Jean 5

Jésus kpasasa ma wan-zɛlɛ mɛla

1Hapata mɔ ndɔng, ma yenga pɛ hio *zuife dungɔ ha Jérusalem, nɛ Jésus nɛa ha yo. 2Ha gasa ngeng ka zikiri Jérusalem ma nua ang, linga nde, nu ngalɔ sami. Ma bebe tɔ dungɔ haki ka ɛ sa nɛ nu *Hebro nde, Betzata. Hio gala mɔrkɔ dungɔ hapɛtɛa. 3,4Hio gili wan-zɛlɛ dungɔ ha ɔanu ha si gala ndɔng. Hio ma dungɔ nê wan-gdɔka li, hio ma nê kumɔ wi, nɛ hio ma nê wan-zɛlɛ mɛla. [Mbwa dungɔ ha kera ngimɔ ka *telenge pɛ Sɔ bezil ha ngɔn tɛ tɛ tongbisi li. Bosi wan-zɛlɛ ka bele ha li ka telenge ɛngɛ fesa, zɛlɛ pɛa bekari ngase ka yo badung mɛng.] 5Ma wi ang haki ka dung nɛ zɛlɛ tɛ bo bɛlɛ bhukɔa tar zanga mɔrkɔ gbala tar. 6Ka Jésus hɔa haki, a kpaa wei ɛngɛ ha ɔanu. A ingɔ nde, pata zɛlɛ pɛ wi kɛ yɛa. Mɛgi, Jésus ana wɛnɛ: «Mɛ ngoya nde, zɛlɛ pɛ mɛ akari nde?» 7Wan-zɛlɛ kiforo wen ha wɛnɛ: «Wan-osimɔ, ha ngimɔ ka telenge ha tongbasa li, mi tɛ kpa ma wi ka beba mi pi ha lia nɛhasa na. Ha ngimɔ ka mi ha kio wal mɛ nɛ, ma wi gɔna li mi nɛ le ha li sɔngsi mi.»

8Nɛ Jésus tɔa ha wɛnɛ: «Gutɛ, ba dele pɛ mɛ, mɛ nɛ nɔ!» 9Ha ndangtɛ ngimɔ, wei kɛ guotɛ, ba dele pɛa, nɛ a nɛa nɔ. Mɔ ɛngɛ hɔa ha *swe ɔmtɛ. 10Mɛgi, ka hio zuife zɔka wei kɛ ka zɛlɛ pɛa kara ha nɛa nɔ, mbwa tɔa ha wɛnɛ: «Mɛsɛ nê swe ɔmtɛ. *Mbonga pɛ ɔ tɔ nde, wi atoy dele na.» 11Wei kɛ tɔa ha mbwa: «*Wan-kpasisi mi ha tɔ ha mi nde, mɛ aba dele pɛ mɛ, mɛ nɛ nɔ.» 12Mbwa ana wɛnɛ: «O ha tɔ nde, mɛ de mɛgi o?» 13Ma, wei kɛ tɛ ing ling wi ka kpasasa wɛnɛ na, hazu Jésus lea nɛhasa ha soko giliwi ka dung haki.

14Hapata, Jésus kpaa wei kɛ ha zang *gasa twa Sɔ. Nɛ a tɔa ha wɛnɛ: «Mɛ kpasa kari. Ka mɛ ade fin gdangamɔ na, yu nde, ma ngamɔ betɛ kpa mɛ pen mɔ sɔngsi.» 15Mɛgi, wei kɛ pena nɛ tɔ ha hio wan-le zuife nde, yo nê Jésus ka kpasasa wɛnɛ. 16Tuka ɛngi, hio zuife angara namala Jésus, hazu a kpasasa wan-zɛlɛ ha swe ɔmtɛ. 17Ma, Jésus tɔa ha mbwa: «Bafa mi ha dea tom ngimɔ fɛt. Mɛgi, mi fin, mi ha dea tom.» 18Yo nê ɛngi ka hio zuife kio wal mɛ gbɛ wɛnɛ nɛngaya pen mɔ sɔngsi. Yo bo sɔna hazu a tukolo mbonga swe ɔmtɛ na, ma, hazu a tɔa fin nde, Sɔ nê Bafa wa. Ɛngɛ osi nde, a dea tɛ wa tuka Sɔ.

Sɔ haa ziomɔ ha Bewei pɛa

19Jésus tɔa ha hio wan-le *zuife: «Kpasawen, mi tɔ ha ɛnɛ nde, mi, Bewei, lɛm de mɔ ndang nɛ zu mi na. Mi de sɔna nɛ mɔ ka mi zɔka Bafa mi ha dea. Mɔ fɛt ka Bafa mi ha dea, mi ha dea yo gbesi. 20Hazu Bafa mi ngoya mi, Bewei pɛa, nɛ a osa ha mi mɔ ka wɛnɛ ha dea. Nɛ a beosi ha mi hio gasa tom fin pen mɔ ndɔng tuka nde, ɛnɛ ayaksi. 21Gbesi tuka Bafa mi gu hio fiowi nɛ gde mbwa nɛ tunɔ, mi Bewei pɛa, mi ha tunɔ ha hio wi tuka sila mi ngoya. 22Hazu Bafa mi gɔn kita ha zu ma wi na. Ma, a gdea ziomɔ mɛ gɔn kita fɛt ha kɔ mi, Bewei pɛa. 23A dea mɛgi tuka nde, hio wi fɛt alukisi mi gbesi tuka mbwa lukisi nɛ Bafa mi. Wi ka lukisi mi na, a lukisi Bafa mi ka tomsa mi na.

