San Juan 19

1Nianna ben Pilato‑ni mandadu bedaxxukana Jesús‑ni ki bekulhakane. 2Ka soldaduha nna benkana ttu corona yetsi nna ulu'ukana nuha ikie lhe begukukane ttu lari xiná chulha, 3nianna tti ribigakana arloe nna rákane:

―¡Xxeni ra lelu xa nu rinnabia ge ka nu Israel!

Nianna ribeakana gi ro'e, 4nianna tti bederia Pilato‑ni attu libe, rana ka nu Israel‑ni:

―Gwaluyúruga. Nena chi kweaya‑ni kini uyú lole deki neti labí raxxakaa bixa tulha benna.

5Tti biria Jesús‑ni nna chi yu'u ikie corona yetsiha lhe chi nukue lari xináha lhe. Nianna ra Pilato‑ni kana:

―Ne nubiyúha du nii.

6Ka nu loni ge ka bixxudiha lhe ka nu rise'e gweyú ro'o yotuha lhe, tti bilákinna Jesús‑ni, nianna tti unnekana idisa rákana:

―¡Betá nuná lo ya kurusi! ¡Betá nuná lo ya kurusi!

Pilato‑ni nna bekabina gekani, rana kana:

―Lebi'iba gwaleche na nna gwalutá na lo ya kurusi, kumu neti labí raxxakaa bixa tulha ben nuní.

7Ka nu Israel‑ni nna bekabikana geni, rákana:

―Ri'itu tee ttu bia bennabi getu ata gwa rugwelhabana deki gattiba nuná kumu de rana ankana Xi'in Tata Do Yebáha.

8Tti biyienini Pilato‑ni nu ra ka nuha, nianna adíla usi chiettiruinna, 9nianna tti bedeta'ana lhe'e guskaduha nna redeana Jesús‑ni:

―¿Gá benne lu?

Jesús‑ni nna labí bekabie geni. 10Nianna rane:

―Neti rinnea nna abígaba rekabilu kia. ¿Si bi gwa yulu deki neti gwa tee lo neda kia odiláya lu o utáya lu lo ya kurusi lhe?

11Jesús‑ni nna bekabie geni ree:

―Labí aka gelu innabialu neti ganna abíba bete Tata Do Yebáha lo neda lenlu kini inná xxeni lelu. Laxkala nu betena neti lasi nálu, adírula tulha xxeni daa nuha tti lu.

12Debá la'ania ruin Pilato‑ni odilána Jesús‑ni, ttaka ka nu Israel‑ni ribesi'abakana, rákana:

―Ganna odilálu nuná, la'ania nna labí gwalí do tse lenlu César benne rinnabia xeniha, kumu iyába ka nu uinkana deki xxenirula ra lekani tti César‑ni, tti uinkana aníha, rigu'uba ni'akani benneha.

13Tti biyienin Pilato‑ni nu ra ka nuha, nianna uleana Jesús‑ni nna lana nna bedona lo xxila ata ridona ruinna elhuxtisiha. Ata ridonaha, len tisa hebreo tee láni Gabata. (“Gabata” dienna innána Ata Yu'u Ka Íyya.) 14La sáha nuha chi rese'e tse ka nu Israel‑ni kini attu sáha nna chi ga'akana laní Pascua. Ttiba retin tsi'inu (12) nuha nna ra Pilato‑ni ka nu Israel‑ni:

―¡Ne nu rinnabia geleha du nii!

15Ttaka lakana nna uresi'alakana, rákana:

―¡Ttu tsa utua nuná! ¡Betá nuná lo ya kurusi!

Pilato‑ni nna bekabina, rana kana:

―¿Si utáya nu rinnabia gele‑ni lo ya kurusi?

Ka nu loni ge ka bixxudiha nna bekabikana geni, rákana:

―Ri'itu lanúru attu nu rinnabia ge ri'itu do, sunruba César‑ni dointu.

16Aníha uka nna bote Pilato‑nie lasi nákani kini utákane lo ya kurusi. Lakana nna dechekana Jesús‑ni.

Jesús‑ni betákane lo ya kurusi

(Mt. 27:32-44; Mr. 15:21-32; Lc. 23:26-43)

17Jesús‑ni nna nuje kurusi geeha birie die ttu latti ata tee láni Gólgota len tisa hebreo. (“Gólgota” dienna innána bega iki nu yatti.) 18Niha betákane lo ya kurusiha. Betágabakana a chupa ka nubiyú lo ka ya kurusi, ttu ttukana utákana daka lhitte, labie nna betákane lagwi ge ka nuha. 19Pilato‑ni benna lo ttu breta betákana lo ya kurusiha daka xaliekie. Lo bretaha dia ra: “Jesús ge Nazaret, nu rinnabia ge ka benne Israel.” 20Ixe ka nu Israel‑ni belabakana nu dia lo bretaha, kumu ata betákana Jesús‑ni lo ya kurusiha gaxxaba re nuha ro'o yiesiha lhe kumu ka letraha ankakana len tisa hebreo lhe latín lhe griegu lhe. 21Laxkala ka nu loni ge ka bixxudi ge ka nu Israel‑ni, rákana Pilato‑ni:

―Bittuba a bedelhalu lo breta‑na: “Nu rinnabia ge ka benne Israel.” A bedelhabalu loni: “Nu rana: Neti ankaa nu rinnabia ge ka benne Israel.”

22Ttaka Pilato‑ni nna rana kana:

―Neti nu chiga benia, benia.

