San Marcos 1

Juan benne rugadi indaha rekie rigixxi'e ge Jesús‑ni

(Mt. 3:1-12; Lc. 3:1-9, 15-17; Jn. 1:19-28)

1Nii ridulo ka tisa ka nu rigixxi'akana ge Jesucristu benne anka Xi'in Tata Do Yebáha. 2Ukaba atti tteba ra lo yetsi ben profeta Isaías‑ni. Lo yetsiha rinne Tata Do Yebáha rulise Jesús‑ni, ree:

Neti idhelhaa ttu benne tsie nnerue lolu kini kixxi'e ka tisa kia‑ni.

Benneha idhalie neda gelu.

3Lo yu bisi ata lanú benne se'e, niha riyien tsi'i benneha rinnebie idisa, ree:

“Gwalegixxa tse neda ge benne anke Xxanari'iha.

Gwalolixxa neda kini dhabie.”

4Aníha‑ba ben Juan benne rugadi indaha tti ugwekie lo yu bisiha, rigixxi'anie ka benne kini odúna ke nna odaxxuke neda ge Tata Do Yebáha, nianna gadike inda kini anáchu nna ixú elha xen lasi ge ka tulha ruinkeha.

5Iyába ka benne se'e lhe'esi Jerusalén‑ni lhe ka benne se'e itúba daka Judea‑ni lhe, risinke ata reki Juan‑ni, rigixxi'ake ge ka tulha ruinke nna rugadie ke inda lhe'e yoo Jordán‑ni.

6Juan‑ni itsa xo camellu‑ba uka xoe nna udhí lhe'ebie ttu yieti. Nu xixxi ge betsirúba lhe kutsittaba lhe utobie ugwekie 7nna rigixxi'anie ka benne, ree ke:

―Iki de neti nna si dala attu benne ra tsitsiru lebie attichula neti. Neti labí elha ralhaa iyettaa idhasia lo ka gwaracha geeha. 8Gwalí galá neti tti rugadia le inda, suna indaba rixúti, ttaka benneha nna ugadie le Espíritu ge Tata Do Yebáha.

Jesús‑ni radie inda

(Mt. 3:13-17; Lc. 3:21-22)

9Lhe'e ka sáha‑gaba udá Jesús‑ni lhe'esi Nazaret, re nuha daka Galilea. Nianna bisine nna begadi Juan‑nie inda lhe'e yoo Jordán‑ni. 10Tti lo reria Jesús‑ni lhe'e indaha, nianna bilánie biyali yebáha nna Espíritu ge Tata Do Yebáha attiba ttu becha ugwadie betedhoe ikie. 11Nianna tti biyien tsi'i ttu benne unnebie yebáha, ree bie:

―Lu ankalu Xi'inia rakati gelu; lu ankalu benne ru'u lasia.

Nu xxegwiha benna dhi yiena Jesús‑ni

(Mt. 4:1-11; Lc. 4:1-13)

12Nianna che tteba Espíritu ge Tata Do Yebáha Jesús‑ni daka lo yu bisiha, ata lanú benne se'e. 13Niha ugwekie chua (40) ubisa ata reki ka nimala ixxi. Niha‑gaba ben nu xxegwiha dhi yiene nna ka anjeliha‑ba bete náke lenbie.

Jesús‑ni uduloe rigixxi'abie ka tisa ge Tata Do Yebáha

(Mt. 4:12-17; Lc. 4:14-15)

14Iki de chi utixxakana Juan‑ni lisiyya, Jesús‑ni nna deyye daka Galilea rigixxi'anie ka benne ka tisa tse, delába rigixxi'e gasina ki akake benne innabia Tata Do Yebáha ke. 15Nianna ree ka benneha:

―Chiba gwa dona sá ga'anani Tata Do Yebáha lhe chigaba dabigana innabie. De nuha nna gwalodúna le nna gwaltsia lele ge ka tisa geeha.

Jesús‑ni raxie ttapa ka benne kini udhetinie ke

(Mt. 4:18-22; Lc. 5:1-11)

16Tti ute Jesús‑ni ro'o indatoo ge Galilea‑ni, niha bilánie Simón‑ni lenna betsini Andrés‑ni yu'ukana rudelhakana yexxa ge ka belhaha lhe'e indaha, kumu ankakana benne rudaxxu belha. 17Jesús‑ni nna ree kana:

―Gwaltá gwetenalha neti. Neti nna unia kini akale ka nu gaxile ka benne ki udaxxuke neda ge Tata Do Yebáha.

18Looraha tteba nna bese'e bixxibakana ka yexxa gekaniha nna diakana danalhakane.

19A lattiruba bededábie nna bedelánie Jacobo‑ni lenna betsini Juan‑ni. Ka nuha ankakana xi'in Zebedeo. Se'ekana lhe'e barcu gekaniha reyoinkana ka yexxa ka nu rudaxxu lenkana belhaha. 20Nianna uxi ttebe kana. Lakana nna bedhá bixxiba ikikani tata gekaniha lo barcuha lenie ka nu ren sina gekaniha, nianna dia ttebakana danalhakana Jesús‑ni.

