai ɠula kɛlɛma ga ná-Doun Zunui maaʋele. 14Ni wa ani nɔpɛ falina ga dàaseigi, nà naa ɠɛ.»

Zɛnvu Ɲadegai ma minazeɠegi

15«Ni nɛ̀ɛʋɛ wo ʋɛ, wa nà-deveiti so. 16Nɔ̀un, nà Kɛ̀ɛ maanɛɛnɛ, é Kpɔba Nu ɠili teʋe wo ma, nii a yɛ wo ʋa eyɛsu ɠɔ. 17Gaama Yɛnvui ʋe de, nii eteai la zooga sɔlɔɔsu, mazɔlɔɔ é la zooga kaazu, ɓaa é ʋa kwɛɛ. Kɛlɛ wɔun, wo kwɛni, tɔɔzei toɠa wo ʋa, é ɠɛ zeini wo-yiimaʋɛ. 18Gè la wa ɠila wo yɛsu eɠɛ podoun, kɛlɛ nà ʋaazu ʋolu wo ʋɔ. 19É yɛga ga yeeɠɛɠala go nɔ, eteai la mɔ kàa, kɛlɛ wɔun, wa kà. Tɛi zɛnvui zèa, wa ɓalaagi zɛnvui ɠa ɠɛ wo ya. 20Naama yeei, wa gaaɠa ga gìliʋɛ Kɛ̀ɛ ʋa, wa ɓalaa wa ɠili bà, gè ɠili wo ʋa. 21Zɔi é nɛ̀ai ʋɛ, naa ɠa ga nui nii é nà-deveiti sosu, é ɗa ti ɠɛ. Zɔi é nɛ̀ɛzu ʋɛ, Kɛ̀ɛ ɠa naama nui nɛɛ ʋɛ, nà ɓalaa, nà nɛɛ ʋɛ, gè ɓɔɠɔ lɛɛ la.»

22Zude gaazaɠani (kɛlɛ Zudase Isekaliyɔte laade), é ɠɛ ma: «Màliɠii, lee vaa zu gá nɔ ɠa è pɔ è ɓɔɠɔ lɛ ga giye, kɛlɛ è la ɓɔɠɔ lɛɛzu ga eteai?» 23Yesu gooɠaaʋoteni, é ɠɛ ma: «Nui nɔpɛgi é nɛ̀ɛzu ʋɛ, naama nui ɠa gòoiti so, Kɛ̀ɛ ɠa tɔ ɓalaa nɛɛ ʋɛ, gá ʋa pɔ bɛ, gi zei ná. 24Kɛlɛ zɔi gè la nɛɛni bɛ, naama nui la gòo zo ga é ʋa ɗa kɛ. Tama wooi nii wo mɛnisu, naa la ɠulani nà ɓɔɠɔgo dà, kɛlɛ Kɛ̀ɛ nii é tèʋegai, naa ɓɔɠɔi ɠa daawoo ʋe.

25«Gè niima vaiti bogɛ wo ma siɛgi zu gè wo ʋa la dɛ. 26Kɛlɛ Kpɔba Nui nii é ga Zɛnvu Ɲadegai, nii Kɛ̀ɛ ʋaazu teʋesu wo ma dàaseigi zu, naa ɠa wo ɠala ga fai pɛ, ta é wo ɠitoo naa pɛ su, nii gè bogai wo ma.

27«Nà ziilɛigi yɛsu wo ya, nà nà-ziilɛigi veezu wo ʋɛ. Gè la feezu ga ʋelei eteai ɠa ɗa fee la. Naa ɠa é ba, wo-yii mina ɓɔlɔ, dualua ge mina ɠɛ wo-yiimaʋɛ. 28Wo gòomɛnigɛ, gè ɗa ɠɛ wo ma: ‹Nà ga li, kɛlɛ nà ʋaazu ʋolu wo ʋɔ.› Ni wo nɛ̀ɛni ʋɛ, wo ɓena ɠoozunɛ ga nà ga li Kɛ̀ɛ ʋɔ bɛ, tɔɔzei Kɛ̀ɛ wɔɔlɔʋɛ nɔ̀un ba. 29Gè wo loa ɠisu niina, aisa niima vaiti ti ʋa ɠɛ, naa ɠa a kɛ siɛgi zu ma vaiti ti ɠɛɛzu la, wo la da. 30Gè la mɔ woo mɔinmɔin kili nɔpɛ bosu wo ma, tɔɔzei zɔi é zeini eteai nii unda, naa ɠana ʋa. Naa la bosu ga ná-zobo ka mà, 31kɛlɛ, kɛni eteai nii zu nuiti ti kwɛɛ ga Kɛ̀ɛ nɛɛʋɛ bɛ̀, ta nɔ̀un nà faiti pɛ kɛɛzu é zoloo naa ma, nii é ma levei veai zèa.

«À wuzeɠe, ade zeɠe ʋɛ.»

Currently Selected:

Zan 14: GDZ

Highlight

Copy

Want to have your highlights saved across all your devices? Sign up or sign in

This work is licensed under the Creative Commons Attribution-NonCommercial-NoDerivatives 4.0 International.

https://creativecommons.org/licenses/by-nc-nd/4.0/

Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.

Learn More About GALA Daawoo Zɛʋɛi