Zenɛze 14
14
Abalame Lote unmɔɔ fai
1Naama ziɛgi zu, Sineyaal masagi Amalafɛle, ta Elazaal masagi Aliyɔke, ta Elame masagi Kedɔɔl-Lawomɛɛl, ta Gɔyime masagi Tideyale, 2yeeta naati ti kɔɔi ʋɛɛni Sɔdɔme masagi Ɓela ʋa ta Gomɔɔl masagi Ɓiilisa, ta Adema masagi Sineyaɓe, ta Seɓoyime masagi Semeyebɛɛl, ta Ɓela masagi (taai naa laa ɠa ga ɓalaa Sowaal). 3Naati kpein ti ɠaalɛɛni ba Sidime nɛmɛ wolai zu, nii maaɓɔlegai za ga Kpoloɗɛ Wanai. 4Kona puugɔ maazu felegɔ (12) laawu, ti ɠoloa ɠɛni de Kedɔɔl-Lawomɛɛl ʋɛ, kɛlɛ kona puugɔ maazu zaʋasiɛi (13) ma, ti ɓakani.
5Kona puugɔ maazu naanisiɛi (14) ma, Kedɔɔl-Lawomɛɛl ta masagiti ti ɠɛni polu, ti ʋaani, ti zobo sɔlɔɔ Lefa mavofodaiti ma Asatelɔte-Kaalenayime, ta Zuze mavofodaiti ti Ɠame, ta Eme mavofodaiti ti Savé-Kiliyatayime, 6ta Woli nuiti ti ta-ɠizeiti su Seyiil, eyɛsu é zeeli Palan sɛne guluiti pɔ bɛ, nii é teʋebai ɠobaʋɛ. 7Naa ʋolu, ti ɠaleni ma, ti li En-Misepate, nii é ga Kadɛse, ti zobo sɔlɔɔni Amalɛke nuiti ma, ta-yooi ná pɛ su, é ʋɛɛ Amool nuiti ba, ti ɠɛni zeini Ɠasason-Tamaal.
8Názuʋɛ ɠa Sɔdɔme masagi, ta Gomɔɔl masagi, ta Adema masagi, ta Seɓoyime masagi, ta Ɓela masagi nii é ga Sowaal, naati ti kɔɔi ɠɛʋele ɓɛtɛni la ti laalɔɠɔma Sidime nɛmɛ wolai zu. 9Elame masagi Kedɔɔl-Lawomɛɛl, ta Gɔyime masagi Tideyale, ta Sineyaal masagi Amalafɛle, ta Elazaal masagi Aliyɔke, ti ɠɛni ga masa naanigɔ, dɔɔlugɔi laalɔɠɔma. 10Mana zeɠei wola mɔinni Sidime nɛmɛi zu, Sɔdɔme masagi ta Gomɔɔl ʋele geleiti ti ɠɛni ʋelazu, ti ɗa li, ti ɗa loo zeɠei naati su. Mɔtaiti ti ʋelani, ti li gizei ma. 11Niiti ti zobogi zɔlɔɔni, naati ka ti Sɔdɔme ta Gomɔɔl naavoloiti kpein seɠeni, ta daamiani makɛgaiti, naa ʋolu ti li. 12Ti Abalame deɠe loin Lote ta kɔligiti soni, ti li ga tiye, mazɔlɔɔ Lote ɠɛni zeini Sɔdɔme.
13Pela nu ɠila ge ʋaani, é daazeeli Eɓulu nui Abalame ma, nii é ɠɛni zeini Amool nui Mamelé ná-sɛne guluiti saama. Mamelé ɠɛni ga Esekɔleni ta Anɛɛl ti-ɠɛɛloin, niiti ti minazeɠeni Abalame ʋɛ. 14Abalame mɛnigai ma ga deɠe loin zogɛ, é ná-botiɠɛ nu unsaʋagɔ nu puugɔ maazu lɔsaʋa (318) maaɠilini, niiti ti zuzeeliai kɔɔɠɔ vai ma, ti zɔlɔɔgai ná-pɛlɛi wu, naati ti ʋilɛni masagiti polu, eyɛsu ti zeeli Dan. 15É ná-botiɠɛ nuiti balini su, é sili nuiti so kpidii. É zobo sɔlɔɔni ti ma, é yɛ ti ʋolu, ti zeeli Woɓa, nii é Damase ɠɔʋɛzu ʋelei. 16É ɠaleni ma ga kɔɔzoganiiti kpein. É ɠaleni ma ɓalaa ga deɠe loin Lote, ta zeaɠɔligiti, ta anzanuiti ɓalaa, ta kɔɔ luɔiti.
17Naa ʋoluma, Abalame ɠaleni ma, é zobogi zɔlɔɔgai ma Kedɔɔl-Lawomɛɛl ma, ta masagiti ti ɠɛni polu. Sɔdɔme masagi ɠulani, é daaɠomi Savé nɛmɛi zu, nii é ga Masa Nɛmɛi.
18Mɛlekizedɛke, Salɛme masagi ʋaani ga ɓului ta dɔɔi. É ɠɛni ga GALA nii é Anii-Pɛ-Unda, naa ná-zalaɠa ɠula nui. 19É tuya looni Abalame ʋɛ, é ɠɛ ma: «GALA ge tuya loo Abalame ʋɛ, GALAGI nii é Anii-Pɛ-Unda, é geeɠɔlɔgi ta zooi ɓɛtɛai! 20Mamagi ɠa GALA bɛ, nii é Anii-Pɛ-Unda, nii é vaa bu, è zobogi zɔlɔɔ è zili nuiti ma!» Abalame kɔɔzoganiiti pɛ ma ʋuusiɛi veeni zea.
21Sɔdɔme masagi ɠɛni Abalame ma: «Nuiti fe zèa, è naavoloiti ta sɔɔlaiti seɠe ʋɛ.»
22Abalame ɠɛni Sɔdɔme masagi ma: «Gè ɠonaa Ɠɔoɠɔ GALAGI ma, nii é Anii-Pɛ-Unda, é geeɠɔlɔgi ta zooi ɓɛtɛai, 23nii dɔin é ga ɗɔnɔi, gè la ani nɔpɛ seɠea naa ʋa, anɛɛ geze ɠaali ɠilagi ɓaa saʋala galu ɠilagi, naa ɠa a kɛ è mina ɠɛ ma: ‹Gè Abalame ɠɛɛʋɛ ga kpɛtɛ nu.› 24Gè la ani nɔpɛ makɛsu nà ɓɔɠɔi bɛ̀, kɛni niigi zunu loungoiti ti miai, ta zunui naati tɔnɔi, niiti gi ɠɛa siɛi zu, Anɛɛl ta Esekɔle ta Mamelé, naati ta tɔnɔ zeɠe.»
Currently Selected:
Zenɛze 14: GDZ
Highlight
Share
Copy
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