23Iki de chi betá ka soldaduha Jesús‑ni lo ya kurusiha, nianna tti bedaxxukana ka xoeha nna benkana ka nuha ttapa lha'a. Ttu ttu lha'a ka nuha ulha ttu ttu ka soldaduha. Bedaxxugabakana lari nu nukue lo liaha, ttaka kumu labí tiyya nuha, suna ttu lhaaba anka itú nuha, 24de nuha nna ka soldaduha ra luesikani:

―Labí itsúri'i nuní. Suertiba udelhari'i geni, kini nuxari'i eya'an lenri'i lari‑ni.

Aníha uka kini gwado tisa ge nu dia lo ka yetsi ge Tata Do Yebáha ata ra: “Belha'abakana ka xoaha lhe bedelhabakana suerti gekani lhe.” Aníha‑ba ben ka soldaduha.

25Gaxxaba ata taa Jesús‑ni lo ya kurusiha du nan geeha lhe xila nan geeha lhe María nuila ge Cleofas‑ni lhe María Magdalena‑ni lhe. 26Tti bilani Jesús‑ni nan geeha due niha, kwe'e benneha nna dúgaba ttu ka benne rudhetinieha, delába benne rakarunie geeha, nianna tti ree nan geeha:

―Nana, ne xi'inluha du naa.

27Nianna tti redeabie benne rudhetinieha:

―Ne nan gelu du naa.

Debá la'ania nna deche benne rudhetinieha nan ge Jesús‑ni lisieha.

Jesús‑ni uxíbie elhutti lo ya kurusiha

(Mt. 27:45-56; Mr. 15:33-41; Lc. 23:44-49)

28Iki de nuha nna kumu chiba yu Jesús‑ni deki iyába nu chi ga'anna akaha, chiba benie nuha, de nuha nna kini sado tisa ge nu ra lo ka yetsi ge Tata Do Yebáha, nianna ree:

―Rebisia inda.

29Niha du ttu kanti ta'a vinu idí lhe'eni. Bedokana ttu xunu lo ttu iyyaxtila, nianna begi'akana xunuha vinuha nna tti besigakana nuha ro'e. 30Tti chi u'uye vinu idíha, nianna ree:

―Chi uluxa iyá nu chi ga'anna unia.

Nianna tti bodetta ikie nna bechú lebie.

31Kumu chi galá bisia sá tti rese'e tse ka nu Israel‑ni kini attu sáha‑ba nuha chi ga'akana laní Pascua, de nuha nna ka nu loni gekaniha labí raka lekani eya'an ka benne yattiha lo ka ya kurusiha la sá reyaka lekaniha kumu la sáha anka sá laní xxeniru. Aníha uka nna ugíakana unnabakana len Pilato‑ni kini kinkana yaga lhe'e ni'a ka benneha kini ila'a lhe'e ka sitta ni'akeha nna echidakana ke lo ka ya kurusiha. 32Ka soldaduha nna ugíakana ulha'akana lhe'e ka sitta ni'a ttu ka nu taa len Jesús‑ni lo ka ya kurusiha, nianna tti bedeyekikana bedelha'akana lhe'e ka sitta ni'a attu nuha. 33Ttaka tti ubigakana ata taa Jesús‑ni nna bilákinna chiba utti benneha. De nuha nna labíru ulha'akana lhe'e ka ni'eha. 34Ttaka ttu ka soldaduha nna bega'ana iyya tutsa dennaha lhitte, nianna biria tteba reni lhe inda lhe. 35Benne rigixxi'abie nuní anke benne bilánie nu ukaha nna rigixxi'abe nu ankaba gwalí. Benneha yube deki nu gwalíba anka nu rinneeha kini anágaba lebi'i tsia lele ge nu rigixxi'eha. 36Kumu aníha uka ki gwado tisa ge nu ra lo ka yetsi ge Tata Do Yebáha ata dia ra: “Ni ttú sitta lati benneha labí ilha'akana.” 37Rágaba attu lisia lo ka yetsi ge Tata Do Yebáha: “Tse'ebakana ugíakana benne utitikana lhitteha.”

Jesús‑ni bekatsike bie

(Mt. 27:57-61; Mr. 15:42-47; Lc. 23:50-56)

38Iki de nuha nna José benne lhe'esi Arimatea ugíe gwannabe len Pilato‑ni kini ugwelhane elhide Jesús‑ni lo ya kurusiha kini ukatsie benneha. José‑ni uke ttu ka benne bedhetini Jesús‑ni, meskiba labí bele'e looe deki uke ttu ka nu bedhetini benneha kumu de rasinie ge ka nu loni ge ka nu Israel‑ni. Pilato‑ni nna gwa begwelhabana José‑ni kini dechebie benne yattiha. 39Anágaba Nicodemo‑ni, delába benne ugíe ttu lo rela gwanne lenie Jesús‑ni, bisingaba benneha denie ttiba rerua (30) kilu seti nu rure ixixxi. 40Laxkala José‑ni lhe Nicodemo‑ni lhe bottesike Jesús‑ni lhe'e ttu lari nu chi ulu'u taake seti nu rure ixixxiha. Benbake attiba chi labini ka benne Israel‑ni ruinke tti rukatsike ka benne yatti geke. 41Ata betákana Jesús‑ni lo ya kurusiha, niha tee ttu yu yadakinna ka ya xixxi loni. Lhe'e yuha do ttu baa kubi, ttu baa lanú nu chi bigatsi lhe'eni. 42Niha‑ruba bekatsikana Jesús‑ni, kumu de chi ga'a sá tti reyaka le ka benne Israel‑ni lhe kumu yieru baaha‑ruba nuha do gaxxa ata uttieha.

Currently Selected:

San Juan 19: zae

Highlight

Copy