Kɛɛwotiiti 6
6
Zeelobai wo fai ga Egilisi wotiɠɛ nu lɔfela
1Naama ziɛgi zu, tɛi kaladopoiti ti ɠɛni mɔinzu gola, ti zaama Zuifui niiti ti Gɛlɛke wooi wosu, naati ti ɠɛni unsuyelii losu ga Eɓulu nuiti, mazɔlɔɔ folo ɠilagila kɔnɔgi ɠaaɠwɛ ziɛgi zu, ti la ɠɛni ta-ʋoanzaiti daazɔbosu ga pagɔ. 2Keela puugɔ maazu felegɔiti (12) ti kaladopoiti pɛ gaalɛɛni ba, ti ɠɛ ti ma: «É la zolooni ga gi GALA daawooi laazeeli vai yɛ ná, ɠɔnɔ gaaɠwɛɛ vai zu. 3Naa ɠa é ba, kɛ̀ɛleaiti, à yeelo nu lɔfela ʋa wo zaama, niiti lɔɠɔ ʋagɔ ti ʋa, ti laavegai ga Zɛnvu Ɲadegai ta ɠimalai, gi naama wotii ve ti ya. 4Gɔun, gá ɠaaɓaazu GALA falii ta GALA daawooi ma wotii ma.» 5Naama wooi laani bɛbɛi yii ɠa ga pagɔ. Ti yeeloni Etiyɛni ʋa, zunui nii daaveni ga kidaaleʋei ta Zɛnvu Ɲadegai, naa ʋoluma Filipe ta Polokɔɔl, Nikanɔɔl ta Timɔn, Paalemenase ta Antiyɔse nui Nikola, nii é lɔɔni mɔungi Zuifuiti ta-ƓALA pelei ma. 6Ti ti lɛɛni ga keelaiti, naati kpegai ma ga GALA falii ɠɛ, ti yeelaani ti ma.
7GALA daawooi zu ɠɛni wɔɔlɔzu, kaladopoiti ti ɗa mɔin Zeluzalɛme, zalaɠa ɠula nui ma mɔinmɔin ge ɠɛni ɠidaaleʋezu ɓalaa.
Yesu Kilista ná-zeelei Etiyɛni zɔɔ vai
8Etiyɛni nii GALA ná-zaalai ta ná-zɛbɛi ɠɛni ba ga gola, é ɠɛni maaɓɛlɛ vaiti ta laavɔɔ vaiti kɛɛzu nuɓusɛiti saama. 9Kɛlɛ nui tanigaa ti wuzeɠeni daalɔɠɔma, tanigaa ti zeɠeni GALA dɛbi ʋɛlɛi wu, nii daaseigi ga «Duɔi niiti ti unmɔɔgai», naa tanigaa ti ɠɛni ga Silɛne Zuifuiti ta Alɛgezandili ʋeaiti, naa ʋɛɛ Silisi ta Azi Zuifuiti ba. Ti Etiyɛni maaɠaalini, 10kɛlɛ ti la ɠɛni ziɛzu bu, tɔɔzei é ɠɛni ɓɔɛzu ga ɠigi, nii Zɛnvu Ɲadegai ɠɛni feezu zea. 11Ti veleni nuiti su, ti ɗa ɠɛ ma: «Gi goomɛnigɛ, é ɗa woo ɲɔi wo Moize ta GALA daalɔɠɔma.» 12Ʋele ɠana ti wutugi leʋeni la nuɓusɛiti saama, ta totuɠɔiti, naa ʋɛɛ tɔ kalamɔinti ba, naa ʋoluma ti liini, ti so ga maaɓaai, ti ʋaa la tukpɔɠaaleʋe nu wolaiti pɔ. 13Ti zɛɛ zeeleiti kulani, ti ɗa ɠɛ ma: «Zunui nii ɠa woo ɲɔi wosu nɔ ɠɔ ada ɲadegai ta tɔgi laalɔɠɔma. 14Mazɔlɔɔ gi goomɛnigɛ, é ɗa ɠɛ ma, Nazalɛte nui Yesu ɠa adɛ ʋɛ ɠoloɠolosu, ta é faa wɔlɔmaiti maavalibo, niiti Moize ti lɛai ga adeye.» 15Zɔiti kpein ti ɠɛni zeini tukpɔɠaaleʋezuʋɛ, ti ɠaazuloga ɠɛni de Etiyɛni ʋa, ti pɛtɛni ga gaazuʋɛ ɠɛɛʋɛ eɠɛ geezuɠeelai.
Currently Selected:
Kɛɛwotiiti 6: GDZ
Highlight
Share
Copy
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