24«Kpasawen, mi tɔ ha ɛnɛ nde, wi ka ze wen pɔm nɛ ka mɛkiri Sɔ ka tomsa mi, a bedung nɛ *tunɔ kpoo. Sɔ lɛm gɔn kita ba wɛnɛ fin na. Mɛgi, wia laka fio gde kari, nɛ a tɛ bo nɛ tunɔ. 25Mi tɔ fin kpasawen ha ɛnɛ nde, ngimɔ ha tɛa, yo hɔa sising, ka hio fiowi beze gɛl mi, *Bewei pɛ Sɔ, nɛ ɛ ndɔng ka zea yo betun. 26Hazu, gbesi tuka Bafa mi nɛ ziomɔ mɛ ha tunɔ ha hio wi, a haa mi fin ziomɔ mɛ ha tunɔ ha hio wi. 27Nɛ a haa mi fin ziomɔ mɛ gɔn kita ha zu hio wi, hazu mi nê *Bewei pɛ Wi. 28Ka mɔ ndɔng ayaksi ɛnɛ na, hazu ma ngimɔ behɔ ka ɛ ndɔng ka dung ha zang kɔfio beze gɛl mi, 29nɛ mbwa fɛt begutɛ ha kɔfio gbo. Ɛ ndɔng ka bade dedemɔ, mbwa begutɛ nde, mi aha mbwa tunɔ kpoo. Ma, ɛ ndɔng ka bade gdangamɔ, mbwa begutɛ nde, mi agɔn kita ba mbwa.»

Hio mɔ ka gbasi ziomɔ pɛ Jésus

30«Mi lɛm de mɔ ndang nɛ zu mi na. Mi gɔn kita ha zu wi lɛm nɛ mɔ ka Sɔ osa ha mi. Mɛgi, kita ka mi gɔn nɛ nzeng, hazu mi de nɛ mɔ ka sila mi ngoya na. Ma, mi de nɛ mɔ ka sila Sɔ, wan-tomsi mi, ngoya. 31Ka bo nê mi gbatɛ ha kɛ wen tɛ mi nɛ pɔm tɛ, yo bo nê tɛwen na. 32Ma, ma wi ang ka kɛ wen pɔm. Nɛ mi ingɔ nde, wen tɛ mi ka wɛnɛ kɛ, nê tɛwen. 33Ɛnɛ batomsi hio ma wi ha pɛ *Jean wan-gdumsiwi, nɛ kɛa wen pɛa nɛ tɛwen. 34Mi tɛ ngoy nde, ma wi akɛ wen hazu mi na. Ma, mi osi kɛa wen pɛ Jean ha ɛnɛ nde, Sɔ akpasisi ɛnɛ. 35Jean badung tuka lamba ka wea baa, nɛ ɛnɛ dea totɛ ha yoloa ngimɔ tikiring. 36Ma, pɔm, mi nɛ ma kɛa wen ka pena pɛ Jean. Yo nê hio tom pɔm, ka Bafa mi haa ha mi. Nɛ hio mɔ ndɔng ka mi de, kɛ wen hazu mi nde, yo nê Bafa mi ka tomsa mi. 37Bafa mi ka tomsa mi, ha kɛa wen pɔm fin. Ma, ɛnɛ tɛ ze gɛl wa na, nɛ ɛnɛ tɛ zɔk li wa ndang na. 38Ɛnɛ pam wen pɛa ha sila ɛnɛ na, hazu ɛnɛ tɛ mɛkiri mi, ka wɛnɛ tomsa ha nu na. 39Ɛnɛ yambi takarata pɛ Sɔ hazu ɛnɛ takiri nde, ɛnɛ ha kpaa *tunɔ kpoo ha zanga. Ma, bo nê takarata pɛ Sɔ ha kɛ wen tɛ mi, na nde? 40Ma, ɛnɛ ngoy tɛa ha pɔm hazu kpa tunɔ kpoo na.

41«Mi ki lukosomɔ pɛ hio wi na, 42hazu mi ingɔ ɛnɛ nɛdedea nde, sila ɛnɛ ngoy Sɔ na. 43Yo nê Bafa mi ka tomsa mi ha nzan. Nɛ ɛnɛ tɛ ba mi nɛ dede kɔ na. Ma, ka ma wi tɛ nɛ wal ngatɛ pɛa nɛ pɛa tɛ, ɛnɛ beba wɛnɛ nɛ dede kɔ. 44Ɛnɛ ngoya kpaa lukosomɔ pɛ may. Ma, ɛnɛ ki lukosomɔ ka tɛ nɛ ndanga Sɔ na. Ka mɔ dung mɛgi, ki ɛnɛ betɛ mɛkiri mi mɛng? 45Ka ɛnɛ atakiri nde, yo nê mi ka befundi ɛnɛ ha li Bafa mi, na. Wi ka befundi ɛnɛ, yo nê Moïse ka ɛnɛ gde tazu ha tɛ wa. 46Ɛnɛ amɛkiri se Moïse nɛkpasa, ki ɛnɛ mɛkara mi, hazu wɛnɛ ngɛraka nɛ wen tɛ mi. 47Ma, ka ɛnɛ tɛ mɛkiri ngɛrakamɔ pɛa na, ki ɛnɛ bemɛkiri wen pɔm mɛng?»

Currently Selected:

Jean 5: NTGBY

Highlight

Copy