Jesús‑ni bebeabie ttu espíritu satsa yu'u lati ttu nubiyú

(Lc. 4:31-37)

21Tti bisin Jesús‑ni lenie ka benne rudhetinieha lhe'esi Capernaum‑ni, la sá tti reyaka le ka benne Israel‑ni, uta'a ttebe lhe'e yo'o ata rudhetike ka tisa ge Tata Do Yebáha nna uduloe rule'enie ka benne se'e niha. 22Ka benneha nna rebanabakanie ge nu rule'enie keha kumu rinnebie ttiba rinne ttu uxtisi rapa lo neda, labí tti rinne ka nu rule'ekinna ka benne nu ra lo bia bennabi bodha'an Moisés‑ni. 23Lhe'e yo'o ata rudhetike ka tisaha, niha re ttu nubiyú yu'u latini ttu espíritu satsa. 24Nubiyúha nna unnena idisa, rana:

―¡Begwelha ri'itu! ¡Bittu etega'a gelu len ri'itu, lu Jesús ge Nazaret! ¿Si dalu gwetse'e loo ri'itu? Neti gwankabiabati lu. ¡Lu ankalu benne chi ulesi Tata Do Yebáha!

25Jesús‑ni nna bedhaka dise espíritu satsaha, ree nuha:

―¡Bedhea ro'olu nna beria lati nubiyú‑ni!

26Espíritu satsaha nna bekubi xxattana nubiyúha nna ribesi'a layabana beriana latini. 27Iyába ka benne se'e niha bebanabakanie nna rinnaba tisa luesike, ráke:

―¿Bíunni raka? ¡Nubiyú du‑ni rula'ana attu tisa kubi! ¡Xxeniba ra leni nna axtaba ka espíritu satsa‑na rudokana tisa ge nu rana!

28Nianna ttu nnelaba ugwadhi tisa ge Jesús‑ni nna ka benne se'e itúba daka Galilea‑ni rinneke ge nu runieha.

Jesús‑ni beyonie ixe ka benne rani

(Mt. 8:14-17; Lc. 4:38-41)

29Atti beriake lhe'e yo'o ata rudheti ka benne Israel‑ni ka tisa ge Tata Do Yebáha, Jesús‑ni lenie Jacobo‑ni lhe Juan‑ni lhe dia ttebake lisi Simón‑ni lhe Andrés‑ni lhe. 30Nan ge nuila ge Simón‑ni teba benneha yu'u xxatte xilhaa. Nianna utixxi'akinna Jesús‑ni ge benneha. 31Jesús‑ni nna ubiga ttebe bedaxxue ná benneha nna ulhidhe bie. Looraha tteba nna beria xilháha lati benneha nna udulo ttebe benie nu utoke.

32Atti chi ugwadi tatubisa‑na lo'eyya‑na, tti chi daa ratti loha, la'ania nna iyába ka benne yu'u isagwe latike lhe ka benne yu'u latike espíritu xxegwi uchekana ke ata du Jesús‑ni. 33Nianna itúba yiesiha bitupa ro'o yo'o ata dueha. 34Jesús‑ni nna beyonie ixeba ka benne rani yu'u latike iyá looba isagwe lhe bebeabie ixeba ka espíritu xxegwi yu'u lati ka benne lhe. Labí begwelhe inne ka espírituha kumu yúbakana nú anke.

Jesús‑ni rigixxi'abie ka tisa ge Tata Do Yebáha daka Galilea

(Lc. 4:42-44)

35Dila tteba ugwadha Jesús‑ni. Sa rula'aruba chulhaha birie die ro'esiha nna bisine ttu latti ata lanú benne se'e. Niha ulhapie tisa len Tata Do Yebáha. 36Simón‑ni lhe ka benne se'e lennaha, diake satilake bie. 37Tti gwaxxakake benneha nna ráke bie:

―Iyába ka benne chi rekike ugila lu.

38Lee nna ree ke:

―Tsiari'i lhe'e adí ka yiesi se'e gaxxaba nii kini lhe'e ka nuná kixxi'agabaa ka tisa ge Tata Do Yebáha, kumu de nuha‑la daya.

39Itúba Galilea‑ni reki Jesús‑ni rigixxi'e ka tisa ge Tata Do Yebáha lhe'e ka yo'o ata rudheti ka benne se'e niha ka tisa geeha lhe anágaba nna rebeagabe ka espíritu xxegwi yu'u lati ka benneha lhe.

Jesús‑ni beyonie ttu benne raka latie yiesu nu tee láni lepra

(Mt. 8:1-4; Lc. 5:12-16)

40Ttu benne biyú raka latie yiesu nu tee láni lepra, bisine ata du Jesús‑ni nna bedú xibie arlo benneha nna ree bie:

―Tata to, ganna lu aka lelu, gwadaabalu eyoinlu neti.

41Jesús‑ni nna gwatuaba lebie benneha nna tti belhí nábie utane lati benneha nna ree bie:

―Gwaka galá lasia. ¡Nnanna, chinka beyaka!

42Looraha tteba nna betúa yiesuha lati benneha nna beyaka ttebe. 43Nianna bedhelha tteba Jesús‑nie deyye nna bodha'an tsitsie, ree benneha:

44―Biyú gelu. Anuttu nu kixxi'enlu. Sun tteba nna ugía gwatso du arlo bixxudiha nna uche úna nu daa lolu utelu ge Tata Do Yebáha de chi beyarilu. Beni attiba ra lo bia bennabi bodha'an Moisés‑ni. Aníha kini uyú lo ka benne deki chiba betúa isagwe‑na latilu.

45Ttaka benne biyúha nna adíla benie. Tti berie niha deyye nna iyába ka benne utixxi'anie ge nu chi ben Jesús‑ni. De nuha nna birua uka ga'a Jesús‑ni la saa lhe'e ka yiesi se'e niha. Ka ro'esiha‑liba ridúe ata lanú benne se'e. Ata dueliba risina ka benne daa lhe'e iyába ka yiesiha.

Currently Selected:

San Marcos 1: zae

Highlight

Copy